You are here

ᐃᒃᐱᐊᕐᔪᒃ

ᐃᒃᐱᐊᕐᔪᒃ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐃᒃᐱᐊᕐᔪᒃ ᐅᐊᖕᓇᖓᓃᑦᑐᖅ ᕿᑭᖅᑖᓗᖕᒥ. ᐃᓄᖃᐅᖅᑐᒡᒍᑕᓂ ᓄᓇᓕᖕᓂ ᓄᓇᕗᒥ, ᖃᐅᓱᐃᑦᑐᑐᐊᖅ ᐊᒻᒪᓗ ᐊᐅᓱᐃᑦᑐᖅ ᐅᐊᖕᓇᖓᓃᓐᓂᖅᓴᑑᕘᒃ ᓄᓇᓖᒃ. ᓄᓇᕗᑦ ᒐᕙᒪᒃᓴᖓᓄᑦ ᐸᕐᓇᐃᔩᑦ ᓄᓇᙳᐊᓕᐅᕐᒪᑕ ᓄᓇᕗᒥ ᓄᓇᕗᑦ ᓄᓇᑖᕈᑕᐅᓂᖓᓄᑦ ᐊᖏᕈᑎᒥ, ᑎᑎᖅᓯᓚᐅᖅᓯᒪᔪᑦ ᐃᓄᒃᑎᑐᑦ ᐃᒃᐱᐊᕐᔪᑉ ᑐᓄᓂᕈᓯᐅᓂᕋᖅᑕᐅᓪᓗᓂ. ᑭᓯᐊᓂᓕ ᓄᓇᓕᒻᒥᐅᓄᑦ ᑕᐃᔭᐅᓲᖅ ᐃᒃᐱᐊᕐᔫᓂᕋᖅᑕᐅᓪᓗᓂ ᑐᑭᖃᖅᑐᖅ “ᐃᒃᐱᐊᕐᔫᔮᕋᒥ”, ᓄᓇᓕᐅᔪᖅ ᐃᒃᐱᐊᕐᔪᖕᒦᒻᒪᑦ, ᖃᖅᑲᑲᐅᖅᑐᓂ. ᑕᒪᓐᓇ ᐃᓄᖃᖃᑦᑕᕐᓂᑰᕗᖅ ᐊᑐᖅᑕᐅᖃᑦᑕᖅᑐᒥᓂᐅᑎᓪᓗᒍ ᐅᐊᑦᑎᐊᕈᐊᓗᒃ, ᑭᓯᐊᓂᓕ ᓯᒃᑳᑦᑎᐅᔪᖅ ᐊᕐᕕᓂᐊᖅᑎ ᖃᓪᓗᓈᕐᒥᒃ ᐊᑦᑎᓚᐅᖅᓯᒪᒻᒥᔭᖓ 1872−ᖑᑎᓪᓗᒍ. ᖃᓪᓗᓈᑦ ᑕᒪᐅᙵᖃᑦᑕᕐᓂᑰᓯᒪᔪᑦ ᐊᕐᕌᒍᓂᑦ ᐊᔾᔨᒌᙱᑦᑐᓂᑦ ᐱᔾᔪᑎᖃᐅᕈᓘᔭᖅᑐᑎᑦ, ᐃᑦᑕᕐᓂᓴᓂᑦ ᕿᒪᐃᖃᑦᑕᕐᓂᑰᓪᓗᑎᑦ: ᑲᐱᑕᐃ ᔫᓯᐱ ᕗᕐᓂᐅᕐ ᑎᑭᓚᐅᖅᓯᒪᔪᖅ 1911-ᖑᑎᓪᓗᒍ ᑲᓇᑕᑉ ᓄᓇᖓ ᐊᑐᖅᑕᐅᖃᑦᑕᕐᓂᖓᓄᑦ ᐊᐅᓪᓚᖅᓯᒪᓪᓗᓂ, ᕼᐊᑦᓴᓐᔅ ᕙᐃ ᓂᐅᕕᕐᕕᖓ ᒪᑐᐃᓚᐅᖅᓯᒪᔪᖅ 1926-ᖑᑎᓪᓗᒍ ᐊᕐᕌᒍᒧᑦ ᐊᒻᒪᓗ ᒪᑐᐃᒃᑲᓂᖅᑐᓂ 1933−ᒥ. ᐊᔪᕆᖅᓱᐃᔨ ᑑᓄᕐ ᐋᓐᓕᑲᓐ ᑐᒃᓯᐊᕐᕕᖓᓂ ᓴᓇᓚᐅᖅᓯᒪᔪᖅ ᒪᐸᑦ ᑲᖏᖅᑐᒥ 1937−ᖑᑎᓪᓗᒍ, ᐊᒻᒪᓗ ᑲᓇᑕᒥ−ᒥᐊᓕᒐᑦ ᓯᓚᓐᓂᐊᕐᕕᖓ ᓴᓇᔭᐅᓚᐅᖅᓯᒪᔪᖅ 1941-ᖑᑎᓪᓗᒍ ᐊᐅᓚᓂᖃᓚᐅᖅᓯᒪᓪᓗᓂ ᐊᕙᑎᓄᑦ ᐊᕐᕌᒍᓄᑦ ᐊᒻᒪᓗ ᒫᓐᓇ ᓱᓕ ᒪᑭᑕᕗᖅ. ᓯᕗᓪᓕᖅᐹᖅ ᐃᓕᓐᓂᐊᕐᕕᒃ ᓴᓇᔭᐅᓚᐅᖅᓯᒪᔪᖅ 1959-ᖑᑎᓪᓗᒍ ᐊᒻᒪᓗ 1960−ᖏᓐᓂ ᑲᓇᑕᒥ ᒐᕙᒪᒃᑯᑦ ᓴᓇᓚᐅᖅᓯᒪᔪᑦ ᐋᓐᓂᐊᕐᕕᒻᒥ ᐊᒻᒪᓗ ᐃᓄᐃᑦ ᑭᒃᑯᑐᐃᓐᓇᐃᑦ ᐃᒡᓗᒃᓴᖏᓐᓂᑦ, ᐊᒻᒪᓗ ᓱᒃᑯᐊᕿᑎᑦᑎᖃᑦᑕᓕᖅᑐᑎᑦ ᐃᓄᖕᓄᑦ ᓄᓇᓕᕋᓛᓃᙶᖅᑐᓂᑦ ᐊᒻᒪᓗ ᑕᒪᐅᖓ ᓄᓇᑖᕆᐊᖅᑐᖅᓯᒪᔪᓂᑦ. ᑭᖑᓪᓕᖅᐹᕐᒥᒃ ᓄᓇᓕᕋᓛᑦ ᖃᑕᙳᑎᒌᑦ ᑕᒪᐅᙵᓚᐅᖅᓯᒪᔪᑦ ᓄᓇᓕᒨᖅᑐᑎᑦ 1970−ᖏᓐᓂ, ᐊᒻᒪᓗ ᐃᒃᐱᐊᕐᔪᒃ ᕼᐊᒻᓚᙳᖅᑐᓂ 1976−ᖑᑎᓪᓗᒍ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ. ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ. http://www.gov.nu.ca/

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐃᒃᐱᐊᕐᔪᒃ ᓄᓇᓕᐅᕗᖅ ᐱᖅᑯᓯᑐᖃᖅᑎᒍᑦ ᐃᓄᐃᑦ ᓱᓕ ᐃᓅᓯᖃᓲᑦ ᐱᕐᔪᐊᖑᓪᓗᑎᑦ ᓄᓇᓕᑉ ᐃᓅᓯᖓᓄᑦ. ᓄᓇᓕᓐᓂ ᖃᓄᐃᓕᐅᕈᑕᐅᓲᑦ, ᓲᕐᓗᒃ ᐸᖓᒡᒍᔾᔨᓂᖅ ᓄᓇᕗᒥ ᕿᒧᒃᓯᕐᓂᑭᓴᐅᑎᓲᑦ, ᐊᑐᖅᑕᐅᓲᖑᒻᒥᔪᑦ ᐸᐸᑕᐅᓪᓗᑎᑦ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓕᖅᑯᓯᖏᑦ. ᕼᐊᒻᓚᒃᑯᑦ ᐊᐅᓚᑦᑎᓲᑦ ᕿᒪᑐᓕᒡᕕᒃ ᐱᖅᑯᓯᓕᕆᔨᒃᑯᑦ ᑲᑐᔾᔨᖃᑎᒌᖏᑕ ᓂᐅᕕᕐᕕᕋᓛᖓᓂ ᑐᑭᓯᒋᐊᕐᕕᖓᓂᓗ ᐊᒻᒪᓗ ᐃᓕᓐᓂᐊᕐᕕᐅᕙᒻᒥᔪᖅ ᓄᓇᓕᓐᓂ ᐊᑐᖅᑕᐅᖃᑦᑕᑐᒥᓂᐅᔪᓂᑦ ᐃᓕᖅᑯᓯᖓᓂᓗ. ᓴᓇᙳᐊᒐᕐᓂᑦ ᓂᐅᕕᕐᕕᕋᓛᖃᖅᑐᓂ.

 

ᒪᕐᕉᕘᒃ ᑐᒃᓯᐊᕐᕖᒃ ᐃᒃᐱᐊᕐᔪᖕᒥ: ᐋᓐᓕᑲᓐ ᐊᒻᒪᓗ ᓂᖅᑯᐃᔨᒃᑯᑦ, ᑕᒪᒃᑮᒃ ᓈᑦᑏᖑᔭᕐᕕᒻᒥ ᐅᓪᓛᖓᓂ ᑐᒃᓯᐊᑎᑦᑎᓲᒃ. ᐅᓐᓄᒃᑯᑦ ᑐᒃᓯᐊᕆᐊᖅᑐᖃᕈᓐᓇᓲᖑᒻᒥᔪᖅ. ᐃᓄᒃᑎᑐᑦ ᑐᒃᓯᐊᓲᑦ, ᑭᓯᐊᓂᓕ ᖃᓪᓗᓈᑎᑑᖅᑐᖃᕈᓐᓇᖅᑐᓂ ᑐᓵᔨᖃᕈᓐᓇᖅᑐᑎᓪᓗ ᑐᒃᓯᐊᕆᐊᖅᓯᒪᑎᓪᓗᒋᑦ, ᑐᒃᓯᐊᕐᕖᑦ ᐱᓇᓱᐊᑦᑎᐊᓲᖑᒻᒪᑕ ᑐᑭᓯᓗᑎᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᓄᑦ.

 

ᐃᓄᒃᑎᑑᖅᑐᒻᒪᕆᐅᕗᑦ ᐃᒃᐱᐊᕐᔪᖕᒥ: ᓄᓇᓕᒻᒥ ᐃᓄᒃᑎᑑᖅᑐᓂᑦ ᑐᓵᖃᑦᑕᓂᐊᖅᑐᑎᑦ ᐊᒻᒪᓗ ᐊᑐᖅᑕᐅᓗᓂ ᖃᐅᑕᒫᑦ ᐃᓅᖏᓯᓐᓂ. 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ, 96%−ᖑᔪᑦ ᐃᓄᖏᑦ ᐃᓄᒃᑎᑐᑦ ᐅᖃᐅᓯᕆᔭᐅᖅᑳᕐᓂᕋᖅᓯᒪᕗᑦ, ᐊᒻᒪᓗ 4%−ᑐᐃᓐᓇᑯᓗᐃᑦ ᖃᓪᓗᓈᑎᑐᑦ ᐅᖃᐅᓯᖃᖅᑳᖅᓯᒪᓂᕋᖅᑐᑎᑦ. ᐊᕝᕙᖏᑕ ᐊᕝᕙᑲᓐᓂᖏᑦ ᐃᒃᐱᐊᕐᔪᖕᒥᐅᑦ ᖃᓪᓗᓇᐅᔭᓲᑦ ᐊᒻᒪᓗ ᖃᑦᑏᓐᓇᓗᐃᑦ ᐅᖃᓪᓚᒍᓐᓇᖅᑐᑦ ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ, ᑭᓯᐊᓂᓕ 23% ᐃᓄᒃᑎᑑᑐᐊᖅ ᐅᖃᓪᓚᓲᑦ. ᐃᓄᒃᑎᑐᑦ ᐅᖃᐅᓯᖓ ᐊᑐᖅᑕᐅᓲᖅ 92%−ᖑᔪᑦ ᐊᖏᕐᕋᒥ ᐅᖃᐅᓯᕆᔭᐅᖅᑳᖅᑐᓂ ᐊᑐᖅᑕᐅᓲᖒᓂᖓᓂᒃ, ᐊᒻᒪᓗ 3%−ᖑᔪᑦ ᖃᓪᓗᓇᐅᔭᓲᑦ ᐊᖏᕐᕋᒥᓂᒃ ᐃᓄᒃᑎᑑᓲᖑᓂᕋᖅᑐᑦ ᐊᖏᕐᕋᒥ. ᐃᓄᐃᑦ ᑲᑎᒐᐃᒻᒪᑕ ᑭᒃᑯᑐᐃᓐᓇᐃᑦ ᐊᒻᒪᓗ ᑲᑎᒪᔪᖃᕋᐃᒻᒪᑦ ᑕᒪᒃᑮᓐᓂᒃ ᐅᖃᐅᓰᖕᓂᒃ ᐊᑐᖅᑐᓂᑦ ᓂᕆᐅᒍᓐᓇᖅᑐᑎᑦ, ᑭᓯᐊᓂᓕ ᓂᕆᐅᑦᑐᒃᓴᐅᓂᐊᙱᑦᑐᑎᑦ ᐃᓄᒃᑎᑑᖅᑐᑦ ᖃᓪᓗᓇᐅᔭᓕᖅᑎᑕᐅᑲᐅᑎᒋᓂᐊᕐᓂᖏᓐᓂᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᖑᔪᖅᑕᖃᕈᓗᒻᒪᑦ. ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ. ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

 

ᐃᒃᐱᐊᕐᔪᒃ ᒪᒃᑯᑐᒡᒍᑕᒻᒪᕆᐅᕗᑦ ᐃᓄᖏᑦ. 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᖅᑕᐅᓯᒪᔪᑦ, ᐅᑭᐅᖃᓗᐊᓲᑦ 22.5−ᓂᑦ. 145−ᖑᓚᐅᖅᑐᑦ ᐃᓕᓐᓂᐊᕆᐊᓕᓵᓲᑦ ᓱᕈᓯᓛᑦ ᐊᒻᒪᓗ 190 ᐃᓕᓐᓂᐊᕆᐊᓲᑦ ᓱᕈᓰᑦ, 40%−ᖑᓪᓗᑎᑦ ᐃᓄᖏᑦ ᐅᑭᐅᓖᑦ 18−ᓂ ᑐᖔᓂ. 5%−ᑐᐃᓐᓇᑯᓗᐃᑦ ᐊᒥᓲᓂᖏᑦ ᐃᓄᐃᑦ ᐅᑭᐅᓖᑦ 65-ᓂᑦ ᐅᖓᑖᓄᓪᓗ, ᐊᒻᒪᓗ ᐱᖅᑯᓯᑐᖃᖅᑎᒍᑦ ᖃᖃᐅᔨᒪᓂᖏᑦ ᐃᓐᓇᑐᖃᐃᑦ ᐱᕐᔪᐊᖑᑎᑕᐅᓲᑦ. 

ᑮᓇᐅᔾᔭᒃᓴᕈᑕᐅᔪᑦ: 

ᐃᒃᐱᐊᕐᔪᒃ ᐱᖅᑯᓯᑐᖃᖅᑎᒍᑦ ᐃᓕᖅᑯᓯᖃᖅᑐᒻᒪᕆᐅᕗᖅ ᓄᓇᓕᖓ ᑮᓇᐅᔭᓕᐅᕈᑎᖃᕋᓱᐊᓗᐊᓲᖑᓪᓗᑎᑦ ᓂᐅᕕᐊᒃᓴᖃᕐᓂᒃᑯᑦ ᐱᔨᑦᑎᕋᕐᓂᑯᓪᓗ ᓄᓇᓕᒻᒥᐅᓄᑦ. ᐊᒥᓱᑦ ᐃᓄᐃᑦ ᐊᖑᓇᓱᒋᐊᓲᑦ ᓂᕿᑖᕋᓱᐊᖅᑐᑎᑦ. ᐊᒥᓲᕗᑦ ᓴᓇᙳᐊᕈᓐᓇᖅᑐᑦ, ᒥᖅᑯᑲᒻᒪᕆᐅᓪᓗᑎᓪᓗ ᐊᓐᓄᕌᓕᐅᓲᑦ ᐅᑭᐅᖅᓯᐅᑎᓂᑦ. ᐃᒃᐱᐊᕐᔪᒃ ᒐᕙᒪᒃᑯᓐᓄᑦ ᐊᓪᓚᕝᕕᖃᕐᕕᐅᙱᒃᑲᓗᐊᖅᑎᓪᓗᒍ ᑮᓇᐅᔭᓕᐅᕈᑎᒋᔭᐅᓲᖑᓪᓗᑎᑦ ᐊᒥᓱᓄᑦ ᓄᓇᕗᒥ ᓄᓇᓕᐅᔪᓄᑦ, ᐱᓇᓱᐊᕐᓂᖅᓴᐅᔪᑦ ᕼᐊᒻᓚᒃᑯᑦ ᐳᓚᕋᖅᑐᓕᕆᔪᓐᓇᕐᓂᖓᓂᒃ, ᐊᒥᓲᓂᖏᓐᓂᒃ ᓂᕐᔪᑎᖏᑦ ᐊᒻᒪᓗ ᑲᔾᔮᓇᖅᑐᒻᒪᕆᐅᓂᖓ ᐱᓪᓗᒍ.

 

ᐊᒥᓱᓂᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᐃᒃᐱᐊᕐᔪᒃ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ. ᓄᐊᑐᓐ ᓂᐅᕕᕐᕕᒃ “ᑮᓇᐅᔭᓕᕆᔪᓐᓇᕐᒥᔫᒐᓗᐊᑦ”, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖃᕐᕕᒋᒍᓐᓇᖅᑐᒋᑦ ᓂᐅᕕᕐᕕᒃᑯᑦ, ᓯᒃᑮᕐᕕᒃᓴᐅᓪᓗᑎᑦ, ᐊᓯᖏᓪᓗ. ᐊᐅᒃᑕᔫᓅᖅᑐᑦ ᑮᓇᐅᔭᖅᑎᒍᑦ ᐊᑭᓕᐅᑎᐅᕙᑦᑐᑦ ᐊᑭᓕᒃᓴᓂᒍᓐᓇᐅᑏᓪᓗ ᓂᐅᕕᕐᕕᓂ ᐊᑐᕋᒃᓴᐅᓲᑦ. ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ. ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᑕᕆᐅᕐᒥᐅᑕᐃᑦ ᐳᐃᔩᑦ ᑕᑯᔭᐅᔪᓐᓇᓲᑦ ᐃᒃᐱᐊᕐᔪᑉ ᖃᓂᒋᔭᖓᓂ ᓲᕐᓗᒃ ᐊᕐᕖᑦ, ᑑᒑᓖᑦ, ᓇᑦᑏᑦ ᐊᒻᒪᓗ ᐃᓛᓐᓂᒃᑯᑦ, ᓇᓄᐃᑦ. ᐱᓱᒃᑏᑦ ᐅᑯᐊᖑᓪᓗᑎᑦ ᐅᑲᓖᑦ, ᑎᕆᒐᓂᐊᑦ, ᐊᕕᙵᑦ ᐊᒻᒪᓗ ᓯᒃᓰᑦ. ᐊᒥᓱᒻᒪᕇᑦ ᑎᖕᒥᐊᑦ ᖁᑦᑎᒃᑐᒨᓲᑦ, ᓲᕐᓗᒃ ᐊᒃᐸᑦ, ᓂᕐᓖᑦ, ᑎᕋᑎᕋᑦ, ᓇᐅᔭᑦ ᐊᒻᒪᓗ ᖃᖁᓪᓗᐃᑦ, ᐃᕙᕙᑦᑐᑦ ᖃᓂᒋᔭᖓᓂ ᐊᐅᔭᒃᑯᑦ. ᐃᓚᖓᑦ ᑎᖕᒥᐊᓂᑦ ᑕᐅᑐᓲᖅ ᓴᖅᑭᑎᑦᑎᓯᒪᕗᖅ ᑎᖕᒥᐊᑦ ᐊᔾᔨᓕᐅᖅᓯᒪᔭᖏᓐᓂᑦ ᖃᕋᓴᐅᔭᒃᑯᑦ (http://kiggavik.typepad.com/the_birds_of_arctic_bay_n/)

ᐅᖃᓕᒫᑲᓐᓂᕐᓃᑦ : 
  • Bennett, John & Susan Rowley, eds. Uqalurait: an oral history of Nunavut. Montreal & Kingston: McGill-Queen’s University Press, 2004.
  • Hinds, Margery. High Arctic Venture. Toronto: Ryerson Press, 1968.
  • Issenman, Betty Kobayashi. Sinews of Survival: the living legacy of Inuit clothing. Vancouver: UBC Press, 1997.
  • MacDonald, John. The Arctic sky: Inuit astronomy, star lore and legend. Iqaluit & Toronto: Nunavut Research Institute and Royal Ontario Museum, 1998.
  • McGhee, Robert. The last imaginary place: a human history of the Arctic world. Toronto: Key Porter Books, Canadian Museum of Civilization, 2004.
  • Morrison, David and Georges-Hébert Germain. Inuit: glimpses of an Arctic past. Hull: Canadian Museum of Civilization, 1995.
  • Pauktuutit Inuit Women of Canada. The Inuit way: a guide to Inuit culture, rev. ed. Ottawa: Pauktuutit Inuit Women of Canada, 2006. (also available electronically on the GN Orientation website) http://www.orientation.hr.gov.nu.ca/i18n/english/pdf/The%20Inuit%20Way.pdf
  • Rholem, Karim: Uvattinnit: the people of the far north. Montreal: Stanké International, 2001.
  • Rowley, Graham W.: Cold comfort: my love affair with the Arctic. Montreal & Kingston: McGill-Queen’s University Press, 1996.