You are here

ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ

ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ

ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ (DEA) ᓄᓇᓕᓐᓂ ᓂᕈᐊᖅᑕᐅᓯᒪᔪᖁᑕᐅᕗᑦ ᓄᓇᓕᒻᒥᐅᑕᐅᔪᑦ ᐱᓕᕆᐊᖃᕈᒪᓲᑦ ᐃᓕᓐᓂᐊᕐᓂᓕᕆᓂᕐᒥᒃ. ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐃᑲᓇᐃᔭᖃᑎᖃᓲᑦ ᐃᓕᓐᓂᐊᕐᕕᒻᒥ ᐃᖅᑲᓇᐃᔭᖅᑎᖏᓐᓂᑦ ᐊᒻᒪᓗ ᐊᕕᑦᑐᖅᓯᒪᔪᓂᑦ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑕ ᐃᖅᑲᓇᐃᔭᖅᑎᖏᓐᓂᑦ. ᑕᒪᐃᓐᓂᑦ, ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ ᐊᕕᑦᑐᖅᓯᒪᔪᓂᑦ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ ᐱᔨᑦᑎᕋᓲᑦ ᐊᒥᓱᓂᑦ ᐱᓕᕆᐊᖃᐅᕈᓘᔮᖅᑐᑎᑦ ᐃᓕᓐᓂᐊᕐᕖᑦ ᑲᑎᒪᔨᖏᓐᓄᑦ ᑲᒪᒋᓲᖏᓐᓂᑦ ᐊᒻᒪᓗ ᑲᒪᒋᔭᓖᑦ ᐃᓕᓐᓂᐊᕐᕖᑦ ᐊᐅᓚᑕᐅᓂᖏᓐᓄᑦ ᓄᓇᕗᒥ. ᓄᓇᕘᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑕ ᑭᒡᒐᖅᑐᐃᔨᖏᑦ (CNDEA) ᐃᑲᔪᑐᐃᔨᐅᓪᓗᓂ ᑲᑐᔾᔨᖃᑎᒌᖑᔪᖅ ᑕᒪᐃᓐᓂ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ.)

 

ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᑲᒪᒋᔭᓖᑦ ᐱᒻᒪᕆᐅᔪᓂᑦ ᐃᓱᒪᓕᐅᕈᑎᖃᓲᖑᓪᓗᑎᑦ ᖃᓄᖅ ᐃᓕᓐᓂᐊᖅᑎᑦᑎᔪᖃᕐᓂᐊᕐᒪᖔᖅ ᓄᓇᓕᐅᔪᒥᒃ. ᐱᖃᓯᐅᔾᔨᔪᑦ ᐅᑯᓂᖓ:

  • ᓂᕈᐊᓲᖑᓪᓗᑎᑦ ᐅᖃᐅᓯᕐᒥᒃ ᐊᑐᖅᑕᐅᓂᐊᖅᑐᒥᒃ ᐃᓕᓐᓂᐊᑎᑦᑎᔪᖃᖅᑎᓪᓗᒍ ᐃᓕᓐᓂᐊᕐᕕᒻᒥ

  • ᐋᖅᑮᓪᓗᑎᑦ ᐃᓕᓐᓂᐊᕐᕕᒻᒥ ᐊᑐᖅᑕᐅᖃᑦᑕᓂᐊᖅᑐᑦ ᐋᖅᑭᒃᓯᒪᔪᓂᑦ

  • ᐊᖅᑮᓗᑎᑦ ᐊᑎᓕᐅᕆᓂᕐᒧᑦ ᐃᓕᓐᓂᐊᕐᓂᐊᖅᑐᓂᑦ ᐊᒻᒪᓗ ᐃᓕᓐᓂᐊᕆᐊᖃᑦᑕᓂᕐᒧᑦ ᐊᑐᐊᒐᖏᓐᓂᑦ

  • ᐋᖅᑮᓗᑎᑦ ᐃᓅᖃᑎᒌᑦᓯᐊᓂᕐᒥᒃ ᐊᑐᐊᒐᕐᒥᒃ

  • ᐃᓕᓐᓂᐊᙱᑲᐃᓐᓇᖅᑎᑕᐅᔭᕆᐊᓕᖕᓂᑦ ᐃᓕᓐᓂᐊᕈᓐᓃᖅᑎᑕᐅᔭᕆᐊᓕᓐᓂᓗ ᑐᓂᓯᖃᑦᑕᕐᓗᑎᑦ ᐃᓱᒪᓕᐅᕐᓂᖏᑎᒍᑦ

  • ᐃᖅᑲᓇᐃᔭᖃᑎᖃᖅᑐᑎᑦ ᐊᕕᑦᑐᖅᓯᒪᔪᓂᑦ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᓐᓂᑦ ᐃᖅᑲᓇᐃᔭᖅᑎᑖᖁᓪᓗᒋᑦ ᐃᓕᓐᓂᐊᕐᕕᒻᒧᑦ (ᐱᖃᓯᐅᔾᔨᔪᑦ ᐃᓕᓴᐃᔨᓂᑦ ᐊᒻᒪᓗ ᐃᓕᓴᕕᑉ ᐊᖓᔪᖅᑳᖓᓂ)

  • ᐃᓕᓐᓂᐊᓕᓵᖅᑐᓕᕆᓂᕐᒥᒃ ᐊᐅᓚᑦᑎᓗᑎᑦ ᐃᓄᐃᑦ ᐅᖃᐅᓯᓂᒃ ᐃᓕᖅᑯᓯᖓᓂᓪᓗ ᐊᑐᕆᐊᕐᔫᒥᑎᑦᑎᓇᓱᐊᓲᕐᓂᑦ

 

ᐊᔾᔨᒌᙱᑦᑐᑦ ᐃᖅᑲᓇᐃᔮᒃᓴᑦ/ᐃᖅᑲᓇᐃᔮᑦ ᖃᓄᐃᓕᖓᓂᖏᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐅᑯᐊᖑᕗᑦ:

  • ᐊᑐᓂᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐱᖓᓲᔪᖅᑐᑦ ᐊᑕᐅᓯᕐᒥᓗ ᐃᓚᒋᔭᐅᔪᖃᖃᑦᑕᑐᒃᓴᐅᕗᑦ;

  • ᐊᑐᓂᑦ ᐃᓚᒋᔭᐅᔪᖅ ᓂᕈᐊᖅᑕᐅᓯᒪᓲᖅ ᐱᖓᓱᓄᑦ ᐊᕐᕌᒍᓄᑦ ᐊᑯᓂᐅᑎᒋᔪᖅ;

  • ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦᑕ ᐊᑯᓂᐅᓂᖏᑦ ᐊᑕᐅᑦᑎᒃᑰᖓᔪᒡᒍᑕᐅᓂᐊᙱᑦᑐᑦ ᐃᓚᒋᔭᐅᔪᑦ ᓄᖅᑲᕐᓂᕈᑎᑦ ᐃᓱᓕᑦᑎᑐᐃᓐᓇᐅᓂᐊᙱᒻᒪᑕ ᐊᑯᓂᐅᓂᖏᑦ ᑲᑎᒪᔨᐅᓗᑎᑦ;

  • ᐊᑐᓂᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᑕᐅᓯᕐᒥᒃ ᐃᒃᓯᕙᐅᑕᖃᖃᑦᑕᕆᐊᓖᑦ ᐊᒻᒪᓗ ᐊᑕᐅᓯᕐᒥᒃ ᐃᒃᓯᕙᐅᑕᑉ ᑐᖏᓕᐊᓂᑦ ᐱᑕᖃᕐᒥᓗᓂ;

  • ᐊᑐᓂᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᑲᑎᒪᔨᕋᓛᖃᕆᐊᓖᑦ ᐃᖅᑲᓇᐃᔭᖅᑐᓕᕆᓂᕐᒧᑦ, ᑮᓇᐅᔭᓕᕆᓂᕐᒧᑦ, ᐃᓅᖃᑎᒌᑦᓯᐊᓂᕐᒧᑦ (ᐃᓂᖅᑎᕆᔾᔪᓯᖅ ᐊᑐᐊᒐᖅ) ᐊᒻᒪᓗ ᐃᓕᓐᓂᐊᕐᕕᒻᒧᑦ ᐅᐸᖃᑦᑕᕐᓂᖅ; ᐊᒻᒪᓗ

  • ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᑕᖅᑭᑕᒫᑦ ᑲᑎᒪᖃᑦᑕᑐᒃᓴᐅᔪᑦ.

 

ᖃᐅᔨᒋᐊᕐᕕᒋᓗᒍ ᐃᓕᓴᕕᒻᒥ ᐊᖓᔪᖅᑳᖅ ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑕ ᒥᒃᓵᓄᑦ. ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᓇᒻᒥᓂᖅ ᐃᑭᐊᖅᑭᕕᖃᐅᙱᑦᑐᑦ, ᑭᓯᐊᓂᓕ ᐅᖄᓚᐅᑎᒃᑯᑎᒍᑦ ᖃᐅᔨᒃᑲᕈᓐᓇᑕᐃᓐᓇᑎᑦ.

 

ᐃᑲᔫᑎᒃᓴᑲᓐᓃᑦ

ᐃᓕᓐᓂᐊᕐᓂᓕᕆᔨᒃᑯᑦ ᐃᑭᐊᖅᑭᕕᖓ

ᓄᓇᕘᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑕ ᑭᒡᒐᖅᑐᐃᔨᖏᑦ (CNDEA)

 

ᖃᐅᔨᒋᐊᕐᕕᒃ

ᓄᑖᖑᓛᑦ ᖃᐅᔨᒋᐊᕐᕕᒃᓴᑦ ᑐᑭᓯᒋᐊᕈᑎᖏᑦ ᑕᒪᐃᓐᓄᑦ ᓄᓇᕘᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ

ᐃᖃᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ (IDEA)

 

ᖃᐅᔨᒪᒋᐊᕈᑎ: ᐊᔾᔨᙳᐊᖅ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᓂᖏᑦ ᐃᖃᓗᓐᓂ. ᐊᔾᔨᓕᐅᖅᓯᔪᒥᓂᖅ ᐳᕆᓐᔅ ᐅᐊᑦᕗᑦ ᐊᐃᓚᓐ ᓯᓚᑦᑐᓴᕐᕕᕐᔪᐊᖓ (UPEI), ᓯᑏᕝᕙ 4, 2013.