You are here

ᐃᒡᓗᓕᒃ

ᐃᒡᓗᓕᒃ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᑕᐃᒪᙵᓂᑦ ᐊᒥᓲᖃᑦᑕᕐᓂᑰᕗᑦ ᓂᕐᔪᑎᖏᑦ, ᑕᒫᓂ ᐊᒻᒪᓗ ᖃᓂᒋᔭᖓᓂᒃ ᐃᒡᓗᓕᒃ ᐊᒥᓱᓂᑦ ᐃᑦᑕᕐᓂᓴᖃᐅᖅᑐᖅ ᓄᓇ ᐊᑐᖅᑕᐅᖃᑦᑕᖅᑐᑐᖃᐅᓂᖓᓂᒃ 4000 ᐊᕐᕌᒎᓕᖅᑐᓂᑦ. ᐃᒡᓗᓕᒃ ᑐᑭᖃᖅᑐᖅ “ᐃᒡᓗᖃᐅᕐᓂᖓᓂᒃ” ᐃᓄᒃᑎᑐᑦ. ᕕᓕᐊᒻ ᐱᐅᕆ ᑎᑎᕋᖅᑐᒥᓂᐅᓯᒪᕗᖅ ᓯᕗᓪᓕᖅᐹᕐᒥᒃ ᖃᓪᓗᓈᑦ ᖃᐅᔨᔪᒥᓂᐅᑎᓪᓗᒋᑦ ᑕᒫᓂᕐᒥᐅᑕᓂᑦ ᐃᓄᖕᓂᑦ, ᑕᐃᔭᐅᔪᑦ ᐃᒡᓗᓕᖕᒥᐅᓂᑦ, 1822ᔾᖑᑎᓪᓗᒍ, ᐅᑮᔪᒥᓂᐅᑎᓪᓗᒍ ᓇᓂᓯᓇᓱᐊᖅᑐᓂ ᐅᑭᐅᖅᑕᖅᑕᑉ ᑕᕆᐅᖓᓂ ᐃᑳᕐᕕᒻᒥᒃ. ᑦᓵᕈᓪᔅ ᕗᕌᓐᓯᔅ ᕼᐊᓪ ᐊᐅᓪᓚᖅᑐᒥᓂᐅᕗᖅ 1965-ᖑᑎᓪᓗᒍ ᐊᒻᒪᓗ 1868-ᒥ ᖃᐅᔨᓴᖅᑐᒥᓂᐅᑎᓪᓗᒍ ᓇᓂᓯᒍᒪᓪᓗᓂ ᑕᒫᓃᑦᑐᒥᓂᐅᓂᖓᓂᒃ ᓇᓗᓇᐃᒃᑯᑕᓂᒃ ᐅᕝᕙᓘᓐᓃᑦ ᕿᒪᒃᑲᑯᖏᓐᓂᒃ ᕗᕌᓐᑭᓕᓐ ᖃᐅᔨᓴᖅᑐᒥᓂᐅᑎᓪᓗᒋᑦ. ᐅᔭᕋᓐᓂᐊᕋᒃᓴᓂᒃ ᕿᓂᖅᑎᐅᔪᖅ, ᐊᓪᕗᕆᑦ ᑐᕆᐊᒻᕙᓚᐃ, ᑭᖑᓂᐊᒍᑦ ᑕᒪᐅᙵᖅᑐᒥᓂᐅᕗᖅ 1913-ᒥ, ᐊᒻᒪᓗ ᑕᐃᓂᔅ ᖃᐅᔨᓴᖅᑎᐅᔪᖅ ᑲᓇᑦ ᕋᔅᒪᓴᓐ 1921-ᒥ ᑕᒪᐅᙵᖅᑐᒥᓂᐅᓪᓗᓂ. ᐃᒃᓯᕋᕐᔪᐊᒃᑯᑦ ᑕᒪᐅᙵᓚᐅᖅᓯᒪᔪᑦ ᐃᒡᓗᓕᐅᓕᖅᑐᒧᑦ ᑐᒃᓯᐊᕐᕕᓕᐅᖅᑐᑎᑦ 1930−ᖏᓐᓂ, ᕼᐊᑦᓴᓐᔅ ᕙᐃ ᑲᒻᐸᓂᒃᑯᑦ ᓂᐅᕕᕐᕕᓕᐅᓚᐅᖅᓯᒪᔪᑦ ᓄᓇᓕᐅᔪᒥ ᑭᖑᓂᑦᑎᐊᖓᒍᑦ. ᑕᐃᒪᐃᒻᒥᒻᒪᑕ ᐊᒥᓱᓂᑦ ᓄᓇᓕᐅᔪᓂ ᓄᓇᕗᒥ, 1950 ᐃᓱᓕᑦᑎᓕᖅᑎᓪᓗᒋᑦ ᐊᒻᒪᓗ 1960−ᐅᔪᑦ ᐱᒋᐊᓕᖅᑎᓪᓗᒋᑦ ᑲᓇᑕᒥ ᒐᕙᒪᒃᑯᑦ ᐃᓚᐅᖃᑕᐅᓂᖅᓴᐅᓕᓚᐅᖅᓯᒪᔪᑦ ᐋᓐᓂᐊᕕᓕᐅᖅᑐᑎᑦ, ᐃᓕᓐᓂᐊᕐᕕᓕᐅᖅᑐᑎᑦ, ᐊᒻᒪᓗ ᐳᑭᖅᑕᓕᒃᑯᑦ ᐊᓪᓚᕝᕕᐊᓂ ᓴᓇᓪᓗᑎᑦ. ᐊᓐᓕᑲᓐ ᑐᒃᓯᐊᕐᕕᓕᐅᓕᓚᐅᖅᓯᒪᔪᑦ 1959−ᖑᑎᓪᓗᒍ. ᐃᒡᓗᓕᒃ ᑯᐊᐸᒃᑯᓐᓂᑦ ᐊᔪᕆᒋᐊᓯᓚᐅᖅᓯᒪᔪᖅ ᐃᒡᓗᓕᒃ ᑯᐊᐸᓕᐅᖅᑐᑎᑦ 1963−ᖑᑎᓪᓗᒍ. 1970−ᖏᓐᓂ, ᑲᓇᑕᒥ ᒐᕙᒪᒃᑯᑦ ᓴᓇᓕᓚᐅᖅᓯᒪᔪᑦ ᐱᖓᓱᓂᑦ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᔪᓂᑦ ᐃᓅᕕᖕᒥ, ᐃᒡᓗᓕᖕᒥ ᐊᒻᒪᓗ ᐃᖃᓗᖕᓂ. ᑖᒃᑯᐊ ᖃᐅᔨᓴᕐᕕᐅᔪᑦ ᐅᑭᐅᖅᑕᖅᑐᒥ ᖃᐅᔨᓴᕐᕕᐅᒋᐊᓪᓚᓕᓚᐅᖅᓯᒪᔪᑦ ᐊᒻᒪᓗ ᓄᓇᓕᖕᒥᐅᑦ ᐃᓚᐅᖃᑕᐅᓂᖅᓴᐅᕙᓕᖅᑐᑎᑦ. ᐃᒡᓗᓕᒃ ᐱᕈᖅᐸᓪᓕᐊᓯᒪᑐᐃᓐᓇᖅᐳᖅ ᐊᒻᒪᓗ ᐃᓚᒋᔭᐅᓪᓗᓂ ᓄᓇᓖᑦ ᐊᓪᓚᕝᕕᖃᕐᕕᐅᔪᑦ ᓄᓇᕗᑦ ᒐᔭᒪᖏᓐᓄᑦ, ᓄᓇᕗᑦ ᐱᓕᕆᕝᕕᖓ ᑕᒫᓃᑦᑐᖅ ᐱᓕᕆᐊᖃᖃᑕᐅᒻᒪᕆᒃᑐᓂ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ. ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ. http://www.gov.nu.ca/

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐃᒡᓗᓕᖕᒥᐅᑦ ᐱᖅᑯᓯᑐᖃᖅᑎᒍᑦ ᐃᓕᖅᑯᓯᕐᒥᒃ ᐊᓐᓂᕈᓱᑦᑐᒻᒪᕆᐅᒻᒪᑕ. ᐃᒡᓗᓕᖕᒦᑦᑐᖅ ᐃᓱᒪ ᑕᑯᓐᓇᒐᒃᓴᓕᐅᖅᑏᑦ, ᑕᕐᕆᔮᒃᓴᓕᐅᖃᑦᑕᖅᓯᒪᔪᑦ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓅᓯᖏᓐᓂᑦ. ᖃᐅᔨᒪᔭᐅᑦᑎᐊᖅᑐᖅ ᐊᑕᓈᕐᔪᐊᑦ, ᓱᑲᑦᑑᓪᓗᓂ ᐅᓪᓚᓲᖅ, ᑭᓯᐊᓂᓕ ᐃᓱᒪ ᐊᒥᓱᓂᑦ ᑕᕐᕆᔮᒃᓴᓕᐅᖅᓯᒪᔪᖅ ᐊᔾᔨᒌᙱᑦᑐᓂᑦ ᐃᓄᐃᑦ ᐱᖅᑯᓯᖏᓐᓂᒃ ᑕᑯᒃᓴᐅᑎᑦᑎᓪᓗᓂ ᐊᒻᒪᓗ ᐊᑦᑐᐃᓂᖃᕐᓂᖏᑦ ᖃᓪᓗᓈᑦ, ᓲᕐᓗᒃ ᑕᕐᕆᔮᒃᓴᓂᑦ ᑎᑎᕋᖅᓯᒪᔭᖏᑦ ᑲᓇᑦ ᕌᔅᒪᓴᓐ. ᐊᒥᓱᑦ ᑕᕐᕆᔮᒃᓴᓕᐊᒥᓂᖏᑦ ᖃᕋᓴᐅᔭᒃᑯᑦ ᑕᐅᑐᑦᑕᐅᔪᓐᓇᕐᒪᑕ. (www.isuma.tv) ᐃᒡᓗᓕᒃ ᐊᕐᑦᓲᒃᑯᓐᓄᑦ ᑕᑯᓐᓇᒐᒃᓴᓕᐅᖅᑎᑯᓐᓄᑦ ᐊᖏᕐᕋᕆᔭᐅᒋᕗᖅ, ᐃᓄᐃᑦ ᑕᑯᓐᓇᒐᒃᓴᓕᐅᖅᑏᑦ ᓄᓇᕐᔪᐊᕐᒥ. (http://artcirq.org/). ᖃᓄᐃᓕᐅᕈᑕᐅᓲᑦ ᓲᕐᓗᒃ ᐊᕐᕌᒍᑕᒫᑦ ᓯᕿᓂᖅ ᐅᑎᖅᑎᓪᓗᒍ ᓇᓪᓕᐅᓂᖅᓯᐅᓲᑦ ᓄᓇᓕᐅᔪᖅ ᓇᓪᓕᐅᓂᖅᓯᐅᕈᓐᓇᖃᑦᑕᓲᖅ ᐃᓕᖅᑯᓯᖓᓂᒃ ᐃᒡᓗᕕᒐᓕᐅᕐᓂᑭᓴᐅᑎᓪᓗᑎᑦ, ᕿᒧᒃᓯᕐᓂᑭᓴᐅᑎᓪᓗᑎᑦ, ᐊᒻᒪᓗ ᐱᖅᑯᓯᑐᖃᖅᑎᒍᑦ ᐱᙳᐊᖅᑐᑎᑦ. ᐃᒡᓗᓕᖕᒥᐅᑦ ᐱᖅᑯᓯᑐᖃᖅᑎᒍᑦ “ᐃᓄᐃᑦ ᓂᕿᖏᓐᓂᒃ” (ᓂᕐᔪᑏᑦ ᐊᖑᔭᒥᓃᑦ ᐊᒻᒪᓗ ᐃᖃᓗᒃᑕᒥᓃᑦ ᓂᕿᒋᔭᐅᓲᖑᓪᓗᑎᑦ) ᓂᕆᔪᒻᒪᐅᒋᕗᑦ. ᓄᓇᓕᐅᔪᖅ ᖃᐅᔨᒪᔭᐅᑦᑎᐊᖅᑐᖅ ᐃᒍᓇᖃᓲᖑᓂᖓᓄᑦ, ᐅᕝᕙᓘᓐᓃᑦ ᐊᐃᕕᒥᓂᖅ ᐃᒍᓇᖅᓯᒪᔪᖅ, ᓄᓇᓕᒻᒥᐅᓄᑦ ᐱᔭᐅᔪᒪᔪᒻᒪᕆᐅᓲᖅ. ᐅᒃᐱᕐᓂᖅ ᐱᕐᔪᐊᖑᔪᒥᓗ ᓄᓇᓕᓐᓂ ᐃᓅᓯᕐᒥᒃ ᐋᖅᑮᓯᒪᖃᑕᐅᕗᖅ. ᒪᕐᕉᕘᒃ ᑐᒃᓯᐊᕐᕖᒃ ᐃᒡᓗᓕᖕᒥ, ᐃᔾᔪᓇᐃᑦᑐᖅ ᓯᑏᕙᓐ ᐃᒃᓯᕋᕐᔪᐊᑉ ᑐᒃᓯᐊᕐᕕᖓ ᐊᒻᒪᓗ ᐃᔾᔪᓇᐃᑦᑐᖅ ᒪᑎᐊᔅ ᐋᓐᓕᑲᓐ ᑐᒃᓯᐊᕐᕕᖓ. ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓ ᓇᑉᐸᖅᑕᐅᓚᐅᖅᓯᒪᔪᖅ 1930−ᖏᓐᓂ, ᐊᒻᒪᓗ ᐊᔾᔨᓕᐅᖅᑕᐅᓯᒪᔪᒻᒪᕆᐅᔪᖅ ᐅᔭᕋᖕᓄᑦ ᑐᒃᓯᐊᕐᕕᓕᐊᕆᔭᐅᓚᐅᖅᓯᒪᔪᖅ 1960−ᖏᓐᓂ. ᐃᔾᔪᓇᐃᑦᑐᖅ ᓯᑏᕙᓐ ᓱᕋᐃᔭᖅᑕᐅᔭᕆᐊᖃᓚᐅᖅᓯᒪᔪᖅ 2006-ᖑᑎᓪᓗᒍ ᐊᑦᑕᓇᖅᑑᓕᕐᓂᖓᓄᑦ ᐊᒻᒪᓗ ᐊᓯᔾᔨᖅᑕᐅᓯᒪᓕᖅᑐᓂ ᓄᑖᕐᒥᒃ ᑐᒃᓯᐊᕐᕕᒻᒥ.

 

ᑕᐃᒪᐃᒻᒥᒻᒪᑕ ᕿᑭᖅᑕᓂ ᓄᓇᓕᐅᔪᓂ, ᑲᓇᑕᑉ ᐅᑭᐅᖅᑕᖅᑐᖓᓂ ᑲᓇᓐᓇᖓ ᐃᓄᒃᑎᑐᑦ ᐅᖃᐅᓯᕆᔭᐅᓗᐊᕆᕗᖅ ᐃᒡᓗᓕᖕᒥᐅᑕᕐᓄᑦ. 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ, 93%−ᖑᔪᑦ ᐃᓄᖏᑦ ᐃᓄᒃᑎᑐᑦ ᐅᖃᐅᓯᕆᔭᐅᖅᑳᕐᓂᕋᖅᓯᒪᕗᑦ, 84%−ᖑᔪᑦ ᐅᖃᖅᑐᒥᓂᐅᓪᓗᑎᑦ ᐊᖏᕐᕋᒥ ᐅᖃᐅᓯᕆᔭᐅᖅᑳᖅᑐᓂ ᐊᑐᖅᑕᐅᓲᖒᓂᖓᓂᒃ, ᐊᒻᒪᓗ 8%−ᖑᔪᑦ ᐃᓄᒃᑎᑑᓲᑦ ᐅᖃᐅᓯᕆᔭᐅᒃᑲᓐᓂᕋᓗᐊᖅᑎᓪᓗᒍ ᐊᖏᕐᕋᖏᓐᓂ. ᐊᒻᒪᓗᑦᑕᐅᖅ, 13%−ᖑᔪᑦ ᐅᖃᖅᓯᒪᒋᓪᓗᑎᑦ ᖃᓪᓗᓇᐅᔭᕈᓐᓇᖏᒻᒪᑕ ᐅᐃᕖᑎᑑᕈᓐᓇᕋᑎᓪᓗ. ᖃᑦᑏᓐᓇᑯᓘᒐᓗᐊᑦ ᐅᐃᕖᑎᑑᓲᑦ. ᐃᓄᐃᑦ ᑲᑎᒐᐃᒻᒪᑕ ᑭᒃᑯᑐᐃᓐᓇᐃᑦ ᐊᒻᒪᓗ ᑲᑎᒪᔪᖃᕋᐃᒻᒪᑦ ᑕᒪᒃᑮᓐᓂᒃ ᐅᖃᐅᓰᖕᓂᒃ ᐊᑐᖅᑐᓂᑦ ᓂᕆᐅᒍᓐᓇᖅᑐᑎᑦ, ᑭᓯᐊᓂᓕ ᓂᕆᐅᑦᑐᒃᓴᐅᓂᐊᙱᑦᑐᑎᑦ ᐃᓄᒃᑎᑑᖅᑐᑦ ᖃᓪᓗᓇᐅᔭᓕᖅᑎᑕᐅᑲᐅᑎᒋᓂᐊᕐᓂᖏᓐᓂᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᖑᔪᖅᑕᖃᕈᓗᒻᒪᑦ. ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ. ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

 

ᐃᒡᓗᓕᖕᒥ ᒪᒃᑯᑐᒡᒍᑕᒻᒪᕆᐅᕗᑦ ᐃᓄᖏᑦ. 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᖅᑕᐅᓯᒪᔪᑦ 225−ᖑᓚᐅᖅᑐᑦ ᐃᓕᓐᓂᐊᕆᐊᓕᓵᓲᑦ ᓱᕈᓯᓛᑦ ᐊᒻᒪᓗ 425 ᐃᓕᓐᓂᐊᕆᐊᓲᑦ ᓱᕈᓰᑦ, 45%−ᖑᓪᓗᑎᑦ ᐃᓄᖏᑦ ᐅᑭᐅᓖᑦ 18−ᓂ ᑐᖔᓂ. ᐅᑭᐅᕆᔭᐅᓗᐊᖅᑐᑦ 21.1, ᑭᓯᐊᓂᓕ 2%−ᑐᐃᓐᓇᑯᓗᐃᑦ ᐊᒥᓲᓂᖏᑦ ᐃᓄᐃᑦ ᐅᑭᐅᓖᑦ 65-ᓂᑦ ᐅᖓᑖᓄᓪᓗ. ᐸᐸᑦᑎᓇᓱᐊᖅᑐᖃᖅᑐᒻᒪᕆᐅᒋᕗᖅ ᐃᒡᓗᓕᑉ ᖃᑦᑏᓐᓇᑯᓗᐃᑦ ᐃᓐᓇᑐᖃᖏᑕ ᖃᐅᔨᒪᓂᖏᓐᓂᑦ. ᐃᓐᓇᑐᖃᐃᑦ ᑲᑎᒪᔨᖏᑎᒍᑦ, ᐃᓄᓪᓚᕇᑦ ᑲᑎᒪᔨᖏᑦ, ᐃᓐᓇᑐᖃᐃᑦ ᐃᓕᓐᓂᐊᑎᑦᑎᓲᑦ ᓄᓇᑐᐃᓐᓇᕐᒥ ᖃᓄᐃᓕᐅᕈᓐᓇᓂᕐᒥᒃ ᐊᒻᒪᓗ ᐱᖅᑯᓯᑐᖃᖅᑎᒍᑦ ᒥᖅᓱᕆᐅᖅᓴᓂᕐᒥᒃ ᓄᓇᓕᐅᔪᒧᑦ. ᐃᒡᓗᓕᒃ ᖃᕐᔨᓴᕐᕕᖓ ᓯᕗᒃᑲᖅᑕᐃᓚᐅᕐᒥᔪᖅ ᐃᒡᓗᓕᒃ ᐅᓂᒃᑳᖅᑐᐊᑦ ᓂᐱᓕᐊᕆᔭᐅᓯᒪᔪᑦ ᑐᖅᑯᐃᕕᖓᓂ, ᐱᓕᕆᐊᕆᔭᐅᔪᖅ ᐸᐸᑕᐅᒐᓱᐊᖅᑐᑎᑦ ᐃᓐᓇᑐᖃᐃᑦ ᐱᖅᑯᓯᑐᖃᕐᒥᒃ ᖃᐅᔨᒪᓂᖏᓐᓂᑦ. 

ᑮᓇᐅᔾᔭᒃᓴᕈᑕᐅᔪᑦ: 

ᐃᒡᓗᓕᒃ ᑮᓇᐅᔭᓕᐅᕈᑎᖃᕋᓱᐊᕈᓐᓇᑦᑎᐊᖃᑕᐅᒋᕗᖅ ᓄᓇᕗᑦ ᒐᕙᒪᖏᑕ ᐊᓪᓚᕝᕕᖏᑦ ᑕᒫᓃᑦᑐᒡᒍᑕᐅᓪᓗᑎᑦ. ᓄᓇᓕᓐᓂ ᐱᔭᓪᓕᐊᔪᓕᕆᓂᕐᒧᑦ ᐃᖅᑲᓇᐃᔭᕐᕕᐅᓲᖑᕗᖅ ᐃᓕᖅᑯᓯᓕᕆᔨᒃᑯᓐᓂ, ᐊᒻᒪᓗ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ ᐊᕙᑎᓕᕆᔨᒃᑯᓐᓂ. ᖄᖓᒍᒃᑲᓐᓂᖅ ᒐᕙᒪᒃᑯᓐᓄᑦ ᐃᖅᑲᓇᐃᔭᕐᕕᐅᓪᓗᓂ ᓄᓇᓕᓐᓂ ᐱᔨᑦᑎᕋᖅᑏᑦ ᑮᓇᐅᔭᓕᐅᕋᓱᐊᓲᑦ, ᒥᐊᓱᑦ ᐃᒡᓗᓕᖕᒥᐅᑦ ᐊᖑᓇᓱᓲᖑᕗᑦ ᐃᖃᓗᒐᓱᐊᖅᑐᑎᓪᓗ ᐃᓚᒥᓄᑦ. ᐃᒡᓗᓕᒃ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖃᖅᑐᒻᒪᕆᐅᓲᖑᒋᕗᖅ, ᐃᓱᒪ ᑕᕐᕆᔮᒃᓴᓕᐅᖅᑏᑦ ᑕᒫᓃᑦᑐᑎᑦ ᐊᒻᒪᓗ ᐊᒃᑦᓲᒃ ᑕᒫᓃᒃᑭᓪᓗᑎᑦ. ᐱᖅᑯᓯᑐᖃᖅᑎᒍᑦ ᑭᓱᑐᐃᓐᓇᐃᑦ ᓲᕐᓗᒃ ᐊᓐᓄᕌᑦ, ᐃᒋᕐᕈᑏᑦ ᐊᒻᒪᓗ ᐃᒡᓗᒥᐅᑕᐃᑦ ᑕᕐᕆᔮᒃᓴᓕᐊᕆᔭᐅᔪᓄᑦ ᐊᑐᖅᑕᐅᔪᒪᓲᖑᒻᒪᑕ. ᐳᓚᕋᖅᑐᓕᕆᓂᖅ ᐃᖅᑲᓇᐃᔮᒃᓴᓂᑦ ᓴᖅᑭᑎᑦᑎᓚᐅᑲᑲᐃᓐᓇᓲᖅ ᑐᑭᓯᒋᐊᖅᑎᑦᑎᔨᓄᑦ, ᐊᐅᓪᓚᐅᔾᔨᔨᓄᑦ, ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᑕᑯᕋᕐᓈᑎᑦᑎᔨᖏᓐᓄᑦ.

 

ᑮᓇᐅᔭᒃᑯᕕᖃᙱᑦᑐᖅ ᐃᒡᓗᓕᒃ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ. ᓄᐊᑐᓐ ᓂᐅᕕᕐᕕᒃ, ᐊᒻᒪᓗ ᑯᐊᐸᒃᑯᑦ “ᑮᓇᐅᔭᓕᕆᔪᓐᓇᕐᒥᔫᒐᓗᐊᑦ”, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖃᕐᕕᒋᒍᓐᓇᖅᑐᒋᑦ ᓂᐅᕕᕐᕕᒃᑯᑦ, ᓯᒃᑮᕐᕕᒃᓴᐅᓪᓗᑎᑦ, ᐊᓯᖏᓪᓗ. ᐊᐅᒃᑕᔫᓅᖅᑐᑦ ᑮᓇᐅᔭᖅᑎᒍᑦ ᐊᑭᓕᐅᑎᐅᕙᑦᑐᑦ ᐊᑭᓕᒃᓴᓂᒍᓐᓇᐅᑏᓪᓗ ᓂᐅᕕᕐᕕᓂ ᐊᑐᕋᒃᓴᐅᓲᑦ. ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ. ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᐊᑭᐊᓃᑦᑐᓂ ᓴᓂᕋᔭᑉ ᐊᒻᒪᓗ ᑲᑐᔾᔨᓪᓗᑎᑦ ᓄᓇᒥ, ᐃᒡᓗᓕᒃ ᐊᔾᔨᖏᓐᓂᒃ ᓯᔾᔭᖏᓐᓃᑦᑐᓂᑦ ᓂᕐᔪᑎᓂᑦ ᓂᕐᔪᑎᖃᐅᕆᕗᖅ, ᓲᕐᓗᒃ ᐊᐃᕖᑦ, ᓇᑦᑏᑦ, ᕿᓚᓗᒐᐃᑦ, ᐊᒻᒪᓗ ᓇᓄᐃᑦ. ᒪᓂᕋᐅᓪᓗᓂ ᓄᓇᖓ ᑎᖕᒥᐊᖃᕐᕕᐅᒍᓐᓇᑐᒻᒪᕆᐅᓲᖑᕗᖅ ᐊᐅᔭᒃᑯᑦ, ᐱᓗᐊᖅᑐᒥᒃ ᐃᕙᕕᐅᓪᓗᓂ ᑎᖕᒥᐊᓄᑦ ᓲᕐᓗᒃ ᒥᑏᑦ, ᓂᕐᓖᑦ, ᑲᖑᖅ, ᑑᓪᓕᒑᕐᔪᑦ, ᖁᐸᓄᐊᑦ ᐊᒻᒪᓗ ᐅᒃᐱᔾᔪᐊᑦ. ᒥᑭᔫᑕᐃᑦ ᐆᒪᔪᑦ ᑕᒫᓃᓲᖑᒋᓪᓗᑎᑦ. ᐃᓄᐃᑦ ᓄᓇᓕᒻᒥᐅᑦ ᐃᖃᓗᒐᓱᐊᓲᑦ ᐃᖃᓗᒃᐱᓂᑦ ᐊᒻᒪᓗ ᐃᕕᓵᕈᓂᑦ, ᐊᒻᒪᓗ ᒪᓐᓂᑦᑕᕆᐊᓲᖑᓪᓗᑎᑦ ᐅᐱᕐᖔᖑᓕᕋᐃᒻᒪᑦ. 

ᐅᖃᓕᒫᑲᓐᓂᕐᓃᑦ : 
  • Bennett, John and Susan Rowley, eds. Uqalurait: an oral history of Nunavut. Montreal & Kingston: McGill-Queen’s University Press, 2004.
  • Dorais, Louis-Jacques: The language of the Inuit: syntax, semantics and society in the Arctic. Montreal & Kingston: McGill-Queen’s University Press, 2010.
  • Georgia: An Arctic diary. Edmonton: Hurtig, 1971.
  • Issenman, Betty Kobayashi. Sinews of Survival: the living legacy of Inuit clothing. Vancouver: UBC Press, 1997.
  • MacDonald, John. The Arctic sky: Inuit astronomy, star lore and legend. Iqaluit & Toronto: Nunavut Research Institute and Royal Ontario Museum, 1998.
  • McGhee, Robert. The last imaginary place: a human history of the Arctic world. Toronto: Key Porter Books, Canadian Museum of Civilization, 2004.
  • Morrison, David and Georges-Hébert Germain. Inuit: glimpses of an Arctic past. Hull: Canadian Museum of Civilization, 1995.
  • Pauktuutit Inuit Women of Canada. The Inuit way: a guide to Inuit culture, rev. ed. Ottawa: Pauktuutit Inuit Women of Canada, 2006. http://www.uqar.ca/files/boreas/inuitway_e.pdf
  • Rasmussen, Knud. Intellectual culture of the Iglulik Eskimos (Fifth Thule Expedition, v. 7) and Material culture of the Iglulik Eskimos (Fifth Thule Expedition, v. 6 no. 1). New York: AMS Press, 1976
  • Rowley, Graham W.: Cold comfort: my love affair with the Arctic. Montreal & Kingston: McGill-Queen’s University Press, 1996.