ᐊᔪᕈᑎᖃᙱᑦᑐᖅ (ᑎᑭᑎᑕᐅᖃᑦᑕᖅᑐᓄᑦ ᒪᓕᒐᕋᓛᑦ ᐊᑐᖅᑐᑦ, ᐅᒃᑑᐱᕆ 2014)* ᐅᓇ ᓇᕿᓪᓗᒍ ᐅᓪᓗᒥᒨᓕᖅᑐᖅᓯᒪᔪᒥᒃ ᐱᔪᒪᒍᕕᑦ
*ᐃᒥᐊᓗᖕᓂᒃ ᐊᐅᓚᑦᑎᓂᕐᒧᑦ ᐱᙱᓐᓂᕋᐅᑎ: ᖃᐅᔨᒋᐊᕐᕕᒋᓗᒋᑦ ᐸᓖᓯᒃᑯᑦ (ᓄᓇᓕᖕᓂᑦ) ᒫᓐᓇᒨᓕᖅᑐᖅᓯᒪᓛᕐᒥᑦ ᐃᒥᐊᓗᖕᓂ ᖃᓄᐃᓐᓂᕆᔭᖏᓐᓄᑦ ᓄᓇᓕᖕᒥᑦ ᐋᖅᑭᒃᑕᐅᔪᑦ, ᖃᓄᐃᓕᖓᓂᕐᓂᑦ ᑎᑎᕋᖅᓯᒪᓂᖓ ᐊᓯᐊᙳᑐᐃᓐᓇᕆᐊᖃᕐᒪᑕ. ᓱᕋᒃᓯᔪᖃᖅᐸᑦ ᒪᓕᒐᓂᒃ ᐸᓯᔭᒃᓴᙳᖅᑎᑕᐅᔪᓐᓇᖅᑐᑦ ᐊᒻᒪᓗ ᐊᑭᓕᒐᒃᓴᖅᑖᖅᑎᑕᐅᓗᑎᒃ.
Royal Bank of Canada branch, First Nations Bank of Canada branch, CIBC branch kiosk. ᖃᔅᓯᐊᕐᔪᖕᓂᒃ ᑮᓇᐅᔭᓂᒃ ᐊᒧᓯᔾᔪᑎᑕᖃᐅᖅᑐᖅ. ᐊᐅᒃᑕᔫᑦ ᐊᒻᒪᓗ ᐊᑮᑦᑐᖅᓯᔾᔪᑏᑦ ᐊᐅᒃᑕᔫᑦ ᐱᔭᐅᖃᑦᑕᖅᑐᑦ ᓂᐅᕕᕐᕕᓗᒃᑖᖅᑲᔭᕐᓂᑦ. ᖃᕋᓴᐅᔭᒃᑯᑦ ᑮᓇᐅᔭᒃᑯᕕᓕᕆᓂᕐᒥᒃ ᐊᑐᖁᔭᐅᖕᒥᔪᑦ.
ᐅᖄᓚᐅᑏᑦ ᐊᒻᒪᓗ ᖃᕋᓴᐅᔭᖅ (ᑭᒡᓕᖃᖅᑐᖅ ᐃᓂᖃᕐᓂᖓ) ᐱᔨᑦᑎᕋᐅᑏᑦ ᒪᓂᒪᔪᑦ. ᑭᒡᓕᖃᖅᑐᑦ ᐅᖄᓚᐅᑎᕋᓛᓄᑦ ᐱᔨᑦᑎᕋᐅᑏᑦ ᐊᑐᐃᓐᓇᐅᔪᓂ.
ᐃᖃᓗᐃᑦ, ᓄᓇᓕᑦᐸᐅᔭᐅᕗᖅ ᓄᓇᕗᒻᒧᑦ, ᐃᓱᐊᓃᑦᑐᖅ ᑕᕆᐅᑉ ᐊᑦᑎᖅᑕᐅᓯᒪᔪᒥᑦ ᓲᕐ ᒫᑎᓐ ᕗᕉᐱᓴᒥᑦ, ᑖᓐᓇ ᓇᓂᓯᓇᓱᒋᓚᐅᖅᑐᖅ ᐅᓂᒃᑲᐅᓯᐅᓯᒪᔪᖅ ᐅᑭᐅᖅᑕᖅᑐᒥ ᐅᒥᐊᕐᔪᐊᒃᑯᑦ ᐊᖅᑯᑕᐅᕙᒃᑐᒥᑦ 1576-ᒥᑦ. ᑕᕆᐅᖅ ᐊᑦᑎᖅᑲᐅᑕᐅᓚᐅᖅᓯᒪᔭᖓ “Frobisher's Straites”-ᒥᒃ (ᑕᐃᒪᓐᓇ ᑎᑎᕋᖅᑕᐅᕙᓚᐅᖅᑐᖅ ᑕᐃᔅᓱᒪᓂ), ᐊᒻᒪᓗ ᐊᒥᓱᓄᑦ ᐅᑭᐅᓄᑦ ᓄᓇᓕᒃ ᖃᐅᔨᒪᔭᐅᓚᐅᖅᑐᖅ ᕗᕉᐱᓴ ᐸᐃᒥᒃ. ᐃᓄᐃᑦ ᑕᒫᓂ ᓄᓇᖃᖅᓯᒪᔪᑦ ᑕᐅᓴᓐ-ᖏᓐᓃᑦᑐᓄᑦ ᐊᕐᕌᒍᓄᑦ, ᑕᐃᑲᙵᑦ ᐊᓯᐊᓄᐊᖅᐸᒃᖢᑎᒃ ᐅᑎᖅᐸᒃᖢᑎᒃ ᒪᓕᒃᖢᒋᑦ ᓂᕐᔪᑏᑦ ᓅᑦᑕᕐᓂᖏᑦ ᐊᕐᕌᒎᑉ ᐃᓗᐊᓂᑦ. ᐃᖃᓗᐃᑦ, ᐅᕝᕙᓘᓐᓃᑦ “ᐃᖃᓗᒃᑕᓕᒃ” ᐃᓄᒃᑎᑐᑦ, ᐱᔾᔪᑎᖃᖅᑐᖅ ᐊᕐᕌᒎᑉ ᐃᓚᖓᒍᑦ ᐃᖃᓗᒃᓯᐅᖃᑦᑕᕐᓂᖅ ᓯᐅᓪᕕᐊ ᒋᕈᓂᐅᓪ ᑰᖕᒥᑦ ᐃᖃᓗᐃᑦ ᒪᔪᓕᕌᖓᑕ. ᐊᓯᖏᑦᑎᑐᑦ ᐃᓂᐅᔪᓂᑦ ᓄᓇᕗᒻᒥ 1800-ᖏᓐᓂᑦ ᐊᒻᒪᓗ 1900-ᖏᓐᓂᑦ, ᕗᕉᐱᓴ ᐸᐃ ᑕᑯᖃᑦᑕᓚᐅᖅᑐᖅ ᐊᔾᔨᒌᙱᑦᑐᓂᒃ ᕿᓚᓗᒐᓕᕆᓂᕐᒧᑦ ᐊᖑᓇᓱᒃᑕᐅᓂᖏᓐᓄᑦ ᐊᐅᓚᑎᑦᑎᓂᐅᔪᓂᒃ, ᐱᓗᐊᖅᑐᒥᒃ ᑲᖏᖅᖢᐊᓂᑦ ᑲᑎᓐᓂᖓᓂᑦ ᕿᑭᖅᑖᓘᑉ ᐃᑭᖓᓂᑦ. 1861-ᒥᑦ, ᐃᓚᒋᔭᐅᓪᓗᓂ ᕿᓂᕐᓂᕐᒥᒃᔮᓐ ᕗᕌᖕᒃᓕᓐ-ᒥᒃ, ᓴᕐᓕ ᕗᕌᓐᓯᔅ ᕼᐋᓪ, ᐱᖃᑎᖃᖅᖢᓂ ᐃᓄᖕᓂᒃ, ᐃᖏᕐᕋᓚᐅᖅᑐᑦ ᐅᖓᓯᒃᑎᒋᔪᒧᑦ ᑕᐃᔭᐅᓕᖅᑐᖅ ᐃᓂᖓ ᐃᖃᓗᐃᑦ. ᓯᕗᓪᓕᕐᒥ ᑭᒻᒥᕈᑦ ᐊᐅᓚᑦᑎᓂᖃᕐᕕᐅᓚᐅᖅᓯᒪᖅᑲᐅᑕᐅᔪᖅ ᕿᑭᖅᑖᓘᑉ ᓂᒋᐊᓄᑦ, ᐊᔪᕆᒻᓱᐃᔨᑦ ᐊᒻᒪᓗ ᓂᐅᕕᖅᑎᒃᑯᑦ (HBC) ᐊᓯᖏᓐᓄᑦ ᓄᓇᓕᕋᓛᓄᙵᐅᖃᑦᑕᖅᖢᑎᒃ ᖃᓂᒋᔭᖓᓂᑦ. 1914-ᒥᑦ, HBC-ᑯᑦ ᒪᑐᐃᖅᓯᓚᐅᖅᑐᑦ ᑕᐅᖅᓰᕕᐅᕝᕕᖕᒥᑦ ᐃᖃᓗᒑᕐᔪᖕᒥᑦ, 65 ᑭᓛᒥᑕᓂᒃ ᓂᒋᖅᐸᓯᐊᓂᑦ ᑲᓇᖕᓇᖅᐸᓯᐊᓃᑦᑐᖅ ᐃᖃᓗᖕᓂᑦ. ᑕᐅᖅᓰᕕᒃ ᓅᓚᐅᖅᑐᖅ 1950-ᒥᑦ ᐃᓄᐃᓐᓇᕐᓚᖕᓄᑦ ᐃᓂᒋᔭᐅᔪᒧᑦ ᓂᐊᖁᙴᒧᑦ (ᐃᓚᒋᔭᐅᓕᖅᑐᖅ ᓄᓇᓕᖅᐸᐅᔭᖅ ᐃᖃᓗᖕᓂᑦ). ᐸᓖᓯᒃᑯᑦ ᑕᐃᒪᙳᓚᐅᖅᑐᑦ ᑕᐃᑲᓂ 1920-ᒥᑦ.
ᖃᔅᓯᐊᕐᔪᐃᑦ ᐃᓄᐃᑦ ᓄᓇᓕᕋᓛᖏᑦ ᑕᐃᒪᐅᓚᐅᖅᑎᓪᓗᒋᑦ ᕗᕉᐱᓴ ᐸᐃ ᖃᓂᒋᖓᓂᑦ, ᐃᓂᐅᔪᖅ ᒫᓐᓇᐅᔪᖅ ᓄᓇᓕᒃ ᑕᐊᒪᐊᔪᖃᓚᐅᖅᑐᖅ ᐊᒥᐊᓕᑲᒃᑯᓐᓂᑦ. ᑎᖕᒥᓲᓕᕆᔨᒃᑯᑦ ᐃᓱᒪᓕᐊᖓᑦ ᒥᑦᑕᕐᕕᓕᐅᕐᓂᕐᒧᑦ 1942-ᒥᑦ ᐃᓚᒋᔭᐅᓗᓂ ᐅᑭᐅᖅᑕᖅᑐᒥᑦ ᐊᖅᑯᑎᒋᔭᐅᓂᕐᒧᑦ ᑕᕆᐅᑉ ᐊᑭᐊᓄᑦ ᑐᒡᓕᐊᓂᑦ ᓄᓇᕐᔪᐊᕐᒥᑦ ᐅᓇᑕᖅᑎᓪᓗᒋᑦ. ᐅᓇᑕᖅᑐᒃᓴᐃᑦ ᐃᓂᖓᑦ ᐃᓐᓄᒃᑕᐅᓯᒪᓚᐅᖅᑐᖅ ᑕᐃᔅᓱᒪᓂ ᐊᒻᒪᓗ ᓄᑖᒥᒃ ᐃᓂᑖᖅᖢᑎᒃ 1950-ᖏᓐᓂᑦ DEW (ᐅᖓᓯᒃᑐᒥᑦ ᖃᐅᔨᑎᑕᐅᕙᒌᕐᓂᖅ) ᐃᓂᐅᔪᒧᑦ ᐅᓇᑕᕐᔪᐊᖅᑎᓪᓗᒋᑦ. ᐃᓄᐃᑦ ᓅᑉᐸᓪᓕᐊᓕᓚᐅᖅᑐᑦ ᓄᓇᓕᖕᒧᑦ, ᐊᑐᖅᖢᑎᒃ ᐃᒋᑕᐅᖃᑦᑕᖅᑐᓂᒃ ᐅᓇᑕᖅᑐᒃᓴᓄᑦ ᓯᕐᓗᐊᕋᓛᓕᐅᕆᓂᕐᒧᑦ, ᐅᕝᕙᓘᓐᓃᑦ ᒥᑭᑦᑐᓂᒃ, ᖃᔅᓯᐊᕐᔫᓪᓗᑎᒃ ᐃᒡᓗᕐᔪᐊᑦ ᓯᒡᔭᖓᓂᑦ ᑯᔭᓯᐅᑉ ᑕᓯᐅᔭᖓᓂ. (ᑐᑭᖓ “ᓯᕐᓗᐊᖅ” ᐊᑐᖅᑕᐅᖃᑦᑕᓚᐅᖅᑐᖅ ᐅᖃᐅᓯᕆᓂᕐᒧᑦ ᑕᒪᒃᑯᐊ ᓴᓇᓯᒪᔪᑦ ᐊᒻᒪᓗ ᐊᑐᖅᑕᐅᖃᑦᑕᖅᑐᑦ ᓱᓕ ᐅᓪᓗᒥ ᐱᐅᖏᑦᑐᖅᑕᖃᙱᖦᖢᓂ ᑐᑭᖃᖅᑎᓐᓂᕐᒧᑦ ᐊᑐᖅᑕᐅᒐᔪᒃᑐᒧᑦ ᑖᔅᓱᒧᖓ ᐅᖃᐅᓯᕐᒧᑦ). ᐊᒥᐊᓕᑲᒃᑯᑦ ᑎᖕᒥᓲᓕᕆᔨᒃᑯᖏᑦ ᑕᐃᒪᐅᔪᓐᓃᓚᐅᖅᑐᑦ 1963-ᒥᑦ. ᓯᕗᓪᓕᖅᐸᖑᔪᑦ ᓄᓇᓕᖕᒧᑦ ᑲᑎᒪᔩᑦ ᕗᕉᐱᓴ ᐸᐃᒧᑦ ᓂᕈᐊᖅᑕᐅᓚᐅᖅᑐᑦ 1964-ᒥᑦ. ᕗᕉᐱᓴ ᐸᐃ ᐃᓕᓴᕆᔭᐅᓕᓚᐅᖅᑐᖅ ᐃᓂᐅᓕᕐᓂᖓᓄᑦ 1970-ᒥᑦ, ᓄᓇᓕᒃ (ᕼᐋᒻᓚ) 1974-ᒥᑦ, ᐊᒻᒪᓗ ᑕᐅᓐ-ᖑᖅᖢᓂ 1980-ᒥᑦ. 1987-ᒥᑦ ᓄᓇᓕᒃ ᐅᑎᓚᐅᖅᑐᖅ ᐃᓄᒃᑎᑐᑦ ᐊᑎᑐᖃᖓᓄᑦ ᐃᖃᓗᐃᑦ. ᑕᐃᒪᓐᓇᒧᑦ ᐊᑎᓕᐅᖅᑕᐅᓂᖓ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ 1993-ᒥᑦ, ᓴᖅᑭᑦᑎᔪᖅ ᓄᑖᒥᒃ ᐃᓂᐅᔪᒥᑦ ᓄᓇᕗᒻᒥ, ᐊᐱᖅᑯᑎᓄᑦ ᓂᕈᐊᖅᑎᑦᑎᓂᕐᒥᑦ ᓂᕈᐊᓚᐅᖅᑐᑦ ᓄᓇᓕᖅᐸᐅᔭᐅᓂᐊᖅᑐᒥᑦ ᓄᑖᒥᑦ ᐃᓂᐅᔪᒥᑦ ᓄᓇᕗᒻᒥᑦ 1995-ᒥᑦ, ᐃᖃᓗᐃᑦ ᓂᕈᐊᖅᑕᐅᓚᐅᖅᑐᖅ. ᓄᓇᕗᑦ ᐱᙳᓚᐅᖅᑐᖅ 1999-ᒥᑦ, ᐊᒻᒪᓗ 2001-ᒥᑦ, ᐃᖃᓗᐃᑦ ᓄᓇᓕᖅᐸᐅᔭᙳᖅᖢᓂ. ᐱᖅᑯᓯᒃᑯᑦ ᓄᓇᒥᑦ ᖃᓄᐃᓕᐅᕐᓂᐅᔪᑦ ᐃᓚᒋᔭᐅᒐᓗᐊᖅᑎᓪᓗᒋᑦ ᓱᓕ ᐃᓅᓯᕆᔭᐅᔪᓂᑦ ᐃᖃᓗᖕᓂᑦ, ᓄᓇᓕᖅᐸᐅᔭᐅᑉ ᐊᐅᓚᓂᖓ ᐊᖏᔪᒥᒃ ᐃᖏᕐᕋᔭᖕᓂᕐᒧᑦ ᐊᒻᒪᓗ ᑐᓴᐅᒪᖃᑦᑕᐅᑎᓂᕐᒧᑦ ᐃᓂᐅᓂᖓ, ᐊᒻᒪᓗ ᐊᐅᓚᑦᑎᓂᕐᒧᑦ ᐃᓂᒋᔭᐅᓗᐊᖅᑐᖅ ᓄᓇᕗᒻᒧᑦ. ᑕᐃᒪᓐᓇᒧᑦ, ᐃᓄᖏᑦ ᐱᕈᖅᐸᓪᓕᐊᕋᓚᓴᖅᓯᒪᔪᖅ, ᐊᒥᓱᓂᒃ ᓄᑖᓂᒃ ᑎᑭᑦᑐᖃᖃᑦᑕᖅᖢᓂ ᐊᓯᖏᓐᓂᑦ ᓄᓇᓕᖕᓂᙶᖅᑐᓂᒃ ᓄᓇᕗᒻᒥᑦ, ᑲᓇᑕᒥᑦ ᐊᒻᒪᓗ ᐊᓯᖏᓐᓂᑦ ᓄᓇᐅᔪᓂᑦ ᓄᓇᕐᔪᐊᕐᒥᑦ, ᐊᒻᒪᓗ ᓄᓇᓕᖅᐸᐅᔭᖅ ᑕᑯᓯᒪᔪᖅ ᐱᕙᓪᓕᐊᓂᐅᔪᓂᒃ ᐃᒡᓗᕐᔪᐊᓕᐅᖅᑐᓂᒃ ᐊᒻᒪᓗ ᐱᔨᑦᑎᕋᐅᑎᓂᒃ ᒪᓕᒃᑐᑦ ᐱᕈᖅᐸᓪᓕᐊᓂᖓᓂᒃ ᓄᓇᓕᒃ.
ᓄᓇᕗᒻᒥ ᒐᕙᒪᒃᑯᖏᑦ (GN) ᐱᓕᕆᔨᖏᓐᓄᑦ ᓇᓗᓇᐃᔭᐃᓂᕐᒧᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᑐᓂᓯᖃᑦᑕᖅᑐᖅ ᐱᐅᔪᒻᒪᕆᖕᒥᑦ ᑲᑎᖅᓱᖅᓯᒪᔪᓂᒃ ᓇᑭᙶᕐᓂᖓᓂᑦ ᓄᓇᕗᒻᒥ, ᐊᑕᐅᑦᑎᒃᑯᑦ ᐃᓄᐃᑦ ᐱᖅᑯᓯᖏᑦ ᐊᒻᒪᓗ ᓇᑭᙶᕐᓂᖓᓂᒃ ᐊᒻᒪᓗ ᐅᖃᐅᓯᖃᖅᑐᖅ ᖃᓄᖅ ᐃᓄᐃᑦ ᐱᖅᑯᓯᖓᑦ ᐃᓚᐅᑎᑕᐅᖕᒪᖔᑕ ᒐᕙᒪᒃᑯᑦ ᐊᐅᓚᓂᕆᔭᖓᓐᓄᑦ ᐊᒻᒪᓗ ᐱᔨᑦᑎᕋᐅᑎᖏᓐᓄᑦ. ᕿᓂᕐᕕᐅᖁᔭᕗᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᐊᑐᐃᓐᓇᐅᓕᒃᑲᓐᓂᖅᐸᑦ ᐋᖅᑭᒃᓱᖅᑕᐅᕌᓂᒃᐸᑦ, ᒫᓐᓇᐅᔪᖅ ᓱᓇᑐᐃᓐᓇᓅᖓᔪᖓᑦ ᓄᓇᕗᑦ ᒐᕙᒪᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑐᕐᕕᖓᑦ ᐆᒃᑐᕈᓐᓇᖅᑕᐃᑦ ᑐᑭᓯᐅᒪᔾᔪᑎᓂᒃ ᐱᓂᕐᒧᑦ
ᐊᑯᓪᓕᖅᓯᒪᔪᑦ ᑕᐃᑲᓂᕐᒥᐅᑕᑐᖃᐃᑦ, ᑕᒪᕐᒥᒃ ᐃᓄᐃᑦ ᐊᒻᒪᓗ ᖃᓪᓗᓈᑦ (ᐃᓄᐃᑦ-ᖑᖏᑦᑐᑦ), ᐊᒻᒪᓗ ᓄᑖᑦ ᑕᐃᑯᙵᖅᑐᑦ ᐊᓯᐊᓂᙶᖅᑐᑦ ᓄᓇᕗᒻᒥᑦ, ᑲᓇᑕᒥᑦ ᐊᒻᒪᓗ ᐊᓯᖏᓐᓂᑦ ᓄᓇᕐᔪᐊᕐᒥᑦ, ᐃᖃᓗᐃᑦ ᐆᒻᒪᕆᖕᓂᖃᖅᑐᓂᒃ ᐃᓕᖅᑯᓯᕐᒥᒃ ᐊᒻᒪᓗ ᐃᓅᖃᑎᒌᖕᓂᕐᒥᒃ ᐃᓅᓯᖃᖅᑐᖅ. ᖃᓪᓗᓈᑎᑑᓕᖓᓂᖅᓴᐅᔪᖅ “ᐱᖁᖅᓯᕆᔭᐅᔪᖅ”-ᐊᒥᓱᓂᒃ ᐊᓯᖏᓐᓂᑦ ᓄᓇᕗᒻᒥ ᓄᓇᓕᐅᔪᓂᐅᖓᓂᑦ, ᑭᓯᐊᓂ ᓴᙱᔪᒥᒃ ᐃᒃᐱᒋᔭᖃᕐᓂᖓᑦ ᑕᐃᒪᐅᔪᖅ ᐃᓕᖅᑯᓯᑐᖃᖏᓐᓄᑦ ᐃᓄᐃᑦ, ᖁᕕᐊᓲᑎᒋᔭᐅᖃᑦᑕᖅᑐᖅ ᑐᓂᒃ ᑕᐃᒻ-ᒥᑦ (ᐊᕐᕌᒍᑕᒫᑦ ᐅᐱᕐᖔᒃᑯᑦ ᖁᕕᐅᓲᑎᖃᕐᓂᖅ), ᓄᓇᕗᒻᒦᖓᓪᓗᓂ ᐊᒻᒪᓗ ᑲᓇᑕᐅᑉ ᕿᑲᕐᓂᕐᒧᑦ ᖁᕕᐊᓲᑕᐅᔪᑦ, ᐊᒻᒪᓗ ᓄᓇᓕᖕᒥᑦ ᓂᕆᕕᒡᔪᐊᕐᓃᑦ ᐊᒻᒪᓗ ᖃᓄᐃᓕᐅᕐᓃᑦ, ᓲᕐᓗ ᐊᓐᓄᕌᓂᒃ ᑕᑯᕋᓐᓈᖅᑎᑦᑎᓃᑦ haute couture ᒥᖅᑯᐃᑦ ᑕᑯᒃᓴᐅᑎᑕᐅᓪᓗᑎᒃ ᐊᒻᒪᓗ ᖁᕕᐊᓱᒡᕕᖕᒥ ᐃᓄᒃᑎᑐᑦ ᒧᒥᕐᓃᑦ ᐊᔪᕆᖅᓱᐃᔨᒃᑯᑦ ᐃᒡᓗᖁᑎᖓᓐᓂᑦ. ᓄᓇᑦᑕ ᓱᓇᑯᑖᖏᑦ ᑕᑯᓐᓇᒐᖃᕐᕕᖓ ᐊᒥᓱᓂᒃ ᐱᐅᔪᒻᒪᕆᖕᓂᑦ ᐱᑕᖃᐅᖅᑐᑦ ᐊᒻᒪᓗ ᐱᓕᕆᓂᖃᖃᑦᑕᖅᖢᑎᒃ ᐊᕐᕌᒍᑕᒫᑦ ᑕᑯᔭᒃᓴᐅᑎᓂᒃ ᑎᑎᕋᐅᔭᖅᓯᒪᔪᓂᒃ ᐊᓯᖏᓐᓂᙶᖅᑐᓂᒃ, ᓲᕐᓗ ᑭᙵᕐᓂᑦ ᐊᒻᒪᓗ ᐸᖕᓂᖅᑑᕐᒥᑦ. ᖃᔅᓯᐊᕐᔪᖕᓄᑦ ᐅᑭᐅᓅᓕᖅᑐᖅ ᐃᖃᓗᐃᑦ ᐱᓕᕆᐊᖃᖃᑦᑕᖅᑐᖅ ᐊᓕᐊᓇᐃᑦ-ᒥᑦ, ᐊᔾᔨᒌᙱᑦᑐᑦ ᐱᖅᑯᓯᖏᑦᑎᒍᑦ ᑎᑕᖕᓃᑦ ᐊᒻᒪᓗ ᓴᓇᙳᐊᕐᓂᕐᒧᑦ ᖁᕕᐊᓲᑎ ᑕᑯᒃᓴᐅᑎᑦᑎᖃᑦᑕᖅᑐᖅ ᓄᓇᓕᖕᒥᑦ ᐊᔪᙱᓐᓂᕆᔭᐅᔪᓂᒃ ᐊᒻᒪᓗ ᐅᑭᐅᖅᑕᖅᑐᒥᑦ ᐊᒻᒪᓗ ᐊᓯᖏᓐᓂᒃ ᓄᓇᕐᔪᐊᕐᒥᑦ ᐊᔪᙱᓐᓂᓖᑦ. ᐃᖃᓗᐃᑦ ᐃᒥᕐᕕᒃᑕᖃᐅᖅᑐᖅ, ᓂᕆᕝᕕᖕᓂᒃ, ᑐᕌᖓᔪᓄᑦ ᐊᒻᒪᓗ ᐱᔨᑦᑎᕋᐃᓂᕐᒧᑦ ᑲᑐᔾᔨᖃᑎᒌᑦ, ᐊᒻᒪᓗ ᕈᐊᔪᓪ ᑲᓇᑕᒥ ᓖᔾᔭᓐᒥᑦ ᐃᖃᓗᖕᓂᑦ ᐃᓂᒋᔭᖓᑦ ᐱᓕᕆᓂᖅᐹᖑᖃᑦᑕᖅᑐᖅ ᑲᓇᑕᒥᑦ, ᑎᑕᒃᑎᑕᖃᕋᔪᒃᖢᑎᒃ. ᓄᓇᓕᖅᐸᐅᔭᐅᓪᓗᓂ ᐊᒻᒪᓗ ᓄᖅᑲᕐᕕᐅᖃᑦᑕᖅᖢᓂ ᐊᒥᓱᓄᑦ ᐱᙳᐊᖅᑎᓄᑦ, ᐃᖃᓗᖕᒥᐅᑦ (ᐃᖃᓗᖕᒥᐅᑕᐃᑦ) ᑕᑯᔪᓐᓇᖃᑦᑕᖅᓯᒪᔪᑦ ᐊᒥᓱᓂᒃ ᑲᓇᑕᒥᐅᑕᓂᒃ ᐊᒻᒪᓗ ᓄᓇᕐᔪᐊᕐᒥᑦ ᖃᐅᔨᒪᔭᐅᔪᓂᒃ, Barenaked Ladies-ᑯᓐᓂᑦ ᐊᒻᒪᓗ Blue Rodeo ᐱᒋᐊᓕᓵᖅᑎᓪᓗᒋᑦ, White Stripes-ᓄᑦ ᐊᒻᒪᓗ ᑲᓇᑕᒥᑦ ᓴᓇᙳᐊᖅᑐᓕᕆᔨᒃᑯᑦ ᑎᑕᒃᑎᖏᑦ ᖃᖓᑦᑎᐊᓵᖅ ᐅᑭᐅᖅᑕᖅᑐᒥᐅᓄᙵᐅᖃᑦᑕᕐᓂᖏᓐᓂᑦ.
ᐃᖃᓗᐃᑦ ᐊᔾᔨᒌᙱᑦᑐᓂᒃ ᐅᒃᐱᕐᓂᖃᖅᑑᑎᖃᐅᖅᑐᖅ, ᐊᔾᔨᒌᙱᓐᓂᕐᒧᑦ ᐃᓄᖏᑦ. ᖃᔅᓯᐊᕐᔪᖕᓂᑦ ᑐᒃᓯᐊᕐᕕᒃᑕᖃᐅᖅᑐᖅ. ᖃᐅᔨᒪᔭᐅᓂᖅᐹᖅ ᐃᒡᓗᑎᑐᑦ ᓴᓇᓯᒪᔪᖅ ᓴᐃᓐᑦ ᔫᑦ ᐊᔪᕆᖅᓯᐃᔨᒃᑯᑦ ᑐᒃᓯᐊᕐᕕᖓᑦ, ᐊᔪᕆᖅᓯᐃᔨᒃᑯᑦ ᑐᒃᓯᐊᕐᕕᖓᑦ ᑲᓇᖕᓇᒥᑦ ᐅᑭᐅᖅᑕᖅᑐᒧᑦ. ᓄᓇᓕᖕᒥᐅᑕᐃᑦ ᓴᓇᓚᐅᖅᑕᖓᑦ ᑐᒃᓯᐊᕐᕕᖅᑲᐅᑕᐅᖑᓚᐅᖅᑐᖅ ᐱᒋᐊᓵᖅᑎᓪᓗᒋᑦ 1970-ᖏᓐᓂᑦ, ᐃᓂᐅᔪᒥᑦ ᑯᐃᓐ ᑕᐃᑯᙵᓚᐅᖅᓯᒪᔪᖅ ᕗᕉᐱᓴ ᐸᐃ-ᖑᑎᓪᓗᒍ. ᐱᐅᓴᖅᓯᒪᓪᓗᓂ ᐊᒥᓱᓂᒃ ᐊᔾᔨᐅᙱᑦᑐᓂᒃ ᐱᓕᕆᐊᖑᓯᒪᔪᓂᒃ, ᓲᕐᓗ ᓴᓐᓂᖓᔪᖅ ᓴᓇᓯᒪᔪᖅ ᑑᒑᓕᐅᑉ ᑑᒑᖏᓐᓂᒃ, ᐊᒻᒪᓗ ᑲᒥᒃᐸᒃᓴᐅᓪᓗᑎᒃ ᓴᓂᕋᕐᒦᑦᑐᑦ ᑐᓂᔭᐅᔪᑦ ᒥᖅᓱᖅᑎᓄᑦ ᐅᑭᐅᖅᑕᖅᑐᒥᑦ ᓄᓇᓕᖏᓐᓄᑦ, ᑐᒃᓯᐊᕐᕕᒃ ᓱᕋᓚᐅᖅᑐᖅ ᐃᑯᐊᓪᓚᒃᑎᑕᐅᓂᒃᑯᑦ 2005-ᒥᑦ. ᐊᖏᓂᖅᓴᖅ ᐊᒻᒪᓗ ᐅᓪᓗᒥᒨᖓᔪᖅ ᑐᒃᓯᐊᕐᕕᒃ ᓴᓇᔭᐅᓚᐅᖅᑐᖅ ᐃᑲᔪᖅᑕᐅᓪᓗᑎᒃ ᑲᓇᑕᓗᒃᑖᒥᒃ ᑮᓇᐅᔭᓂᒃ ᐱᕈᖅᑎᑦᑎᓂᒃᑯᑦ, ᐊᒻᒪᓗ ᑐᓂᐅᑕᐅᑲᓐᓂᓚᐅᖅᑐᖅ ᐊᒻᒪᓗ ᒪᑐᐃᖅᖢᓂ ᐱᔨᑦᑎᕋᐃᓂᕐᒧᑦ 2012-ᒥᑦ. ᐊᒥᓱᑦ ᐊᔾᔨᐅᔪᓂᑦ ᐃᖃᓗᖕᓂᑦ ᑕᑯᒃᓴᐅᔪᑦ ᑐᒃᓯᐊᕐᕕᑐᖃᖅ. ᓴᐃᓐᑦ ᓴᐃᒪᓐ ᑐᒃᓯᐊᕐᕕᖓ ᓂᐊᖁᙴᒥᑦ ᐊᔪᕆᖅᓱᐃᔨᒃᑯᑦ ᑐᒃᓯᐊᕐᕕᑐᖃᖓᑦ ᑕᐃᑲᓂ ᐊᒻᒪᓗ ᑕᐃᔅᓱᒪᓂᑐᖃᐅᓂᕐᒧᑦ ᑕᑯᒃᓴᐅᑎᑦᑎᔪᖅ ᒥᑭᑦᑐᒥᑦ ᑐᒃᓯᐊᕐᕕᖕᓂᑦ ᓴᓇᔭᐅᔪᑦ ᐅᑭᐅᖅᑕᖅᑐᒥᑦ ᑕᐃᔅᓱᒪᓂ ᐊᔪᕆᖅᓱᐃᔨᒃᑯᓐᓄᑦ. ᐊᔪᕆᖅᓱᐃᔨᒃᑯᑦ ᑐᒃᓯᐊᕐᕕᖓᑦ ᐃᖃᓗᖕᓂᑦ ᐊᑐᖅᑕᐅᖃᑦᑕᖅᑐᖅ ᐊᒥᓱᓄᑦ ᐃᓄᐃᑦ ᓄᓇᓕᖏᑦᑕ ᖁᕕᐊᓲᑎᖏᓐᓄᑦ, ᓲᕐᓗ ᑯᕕᐊᓱᒡᕕᖕᒥ ᐱᙳᐊᖅᑎᑦᑎᓂᕐᓄᑦ ᐊᒻᒪᓗ ᒧᒥᕐᓂᐅᔪᓄᑦ. ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓᑦ Our Lady of Assumption ᖁᕕᐊᓲᑎᖃᓚᐅᖅᑐᖅ 50 ᐅᑭᐅᓄᑦ ᑕᐃᒪᐅᓕᕐᓂᖓᓄᑦ 2009-ᒥᑦ. ᐊᑐᖅᑕᐅᒐᔪᒃᑐᒥᒃ ᑐᒃᓯᐊᖅᑎᓄᑦ ᐃᓂᑕᖃᖅᑐᖅ. ᐃᖃᓗᐃᑦ ᐸᓐᑎᑳᔅᑐᒃᑯᓐᓂ ᑐᒃᓯᐊᕐᕕᖃᖅᑐᖅ ᐊᒻᒪᓗ ᑐᒃᓯᐊᖅᑎᑦᑎᔨᐅᓪᓗᑎᒃ Northern Lights Ministries-ᓂᑦ.
ᐊᒻᒪᓗ, ᐃᖃᓗᐃᑦ ᐊᖏᕐᕋᕆᔭᐅᔪᖅ ᐸᕼᐃ-ᖑᔪᓄᑦ ᐊᒻᒪᓗ ᐸᕼᐃ ᐃᒡᓗᖁᑎᖓᑦ, ᒥᑭᑦᑐᒥ ᐸᕼᐃᖑᔪᓄᑦ ᐊᑐᖅᑕᐅᖃᑦᑕᖅᑐᖅ (ᐃᒡᓗᕐᔪᐊᕐᒥᒃ ᐊᑐᕐᓂᐊᖅᑕᖓᓐᓂᒃ ᒫᓐᓇᐅᔪᖅ ᓴᓇᔭᐅᔪᖅᑕᖃᖅᑐᖅ), ᐊᒻᒪᓗ Soto Zen mediation ᑲᑐᔾᔨᖃᑎᒌᒃᑕᖃᖅᖢᓂ, ᐊᒻᒪᓗ ᐊᑐᖅᑕᐅᖃᑦᑕᖅᓯᒪᔪᑦ ᐱᖅᑯᓯᕆᔭᐅᔪᑦ ᐃᓄᐃᑦ ᐊᖓᒃᑯᓕᕆᓂᐅᔪᑦ.
ᓄᓇᓕᓗᒃᑖᓂᑦ ᓄᓇᕗᒻᒥᑦ, ᐃᖃᓗᐃᑦ ᐊᔾᔨᒌᙱᑦᑐᓂᒃ ᐅᖃᐅᓯᖅᑕᖃᐅᓛᖑᔪᖅ. ᓄᓇᓕᖅᐸᐅᔭᐅᓂᖓᓂ ᑐᑭᖃᖅᑐᖅ ᐃᓄᐃᑦ ᓅᓯᒪᔪᑦ ᑕᐃᑯᖓ ᐱᓕᕆᐊᖅᑖᕐᓂᕐᒧᑦ ᓇᑭᓗᒃᑖᖅ ᓄᓇᕗᒻᒥᑦ ᐊᒻᒪᓗ ᑲᓇᑕᒥᑦ. ᖃᓪᓗᓈᑎᑐᑦ ᐅᖃᓪᓚᒃᑐᓂᒃ ᑐᓴᕐᓂᐊᖅᑐᑎᑦ, ᐃᓄᒃᑎᑐᑦ ᐊᒻᒪᓗ ᐅᐃᕖᑎᑐᑦ ᓯᓚᒥᑦ, ᐊᒻᒪᓗ ᐊᑎᓕᐅᖅᑕᐅᔭᕆᐊᓕᖕᓂᑦ ᑎᑎᖅᑲᓂᒡᓗ ᖃᓪᓗᓈᑎᑐᑦ, ᐃᓄᒃᑎᑐᑦ, ᐊᒻᒪᓗ ᐅᐃᕖᑎᑐᑦ, ᐊᒻᒪᓗ ᑕᐃᒪᐅᒐᔪᒃᑐᑦᑕᐅᖅ ᐃᓄᐃᓐᓇᖅᑐᓐ. 2011-ᒥᑦ ᓈᓴᐃᓂᖅ, 45%-ᖑᔪᑦ ᐃᓄᖏᑦ ᐅᖃᓚᐅᖅᑐᑦ ᐅᖃᐅᓯᑐᖃᕆᓪᓗᒍ ᖃᓪᓗᓈᑎᑐᑦ, 5%-ᖑᔪᑦ ᐅᐃᕖᑎᑐᑦ, 46%-ᖑᔪᑦ ᐃᓄᒃᑎᑐᑦ, ᐊᒻᒪᓗ 4%-ᖑᔪᑦ ᐊᓯᖏᑦ ᖃᓪᓗᓈᖑᔪᑦ ᐅᖃᐅᓯᖏᑦ, ᓲᕐᓗ Tagalog, Hindi ᐊᒻᒪᓗ ᔫᒪᓂ. ᖃᓪᓗᓈᑎᑐᑦ ᐅᖃᓪᓚᒃᑐᑦ ᑐᓴᖅᓴᐅᒐᔪᓛᖅ, ᓯᕗᓪᓕᖅᐸᐅᖕᒪᑦ ᐅᖃᐅᓯᕆᔭᐅᔪᖅ 68%-ᓗᐊᓄᑦ ᐃᓄᖏᓐᓄᑦ, ᐊᒻᒪᓗ ᐊᑐᖅᑕᐅᓪᓗᓂ 98%-ᖑᔪᓄᑦ ᐃᓄᖏᓐᓄᑦ. ᐃᓄᒃᑎᑐᑦ ᐅᖃᐅᓯᖅ ᐊᑐᖅᑕᐅᖃᑦᑕᖅᑐᖅ ᐅᖃᐅᓯᖅᑲᐅᑕᐅᒋᔭᐅᓪᓗᓂ ᐅᕝᕙᓘᓐᓃᑦ ᑐᒡᓕᕆᔭᐅᓪᓗᓂ ᐊᖏᕐᕋᒥᑦ 49%-ᖑᔪᓄᑦ ᐃᓄᖏᓐᓄᑦ. ᐃᖃᓗᐃᑦᑕᐅᖅ ᐊᒥᓱᓂᒃ ᐅᖃᐅᓯᖃᖅᑐᓂᒃ ᓄᓇᓕᖅᐸᐅᔭᐅᔪᖅ – 50%-ᖏᑦ ᖃᐅᔨᓴᖅᑕᐅᓚᐅᖅᑐᒥᑦ ᐅᖃᖅᑐᑦ ᐊᑐᕋᔪᖕᓂᖏᓐᓄᑦ ᐊᑕᐅᓯᐅᖏᑦᑐᒥᒃ ᐅᖃᐅᓯᕐᒥᒃ ᐊᖏᕐᕋᖓᓐᓂᑦ. ᑎᖕᒥᓲᒃᑯᑦ ᑎᑭᖃᑦᑕᖅᑐᓂᒃ ᑕᐃᑯᖓ ᐊᑯᓐᓂᖏᓐᓂᒃ ᐃᖃᓗᐃᑦ, ᐋᑐᕚ ᐊᒻᒪᓗ ᒪᓐᑐᕆᔮ-ᒧᑦ ᑐᓂᓯᔪᖅ ᐃᖃᓗᐃᑦ-ᒥᑦ ᕿᑎᐊᓃᓐᓂᖓᓄᑦ ᓄᓇᕗᑦ ᐅᐃᕖ ᐃᓅᖏᓐᓄᑦ. ᐊᖏᕐᕋᕆᔭᐅᔪᖅ ᓄᓇᒥᑦ ᐅᐃᕖᑎᑑᖅᑐᓄᑦ ᐃᓕᓴᕐᕕᖓᓐᓄᑦ, l’École des Trois Soleils, ᐊᒻᒪᓗ ᐅᐃᕖᑎᑑᖅᑐᒥᒃ ᓈᓚᒡᕕᖕᒧᑦ. L’Association des francophones du Nunavut (AFN) ᓇᖕᒥᓂᖃᖅᑐᑦ ᐅᐃᕖᖃᕐᕕᖕᒥᑦ ᐃᖃᓗᖕᓂᑦ, ᐊᒻᒪᓗ ᐋᖅᑭᒃᓱᐃᖃᑦᑕᖅᖢᑎᒃ ᐊᒥᓱᓂᒃ ᐃᖕᒥᖕᓅᖓᔪᓂᒃ ᐊᒻᒪᓗ ᐅᒃᑯᐃᖓᖃᑦᑕᖅᖢᑎᒃ ᑭᑐᑐᐃᓐᓇᓄᑦ ᖁᕕᐅᒋᔭᖃᖅᑐᓄᑦ ᐅᐃᕖᑦ ᑲᓇᑕᒥᐅᑕᐃᑦ ᐱᖅᑯᓯᖏᓐᓂᒃ. ᐃᓄᓗᒃᑖᓂᒃ ᑲᑎᒪᑎᑦᑎᓂᓗᒃᑖᖅᑲᔭᐃᑦ ᐊᒥᓱᓂᒃ ᐅᖃᐅᓯᖃᖅᑐᓅᖓᔪᓕᕆᔨᐅᔪᑦ, ᐱᓕᕆᐊᖑᑉᓗᑎᒃ ᖃᓪᓗᓈᑎᑐᑦ ᐊᒻᒪᓗ ᐃᓄᒃᑎᑐᑦ, ᐊᒻᒪᓗ ᐅᐃᕖᑎᑑᕋᔪᒃᖢᑎᒃᑕᐅᖅ. ᐃᓄᒃᑎᑐᑦ ᐅᖃᐅᓯᖅ (ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐊᑐᖅᑕᐅᔭᕆᐊᖃᖅᑐᓗᒃᑖᖑᔪᑦ ᐅᖃᐅᓰᑦ ᓄᓇᕗᒻᒥᑦ, ᐱᔪᓐᓇᐅᑎᖃᖅᑐᑎᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓄᑦ ᐅᖃᐅᓯᕐᒥᒃ ᐊᑐᕈᒪᔭᕐᓄᑦ.
ᐃᖃᓗᐃᑦ ᐃᓐᓇᐅᓛᖑᔪᓂᒃ ᐃᓄᖁᑎᖃᖅᑐᖅ ᓇᓂᑐᐃᓐᓇᖅ ᓄᓇᓕᐅᔪᓂᐅᖓᓂᑦ ᓄᓇᕗᒻᒥᑦ, ᒪᒃᑯᒃᑲᓗᐊᖅᑎᓪᓗᒍ ᓱᓕ ᐊᑐᖅᖢᒋᑦ ᐊᑐᖅᑕᐅᔪᑎᒍᑦ ᑲᓇᑕᒥᑦ. 2011-ᒥᑦ ᓈᓴᐃᓂᕐᒥᑦ ᓈᓴᖅᑕᐅᔪᑦ 615 ᐃᓕᓐᓂᐊᖏᑦᑐᑦ ᓱᓕ ᐊᒻᒪᓗ 1310 ᐃᓕᓐᓂᐊᖅᑐᑦ ᓱᕈᓰᑦ, 29%-ᖑᓪᓗᑎᒃ ᐅᑭᐅᓖᑦ 18 ᑐᖔᓂ, ᐊᑦᑎᖕᓂᖅᓴᑲᓪᓚᒃ 40-45%-ᖑᔪᓂᒃ ᐊᒥᓱᓂᒃ ᓄᓇᕗᒻᒥ ᓄᓇᓕᖏᓐᓂᑦ. ᕿᑎᐊᓃᑦᑐᑦ ᐅᑭᐅᓖᑦ ᓄᓇᓕᖅᐸᐅᔭᕐᒥᑦ 30.1-ᖑᔪᖅ ᐊᒻᒪᓗ 3%-ᑐᐃᓐᓇᐃᑦ ᐃᓄᖏᑦ ᐅᑭᐅᖃᖅᑐᑦ 65 ᐅᖓᑖᓄᑦ.
ᑮᓇᐅᔾᔭᒃᓴᔾᔪᑕᐅᔪᑦ ᐃᖃᓗᖕᓂᑦ ᑕᑯᒃᓴᐅᑎᑦᑎᔪᖅ ᐊᖏᓛᖑᓂᖓᓂᒃ ᓄᓇᕗᒻᒥᑦ, ᓄᓇᓕᖅᐸᐅᔭᖅ, ᐊᒻᒪᓗ ᐊᖏᓂᖅᓴᖅ ᐃᖏᕐᕋᔭᒃᑐᓕᕆᓂᕐᒧᑦ ᐊᑐᖅᑕᐅᔪᖅ ᑲᓇᖕᓇᖓᓂᑦ ᐅᑭᐅᖅᑕᖅᑑᑉ. ᐃᓚᒋᔭᐅᓪᓗᓂ ᐊᒥᓱᓄᑦ ᓈᓴᐅᑎᓄᑦ ᑲᓇᑕᐅᑉ ᐊᒻᒪᓗ ᓄᓇᕗᒻᒥ ᒐᕙᒪᒃᑯᓐᓂ ᐱᓕᕆᐊᑦ, ᐃᖃᓗᐃᑦ ᐱᓕᕆᖃᑦᑕᕐᒥᔪᖅ ᐊᔾᔨᒌᙱᑦᑐᓂᒃ ᑲᑐᔾᔨᖃᑎᒌᓂᒃ ᐱᔨᑦᑎᖅᑐᓂᒃ ᓄᓇᕗᒻᒥᑦ ᓱᓇᑐᐃᓐᓇᓂᒃ ᐅᕝᕙᓘᓐᓃᑦ ᐃᓄᐃᑦ ᐃᓄᖏᓐᓂᑦ ᐱᓗᐊᖅᑐᒥᑦ. ᐃᓚᐅᔪᑦ ᓄᓇᕗᒻᒥ ᐃᖅᑲᖅᑐᐃᔪᓕᕆᔨᒃᑯᑦ, ᕿᑭᖅᑕᓂ ᐋᓐᓂᐊᕐᕕᒃ, ᓄᓇᕗᒻᒥ ᑐᙵᕕᒃᑯᑦ (NTI), ᒐᕙᒪᒃᑯᑦ ᐃᓄᖕᓄᑦ ᑐᕌᒐᔪᖏᑦ ᒪᓕᒃᖢᒋᑦ ᓄᓇᕗᒻᒥ ᓄᓇᑖᓂᕐᒧᑦ ᐊᖏᖃᑎᒌᒍᑎ, ᓲᕐᓗ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ, ᐊᕕᒃᑐᖅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᑦ, ᐊᔾᔨᒌᙱᑦᑐᑦ ᑎᑎᕋᕐᕖᑦ ᑲᓇᑕᒧᑦ ᑎᒥᐅᔪᓄᑦ ᓲᕐᓗ ᓄᓇᕐᔪᐊᕐᒥᑦ ᐆᒪᔪᓕᕆᓂᕐᒧᑦ ᑮᓇᐅᔭᐃᑦ, ᐊᒻᒪᓗ ᐊᖏᓛᖅ ᓄᓇᕗᒻᒥ ᓯᓚᑦᑐᖅᓴᕐᕕᒃ, ᖃᔅᓰᓐᓇᐃᑦ ᑕᐃᓪᓗᒋᑦ. ᐃᖏᕐᕋᔭᒃᑐᓄᑦ ᑐᕌᖅᑕᕐᕕᐅᓪᓗᓂ, ᐃᖃᓗᐃᑦ ᑐᙵᕕᒋᔭᐅᔪᖅ ᐊᑐᖅᑕᐅᓗᐊᖅᑐᓂᒃ ᑎᖕᒥᓲᓂᒃ ᐊᒻᒪᓗ ᓵᑕᖅᓯᓂᕐᒧᑦ ᐱᔨᑦᑎᕋᐅᑏᑦ, ᐊᒻᒪᓗ ᐅᓯᖏᔭᐃᕝᕕᐅᓪᓗᓂ ᐅᒥᐊᕐᔪᐊᒃᑯᑦ ᑎᑭᑦᑐᓄᑦ. ᑎᖕᒥᓲᕐᔪᐊᑦ ᑲᑎᑎᑦᑐᐃᓐᓇᖃᑦᑕᖏᑦᑐᑦ ᒥᑭᓂᖅᓴᓂᒃ ᑎᖕᒥᓲᓂᒃ ᓯᕗᒻᒧᒃᑐᓂᒃ ᓄᓇᓕᖕᓄᑦ, ᑭᓯᐊᓂ ᓄᓇᕐᔪᐊᕐᒧᑦ ᑎᖕᒥᓲᖃᕐᕕᒃ ᑕᑯᓯᒪᔪᖅ ᐊᖏᒡᓕᒋᐊᖅᑐᒥᒃ ᐃᖏᕐᕋᔭᒃᑐᓂᒃ ᑕᕆᐅᑉ ᐊᑭᐊᓂᙶᖅᑐᓂᒃ ᐊᐅᔭᐅᑎᓪᓗᒍ, ᐃᓚᖏᑦ ᐊᑐᖅᖢᑎᒃ ᑲᓇᑕᐅᑉ ᑎᑭᑕᐅᓂᕐᒧᐊᖅᑐᓕᕆᔨᒃᑯᖏᓐᓄᑦ ᑲᓇᑕᒧᐊᕐᓂᕐᒧᑦ. ᖃᓇᑕᐅᑉ ᐅᓇᑕᖅᑐᒃᓴᖁᑎᖏᑦ ᐊᑐᖃᑦᑕᖅᑐᑦ ᒥᑦᑕᕐᕕᖕᒥᑦ ᓯᕗᒻᒧᑦ ᐊᐅᓛᖅᑎᑦᑎᓂᕐᒧᑦ ᐃᓂᒋᓪᓗᒍ, ᐊᒻᒪᓗ ᓄᓇᕐᔪᐊᕐᒥᑦ ᑎᖕᒥᓲᓕᐅᖅᑏᑦ ᐊᑐᖃᑦᑕᖅᑕᖓᑦ ᑎᖕᒥᓲᓂᒃ ᓂᒡᓚᓱᒃᑐᒧᑦ ᖃᐅᔨᓴᐃᓂᕐᒧᑦ ᐃᓂᒋᓪᓗᒍ. ᐊᒥᓱᑦ ᓇᖕᒥᓂᖃᖅᑎᐅᔪᑦ ᐱᕈᖅᓯᒪᓕᖅᑐᑦ ᐊᕐᕌᒍᓂᑦ ᐃᑲᔪᐃᓂᕐᒧᑦ ᐱᓕᕆᕝᕕᐅᓂᕐᒧᑦ ᐊᒻᒪᓗ, ᑕᐃᒪᓐᓇᒧᑦ, ᐃᖃᓗᐃᑦ ᑲᒪᒋᔭᖃᖃᑦᑕᖅᑐᖅ ᐊᔾᔨᒌᙱᑦᑐᓂᒃ ᐊᒻᒪᓗ ᐃᒻᒥᒃᑰᖓᔪᓂᒃ ᓇᖕᒥᓂᓕᖕᓂᑦ, ᓂᐅᕕᕐᕕᓕᖕᓂᑦ, ᑐᔪᕐᒥᕕᖕᓂᑦ, ᓂᕆᕝᕕᖕᓂᑦ ᐊᒻᒪᓗ ᖁᕕᐊᓱᒃᑎᑦᑎᓂᕐᒧᑦ ᐊᑐᖅᑕᐅᔪᓂᒃ.
ᐊᐅᓚᑦᑎᓂᖅ ᐊᒻᒪᓗ ᐃᖏᕐᕋᔭᒃᑐᓕᕆᓂᖅ ᐊᖏᔪᒥᒃ ᐱᕈᖅᐸᓪᓕᐊᑎᑦᑎᓂᖃᖅᑎᓪᓗᒍ ᑮᓇᐅᔾᔭᒃᓴᓂᐅᔪᒥᑦ, ᐅᔭᕋᖅᓯᐅᖅᑐᑦ ᐃᓂᐅᔪᒥᑦ ᐃᓕᓴᖅᓯᓯᒪᔪᑦ ᖃᔅᓯᐊᕐᔪᖕᓂᑦ ᐊᖏᔪᒥᒃ ᐱᕕᖃᕐᓂᐅᔪᓂᒃ ᐅᔭᕋᖕᓂᐊᖅᑐᓕᕆᓂᕐᒧᑦ ᐱᕙᓪᓕᐊᓂᕐᒥᒃ. ᐃᖏᕐᕋᔭᒃᑐᓕᕆᓂᖅ ᐊᒻᒪᓗ ᑎᑭᑦᑐᓐᓇᕐᓂᖅ ᐃᖃᓗᖕᓂᑦ ᐅᒡᓚᖅᑕᐅᒐᔪᖕᓂᖅᐹᖑᑎᑦᑎᔪᖅ ᐳᓚᕋᖅᑏᑦ ᑎᑭᑦᑕᖅᑕᖏᓐᓄᑦ, ᐊᒻᒪᓗ ᑲᑎᑎᑦᑎᓂᐅᖃᑕᐅᕐᓗᐊᓛᖑᔪᖅ ᐱᕈᖅᐸᓪᓕᐊᔪᒥᒃ ᐅᑭᐅᖅᑕᖅᑐᒥᑦ ᐅᒥᐊᕐᔪᐊᓕᕆᔨᓄᑦ ᐳᓚᕋᖅᑎᓄᑦ. ᓴᓇᙳᐊᖅᑐᓕᕆᔨᑦ ᐊᖏᔪᒥᒃ ᑐᓂᓯᖃᑕᐅᓯᒪᔪᑦ ᑮᓇᐅᔾᔭᒃᓴᓂᐅᔪᒥᑦ. ᐃᖃᓗᐃᑦ ᖁᕕᐊᒋᔭᖃᖅᑐᖅ ᖃᔅᓯᐅᓂᖏᑦᑕ ᐊᒥᓲᑎᒋᓂᖏᓐᓂᒃ ᐃᓄᖏᓐᓂᒃ ᐊᒻᒪᓗ ᑎᑭᑦᑕᖅᑐᐃᑦ ᑕᒪᕐᒥᒃ ᑐᓂᓯᔪᑦ ᓂᐅᕕᐊᒃᓴᖃᕐᓂᕐᒥᒃ ᒪᓂᒪᙱᑦᑐᓂᒃ ᒥᑭᓂᖅᓴᓂᑦ ᓄᓇᓕᖕᓂᑦ. ᑕᐃᒪᓐᓇᒧᑦ, ᓄᓇᓕᖕᒥᑦ ᑕᑯᔭᒃᓴᖃᕐᕖᑦ ᐱᔾᔪᔾᔨᔨᐅᔪᑎᑐᑦ ᐱᔪᑦ ᓄᓇᓕᖕᒥᑦ ᓴᓇᙳᐊᖅᑎᓄᑐᐃᓐᓇᐅᖏᑦᑐᖅ, ᑭᓯᐊᓂ ᓴᓇᙳᐊᖅᑎᓄᓪᓗ ᒥᑭᓂᖅᓴᓂᑦ ᓄᓇᓕᖕᓃᑦᑐᓂᒃ, ᑕᑯᔭᒃᓴᐅᑎᖃᕋᔪᒃᖢᑎᒃ ᑎᑎᕋᐅᔭᖅᓯᒪᔪᓂᒃ ᑲᑎᑕᖏᓐᓂᒃ ᑎᑎᕋᐅᔭᕐᕕᖕᓂᑦ ᐱᔪᓂᒃ ᐃᖃᓗᐃᑦ ᓯᓚᑖᓂᑦ. ᐊᒥᓱᑦ ᐃᖃᓗᖕᒥᐅᑕᐃᑦ ᐃᓚᐅᖃᑦᑕᖅᑐᑦ ᓱᓕ ᐱᖅᑯᓯᕆᔭᐅᔪᑎᒍᑦ ᐱᕈᖅᐸᓪᓕᐊᓂᕐᒥᒃ ᑐᓂᓯᓂᕐᒧᑦ ᖃᑕᙳᑎᖏᑦᑕ ᓂᕆᓂᐊᖅᑕᖏᓐᓄᑦ ᐊᒻᒪᓗ ᐃᓚᐅᓪᓗᑎᒃ ᑐᓂᖃᑦᑕᐅᑎᓂᕐᓂᒃ ᓂᕿᓂᒃ ᐋᖅᑭᐅᒪᔪᓄᑦ.
ᓄᓇᓕᖅᐸᐅᔭᖅ ᕿᑎᐊᓃᒻᒥᔪᖅ ᑮᓇᐅᔭᒃᑯᕕᓕᕆᓂᕐᒧᑦ ᑮᓇᐅᔭᓄᑦ ᐱᔨᑦᑎᕋᐃᓂᕐᓄᑦ ᐊᒻᒪᓗ ᒫᓐᓇᐅᔪᖅ ᐃᑲᔪᖅᑐᖅ ᖃᔅᓯᐊᕐᔪᖕᓂᑦ ᑮᓇᐅᔭᒃᑯᖃᕐᕕᒡᔪᐊᕐᓂᑦ ᐊᒻᒪᓗ ᑮᓇᐅᔭᖃᖅᑎᑦᑎᓂᕐᒧᑦ ᐱᔾᔪᔾᔨᔨᐅᔪᓂᒃ. ᑭᓯᐊᓂ, ᐊᒥᓱᑦ ᐃᓄᐃᑦ ᐊᑐᖃᑦᑕᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᒃᑯᕕᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᐊᒻᒪᓗ ᖃᕋᓴᐅᔭᒃᑯᑦ ᐊᑐᖅᑕᐅᖃᑦᑕᖅᑐᑦ ᐊᑮᑦᑐᖏᓐᓂᒃ ᐊᑭᓖᓂᕐᒧᑦ, ᐱᔾᔪᑎᒋᓗᐊᖅᖢᒍ ᑎᑎᖅᑲᓄᑦ ᐱᔨᑦᑎᕋᐅᑏᑦ ᓄᖅᑲᖓᑎᑦᑎᔪᓐᓇᖃᑦᑕᕐᒪᑕ ᓯᓚᕐᓘᑕᐅᔭᕌᖓᑦ. ᐊᑮᑦᑐᖅᓯᓂᕐᒧᑦ ᐊᐅᒃᑕᔫᑦ ᐊᒻᒪᓗ ᐊᐅᒃᑕᔫᑦ ᐊᒥᓱᓄᑦ ᐱᔭᐅᔪᓐᓇᖅᑐᑦ, ᐊᒻᒪᓗ ᖃᔅᓯᐊᕐᔪᖕᓂᒃ ᑮᓇᐅᔭᓂᒃ ᐊᒧᓯᔾᔪᑎᑕᖃᖅᖢᓂ ᓄᓇᓕᖅᐸᐅᔭᕐᒥᑦ (ᓲᕐᓗ, ᖃᖓᑕᓲᖃᕐᕕᖕᒥᑦ ᐊᒻᒪᓗ Astro Hill ᐃᓯᖅᑕᕐᕕᖕᒥᑦ).
ᐊᔾᔨᒌᙱᑦᑐᑦ ᐊᒻᒪᓗ ᐃᓂᒋᔭᖏᑦ ᐆᒪᔪᐃᑦ ᐃᖃᓗᖕᓂ ᖃᓂᒋᔭᖓᓂᑦ ᐊᔾᔨᒌᙱᖃᑦᑕᖅᑐᑦ ᐅᑭᐅᑉ ᐃᓚᖓᑎᒍᑦ. ᐃᓂᒋᔭᖓᓄᑦ ᐱᔾᔪᑎᒋᓪᓗᒍ ᕗᕉᐱᓴ ᐸᐃ ᖄᖓᓂᑦ, ᐃᖃᓗᐃᑦ ᐱᔪᓐᓇᕐᓂᖓ ᑕᕆᐅᕐᒥᐅᑕᓂᒃ ᐆᒪᔪᓂᒃ ᐅᑭᐅᒃᑯᑦ ᑭᒡᓕᖃᖅᑐᖅ ᐃᓂᐅᔪᓄᑦ ᓯᓈᓄᑦ ᐊᒻᒪᓗ ᑕᐃᑯᖓ ᕿᑭᖅᑖᓘᑉ ᐃᑭᖓᓄᑦ. ᓯᓈ ᓅᖃᑦᑕᐃᓐᓇᐅᔭᖅᑐᖅ ᐅᑭᐅᒃᑯᑦ, ᓂᒡᓕᓇᕐᓃᑦ ᒪᓕᒃᖢᒋᑦ, ᐊᓄᕆ, ᐊᒻᒪᓗ ᐅᓕᑦᑕᕐᓃᑦ, 30 ᐃᓯᒐᓪᓗᐊᓂ ᐅᖓᑖᓃᑦᑐᖅ. ᖃᑯᑎᒃᑯᑦ ᖃᐃᕈᓖᑦ, ᓇᑦᑏᑦ ᐊᒻᒪᓗ ᐅᒡᔪᐃᑦ, ᐊᐃᕖᑦ, ᕿᓚᓗᒐᐃᑦ, ᑑᒑᓖᑦ, ᐊᓯᖏᑦ ᕿᓚᓗᒐᐃᑦ, ᐊᒻᒪᓗ ᓇᓄᐃᑦ ᑕᐃᒪᐅᓲᑦ. ᑕᕆᐅᕐᒥᐅᑕᐃᑦ ᐃᖃᓗᐃᑦ ᑕᐃᒪᐅᔪᑦ ᐊᒥᓱᓂᑦ ᑰᖕᓂᑦ, ᐊᒻᒪᓗ ᐆᒐᐃᑦ ᐱᔭᐅᔪᓐᓇᖅᑐᑦ ᓂᒋᐊᓂᑦ ᑲᖏᖅᖣᑉ. ᑕᐃᒪᐅᖏᓐᓇᓲᑦ ᑐᓗᒐᕐᔪᐊᑦ ᐅᑭᐅᖑᑎᓪᓗᒍ, ᐃᓚᒋᔭᐅᖃᑦᑕᖅᑐᑦ ᐊᔾᔨᒌᙱᑦᑐᓄᑦ ᑕᕆᐅᕐᒥᐅᑕᓄᑦ ᐊᒻᒪᓗ ᓄᓇᒥᐅᑕᓄᑦ ᑎᖕᒥᐊᓄᑦ ᐊᐅᔭᐅᑎᓪᓗᒍ. ᐃᓚᐅᔪᑦ ᓇᐅᔭᔾᔪᐊᑦ, ᑭᒡᒐᕕᐊᕐᔪᐃᑦ ᐊᒻᒪᓗ ᐊᓯᖏᑦ ᓂᕿᑐᖅᑏᑦ, ᖁᐸᓄᐊᕐᔪᐃᑦ, ᑎᖕᒥᐊᑦ, ᒥᑏᑦ ᐊᒻᒪᓗ ᖃᐅᓪᓗᖅᑖᑯᓗᐃᑦ. ᒫᓐᓇᓕᓴᖅ, ᖃᔅᓯᐊᕐᔪᖕᓂᒃ ᑕᑯᔪᖃᓚᐅᖅᑐᖅ robin-ᓂᒃ ᐊᐅᔭᐅᑎᓪᓗᒍ, ᐃᓚᖏᓐᓄᑦ ᓇᓗᓇᐃᒃᑯᑕᐅᔪᖅ ᓯᓚ ᐊᓯᐊᙳᖅᐸᓪᓕᐊᓂᖓᓄᑦ. ᑐᒃᑐᐃᑦ ᓅᖃᑦᑕᖅᑐᑦ ᖃᓂᑦᑐᒥᑦ, ᐊᒻᒪᓗ ᒫᓐᓇᐅᔪᖅ ᐅᖓᓯᒃᑐᒦᖃᑦᑕᖅᑐᑦ, ᐊᖏᔪᒥᒃ ᐱᕕᖃᕐᓇᕆᐊᖃᖅᖢᓂ ᒪᖃᐃᑕᐅᓂᐊᕐᓗᑎᒃ. ᐊᓯᖏᑦ ᓄᓇᒥᐅᑕᐃᑦ ᐆᒪᔪᐃᑦ ᑕᐃᒪᐅᖕᒥᔪᑦ, ᐃᓚᐅᓪᓗᑎᒃ ᐊᕕᙵᐃᑦ, ᐅᑲᓕᐊᕐᔪᐃᑦ, ᑎᕆᒐᓂᐊᑦ ᑕᒪᓗ ᐊᒪᕈᐃᑦ.
ᐃᖃᓗᐃᑦ, ᑯᔭᓯᐅᑉ ᑕᓯᐅᔭᖓᓂ ᕗᕉᐱᓴ ᐸᐃ-ᒥᑦ ᓂᒋᖅᐸᓯᐊᓂᑦ ᕿᑭᖅᑖᓘᑉ, ᐅᑭᐅᖅᑕᖅᑐᒥᑦ ᓯᓈᖃᖅᑐᖅ. ᐅᑭᐅᑦ ᐃᒃᑮᖑᖃᑦᑕᖅᑐᑦ, ᖃᐅᑕᒫᑦ ᐊᑯᓐᓂᖏᓐᓃᒐᔪᒃᖢᑎᒃ -26ᵒC ᐊᒻᒪᓗ -28ᵒC ᑎᓯᐱᕆᒥᑦ ᕕᕗᐊᕆᒧᑦ, ᐊᒻᒪᓗ 215 ᐅᓪᓗᓂ ᓂᒡᓕᓇᕐᓂᖓ 0ᵒC ᐊᑖᓃᑉᐸᒃᖢᓂ. ᐊᐅᔭᒃᑯᑦ, ᐆᓇᕐᓂᖏᑦ ᕿᑎᕈᔪᐊᓃᖃᑦᑕᖅᑐᑦ, ᖁᑦᑎᖕᓂᖅᐹᖑᒐᔪᒃᑐᖅ 11.6ᵒC ᔪᓚᐅᒥᑦ, ᐆᓇᕐᓃᑦ ᖁᑦᑎᖕᓂᖅᓴᐅᔪᓐᓇᕋᓗᐊᖅᑐᑦ ᐊᒻᒪᓗ ᐃᓛᓐᓂᒃᑯᑦ 20ᵒC ᐅᖓᑖᓄᐊᕈᓐᓇᖃᑦᑕᖅᑐᑦ. ᒪᖁᖃᑦᑕᕐᓂᖓ ᐊᕐᕌᒍᒥ 198.3 mm-ᖑᒐᔪᒃᑐᖅ ᐊᒻᒪᓗ 235.8 cm-ᖑᑉᓗᓂ ᐊᐳᑎ, ᒪᖁᖕᓂᖃᖃᑦᑕᖅᖢᓂ ᑕᕆᐅᕐᒥᑦ ᓯᑯ ᐊᐅᒃᑳᖓᑦ ᐊᐅᔭᒃᑯᑦ. ᑕᕆᐅᒥᑦ ᓯᑯ ᓯᖁᑦᑎᓕᖃᑦᑕᖅᑐᖅ ᔪᓚᐃᒥᑦ ᐊᒻᒪᓗ ᓯᑯᒃᑲᓐᓂᖅᖢᓂ ᑎᓯᐱᕆᒥᑦ, ᓯᑯᖃᑦᑕᕐᓂᐅᔪᖅ ᐊᑐᖃᑦᑕᕐᓂᖅ ᐊᔪᕐᓇᕐᓂᖅᓴᐅᓕᕋᓗᐊᖅᖢᓂ ᒫᓐᓇᓵᕐᓚᒃ ᐊᕐᕌᒎᔪᓂᑦ. ᐃᖃᓗᐃᑦ ᐊᓄᕆᖃᐃᓐᓇᐅᔭᓲᖅ, 15 ᑭᓛᒥᑕᓂᒃ ᐃᑲᕐᕋᑕᒫᑦ ᓇᑭᕐᓂᖃᕋᔪᒃᖢᓂ ᐊᕐᕌᒍᓗᒃᑖᒥᑦ. ᐊᓄᕆᒧᑦ ᓂᒡᓕᓇᕐᓃᑦ -40ᵒC-ᒥᑦ -60ᵒC-ᒨᖓᒐᔪᒃᑐᑦ ᐅᑭᐅᑯᑦ, ᐊᒻᒪᓗ ᐱᖅᓯᕌᖓᑦ ᓄᓇᓕᖅᐸᐅᔭᕐᒥᑦ ᓄᖅᑲᖓᑎᑦᑎᓲᖅ ᑕᑯᒃᓴᐅᑦᑎᐊᖏᓐᓂᖅ ᐱᔾᔪᑎᒋᓪᓗᒍ ᐊᒻᒪᓗ ᐱᖅᑐᖅ. ᒫᓐᓇᐅᔪᖅ ᓯᓚᐅᑉ ᖃᓄᐃᓐᓂᖏᑦ ᐊᒻᒪᓗ ᓇᓚᐅᑖᖅᑕᐅᔪᑦ ᐃᖃᓗᖕᓄᑦ ᓴᖅᑭᑕᐅᖃᑦᑕᖅᑐᑦ ᐊᕙᑎᓕᕆᔨᒃᑯᑦ ᑲᓇᑕᐅᑉ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖓᓐᓂᑦ.
ᐃᓄᐃᑦ ᒪᓂᒻᒥᖅᑐᕈᓐᓇᕐᓂᖓ ᓂᒡᓚᓱᖕᓂᕐᒥᑦ ᐊᔾᔨᒌᙱᑦᑐᑦ ᐊᑐᕐᓂᑯᖏᑦᑎᒍᑦ, ᑭᓯᐊᓂ ᐅᖅᑯᔪᓂᒃ ᐊᓐᓄᕌᖃᕆᐊᖃᖅᑐᑦ ᐊᒥᓱᓄᑦ ᑕᖅᑭᓄᑦ ᐊᕐᕌᒎᑉ ᐃᓗᐊᓂᑦ. ᓄᓇᕗᒻᒧᑦ ᓅᓐᓂᐊᕈᕕᑦ, ᓇᒃᓴᕐᓂᐊᖅᐳᑎᑦ ᐊᑐᕆᐊᖃᖅᑐᓂᒃ ᐅᑭᐅᒃᑯᑦ ᐊᓐᓄᕌᓂᒃ. ᐃᓛᓐᓂᒃᑯᑦ ᓂᐅᕕᕈᓐᓇᕋᓗᐊᖅᖢᓂ ᐊᒡᒐᒧᑦ ᓴᓇᔭᐅᔪᓂᒃ ᐊᓐᓄᕌᓂᒃ, ᓲᕐᓗ ᔭᐸᓂᒃ ᐊᒻᒪᓗ ᐳᐊᓗᓂᒃ, ᓄᓇᓕᖕᒥᑦ ᒥᖅᓱᖅᑎᐅᔪᓂᒃ, ᐱᔨᑦᑎᕐᓂᖏᑦ ᐊᑐᐃᓐᓇᐅᖏᓐᓇᐅᔪᓲᖑᖏᑦᑐᑦ, ᐊᒻᒪᓗ ᑕᒪᒃᑯᐊ ᐅᑭᐅᒃᑯᑦ ᐊᓐᓄᕌᕆᔭᐅᓲᑦ ᑕᐃᒪᐅᖃᑦᑕᖅᑐᑦ ᓂᐅᕕᕐᕕᖕᓂᑦ, ᑭᓯᐊᓂ ᑭᒡᓕᖃᕈᓐᓇᖅᑐᑦ.
63 degrees ᑐᑭᓕᕇᒃᑐᓄᑦ, ᐃᖃᓗᐃᑦ “ᐅᐊᖕᓇᖓᓂᑦ 60”-ᒦᑦᑐᖅ ᑭᓯᐊᓂ ᓄᓇᒥᑦ ᐅᓐᓄᒃᑯᑦ ᓯᕿᓂᕐᒦᙱᐊᕐᔪᒃᑐᖅ. ᐊᐅᔭᒃᑯᑦ, ᓯᕿᓂᖅ ᑕᓕᐊᕐᔪᓲᖅ, ᑖᓗᕿᖦᖢᓂ ᐃᑲᕐᕋᓄᑦ ᐱᖓᓱᓄᑦ ᑎᓴᒪᓄᓪᓘᓐᓃᑦ. ᐅᑭᐅᑯᑦ, ᓯᕿᓂᖅ ᓴᖅᑭᓯᒪᓚᐅᐱᓪᓚᓲᖅ ᖃᔅᓯᐊᕐᔪᖕᓄᑦ ᐃᑲᕐᕋᓄᑦ ᐅᓪᓗᒃᑯᑦ, ᑕᑭᔪᒥᒃ ᑖᖅᓯᕙᓪᓕᐊᓂᖃᖅᖢᓂ ᐊᒻᒪᓗ ᑖᕐᓂᒥᒃ.
ᐃᖃᓗᐃᑦ ᐊᒥᓲᓛᕐᓂᑦ ᐊᔾᔨᒌᙱᑦᑐᓂᒃ ᐃᒡᓗᕐᔪᐊᖃᐅᖅᑐᖅ ᓄᓇᕗᒻᒥᑦ, ᐃᓚᐅᓪᓗᑎᒃ 6-ᖑᔪᑦ ᐊᒻᒪᓗ 8-ᖑᔪᑦ ᖃᓕᕇᓖᑦ ᑲᑎᙵᔪᑦ ᐃᒡᓗᕐᔪᐊᑦ ᓄᓇᓕᖅᐸᐅᔭᐅᑉ ᕿᑎᐊᓂᑦ. ᓴᓇᔭᐅᓂᖏᑦ ᓄᑖᑦ ᐃᒡᓗᕐᔪᐊᑦ ᑲᔪᓯᔪᖅ ᑎᑭᐅᑎᓂᕐᒧᑦ ᐱᔭᐅᔪᒪᔪᑦ ᓄᓇᓕᖅᐸᐅᔭᖅ ᐱᕈᖅᐸᓪᓕᐊᓂᖓ ᒪᓕᒃᖢᒍ. 2011-ᒥᑦ ᓈᓴᐃᓂᕐᒥᑦ, 2365-ᖑᔪᓂᑦ ᓇᖕᒥᓂᕆᔭᐅᔪᓂᑦ ᓈᓴᖅᑕᐅᔪᑦ, 675-ᖑᔪᑦ ᐊᑕᐅᓯᐅᓕᖓᔪᑦ. 155 ᑲᑎᙵᔪᑦ ᐃᒡᓗᕐᔪᐊᑦ ᑕᓪᓕᒪᐅᓪᓗᑎᒃ ᐅᖓᑖᓄᓪᓘᓐᓃᑦ ᖁᓕᕇᓖᑦ, 740 ᑲᑎᙵᔪᑦ ᐃᒡᓗᕐᔪᐊᑦ ᑕᓪᓕᒪᐃᑦ ᑐᖔᓂᑦ ᖁᓕᕇᓖᑦ, 20 ᒪᕐᕉᒃ ᑲᑎᙵᔪᑦ, 195 ᐊᕕᒃᓯᒪᔪᑦ ᐃᒡᓗᕐᔪᐊᑦ, ᐊᒻᒪᓗ 585 ᓴᓂᓕᕇᒃᑐᑦ ᐃᒡᓗᕐᔪᐊᑦ. ᖃᔅᓯᑲᓪᓚᒻᒪᕇᑦ ᐃᓄᐃᑦ ᐃᖃᓗᖕᓂᑦ ᓇᖕᒥᓂᖃᖅᑐᑦ – ᓇᑉᐸᐅᑉ ᓇᑉᐸᒃᑲᓂᖏᖅᑲᔭᐃᑦ ᐊᖏᕐᕋᕆᔭᐅᔪᓂᑦ ᐃᒡᓗᕐᔪᐊᓂᑦ, ᒪᓕᒃᖢᒋᑦ ᓄᓇᕗᒻᒥ ᐱᕈᖅᐸᓪᓕᐊᓂᕐᒧᑦ ᐱᕙᓪᓕᐊᓂᕐᒧᑦ ᑲᑐᔾᔨᖃᑎᒌᒃᑯᑦ. ᐃᓚᖏᑦ ᑕᐃᒪᓐᓇᐃᓯᒪᔪᒃᓴᐅᔪᑦ 20 ᐊᕐᕌᒍᑦ ᐅᖓᑖᓄᑦ, ᐊᒻᒪᓗ ᐃᓚᖏᓐᓄᑦ, ᓇᖕᒥᓂᖃᖅᑐᐃᑦ ᑐᓂᓯᒪᔭᒃᓴᕆᔭᖓᑦ ᑐᒡᓕᐊᓄᑦ ᐱᖓᓱᖓᓐᓄᓪᓘᓐᓃᑦ ᑭᖑᕚᖓᓐᓄᑦ. ᐊᖏᕐᕋᕆᔭᐅᔪᑦ ᓂᐅᕕᐊᒃᓴᙳᖅᑎᑕᐅᒐᔪᒃᑐᑦ, ᐊᒻᒪᓗ ᓂᐅᕕᕈᒪᒍᕕᑦ ᐊᖏᕐᕋᒥᒃ, ᓄᓇᕗᒻᒧᓗᒃᑖᖅ ᐊᖏᕐᕋᒥᒃ ᓂᐅᕕᕐᓂᕐᒧᑦ ᑐᕌᖓᔪᖅᑕᖃᖅᑐᖅ ᐃᑲᔪᐃᔪᓐᓇᖅᑐᖅ ᑮᓇᐅᔭᒥᒃ ᑎᑭᐅᑎᒍᕕᑦ ᑮᓇᐅᔭᖅᑖᖅᑎᑕᐅᓂᕐᒧᑦ ᐋᖅᑭᐅᒪᔪᒥᒃ. ᐃᖃᓗᐃᑦᑕᐅᖅ ᓄᓇᓕᑐᐊᖑᔪᖅ ᐊᖏᔪᒥᒃ ᐊᑐᖅᑐᐊᕐᓂᕐᒧᑦ ᑐᕌᖓᔪᒥᒃ ᐊᑭᖃᙱᖦᖢᒍ. ᐱᓕᕆᕝᕕᐅᔪᑦ ᐃᑲᔪᐃᖃᑦᑕᕋᓗᐊᖅᑎᓪᓗᒋᑦ ᐊᑭᐅᔪᒧᑦ ᐊᑐᖅᑐᐊᕐᓂᕐᒥᒃ ᐃᒡᓗᕐᔪᐊᕐᒥᑦ, ᐃᒡᓗᕐᔪᐊᖃᖅᑎᑕᐅᖏᓐᓇᕐᓇᙱᑦᑐᖅ ᐱᓕᕆᐊᖅᑖᒧᑦ ᐃᖃᓗᖕᓂᑦ ᐊᒻᒪᓗ ᐅᑕᖅᑭᔪᑦ ᒐᕙᒪᒃᑯᓐᓄᑦ ᓯᕗᓪᓕᖅᐸᐅᑎᔭᐅᔪᒨᓕᖓᔪᑦ, ᐱᔨᑦᑎᕋᐃᔭᕆᐊᖃᕐᓂᐅᔪᓄᑦ ᐱᓕᕆᔩᑦ ᓯᕗᓪᓕᖅᐸᐅᑎᔭᐅᓯᒪᓪᓗᑎᒃ. ᐊᐱᕆᓗᒍ ᐱᓕᕆᕝᕕᒋᔭᐃᑦ ᐃᒡᓗᕐᔪᐊᕐᒧᑦ ᐃᑲᔫᑎᓂᒃ ᐱᓕᕆᐊᕐᓄᑦ ᐊᒻᒪᓗ ᐊᑭᖓᓄᑦ. ᐊᐱᕆᓗᒍᓗ ᓈᒻᒪᒃᑐᒥᒃ ᐃᒡᓗᕐᔪᐊᕐᒧᑦ ᓇᓪᓕᐅᑯᒫᒥᒃ ᐱᔪᒪᓗᑎᑦ. ᓂᕐᔪᑎᖁᑎᖃᕈᕕᑦ, ᓂᕐᔪᑎᖃᖅᑐᓄᑦ ᐃᓂᖃᕐᓂᕐᒥᒃ ᓇᓗᓇᐃᖅᓯᒪᑦᑎᐊᕋᔭᖅᑐᖅ ᐃᒡᓗᑖᕐᓂᕐᒧᑦ ᑕᑕᑎᕈᑎᒥᑦ ᐅᕝᕙᓘᓐᓃᑦ ᑎᑎᖅᑲᐅᑎᓂᑦ. ᐃᖃᓗᐃᑦ ᒫᓐᓇᐅᔪᖅ ᓄᓇᓕᑐᐊᖑᔪᖅ ᓄᓇᕗᒻᒥᑦ ᓂᕐᔪᑎᓄᑦ ᐃᓗᐊᖅᓴᐃᔨᒥᒃ.
ᐃᖃᓗᐃᑦ ᓇᓃᓐᓂᖓᓃᓐᓂᖅ ᒪᓕᒃᖢᒍ, ᓄᓇᖃᕐᓂᕐᒧᑦ ᐱᔨᑦᑎᕋᐅᑏᑦ ᐃᒪᕐᒧᑦ ᐊᓇᕐᕕᖕᓄᓪᓗ ᑐᓂᔭᐅᔪᓐᓇᖅᑐᑦ ᐅᑯᓇᙵᑦ “ᑯᕕᔪᓕᕆᓂᖅ”, ᐋᖅᑭᐅᒪᔪᖅ ᓱᓪᓗᓖᑦ ᐋᖅᑭᐅᒪᔪᑦ ᐱᓕᕆᐊᖃᕐᓂᕐᒧᑦ ᐅᑭᐅᖅᑕᖅᑐᒥᑦ ᖁᐊᖑᐃᓐᓇᐅᔭᖅᑐᓄᑦ ᖃᓄᐃᓕᖓᓂᐅᔪᓄᑦ, ᐅᕝᕙᓘᓐᓃᑦ ᓄᓇᒃᑰᕈᑎᒃᑯᑦ. ᖃᐅᔨᒋᐊᕐᕕᒋᓗᒋᑦ ᓄᓇᓕᖅᐸᐅᔭᐅᑉ ᐃᓄᓗᒃᑖᓄᑦ ᐱᓕᕆᔨᒃᑯᖏᑦ ᓇᓗᓇᐃᔭᖅᓯᒪᔪᓂᒃ ᐱᓂᐊᕐᓗᑎᑦ. ᓄᓇᒃᑰᕈᑎᒃᑯᑦ ᐱᔨᑦᑎᕋᖅᑕᐅᖃᑦᑕᕈᕕᑦ, ᐊᖏᕐᕋᐃᑦ ᐃᒪᐅᓯᕝᕕᖃᕐᓂᐊᖅᑐᑦ ᐊᒻᒪᓗ ᐊᓇᕐᕕᐅᓯᕝᕕᖃᕐᓗᓂ, ᑕᑕᑕᐅᖃᑦᑕᖅᑐᑦ ᐊᒻᒪᓗ ᒥᓪᓗᐊᖅᑕᐅᓪᓗᑎᒃ ᒪᓕᒃᖢᒍ ᖃᖓᒃᑰᖃᑦᑕᕐᓂᖅ. ᐃᓄᐃᑦ ᓄᓇᒃᑰᕈᑎᓂᒃ ᐊᑐᖃᑦᑕᖅᑐᑦ ᐅᔾᔨᕈᓱᖕᓂᖃᕆᐊᖃᖃᑦᑕᖅᑐᑦ ᐊᑐᕐᓂᖓᓐᓂᒃ ᐃᒪᕐᒥᒃ, ᐊᑭᐅᔪᑦ ᐃᓚᓯᓂᕐᒧᑦ ᐊᑭᓕᒐᒃᓴᙳᖅᑎᑕᐅᔪᓐᓇᕐᒪᑕ ᐃᒻᒥᖅᑕᐅᑲᓐᓂᕆᐊᖃᖅᐸᑦ ᐅᕝᕙᓘᓐᓃᑦ ᒥᓪᓗᐊᖅᑕᐅᒃᑲᓐᓂᕆᐊᖃᖅᐸᑦ. ᓄᓇᓕᖅᐸᐅᔭᖅ ᐊᒃᑕᑯᓂᒃ ᑲᑎᖅᓱᐃᓂᕐᒧᑦ ᐱᔨᑦᑎᕋᐅᑎᖃᕐᒥᔪᖅ. ᐊᖏᕐᕋᕆᔭᐅᔪᓗᒃᑖᖅᑲᔭᐃᑦ ᐅᖅᑰᓴᖅᑕᐅᕙᒃᐳᑦ ᐃᒃᑲᒃᓴᐅᑎᓄᑦ ᐊᒻᒪᓗ ᐅᖅᓱᖅ ᑯᐊᐳᕇᓴᒃᑯᑦ ᓄᓇᓕᖕᒥᑦ ᐅᖅᓱᐊᓗᖕᒥᑦ ᐱᑎᑦᑎᔨᐅᔪᖅ. ᐃᑯᒻᒪᖅᑯᑎᖃᕐᓂᖅ ᑐᓂᔭᐅᖃᑦᑕᖅᑐᖅ ᖁᓪᓕᒃᑯᑦ ᓄᓇᓕᖕᒥᑦ ᐆᒻᒪᖅᑯᑎᖓᓐᓄᑦ. ᑕᒪᐃᓐᓂᒃ ᐅᖃᓘᑎᓕᕆᓃᑦ ᑎᑭᖃᑦᑕᖅᑐᑦ ᓄᓇᕗᒻᒧᑦ ᖃᖓᑦᑕᖅᑎᑕᐅᓯᒪᔪᒃᑯᑦ. ᐅᖃᓘᑎᒧᑦ ᐱᔨᑦᑎᕋᐅᑏᑦ ᒪᓂᒪᔪᑦ ᓄᐊᑦᕕᔅᑎᐅᓪ-ᑯᓐᓂᑐᐃᓐᓇᖅ. ᑭᒡᓕᖃᖅᑐᓂᒃ ᐅᖃᓘᑎᕋᓛᓂᒃ ᐱᔨᑦᑎᕋᐃᓂᕐᓂᑦ ᒪᓂᒪᔪᖃᖅᑐᖅ, ᖃᔅᓯᐊᕐᔪᖕᓂᑦ ᐱᔨᑦᑎᕋᐃᓂᕐᒥᒃ ᑐᓂᓯᖃᑦᑕᖅᑐᓂᑐᐃᓐᓇᖅ. ᐅᖃᓘᑎᕋᓛᒥᒃ ᐊᑐᖃᑦᑕᕈᕕᑦ, ᖃᐅᔨᒋᐊᕐᕕᒋᓗᒍ ᑐᓂᓯᖃᑦᑕᖅᑐᖅ ᐱᔨᑦᑎᕋᐅᑎᒥᒃ ᐃᓚᐅᑎᑦᑎᖕᒪᖔᑦ ᓄᓇᕗᒻᒥᑦ. ᖃᕋᓴᐅᔭᒧᑦ ᐱᔨᑦᑎᕋᐅᑎ ᐊᑐᐃᓐᓇᐅᕗᖅ ᓄᓇᓕᖕᒥᑦ ᐱᔨᑦᑎᕋᐃᔨᓂᒃ (ᕿᓂᖅ,ᓄᐊᑦᕕᔅᑎᐅᓪ-ᑯᑦ DSL-ᖓᑦ), ᑭᒡᓕᖃᖅᖢᓂ ᐃᓂᐅᔪᖅ, ᐅᕝᕙᓘᓐᓃᑦ ᐊᖏᕐᕋᒧᑦ ᖃᖓᑦᑕᖅᑎᑕᐅᓯᒪᔪᒥᑦ (Xplornet), ᐊᔾᔨᐅᙱᑦᑐᒥᒃ ᐋᖅᑭᒃᓯᓂᖃᕆᐊᖃᖅᑐᖅ ᖃᖓᑦᑕᖅᑎᑕᐅᓯᒪᔪᒥᒃ ᐊᕙᑉᓯᓛᒥᒃ ᐃᓕᓯᓗᑎᒃ. ᓴᕕᒐᐅᔭᑎᒍᑦ ᑕᓚᕖᓴᐃᑦ ᑐᓂᔭᐅᖃᑦᑕᖅᑐᖅ ᐃᖃᓗᐃᑦ ᓴᕕᒐᐅᔭᒃᑯᑦ ᑕᓚᕖᓴᓕᕆᔨᒃᑯᖏᓐᓄᑦ ᐊᒻᒪᓗ ᐊᖏᕐᕋᒧᑦ ᖃᖓᑦᑕᖅᑎᑕᐅᓯᒪᔪᒥᑦ ᑕᓚᕖᓴᐃᑦ ᐱᐅᓪ ᑲᓇᑕᒃᑯᓐᓂᑦ ᑕᓚᕖᓴᓕᕆᔨᒃᑯᓐᓄᑦ.
ᓄᓇᓕᖕᒥᑦ ᓂᐅᕕᐊᒃᓴᐃᑦ, ᓱᕋᖅᓴᕋᐃᑦᑐᑦ ᐊᒻᒪᓗ ᓂᐅᕕᖅᑕᐅᓲᑦ ᐱᖁᑏᑦ ᐊᑐᐃᓐᓇᐅᔪᑦ ᖃᔅᓯᐊᕐᔪᖕᓂᑦ ᓂᐅᕕᕐᕕᖕᓂᑦ. ᐊᖏᔪᒥᒃ ᓂᐅᕕᕐᕕᒃᑕᖃᖅᑐᖅ ᓂᐅᕕᕐᕕᕋᓛᖃᐅᖅᖢᑎᒃ ᐊᓯᖏᓐᓂᑦ ᐃᓂᐅᔪᓂᑦ. ᑳᐱᑖᕐᕕᒃ ᒥᒻ ᕼᐅᐊᑎᓐ-ᑯᑦ ᓯᕗᓪᓕᖅᐹᖅ ᓄᓇᕗᒻᒥ ᓂᐅᕕᕐᕕᖕᒦᑦᑐᖅ, ᐊᒻᒪᓗ Quick Stop-ᖓᑦ. ᐋᒃᑎᒃ ᕙᓐᓱᔅ, ᓂᐅᕕᕐᕕᒃ ᓂᕿᓄᑦ ᐊᒻᒪᓗ ᐱᖁᑎᓄᑦ, ᓂᐅᕕᖅᑕᐅᓚᐅᖅᑐᖅ ᑯᐊᐸᒃᑯᓐᓄᑦ 2012-ᒥᑦ ᖃᐅᔨᒪᔭᐅᓕᖅᑐᖅ Marketplace-ᒥᒃ. ᕿᑭᖅᑕᓂᑦ ᐃᐳᐃᑐᓕᕆᔨᒃᑯᑦ ᐱᐅᒋᔭᐅᔫᒻᒪᕆᐅᒋᕗᖅ ᓂᕿᓄᑦ ᓂᐅᕕᕐᕕᒃ. ᓄᑖᑦ, ᓲᕐᓗ ᐃᒻᒧᐃᑦ, ᐸᓚᐅᒑᑦ, ᐱᕈᖅᑐᐃᑦ ᐊᒻᒪᓗ ᓂᖀᑦ ᑕᐃᒪᐅᒐᔪᒃᑐᑦ ᐊᕐᕌᒍᓗᒃᑖᒥᑦ ᓂᐅᕕᕐᕕᖕᓂᑦ ᐊᒻᒪᓗ ᐃᐳᐃᑦᑐᒦᑦᑐᑦ, ᖁᐊᖑᔪᑦ ᐊᒻᒪᓗ ᐱᖁᑏᑦ, ᐱᑕᖃᙱᓕᖃᑦᑕᖅᑑᒐᓗᐊᑦ ᑎᖕᒥᓲᒃᑰᖅᑐᑦ ᓄᖅᑲᖓᒃᐸᑕ ᓯᓚᕐᓘᑎᒧᑦ. ᓂᐅᕕᕐᕕᖕᓂᑦ ᐊᐅᓚᑦᑎᔩᑦ ᐃᓛᓐᓂᒃᑯᑦ ᑎᑭᓴᐃᔪᓐᓇᖃᑦᑕᖅᑐᑦ ᐊᔾᔨᐅᖏᑦᑐᓂᒃ ᐱᖁᑎᓂᒃ ᐱᔭᐅᔪᒪᔪᒪᒃᐸᑕ. ᓂᐅᕕᐊᒃᓴᓕᐊᖑᔪᑦ “ᐃᓄᐃᑦ ᓂᕿᖏᑦ” (ᐆᒪᔪᐃᑦ ᐊᖑᓇᓱᒃᑕᐅᔪᑦ ᓂᕿᒋᔭᐅᓂᐊᕐᓗᑎᒃ), ᓲᕐᓗ ᑐᒃᑐ, ᐃᖃᓗᒃ ᐅᕝᕙᓘᓐᓃᑦ ᓇᑦᑎᖅ, ᐃᓛᓐᓂᒃᑯᑦ, ᓴᖅᑭᑕᐅᓲᑦ ᓂᐅᕕᕐᕕᖕᓂᑦ. ᐊᑐᐃᓐᓇᐅᑐᐃᓐᓇᕆᐊᖃᖅᑐᑦ ᐃᖃᓗᒃᑖᕐᕕᖕᒥ ᐱᑕᖃᕌᖓᑕ. ᑭᓯᐊᓂ, ᐱᔪᒪᒍᕕᑦ, ᐆᒃᑐᕈᓐᓇᕐᒥᔭᑎᑦ ᓂᖀᑦ ᒪᒪᖅᑐᑦ ᐊᒻᒪᓗ ᓂᕿᑦᑎᐊᕙᐃᑦ ᓄᓇᓕᖕᓂᑦ ᓂᕆᕕᒡᔪᐊᖅᑐᓂᑦ ᐊᒻᒪᓗ ᖃᑯᑎᒃᑯᑦ ᐱᔪᓐᓇᖅᖢᒋᑦ ᓄᓇᓕᖕᓂᑦ ᐊᖑᓇᓱᒃᑎᐅᔪᓂᒃ. ᐃᖃᓗᐃᑦ ᖃᔅᓯᐊᕐᔪᖕᓂᑦ ᓂᕆᕝᕕᒃᑕᖃᐅᖅᑐᖅ, ᑕᒪᕐᒥᑲᓴᐃᑦ ᑐᔪᕐᒥᕕᖕᓃᖦᖢᑎᒃ, ᐊᒻᒪᓗ ᐃᒑᓚᔪᓂᑦ.
ᐊᒥᓱᐃᑦ ᓂᐅᕕᕐᕖᑦ ᐊᒻᒪᓗ ᓴᓇᙳᐊᒐᖃᕐᕖᑦ ᑐᓂᓯᖃᑦᑕᖅᑐᑦ ᓄᓇᓕᖕᒥᑦ ᓴᓇᙳᐊᖅᑕᐅᔪᓂᒃ. ᐊᒥᓲᓂᖅᓴᓂᒃ ᓂᐅᕕᐊᒃᓴᓂᒃ ᐱᑕᖃᐅᖃᑦᑕᖅᑐᖅ ᐃᖃᓗᖕᓂᑦ ᐊᓯᖏᓐᓂᑦ ᓄᓇᓕᖕᓂᐅᔪᓂᑦ ᓄᓇᕗᒻᒥᑦ, ᐃᓚᐅᓪᓗᑎᒃ ᑲᑉᐳᔾᔭᓅᖅᑐᑦ ᐊᒻᒪᓗ ᐊᖏᕐᕋᒥᑦ ᐱᖁᑎᒋᔭᐅᔪᑦ. ᐊᑭᐅᔪᑦ ᑕᒪᒃᑯᓄᙵ ᐊᑭᑐᓂᖅᓴᐅᔮᖃᑦᑕᖅᑑᒐᓗᐊᑦ ᐃᖏᕐᕋᔾᔪᑎᓄᑦ ᐊᑮᑦ ᐱᔾᔪᑎᒋᓪᓗᒋᑦ, ᐱᒻᒪᕆᐅᔪᖅ ᖃᐅᔨᓗᒍ ᐱᔾᔪᑕᐅᔪᖅ ᑖᒃᓰᓄᑦ ᐃᓕᔭᐅᔪᑦ ᐊᒻᒪᓗ ᐊᑭᖓ ᐊᐅᓚᑎᑦᑎᓂᕐᒧᑦ ᐊᓯᖏᓐᓂᑦ ᓂᐅᕕᖅᑕᐅᔪᓂᑦ. ᐱᖁᑎᓂᒃ ᓂᐅᕕᖅᖢᓂ ᐃᖃᓗᖕᓂᑦ ᐊᑭᑐᓗᐊᕌᓗᙱᓐᓂᖅᓴᐅᔪᑦ, ᑖᒃᓰᔭᐃᔭᕈᑎᖃᙱᒻᒪᑕ ᓄᓇᕗᒻᒧᑦ ᐊᒻᒪᓗ HST-ᖑᓂᕋᖅᑕᐅᔪᖅ. ᑕᑯᓗᒍ ᑎᑎᕋᖅᓯᒪᔪᖅ ᖃᐅᔨᒋᐊᕐᕕᐅᔪᓐᓇᖅᑐᑦ ᓇᖕᒥᓂᕆᔭᐅᔪᓄᑦ ᐊᑎᐅᔪᓄᑦ ᐊᒻᒪᓗ ᐅᖃᓘᑎᖏᑦᑕ ᓈᓴᐅᑎᖏᓐᓄᑦ. ᐊᓯᐊᒍᑦ ᓂᐅᕕᕐᕕᓕᕆᓂᖅ ᐃᓚᐅᔪᖅ ᐱᕕᓃᑦ ᓂᐅᕕᕐᕕᒃ, ᐊᐅᓚᑕᐅᖃᑦᑕᖅᑐᖅ ᐊᑭᓕᖅᑐᖅᑕᐅᙱᑦᑐᓄᑦ; ᓯᓚᑎᖏᓐᓂᑦ ᓂᐅᕕᐊᒃᓴᓖᑦ, ᑕᐃᒪᐅᒐᔪᒃᑐᑦ ᓴᓇᓐᓇᐅᖏᑎᓪᓗᒍᒥᑦ; ᐊᒻᒪᓗ ᐱᐅᒋᔭᐅᑦᑎᐊᖅᑐᖅ ᐃᖃᓗᖕᓂᑦ ᓂᐅᕕᐊᒃᓴᖃᕐᓂᖅ/ᑕᐅᖅᓰᓂᖅ ᕙᐃᔅᐳᒃ ᒪᒃᐱᖅᑐᒐᖓᓐᓂᑦ. Iqaluit Sell / Swap, ᐃᓚᐅᔪᒪᓗᓂ ᓈᒻᒪᒋᔭᐅᔭᕆᐊᖃᖅᖢᓂ.
ᓂᖀᑦ ᐊᒻᒪᓗ ᐱᖁᑏᑦ ᓄᓇᕗᒻᒥ ᐊᑭᑐᒐᔪᒃᑐᑦ ᐊᑭᐅᔪᑦ ᐃᖏᕐᕋᓂᕐᒧᑦ ᐅᑭᐅᖅᑕᖅᑐᒧᑦ ᐃᓚᔭᐅᖃᑦᑕᕐᓂᖏᓐᓄᑦ, ᐊᑭᖃᕐᓂᖓᓄᑦ-ᐆᒪᓂᕐᒧᑦ ᐃᑲᔫᑏᑦ ᐊᑭᓕᖅᑕᐅᖃᑦᑕᕋᓗᐊᖅᑎᓪᓗᒋᑦ ᐊᒥᓱᓄᑦ ᐱᓕᕆᔨᓄᑦ, ᓲᕐᓗ ᓄᓇᕗᒻᒥ ᒐᕙᒪᒃᑯᑦ ᐅᑭᐅᖅᑕᖅᑐᒥᑦ ᐃᑲᔫᑎᖓᑦ. ᓱᕈᖅᓴᕋᐃᑦᑐᐃᑦ ᐱᖁᑏᑦ ᑎᑭᑎᑕᐅᖃᑦᑕᖅᑐᑦ ᑎᖕᒥᓲᒃᑯᑦ, ᐅᒥᐊᕐᔪᐊᒃᑯᑦ ᓇᐃᑦᑐᒃᑯᑦ ᐊᑐᖅᑕᐅᖃᑦᑕᖅᑐᖅ ᐊᕐᕌᒎᑉ ᐃᓚᖓᒍᑦ, ᐊᒻᒪᓗ ᐊᖅᑯᑎᑕᖃᙱᖦᖢᓂ ᓄᓇᓕᐅᑉ ᐊᓯᐊᓄᑦ. ᓯᓚᐅᑉ ᖃᓄᐃᓐᓂᖓ ᐊᒃᑐᖅᓯᖃᑦᑕᕐᒥᔪᖅ ᑎᑭᑦᑕᕐᓂᖏᓐᓂᒃ ᑎᖕᒥᓲᑦ, ᐃᓛᓐᓂᒃᑯᑦ ᐊᒥᒐᖅᓯᓂᖅᑕᖃᓕᖅᑎᑦᑎᖃᑦᑕᖅᖢᓂ. ᐃᖃᓗᐃᑦ ᓄᑖᓂᒃ ᐊᖏᓂᖅᓴᓂᒃ ᓂᕿᑕᖃᓲᖑᓂᖅᓴᐅᔪᖅ ᐊᓯᖏᓐᓂᐅᖓᓂᑦ ᓄᓇᓕᐅᔪᓂᑦ ᓄᓇᕗᒻᒥᑦ ᖃᐅᑕᒫᑦ ᑎᖕᒥᓲᖅᑕᐅᖃᑦᑕᕐᓂᖓᓄᑦ, ᑭᓯᐊᓂ ᐊᖏᔫᑎᓪᓗᒍ ᓄᓇᓕᖅᐸᐅᔭᑦ, ᖃᔅᓯᐊᕐᔪᖕᓄᑦ ᐅᓪᓗᓄᑦ ᓯᓚᕐᓘᑕᐅᒃᐸᑦ ᓱᓇᐃᕈᑎᖃᑦᑕᖅᑐᑦ ᓂᐅᕕᕐᕖᑦ. ᐊᔾᔨᐅᙱᑦᑐᓂᒃ ᓂᕆᔭᕆᐊᖃᖃᑦᑕᕈᕕᑦ (ᓲᕐᓗ gluten-ᖃᙱᑦᑐᓂᒃ ᓂᕿᓂᒃ, ᑎᒥᒥᑎᒍᑦ ᐱᐅᒃᓴᙱᓐᓂᐅᔪᒥᑦ-ᐱᔾᔪᑎᓕᖕᓂ, ᓄᓇᒥᙵᑦᑕᐃᓐᓇᖅᑐᓂᒃ), ᐊᒥᓱᓂᒃ ᓱᓇᑐᐃᓐᓇᕐᓂᒃ ᐱᓯᒪᒍᕕᑦ ᓈᒻᒪᖕᓂᖅᓴᐅᓇᔭᖅᑐᖅ ᐅᖃᐅᑎᓗᒋᓪᓘᓐᓃᑦ ᖃᐅᔨᓗᒋᓘᓐᓃᑦ ᐅᑭᐅᖅᑕᖅᑐᒧᑦ ᐊᐅᓪᓚᖅᑎᑦᑎᖃᑦᑕᖅᑐᑦ. ᐊᑭᖃᙱᖦᖢᒍ ᐃᖏᕐᕋᔾᔪᑎᖓᓂᒃ ᐊᐅᓪᓚᖅᑎᑦᑎᓲᑦ ᖃᕋᓴᐅᔭᒃᑯᑦ ᐱᔭᐅᓲᑦ ᐃᓱᒪᒋᔭᒃᓴᐅᖃᑦᑕᕐᒥᔪᖅ. ᑐᑭᓯᐅᒪᔾᔪᑎᓂᒃ ᓇᓂᓯᔪᓐᓇᖅᑐᑎᑦ ᐊᑐᐃᓐᓇᐅᔪᓂᒃ ᐃᑲᔪᖅᑕᐅᓂᕐᒧᑦ ᓂᕿᓄᑦ ᑕᐃᑯᖓ ᐅᕝᕙᓘᓐᓃᑦ ᓇᖕᒥᓂᖅ ᑎᑭᓴᖅᑕᐅᔪᓄᑦ ᒪᓕᒃᖢᒋᑦ ᓄᓇᕗᒻᒥ ᒐᕙᒪᒃᑯᑦ ᑲᓇᑕᒧᑦ ᓂᕿᑦᑎᐊᕙᖕᓂᑦ ᐅᑭᐅᖅᑕᖅᑐᒧᑦ ᑐᕌᖓᔪᖓᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖓᓐᓂᑦ. ᐊᒥᓱᐃᑦ ᓇᖕᒥᓂᕆᔭᐅᔪᑦ ᐊᐅᓪᓚᖅᑎᑦᑎᔪᓐᓇᖅᑐᑦ ᐃᑲᔪᖅᑕᐅᓂᖃᙱᑦᑐᓂᒃ ᓂᕿᓂᒃ. ᐊᑭᖃᙱᑦᑐᑦ ᐊᐅᓪᓚᖅᑎᑦᑎᓂᕐᒧᑦ ᖃᕋᓴᐅᔭᒃᑯᑦ ᐱᔭᐅᔪᓂᒃ ᐃᓱᒪᒋᔭᒃᓴᐅᔪᖅ. ᓄᓇᓕᖕᒥᐅᑦ ᐅᖃᐅᔾᔨᔪᓐᓇᖅᑐᑦ ᐱᐅᒋᓛᕆᔭᖓᓐᓂᒃ ᐊᐅᓪᓚᖅᑎᑕᐅᓂᖏᓐᓄᑦ ᐊᑐᖃᑦᑕᖅᑐᓂᒃ ᐊᒻᒪᓗ ᑎᑭᓴᐃᕝᕕᐅᖃᑦᑕᖅᑐᓂᒃ ᓂᕿᓂᒃ ᐊᒻᒪᓗ ᐱᖁᑎᓂᒃ ᓄᓇᓕᖕᓃᙱᑦᑐᓂᒃ, ᐃᓚᐅᓪᓗᑎᒃ “ᐃᓄᐃᑦ ᓂᕿᖏᑦ” ᐊᓯᖏᓐᓂᑦ ᓄᓇᕗᑦ ᓄᓇᓕᖏᓐᓂᑦ.
ᐃᓗᐃᑦᑑᓪᓗᑎᒃ ᐱᖁᑏᑦ, ᐊᖏᓪᓗᑎᒃ ᐅᕝᕙᓘᓐᓃᑦ ᐅᖁᒪᐃᑦᑐᑦ (ᓲᕐᓗ, ᓄᓇᒃᑰᕈᑏᑦ, ᐃᒡᓗᕐᔪᐊᑉ ᐱᖁᑎᖏᑦ) ᐊᒻᒪᓗ ᐃᒡᓗᕐᔪᐊᒃᓴᒧᑦ ᐊᑐᖅᑐᑦ ᐅᒥᐊᕐᔪᐊᒃᑯᑦ ᑎᑭᑎᑕᐅᒐᔪᒃᑐᑦ ᐊᐅᔭᒃᑯᑦ ᐊᒻᒪᓗ ᐅᑭᐊᒃᓵᒃᑯᑦ, ᑎᑭᓴᖅᑕᐅᔪᑦ ᑎᑭᓴᖅᑕᐅᔭᕆᐊᖃᖅᖢᑎᒃ ᑭᒡᓕᖃᕐᕕᒋᔭᖓᑦ ᑎᑭᐅᑎᖅᑳᖅᑎᓐᓇᒍ. ᐃᖃᓗᐃᑦ ᖃᔅᓯᐊᕐᔪᖕᓂᑦ ᐅᒥᐊᕐᔪᐊᓂᒃ ᑎᑭᑕᐅᖃᑦᑕᖅᑐᖅ ᐊᐅᔭᒃᑯᑦ. ᑲᒻᐸᓃᑦ ᐊᐅᓪᓚᖅᑎᑦᑎᓂᕐᒧᑦ ᐱᔨᑦᑎᕋᐅᑎᖃᖅᑐᑦ ᐃᖃᓗᖕᓂᑦ ᓄᓇᕗᒻᒥᑦ ᑲᓇᖕᓇᖓᓂᑦ ᐅᑭᐅᖅᑕᖅᑐᒥᑦ ᐊᐅᓪᓚᖅᑎᑦᑎᖃᑦᑕᖅᑏᑦ ᐊᒻᒪᓗ ᓄᓇᕗᒻᒥᑦ ᐅᒥᐊᕐᔪᐊᒃᑯᑦ ᐱᖁᑎᓂᒃ ᐅᓯᒃᑲᑦᑕᖅᑏᑦ. ᑕᑯᓗᒍ ᖃᐅᔨᒋᐊᕐᕕᒋᓂᕐᒧᑦ ᑎᑎᕋᖅᓯᒪᔪᑦ ᐅᖃᓘᑏᑦ ᓈᓴᐅᑎᖏᓐᓄᑦ ᐊᒻᒪᓗ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖕᓄᑦ.
ᐃᖃᓗᐃᑦ ᐃᓂᐅᔪᖅ ᓄᓇᕗᑦ ᐋᓐᓂᐊᕐᕕᑐᐊᖓᓄᑦ, 35-ᓂᒃ ᐃᒡᓕᖃᖅᑐᖅ ᕿᑭᖅᑕᓂ ᐋᓐᓂᐊᕐᕕᒃ. ᓄᑖᖅ ᐃᒡᓗᕐᔪᐊᖅ ᓴᓇᔭᐅᓚᐅᖅᑐᖅ 2007-ᒥᑦ, ᐊᒃᑐᐊᓪᓗᓂ ᓄᑕᐅᖏᑦᑐᒧᑦ ᕿᑭᖅᑕᓂ ᐋᓐᓂᐊᕐᕕᑐᖃᕐᒧᑦ, ᐊᒻᒪᓗ ᐱᓕᕆᐊᖃᓕᖅᑐᖅ ᐋᓐᓂᐊᕐᕕᓕᐊᖅᑐᑦ ᐊᓂᕙᓪᓕᐊᔪᓂᒃ ᐱᔨᑦᑎᕋᐃᓂᖅ ᐊᒻᒪᓗ ᖃᐅᔨᓴᖅᑕᐅᖃᑦᑕᖅᑐᓄᑦ, ᐱᓕᕆᐊᖃᕐᓂᕐᒧᑦ ᓱᓇᐅᓗᐊᖏᑦᑐᓄᑦ ᐋᓐᓂᐊᕐᓄᑦ, ᐃᓗᐊᖅᓴᐃᓃᑦ ᐊᒻᒪᓗ ᐊᓯᖏᓐᓄᑦ ᐱᔨᑦᑎᕋᐅᑏᑦ. ᐊᔾᔨᓕᐅᕈᑎᖃᖅᑐᑦ ᐊᒻᒪᓗ ᖃᐅᔨᓴᐃᔾᔪᑎᖃᕐᕕᖕᓂᑦ ᐊᒻᒪᓗ ᓄᑕᒦᒃ ᑐᐊᕕᓇᖅᑐᓕᕆᓂᕐᒥᒃ ᐃᒡᓗᕈᓯᕐᒥᑦ, ᐱᓚᒃᑐᐃᕕᒃ, ᐃᕐᓂᐅᕐᕖᑦ ᐊᒻᒪᓗ ᐅᓪᓗᐃᓐᓇᕐᒥᑦ ᐱᓚᒃᑐᐃᓂᕐᒧᑦ, ᓄᑖᖅ ᐋᓐᓂᐊᕐᕕᐅᑉ ᐱᔨᑦᑎᕋᐃᔪᖅ ᕿᑭᖅᑕᓂ ᐋᓐᓂᐊᖃᖅᑕᐃᓕᒪᓂᓕᕆᓂᕐᒥᒃ, ᐊᒻᒪᓗ ᐃᓛᓐᓂᒃᑯᑦ ᐱᓕᕆᐊᖃᖃᑦᑕᖅᑐᑦ ᐋᓐᓂᐊᖅᑐᓂᒃ ᐊᓯᖏᓐᓂᙶᖅᑐᓂᒃ ᐊᕕᒃᑐᖅᓯᒪᔪᓂᑦ. ᐃᖃᓗᐃᑦ ᐃᕐᓂᕕᐅᔪᖅ ᕿᑭᖅᑕᓂᕐᒥᐅᓄᑦ, ᐊᒻᒪᓗ ᐋᓐᓂᐊᕐᕕᓕᐊᖅᑐᓄᑦ ᑐᔪᕐᒥᕕᖃᖅᖢᑎᒃ ᐊᓯᖏᓐᓂᑦ ᓄᓇᓕᖕᓂᙶᖅᑐᓂᒃ ᑎᖕᒥᓲᒃᑯᑦ ᑎᑭᑎᑕᐅᖃᑦᑕᖅᑐᑦ ᐱᓕᕆᐊᖑᓂᕐᒧᑦ.
ᐃᖃᓗᐃᑦ ᐃᓄᓕᒫᓄᑦ ᑐᕌᖓᔪᓂᒃ ᐱᓕᕆᐊᖃᕐᓂᕐᒧᑦ ᐃᓂᖃᕐᒥᔪᑦ, ᖃᖓᒃᑯᑦ ᖃᐃᔭᕆᐊᖃᕐᓂᖏᓐᓄᑦ ᑐᒃᓯᕋᕆᐊᖃᖅᖢᑎᒃ ᐃᓄᐃᑦ ᑕᑯᔭᐅᓂᐊᕐᓗᑎᒃ ᓘᒃᑖᓄᑦ ᐊᒻᒪᓗ ᐃᓗᐊᖅᓴᐃᔨᓄᑦ. ᑖᓐᓇ ᓇᔾᔨᔪᓂᒃ ᐱᓕᕆᐊᖃᓲᖅ, ᐊᕐᓇᐃᑦ ᑕᑯᔭᐅᖃᑦᑕᕐᓂᖏᓐᓄᑦ, ᐊᒻᒪᓗ ᐊᓯᖏᓐᓂᒃ ᐋᓐᓂᐊᖃᖅᑕᐃᓕᒪᔪᓕᕆᓂᕐᒧᑦ ᐱᔨᑦᑎᕋᐅᑎᓂᒃ, ᓲᕐᓗ ᓂᕿᑦᑎᐊᕙᖕᓂᒃ ᐃᓕᓐᓂᐊᖅᑎᑦᑎᓂᕐᒥᒃ, ᑲᐳᖅᑕᐅᖃᑦᑕᖅᑐᓂᒃ ᐊᒻᒪᓗ ᖃᐅᔨᓴᖅᑕᐅᖃᑦᑕᖅᑐᑦ ᐃᖃᓗᖕᒥᐅᓄᑦ.
ᓄᑖᑦ ᐃᓄᐃᑦ ᓄᓇᕗᒻᒧᐊᖅᑐᑦ ᓇᓪᓕᐅᑯᒫᖃᑲᐅᑎᒋᓱᐃᑦᑐᑦ ᓄᓇᕗᒻᒥ ᐋᓐᓂᐊᖃᖅᑕᐃᓕᒪᔪᓕᕆᔭᐅᓂᐊᕐᓗᑎᒃ. ᓄᓇᕗᒻᒥᐅᑕᐅᔭᕆᐊᖃᖅᑐᑎᑦ ᑕᖅᑭᓄᑦ ᐱᖓᓱᓄᑦ, ᐊᑕᐅᓯᕐᒥᒡᓘᓐᓃᑦ ᐱᓕᕆᓂᕐᒧᑦ ᑳᓐᑐᕌᖃᕐᓗᑎᑦ, ᐊᔪᙱᑎᑕᐅᓂᐊᓵᖅᑎᓪᓗᑎᑦ. ᖃᕋᓴᐅᔭᒃᑯᑦ ᐱᔪᓐᓇᖅᑕᐃᑦ ᑕᑕᑎᕐᓗᒍᓗ ᓄᓇᕗᒻᒧᑦ ᐋᓐᓂᐊᖃᖅᑕᐃᓕᒪᓕᕆᔭᐅᓂᕐᒧᑦ ᑕᑕᑎᕆᐊᓕᒃ, ᑎᑎᖅᑲᑎᒍᓪᓗ ᐊᐅᓪᓚᖅᑎᓪᓗᒍ ᑕᑕᑎᖅᓯᒪᔪᖅ ᐊᑕᐅᑦᑎᒃᑰᖃᑕᐅᓗᒋᑦ ᐱᔭᕆᐊᖃᖅᑐᑦ ᑎᑎᖅᑲᐃᑦ, ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᓐᓄᑦ ᐱᖓᓱᓂᒃ ᑕᖅᑭᓂᒃ ᓄᓇᖃᓕᕈᕕᑦ. ᑕᑕᑎᕆᐊᓖᑦ ᐊᓱᐃᓐᓇᐅᔪᑦ ᐃᓄᓕᒫᓄᑦ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᓐᓂᑦ ᐊᒻᒪᓗ ᕿᑭᖅᑕᓂ ᐋᓐᓂᐊᕐᕕᖕᒥᑦ. ᐱᒻᒪᕆᐅᔪᖅ ᓄᓇᕗᒻᒧᑦ ᐋᓐᓂᐊᖃᖅᑕᐃᓕᒪᔭᐅᓂᕐᒧᑦ ᓇᓪᓕᐅᑯᒫᖃᕐᓗᑎᑦ, ᓯᕗᓂᐊᒍᑦ ᐱᒋᓚᐅᖅᑕᐃᑦ ᐊᑐᕋᔭᖅᑐᒃᓴᐅᒐᓗᐊᖅᑎᓪᓗᒍ ᓱᓕ, ᐱᑕᖃᙱᑐᐃᓐᓇᕆᐊᖃᕐᒪᑕ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᓂᕐᒧᑦ (ᑐᐊᕕᕐᓇᖅᑐᒃᑯᑦ ᓵᑐᑕᐅᔪᖅ ᑎᖕᒥᓲᖅ ᓄᓇᓕᖕᓂᑦ). ᖃᑕᙳᑎᒋᔭᖅᑎᑦ ᐱᖃᑎᒋᓂᐊᕈᕕᒋᑦ ᐱᖃᓐᓈᑎᓪᓘᓐᓃᑦ ᓄᓇᕗᒻᒥᐅᑕᐅᙱᑦᑐᑦ ᐃᓕᖕᓄᑦ ᐳᓛᖅᑐᑦ, ᓂᐅᕕᕆᐊᖃᖅᑐᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᓇᓪᓕᐅᑯᒫᒥᒃ ᑕᐃᑲᓃᓐᓂᓗᒃᑖᖓᓐᓄᑦ ᐃᓚᐅᑎᑕᐅᖃᑦᑕᙱᑦᑐᓂᒃ ᓇᓪᓕᐅᑯᒫᖓᓐᓄᑦ ᐊᕕᒃᑐᖅᓯᒪᔪᖁᑎᖓᓐᓂᑦ ᐅᕝᕙᓘᓐᓃᑦ ᓄᓇᕗᒻᒥᑦ. ᐱᓕᕆᕝᕕᐅᑉ ᐋᓐᓂᐊᖃᖅᑕᐃᓕᒪᓕᕆᓂᕐᒧᑦ ᓇᓪᓕᐅᑯᒫᖃᕐᓂᕐᒧᑦ ᑲᑎᙵᔪᖏᓐᓂᑦ ᐱᔪᓐᓇᖅᑐᒃᓴᐅᔪᑎᑦ ᐃᑲᔫᑎᓂᒃ ᐊᑐᕐᓂᑯᓄᑦ ᓲᕐᓗ ᐃᓅᓕᓴᐅᑎᓄᑦ, ᑭᒍᓯᕆᔭᐅᓂᕐᒧᑦ ᐊᒻᒪᓗ ᐃᒡᒑᓄᑦ. ᖃᐅᔨᒋᐊᕐᕕᒋᓗᒋᑦ ᐃᑲᔫᑎᓕᕆᔨ ᓇᓗᓇᐃᔭᖅᓯᒪᔪᓂᒃ ᐱᔪᒪᓗᑎᑦ.
ᐃᒻᒥᒃᑰᖓᔪᑦ ᐄᔭᒐᖅᑖᕐᕖᑦ ᐃᖃᓗᖕᓃᑦᑐᑦ, ᐃᓚᒋᔭᐅᔪᑦ ᐋᓐᓂᐊᕐᕕᖕᒥᑦ ᐄᔭᒐᖅᑖᑖᕐᕕᖕᒧᑦ, ᑐᓂᓯᔪᓐᓇᖅᑐᑦ ᐃᓚᖏᓐᓂᒃ ᑐᐊᕕᕐᓇᖅᑐᓄᑦ ᐃᓅᓕᓴᐅᑎᓂᒃ, ᑭᓯᐊᓂ ᐊᑑᑎᖃᖅᑎᑕᐅᔪᖅ ᐋᓐᓂᐊᕐᕕᖕᒧᓗᐊᖅ. ᐃᔨᓕᕆᔩᑦ ᑎᑭᑦᑕᖃᑦᑕᕐᒥᔪᑦ, ᐃᔨᓂᒃ ᖃᐅᔨᓴᐃᓪᓗᑎᒃ ᑐᓂᐅᖅᑲᐃᓪᓗᑎᒡᓗ ᐃᒡᒑᒃᑖᕈᑎᓂᒃ. ᖃᐅᔨᒋᐊᕐᕕᒋᓗᒍ ᐋᓐᓂᐊᕐᕕᒃ ᖃᖓᒃᑯᑦ ᐊᑐᐃᓐᓇᐅᓂᐊᕐᓂᖏᓐᓄᑦ ᑕᒪᒃᑯᓄᖓ ᐱᔨᑦᑎᕋᐅᑏᑦ. ᐃᒡᒐᑦ ᐱᔭᐅᔪᓐᓇᖅᑐᑦ ᕿᑭᖅᑕᓂ ᐃᒡᒑᓕᕆᔨᓂᑦ. ᐃᖃᓗᐃᑦ ᒪᕐᕉᖕᓂᒃ ᑭᒍᑎᓕᕆᕝᕕᖃᖅᑐᖅ, ᑭᒍᑎᓕᕆᔨᖃᖅᖢᑎᒃ ᐊᒻᒪᓗ ᑭᒍᑏᑦ ᒥᒃᓵᓄᑦ ᓴᓗᒪᑎᑦᑎᓂᕐᒧᑦ ᑲᒪᔨᓂᒃ.
ᖃᐅᔨᒋᐊᕈᓐᓇᖅᑐᑎᑦ ᖃᕋᓴᐅᔭᒃᑯᑦ ᑐᑭᓯᐅᒪᔾᔪᑎᒃᑲᓐᓂᕐᓂᒃ ᐱᔪᒪᒍᕕᑦ ᓄᓇᕗᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐋᖅᑭᐅᒪᓂᖓᓂᒃ..
ᐃᖃᓗᐃᑦ ᐃᓚᒋᔭᐅᔪᖅ ᓄᓇᕗᑦ ᐊᖏᓛᖑᖃᑕᐅᔪᓂᒃ ᐅᓯᑲᑦᑕᖅᑐᓕᕆᔨᐅᓂᕐᒧᑦ. ᖃᐅᑕᒫᑦ ᑎᖕᒥᓲᕐᔪᐊᕐᓄᑦ ᑎᑭᑕᐅᓲᖅ ᐋᑐᕚᒥᙶᖅᑐᒥᒃ ᑕᒪᕐᒥᒃ ᑲᓇᐃᑎᐊᓐ ᓄᐊᑦ ᐊᒻᒪᓗ ᕘᔅᑎᐊᒃᑯᑦ. ᑕᒪᕐᒥᒃ ᑎᖕᒥᓲᒃ ᐱᔨᑦᑎᖃᑦᑕᖅᑐᒃ ᖃᔅᓰᖅᑕᖅᖢᒍ ᐱᓇᓱᐊᕈᓯᖅ ᔭᓗᓇᐃᒥᑦ ᓄᖅᑲᓚᐅᐱᓪᓚᒃᖢᓂ ᑲᖏᖅᖠᓂᕐᒧᑦ. ᐊᒻᒪᓗ, ᕘᔅᑎᐊ ᖃᖓᑕᓲᖅ ᒪᓐᑐᕆᐊᒥᑦ ᓄᖅᑲᓚᐅᐱᓪᓚᖃᑦᑕᖅᖢᓂ ᑰᒡᔪᐊᕐᒧᑦ, ᑯᐸᐃᒃ-ᒧᑦ ᐃᖃᓗᖕᓄᙵᐅᑎᓪᓗᒍ. ᑲᑎᓂᖃᕈᓐᓇᖅᑐᖅ ᐃᐊᑦᒪᓐᑕᓐᒧᑦ ᔭᓗᓇᐃᒥᑦ, ᐊᒻᒪᓗ ᐅᐃᓂᐲᒡᒧᑦ ᐊᒻᒪᓗ ᑰᒡᔪᐊᕌᓗᕐᒧᑦ ᑲᖏᖅᖠᓂᕐᒥᑦ. ᐃᖃᓗᐃᑦ ᐱᔨᑦᑎᖃᑦᑕᖅᑐᖅ ᕿᑎᐊᓃᓐᓂᕐᒧᑦ ᑕᒪᕐᒥᒐᓚᖕᓄᑦ ᕿᑭᖅᑕᓂ ᐊᕕᒃᑐᖅᓯᒪᓂᐅᔪᒥ ᑎᖕᒥᓲᒃᑯᑦ ᐃᖏᕐᕋᔪᓂᑦ. ᐃᖃᓗᐃᑦ ᑎᖕᒥᓲᖃᕐᕕᖓ ᓄᓇᕐᔪᐊᓗᒃᑖᕐᒧᑦ ᒥᑦᑕᕐᕕᐅᔪᖅ ᑕᐃᑯᙵᕈᓐᓇᕐᓂᕐᒧᑦ ᑎᑎᕋᕐᕕᖃᖅᖢᓂ, ᐱᓕᕆᐊᖃᖃᑦᑕᖅᑐᖅ ᐃᓛᓐᓂᒃᑯᑦ ᓄᓇᕐᔪᐊᕐᒥᙶᖅᑐᓂᒃ ᐅᑭᐅᖅᑕᖅᑐᒃᑰᖅᑐᓂᒃ ᓄᖅᑲᓚᐅᐱᓪᓚᒃᖢᑎᒃ ᐃᖃᓗᖕᓄᑦ ᑲᓇᑕᒧᙵᐊᓪᓗᓂ, ᐊᒻᒪᓗ ᑎᖕᒥᓲᑦ ᐃᖃᓗᖕᓂᑦ ᑲᓛᖦᖠᐅᑉ ᓄᓈᓐᓄᑦ ᐅᑎᒧᓪᓗ. ᓂᐅᕕᖅᑕᐅᓂᖏᑦ ᓄᓇᕗᒻᒥ ᒥᑭᔫᓂᖏᓐᓄᑦ ᐊᒻᒪᓗ ᐊᔾᔨᐅᙱᑦᑐᓕᐅᖅᓯᒪᓂᖓᓄᑦ, ᐊᑭᖏᑦ ᐊᑭᑐᔪᒻᒪᕆᐅᔪᑦ. ᐱᓕᕆᕝᕕᒋᔭᖅᐱᑦ ᐊᑭᓕᕋᓗᐊᕐᓗᓂᒋᑦ ᓅᓐᓂᕐᒧᑦ ᐊᑭᐅᔪᑦ, ᖃᐅᔨᒋᐊᕆᐊᖃᖅᑐᑎᑦ ᐊᑭᐅᔪᓂᒃ ᓇᖕᒥᓂᖅ ᐃᖏᕐᕋᓂᕐᒧᑦ ᐸᕐᓇᒃᐸᓪᓕᐊᓂᐊᓵᕐᓗᑎᑦ. ᖃᐅᔨᒪᖁᔭᐅᔪᑎᑦ ᖃᐅᔨᒋᐊᕐᕕᒋᓗᒋᑦᑕᐅᖅ ᓄᓇᓕᖕᒥᑦ ᑎᖕᒥᓲᑦ ᖃᖓᒃᑰᖃᑦᑕᕐᓂᖏᑦ ᐊᓯᐊᙳᕆᐊᒃᓴᖏᓐᓄᑦ.
ᐃᓚᖏᑦ ᐃᖃᓗᐃᑦ ᑐᔪᕐᒥᕕᖏᑦ ᐊᐃᒃᓯᕈᓐᓇᖃᑦᑕᖅᑐᑦ ᒥᑦᑕᕐᕕᖕᒥᑦ ᑕᐃᑯᖓᓗ ᒥᑦᑕᕐᕕᖕᒧᑦ, ᖃᐅᔨᒋᐊᖅᐸᒌᕐᕕᒋᔭᕆᐊᖃᖅᑕᒃᓴᕆᔭᐃᑦ ᑕᒪᓐᓇ ᑐᔪᕐᒥᕕᖕᒧᑦ ᓯᓂᒃᑕᕐᕕᒋᓂᐊᖅᑕᕐᓄᑦ. ᑖᒃᓯᓄᑦ ᑲᒻᐸᓂᑕᖃᐅᖅᑐᖅ ᐃᖃᓗᖕᓂᑦ, ᐊᑕᐅᓯᕐᒥᒃ ᐊᑭᒥᒃ ᐊᑭᓖᑎᑦᑎᓲᑦ ᐊᑕᐅᓯᕐᒧᑦ ᐃᓄᖕᒧᑦ. ᐃᓚᔭᐅᒃᑲᓐᓂᓲᖅ ᕿᔪᖁᑎᖃᐅᖅᑐᓄᑦ ᐃᓱᒪᖅᓲᑎᒋᓪᓗᓂᐅᒃ ᑖᒃᓯᒥᒃ ᐊᑯᑎᐅᔪᒧᑦ. ᐅᔾᔨᕈᓱᒋᐊᖃᖅᑐᑎᑦ ᑖᒃᓰᑦ ᐱᔨᑦᑎᖃᑦᑕᕐᒪᑕ ᐃᖃᓗᐃᑦ ᐃᓄᖕᓄᑦ ᐃᖏᕐᕋᔭᖕᓂᕆᔭᖓᓐᓂᒃ. ᑖᒃᓰᑦ ᑲᑎᖅᓱᐃᖃᑦᑕᕋᔪᒃᑐᑦ ᐊᒥᓱᓂᒃ ᐊᑕᐅᓯᕐᒥᑦ ᓄᓇᒃᑰᕈᑎᒥᑦ, ᐅᕝᕙᓘᓐᓃᑦ ᓄᖅᑲᕐᓗᑎᒃ ᐊᐃᒃᓯᖅᖢᑎᒃ ᐃᑭᓂᐊᖅᑐᓂᒃ, ᐊᒻᒪᓗ ᐊᒡᔭᖅᖢᒋᑦ ᐃᓗᐊᓛᕆᔭᑎᒃ ᐊᑐᖅᖢᒍ. ᖃᐅᔨᒪᔭᕆᐊᖃᖅᑐᑎᑦ ᐊᓯᖕᓄᑦ ᐊᑐᖅᑕᐅᖃᑕᐅᔪᓐᓇᕐᒪᑦ “ᑖᒃᓯᒋᔭᐃᑦ”. ᓄᓇᒃᑰᕈᑎᓂᒃ ᐊᑐᖅᑐᐊᕈᓐᓇᖅᑐᑦᑕᐅᖅ ᐃᖃᓗᖕᓂᑦ. ᖃᐅᔨᒋᐊᕐᕕᒋᓗᒍ ᑎᑎᕋᖅᓯᒪᔪᑦ ᐅᖃᓘᑎᓂᒃ ᐱᓂᐊᕐᓗᑎᑦ.
ᐊᒥᓱᑲᓪᓚᐃᑦ ᐃᖃᓗᖕᒥᐅᑕᐃᑦ ᓇᖕᒥᓂᖅ ᓄᓇᒃᑰᕈᑎᖃᐅᓕᖅᑐᑦ, ᐅᒥᐊᕐᔪᐊᒃᑯᑦ ᑎᑭᑎᑕᐅᒐᔪᒃᑐᑦ ᐊᐅᔭᒃᑯᑦ, ᑕᐃᒪᑕᖃᖅᑑᒐᓗᐊᖅ ᐊᑐᖅᓯᒪᔪᓂᒃ ᓂᐅᕕᐊᒃᓴᐅᔪᓂᒃ. ᓄᓇᒃᑰᕈᑕᐅᓯᕝᕕᒃᑕᖃᐅᖅᑐᖅ ᐱᓕᕆᐊᖃᖅᑐᓂᒃ ᓄᓇᒃᑰᕈᑎᓂᒃ, ᑭᓯᐊᓂ ᐊᑭᖏᑦ ᖁᑦᑎᖕᓂᖅᓴᐃᑦ ᖃᓪᓗᓈᑦ ᓄᓇᖓᓐᓂᐅᖓᓂᑦ ᑲᓇᑕᒥᑦ. ᐅᖅᓱᖅᑖᕐᕖᑦ ᐊᐅᓚᑕᐅᔪᑦ ᐃᖃᓗᐃᑦ ᐅᖅᓱᖅᑖᕐᕕᒃᑯᓐᓄᑦ, ᕿᑭᖅᑕᓂᑦ ᐅᖅᓱᖅᑖᕐᕕᒃᑯᓐᓄᑦ, ᐊᒻᒪᓗ ᓂᐅᕕᖅᑎᒃᑯᑦ ᓂᐊᖁᙴᒥᑦ QuickStop-ᑯᖓᓐᓂᑦ. ᖃᐅᔨᒋᐊᕐᕕᒋᓗᒍ ᑎᑎᕋᖅᓯᒪᔪᑦ ᐅᖃᓘᑎᓂᒃ ᐱᓂᐊᕐᓗᑎᑦ. ᓄᓇᒃᑰᕈᑏᑦ ᐆᓇᖅᓯᑦᑏᔾᔪᑎᖃᕆᐊᖃᕋᔪᒃᑐᑦ ᐊᐅᓚᑎᓐᓂᕐᒧᑦ ᐅᑭᐅᒃᑯᑦ, ᐊᖏᔪᒥᒃ ᐊᖏᒡᓕᒋᐊᖅᑎᑦᑎᔪᓐᓇᖅᑐᖅ ᐃᑯᒻᒪᖅᑯᑎᒥᒃ ᐊᑐᕐᓂᕐᒧᑦ. ᐊᒥᓱᑦ ᐃᖃᓗᖕᒥᐅᑕᐃᑦ ᐊᑐᖃᑦᑕᕐᒥᔪᑦ ᓯᑭᑑᓂᒃ ᐊᒻᒪᓗ ᕼᐋᓐᑕᓂᒃ ᐊᕙᒻᒧᒐᕐᓂᕐᒧᑦ ᐅᕝᕙᓘᓐᓃᑦ ᓇᒧᙵᐅᑲᑕᖕᓂᕐᒧᑦ ᓄᓇᓕᐅᑉ ᓯᓚᑖᓄᑦ. ᐃᓄᐃᑦ ᐅᒥᐊᖅᑐᕈᒪᔪᑦ ᓇᖕᒥᓂᖅ ᐅᒥᐊᖏᓐᓂᒃ ᐊᑐᕐᓗᑎᒃ, ᐊᑐᕈᖕᓇᕆᐊᖃᖅᑐᑦ ᑕᕆᐅᑉ ᖃᓄᐃᓐᓂᕆᔭᖏᓐᓄᑦ, ᐅᕝᕙᓘᓐᓃᑦ ᐊᑐᕐᓗᑎᒃ ᐊᐅᓪᓚᕈᔾᔨᖃᑦᑕᖅᑐᒥᒃ. ᐅᒥᐊᓄᑦ ᑐᓚᒃᑕᕐᕖᑦ ᐱᑕᖄᓂᙱᓐᓂᖏᓐᓄᑦ ᐊᒻᒪᓗ ᐅᓕᑦᑕᕐᓃᑦ ᑎᓂᑦᑕᕐᓃᑦ ᖁᑦᑎᓗᐊᖅᖢᑎᒃ ᐊᒻᒪᓗ ᐊᑦᑎᓗᐊᖅᖢᑎᒃ, ᐊᒥᓱᑦ ᐅᒥᐊᖃᖅᑐᑦ ᐅᒥᐊᕐᒥᖕᓂᒃ ᐅᓯᔾᔪᑎᖏᓐᓃᑎᑦᑎᖃᑦᑕᖅᑐᑦ ᐊᒻᒪᓗ ᐊᖏᕐᕋᖓᑦᑕ ᓯᓚᑖᓄᐊᖅᖢᒍ ᐊᑐᙱᒃᑳᖓᔾᔪᒃ.
ᐃᖃᓗᐃᑦ ᐊᔾᔨᒌᙱᑦᑐᓂᒃ ᐱᙳᐊᕐᓂᕐᒧᑦ ᐱᕕᖃᖅᑎᑦᑎᖃᑦᑕᖅᑐᖅ, ᓴᓇᔨᐅᔪᓂᒃ ᐊᒻᒪᓗ ᐱᖃᐃᔭᕐᓂᕐᒧᑦ ᐊᒻᒪᓗ ᐃᓅᖃᑎᒌᖕᓂᕐᒧᑦ. ᓄᓇᓕᖅᐸᐅᔭᐅᑉ ᐱᙳᐊᖅᑐᓕᕆᔨᖏᑦ ᐱᔭᒃᓴᐅᑎᖃᖅᑐᑦ ᐊᐅᓚᑦᑎᓂᕐᒧᑦ ᖃᔅᓯᐊᕐᔪᖕᓂᑦ ᐊᔾᔨᒌᙱᑦᑐᓂᒃ ᐃᒡᓗᕐᔪᐊᓂᒃ ᑐᓂᓯᓪᓗᑎᒡᓗ ᑐᑭᓯᐅᒪᔾᔪᑎᓂᒃ ᓄᓇᓕᖅᐸᐅᔭᒥᑦ ᖃᓄᐃᓕᐅᕐᓂᐊᕐᓂᖏᓐᓄᑦ. ᓴᖅᑭᑦᑎᖃᑦᑕᖅᑐᑦ ᐊᕐᕌᒍᑕᒫᑦ ᐱᙳᐊᖅᑎᑦᑎᓂᕐᓄᑦ ᑐᕌᖓᔪᓂᒃ ᐊᒻᒪᓗ ᐊᔾᔨᖏᓐᓂᒃ ᒫᓐᓇᒨᓕᖅᑎᑦᑎᓪᓗᑎᒃ ᑐᑭᓯᐅᒪᔾᔪᑎᓂᒃ ᐱᙳᐊᕐᓂᐊᖅᑐᑦ ᒥᒃᓵᓄᑦ ᐊᒻᒪᓗ ᖃᖓᒃᑰᖓᔪᓂᒃ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖓᓐᓂᑦ. ᓄᓇᓕᖅᐸᐅᔭᖅ ᒪᕐᕉᖕᓂᒃ ᐊᐅᓚᑦᑎᖃᑦᑕᖅᑐᖅ ᐊᓐᓂᑭᑕᕐᕖᖕᓂᒃ, ᐊᕐᓇᐃᑐᖅ ᐊᓐᓂᑭᑕᕐᕕᒃ ᐊᑐᖅᑕᐅᔪᒥᑦ ᓄᓇᓕᖅᐸᐅᔭᐅᑉ ᑎᑎᕋᕐᕕᖏᑦᑕ ᐃᓚᒋᔭᐅᓪᓗᓂ, ᐊᒻᒪᓗ ᐅᑭᐅᖅᑕᖅᑐᒥᑦ ᐅᑭᐅᑯᑦ ᐱᙳᐊᖅᑐᑦ ᐊᓐᓂᑭᑕᕐᕕᒃ. ᐃᓕᓐᓂᐊᕐᕕᖕᒥᑦ ᐱᙳᐊᕐᕕᖏᑦ ᐊᑐᖅᑕᐅᖃᑦᑕᕐᒥᔪᑦ ᐱᙳᐊᖅᑎᑎᓪᓗᒋᑦ ᐃᓕᓐᓂᐊᕐᓂᕐᒧᓪᓗ ᖃᓄᐃᓕᐅᕐᓂᐅᔪᓄᑦ. ᓄᓇᓕᖅᐸᐅᔭᐅᑉ ᓄᑕᐅᔪᓐᓃᓕᖅᑐᖅ ᐳᐃᔾᔪᕋᕐᕕᖓᑦ ᐅᒃᑯᐊᖅᑕᐅᓚᐅᖅᑐᖅ 2012-ᒥᑦ ᐊᒻᒪᓗ ᑮᓇᐅᔭᓂᒃ ᐱᕈᐃᑎᑦᑎᓃᑦ ᐱᕙᓪᓕᐊᔪᑦ ᓄᑖᒥᒃ ᐳᐃᔾᔪᕋᕐᕕᒃᑖᕐᓂᕐᒧᑦ ᐊᒻᒪᓗ ᐱᙳᐊᕐᕕᖕᒥᑦ. Squash Club-ᑕᖃᕐᒥᔪᖅ, ᐃᓚᐅᖃᑕᐅᓂᕐᒧᑦ ᐊᑭᓖᔭᕆᐊᖃᕐᓇᖅᑐᖅ. ᐃᓚᒋᔭᐅᔪᖅ ᐊᒥᓱᓄᑦ ᐃᓚᐅᓪᓗᓂ ᑰᓕᒡᕕᒃ. ᐊᑏ ᐃᖃᐃᓕᓴᕐᕕᒃ, ᒥᑦᑕᕐᕕᐅᑉ ᖃᓂᒋᔭᖓᓃᑦᑐᖅ, ᑮᓇᐅᔭᓂᒃ ᐱᕈᖅᑎᑦᑎᓇᓱᙱᖦᖢᑎᒃ ᐊᑭᓕᖅᑐᖅᑕᐅᙱᑦᑐᓄᑦ ᐊᐅᓚᑕᐅᔪᖅ ᐊᑭᓖᖃᑦᑕᖅᖢᑎᒃ ᐃᓚᐅᔪᒪᔪᑦ.
ᐅᑭᐊᒃᓵᑕᒫᑦ ᐱᙳᐊᖅᑐᓕᕆᔨᒃᑯᑦ ᐊᑎᓕᐅᒪᑎᑦᑎᓂᖃᖃᑦᑕᖅᑐᑦ ᑲᑐᔾᔨᖃᑎᒌᓄᑦ ᐊᒻᒪᓗ ᐊᑭᓕᖅᑐᖅᑕᐅᙱᖦᖢᑎᒃ ᑲᑐᔾᔨᖃᑎᒌᓄᑦ, ᑕᐃᔭᐅᔪᖅ “ᐊᑕᐅᑎᒃᑯᑦ ᐊᑎᓕᐅᕆᓂᕐᒥᑦ”, ᑕᐃᑲᙵᑦ ᖃᐅᔨᔪᓐᓇᖅᑐᑎᑦ ᑭᒃᑯᑦ ᐊᐅᓚᑦᑎᖕᒪᖔᑕ ᑐᕌᖓᔪᓂᒃ ᐱᔪᒪᓇᔭᖅᑕᒃᓴᕆᔭᕐᓂᑦ. ᐱᙳᐊᖅᑎᑦᑎᓂᕐᒧᑦ ᑲᑐᔾᔨᖃᑎᒌᑦ ᑭᒡᓕᖃᖅᑐᑦ ᖃᓄᑎᒋ ᐊᐅᓚᔪᓐᓇᕐᓂᕐᒥᒃ, ᐱᔪᒪᓂᖏᑦ ᐃᓚᐅᔪᑦ ᐊᑐᕐᓗᒋᑦ ᐊᒻᒪᓗ ᐊᑐᐃᓐᓇᐅᓂᖓᓂ ᐱᔪᒪᓂᖏᑦ ᐋᖅᑭᒃᓱᐃᔩᑦ, ᑭᓯᐊᓂ ᐊᕐᕌᒍᓂᑦ ᖄᖏᖅᑐᓂᒃ, ᐊᒥᓱᑦ ᐊᔾᔨᒌᙱᑦᑐᑦ ᖃᓄᐃᓕᐅᕐᓃᑦ ᐋᖅᑭᒃᓱᖅᑕᐅᖃᑦᑕᖅᓯᒪᔪᑦ. ᖃᔅᓯᐊᕐᔪᐃᑦ ᐱᙳᐊᕐᓂᐅᔪᑦ ᑕᐃᒪᐅᙱᓐᓇᖅᓯᓯᒪᔪᑦ, ᐃᓚᐅᓪᓗᑎᒃ ᐊᓇᐅᓕᒑᕋᓛᓕᕆᓂᖅ, ᐋᑦᑕᐃᔭᕐᔪᐊᓕᕆᓂᖅ, ᑑᖅᓯᑦᑕᕐᓂᕐᒧᑦ ᐋᑦᑕᐃᔭᓕᕆᓂᖅ ᐊᒻᒪᓗ ᐃᒡᓗᕐᔪᐊᑉ ᐃᓗᐊᓂᑦ ᐊᑭᔭᕐᓂᖅ, ᐃᓛᓐᓂᒃᑯᑦ, ᖃᑯᑎᒃᑯᑦ, ᐃᓚᐅᑎᑦᑎᓲᑦ ᓄᓇᓕᖕᓂᑦ ᓵᓚᖃᕋᓱᐊᕐᓂᐅᔪᓂᑦ. ᕼᐋᑭ ᖁᕕᐊᒋᔭᐅᑦᑎᐊᖅᑐᖅ ᑕᒪᐃᓐᓄᑦ ᐊᔾᔨᒌᙱᑦᑐᓄᑦ ᐅᑭᐅᓕᖕᓄᑦ, ᐃᓚᐅᓪᓗᑎᒃ ᐃᓐᓇᐃᑦ ᑲᑐᔾᔨᖃᑎᒌᑦ ᐃᑲᔪᖅᑕᐅᓪᓗᑎᒃ ᓄᓇᓕᖕᓂᑦ ᓇᖕᒥᓂᕆᔭᐅᔪᓄᑦ. ᑰᓕᖕ ᓴᖅᑭᑕᐅᑦᑎᐊᖅᓯᒪᓕᕐᒥᔪᖅ, ᑲᖕᕘ, ᑯᕌᑎ, ᑕᐃ ᑦᓯ, ᔫᑑ ᐊᒻᒪᓗ ᑕᐃ ᑯᐊᓐ ᑑ. ᐃᖃᐃᓕᓴᕐᕕᖕᒥᑦ ᐃᖃᐃᓕᓴᕐᓃᑦ ᐊᒻᒪᓗ ᒧᒥᕐᓂᕐᒧᑦ ᑐᕌᖓᔪᑦ ᐊᐅᓚᑕᐅᖃᑦᑕᖅᓯᒪᖕᒥᔪᑦ. ᓄᓇᓕᖕᒥᑦ ᓴᓇᐅᒐᓕᕆᔨᑦ ᐃᓚᐅᑎᑦᑎᓯᒪᔪᑦ ᓄᓇᓕᖕᓂ ᐃᙱᖅᑎᐅᔪᓂᑦ, ᑐᒃᓯᐊᕐᕕᖕᒥᑦ, ᑎᑕᒃᑎᓂᒡᓗ.
ᐃᖃᓗᖕᓂᑦ Centennial ᐅᖃᓕᒫᒐᖃᕐᕕᒃ, ᐃᓄᖕᓄᑦ ᐅᖃᓕᒫᒐᖃᕐᕕᒃ ᐅᓂᒃᑳᕐᕕᒃ ᐅᒡᓚᖅᑎᓄᑦ ᐃᒡᓗᕐᔪᐊᕐᒦᑦᑐᖅ, ᐊᒥᓱᓂᒃ ᑐᕌᖓᔪᓂᒃ ᐊᐅᓚᑦᑎᖃᑦᑕᖅᑐᑦ ᖃᓄᑐᐃᓐᓇᖅ ᐅᑭᐅᓕᖕᓄᑦ, ᐱᓗᐊᖅᑐᒥᒃ ᖃᓪᓗᓈᑎᑐᑦ ᑭᓯᐊᓂ ᐃᓚᖏᑦᑕᐅᖅ ᐃᓄᒃᑎᑐᑦ ᐊᒻᒪᓗ ᐅᐃᕖᑎᑐᑦ. ᐃᓚᐅᔪᑦ ᐅᓂᒃᑳᕐᓂᖅ, ᕿᑲᕐᓂᕐᒨᖓᔪᑦ ᖃᓄᐃᓕᐅᕐᓃᑦ, ᐅᖃᓕᒫᒐᓕᕆᓃᑦ, ᑕᕐᕆᔭᐅᑎᓂᒃ ᑕᐅᑐᕋᓐᓈᕐᓃᑦ, ᐊᒻᒪᓗᒃᑲᓐᓃᑦ. ᑐᓂᓯᖃᑦᑕᕐᒥᔪᑦ ᐃᓄᖕᓂᒃ ᖃᕋᓴᐅᔭᓂᒃ ᐊᑐᖅᑎᑦᑎᓂᕐᒧᑦ ᐃᓄᖕᓄᑦ ᑐᕌᖓᔪᑎᒍᑦ ᖃᕋᓴᐅᔭᒃᑯᑦ ᐊᒻᒪᓗ ᐊᑭᖃᙱᑦᑐᖅ ᖃᕋᓴᐅᔭᒥᒃ ᐊᑐᕈᓐᓇᖅᑎᑦᑎᔪᕐᒥᑦ. ᖃᐅᔨᒋᐊᕐᕕᒋᓗᒍ ᐅᖃᓕᒫᒐᖃᕐᕕᒃ ᒫᓐᓇᐅᔪᖅ ᐃᑲᕐᕋᕆᔭᐅᔪᓂᒃ ᐊᒻᒪᓗ ᑐᕌᖓᔪᓂᒃ ᖃᐅᔨᔪᒪᒍᕕᑦ.
ᐱᔪᒪᔪᓄᑦ ᓄᓇᓕᖕᒥᑦ ᐱᔨᑦᑎᕋᐃᓂᕐᒧᑦ ᑲᑐᔾᔨᖃᑎᒌᓂᒃ, ᐊᐅᓚᓂᖃᐃᓐᓇᖅᑐᖅᑕᓕᒃ ᕈᐊᔪᓪ ᑲᓇᑕᒥ ᓖᔾᔭᒥᒃ ᐊᕐᓇᐃᑦ ᑲᑐᔾᔨᖃᑎᒌᖏᓐᓂᑦ, ᕉᑎᐊᕆ ᓯᓚᕐᔪᐊᓕᒫᒥᒃ ᑲᑐᔾᔨᖃᑎᒌᑦ, ᐊᒻᒪᓗ Lodge of Benevolent Protective Order of Elks (BPO Elks) ᐊᒻᒪᓗ ᐊᕐᓇᓄᑦ ᑲᑐᔾᔨᖃᑎᒌᖏᑦ, Royal Purple-ᑯᑦ. ᓖᔾᔨᓐ ᐊᒻᒪᓗ Elks ᑕᒪᕐᒥᒃ ᓚᐃᓴᖃᖅᑐᐃᑦ ᐃᓂᖓᑦ, ᐊᑎᓕᐅᕈᔾᔨᔭᕆᐊᖃᕐᓂᕐᒧᑦ ᒪᓕᒐᖃᖅᖢᑎᒃ ᑕᐃᑯᙵᐅᑎᔭᖏᓐᓄᑦ. ᐊᒻᒪᓗ ᑲᑐᔾᔨᖃᑎᒌᑦ ᖃᓄᐃᓕᐅᖅᑎᑦᑎᓂᕆᖃᑦᑕᖅᑕᖏᓐᓄᑦ, ᑲᑐᔾᔨᖃᑎᒌᑦ ᑮᓇᐅᔭᓂᒃ ᑮᓇᐅᔭᓂᒃ ᐱᕈᖅᑎᑦᑎᓇᓱᐊᕐᓂᕐᒧᑦ ᓄᓇᓕᖕᒧᐊᕐᓂᐊᖅᑐᓂᒃ. ᓖᔾᔨᓐ ᐃᓂᖃᕐᒥᔪᖅ ᒪᒃᑯᒃᑐᓄᑦ ᐅᓇᑕᖅᑐᒃᓴᙳᐊᓄᑦ ᑐᕌᖓᔪᒥᒃ, ᑐᕌᖓᔪᖅ ᐃᓚᐅᓂᖃᑦᑎᐊᖅᑐᖅ ᖃᔅᓯᐊᕐᔪᖕᓄᑦ ᒪᒃᑯᒃᑐᖏᓐᓄᑦ ᐃᖃᓗᖕᒥᐅᑕᐃᑦ.
ᐊᓯᐊᒍᑦ ᐋᖅᑭᒃᓱᖅᓯᒪᔪᑎᒍᑦ ᐱᙳᐊᕐᓂᕐᒧᑦ ᖃᓄᐃᓕᐅᕐᓂᐅᔪᓂᒃ, ᐊᒥᓱᑦ ᐃᓄᐃᑦ ᐊᖑᓇᓱᖃᑦᑕᖅᑐᑦ ᐊᒻᒪᓗ ᐃᖃᓪᓕᐊᖅᖢᑎᒃ ᐃᖃᓗᐃᑦ ᖃᓂᒋᔭᖓᓂᑦ. ᐊᒻᒪᓗ, ᐊᒥᓱᑦ ᐃᖃᓗᖕᒥᐅᑕᐃᑦ ᑕᖕᒫᕐᕕᖃᖅᑐᑦ ᓄᓇᐅᑉ ᖃᓂᒋᔭᖓᓂᑦ ᐅᕝᕙᓘᓐᓃᑦ ᐃᒡᓗᕋᓛᖃᖅᖢᑎᒃ ᐊᒃᑐᐊᓂᖃᖅᖢᓂ ᐱᖅᑯᓯᖃᕐᓂᒃᑯᑦ ᖃᑕᙳᑎᒌᓄᑦ ᑕᕆᐅᑉ ᓯᒡᔭᖓᓂᑦ. ᐊᒻᒨᒪᔪᖅᓯᐅᖃᑦᑕᕐᓂᖅ ᖁᕕᐊᒋᔭᐅᑦᑎᐊᕐᒥᔪᖅ ᐊᐅᔭᒃᑯᑦ. ᐊᖑᓇᓱᖕᓂᕐᒧ ᐊᒻᒪᓗ ᐃᖃᓪᓕᐊᕐᓂᕐᒧᑦ ᒪᓕᒐᕋᓛᑦ ᐊᔾᔨᒌᖃᑦᑕᙱᑦᑐᑦ ᓄᓇᓕᖕᒥᐅᓄᑦ ᓄᓇᑖᖃᑕᐅᓯᒪᔪᓄᑦ ᒪᓕᒃᖢᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ. ᖃᐅᔨᒋᐊᕐᕕᒋᓗᒋᑦ ᓄᓇᓕᖕᒥᑦ ᓄᓇᕗᒻᒥ ᒐᕙᒪᒃᑯᑦ ᐆᒪᔪᓕᕆᓂᕐᒧᑦ ᐊᐅᓚᑦᑎᔨᖏᑦᑕ ᑎᑎᕋᕐᕕᖓᑦ ᓚᐃᓴᓐᓯᓄᑦ ᐅᕝᕙᓘᓐᓃᑦ ᐆᒪᔪᓄᑦ ᐱᔪᓐᓇᐅᑎᓂᒃ ᐃᓚᐅᖃᑕᐅᓂᐊᕈᕕᑦ ᐊᖑᓇᓱᖕᓂᕐᒥᒃ ᐊᒻᒪᓗ ᐃᖃᓪᓕᐊᕐᓂᒥᒃ. ᐊᓯᖏᑦ ᖃᓄᐃᓕᐅᕐᓃᑦ ᐊᐅᓪᓚᕈᔾᔨᖃᑦᑕᖅᑐᑦ ᐃᓄᖕᓂᒃ “ᓄᓇᒧᑦ” ᐃᓚᐅᔪᑦ ᓯᑭᑑᒃᑯᑦ ᐊᒻᒪᓗ ᑎᓴᒪᓕᒃᑯᑦ. ᓴᓇᓐᓇᐅᙱᑎᓪᓗᒍ ᓯᑭᑑᒃᑯᑦ ᓱᒃᑲᓴᐅᔾᔪᐊᕐᓃᑦ ᑕᕆᐅᒥᑦ ᖁᕕᐊᒋᔭᐅᖃᑦᑕᖅᓯᒪᓕᕐᒥᔪᖅ ᓱᒃᑲᓴᐅᔾᔪᐊᕈᒪᒃᑲᐅᔪᓄᑦ. ᒪᒃᑯᒃᑐᐃᑦ ᑲᑎᖃᑦᑕᖅᑐᑦ ᓯᑭᑑᒪᒋᐊᖅᑐᖅᖢᑎᒃ Tarr Inlet-ᒧᑦ ᐅᕝᕙᓘᓐᓃᑦ ᐊᑭᐅᓄᑦ, ᐊᑐᖅᖢᒋᑦ ᓯᑭᑑᑎᒃ “ᐊᒡᔭᖅᑕᐅᓂᕐᒧᑦ”. ᐅᒥᐊᖅᑐᕐᓂᖅ ᖁᕕᐊᒋᔭᐅᖕᒥᔪᖅ ᐊᐅᔭᒃᑯᑦ ᑭᓯᐊᓂ ᐊᖏᔪᒥᒃ ᐊᑐᕐᓂᖃᕆᐊᖃᖅᑐᖅ ᐱᖁᑎᓂᒃ ᐊᒻᒪᓗ ᖃᐅᔨᒪᓂᖃᑦᑎᐊᕐᓗᓂ ᖃᓂᑦᑐᒥᑦ ᖃᓄᐃᓕᖓᓂᐅᔪᓂᒃ, ᐅᓕᑦᑕᕐᓃᑦ ᑎᓂᑦᑕᕐᓃᑦ ᕗᕉᐱᓴ ᐸᐃ-ᒥᑦ ᖁᑦᑎᒃᑐᒻᒪᕆᐅᖕᒪᑕ, ᐃᓚᒋᔭᐅᔪᖅ ᐱᖓᓲᔪᓂᑦ ᖁᑦᑎᓛᖑᖃᑦᑕᖅᑐᓂᒃ ᑲᓇᑕᒥᑦ.
ᓄᓇᓕᖅᐸᐅᔭᐅᑉ ᐱᙳᐊᖅᑐᓕᕆᔨᖏᑦ ᐋᖅᑭᒃᓱᐃᖃᑦᑕᖅᑐᑦ ᐊᒥᓱᓂᒃ ᓄᓇᓕᖕᒥᑦ ᖃᓄᐃᓕᐅᕐᓂᐅᔪᓂᒃ ᐊᕐᕌᒍᓕᒫᒧᑦ, ᑲᓇᑕᒥᑦ ᖃᓄᐃᓕᐅᕐᓂᐅᔪᓂᒃ ᓲᕐᓗ ᑲᓇᑕᐅᑉ ᐅᓪᓗᖓᓂᑦ ᐊᒻᒪᓗ ᑎᐅᕆ ᕚᒃᔅ ᐅᓪᓚᖓᓂ, ᖃᓄᐃᓕᐅᕐᓂᐅᔪᓄᑦ ᐃᖃᓗᖕᓅᖓᔪᓄᑦ, ᓲᕐᓗ ᑐᓂᒃ ᑕᐃᒻ ᐊᒻᒪᓗ ᖁᕕᐊᓱᒡᕕᖕᒥ ᐱᙳᐊᕐᓂᐅᔪᓂᑦ. ᐊᑭᓕᖅᑐᖅᑕᐅᙱᖦᓗᑎᒃ ᐃᑲᔪᖅᑕᐅᔪᒪᑐᐃᓐᓇᑦᑎᐊᖅᑐᑦ ᑕᒪᒃᑯᓄᖓ ᖃᓄᐃᓕᐅᖅᑎᑦᑎᓂᐅᔪᓄᑦ. ᑐᓂᒃ ᑕᐃᒻ, ᐃᖃᓗᐃᑦ ᐅᐱᕐᖔᒃᑯᑦ ᐱᙳᐊᖅᑎᑦᑎᓂᖓ, ᐊᐃᑉᕆᓕ ᓄᙳᐊᓂᐅᒐᔪᒃᑐᖅ, ᐊᒻᒪᓗ ᐃᓚᐅᓪᓗᑎᒃ ᐱᖅᑯᓯᒃᑯᑦ ᐱᙳᐊᕈᓰᑦ ᐊᒻᒪᓗ ᓵᓚᖃᕋᓱᐊᕐᓃᑦ, ᓲᕐᓗ ᐸᓚᐅᒑᓕᐅᕋᓚᓴᐅᔾᔪᐊᕐᓂᖅ ᐊᒻᒪᓗ ᓇᑦᑎᖅᓯᐅᕐᓂᖅ, ᐊᒻᒪᓗ ᓱᒃᑲᓴᕐᔪᐊᕐᓃᑦ ᖁᕕᐊᒋᔭᐅᓛᑦ, ᓲᕐᓗ ᕿᒧᒃᓯᖅᑎᑦᑎᓃᑦ, ᒪᔪᕋᖅᖢᑎᒃ ᓯᑭᑑᒃᑯᑦ ᓱᒃᑲᓴᐅᑎᓃᑦ, ᐊᒻᒪᓗ ᐅᖓᓯᒃᑐᒧᑦ ᓯᑭᑑᒃᑯᑦ ᓱᒃᑲᓴᐅᑎᓃᑦ ᐃᖃᓗᖕᓂᑦ ᑭᒻᒥᕈᒻᒧᑦ ᐅᑎᒧᓪᓗ. ᐱᓇᓱᐊᕈᓯᓗᒃᑖᖅ ᐱᖅᑯᓯᕆᔭᐅᔪᓂᒃ ᐱᙳᐊᕐᓃᑦ ᐊᒻᒪᓗ ᐃᓄᒃᑎᑐᑦ ᒧᒥᕐᓃᑦ ᐃᑲᔪᕋᔪᒃᑐᖅ ᓇᐃᑦᑑᔪᒥᒃ ᐅᑭᐅᒃᑯᑦ ᐅᓪᓗᐃᑦ ᐊᑯᓐᓂᖏᓐᓂᑦ ᖁᕕᐊᓱᒡᕕᖕᒥ ᐊᒻᒪᓗ ᓄᑖᖅ ᐅᑭᐅᖓᓂ. ᐊᓕᐊᓇᐃᑦ ᑎᒃᑕᒃᑎᓂᒃ ᑲᑎᑎᑦᑎᓂᖅ, ᑕᐃᒪᓐᓇᐃᓕᖅᑎᑦᑎᓯᒪᓕᖅᑐᑦ ᑕᐃᒪᙵᓂᑦ 2005-ᒥᑦ, ᐋᖅᑭᒃᓱᖅᑕᐅᖃᑦᑕᖅᑐᖅ ᐃᒻᒥᒃᑰᖓᔪᒃᑯᑦ ᑲᑎᒪᔨᒃᑯᓐᓄᑦ ᐊᒻᒪᓗ ᐊᐅᔭᖅ ᐱᒋᐊᓕᓵᖅᑎᓪᓗᒍ ᐱᖃᑦᑕᖅᑐᖅ.
ᒪᓕᒃᖢᒍ ᒫᓐᓇᐅᔪᖅ ᓄᓇᕗᒻᒧᑦ ᐃᒥᐊᓗᖕᓄᑦ ᒪᓕᒐᖅ, ᐃᖃᓗᐃᑦ ᓇᓗᓇᐃᒃᑯᑦᑎᖅᑕᐅᓯᒪᔪᖅ ᐃᓱᒪᖅᓱᕐᓂᖓᓄᑦ, ᑐᑭᖃᖅᑐᖅ ᓂᐅᕕᐊᒃᓴᐅᔪᑦ, ᐱᓯᒪᔭᐅᔪᑦ ᐊᒻᒪᓗ ᐃᒥᖅᑕᐅᔪᑦ ᐃᒥᐊᓗᖕᓂᑦ ᐊᔪᙱᑎᑕᐅᔪᑦ ᒪᓕᒃᖢᒋᑦ ᐊᑐᖅᑕᐅᔪᑦ ᐃᒥᐊᓗᐃᑦ ᒪᓕᒐᖏᓐᓂᑦ ᓄᓇᕗᒻᒥᑦ. ᐃᒥᐊᓗᐃᑦ ᓂᐅᕕᖅᑕᐅᔪᓐᓇᖅᑐᑦ ᓛᐃᓴᖃᖅᑐᓂᑦ ᐃᓂᐅᔪᓂᑦ ᐅᕝᕙᓘᓐᓃᑦ ᓂᐅᕕᖅᑕᐅᓗᑎᒃ ᐃᒥᐊᓗᐃᑦ ᐱᔪᓐᓇᐅᑎᖃᕐᓗᓂ ᓇᖕᒥᓂᖅ ᐊᖏᕐᕋᒥᑦ ᐃᒥᕐᓂᐊᕐᓗᒍ. ᐃᒥᐊᓗᐃᑦ ᓯᕐᓗᐊᖅᑕᖃᕋᓗᐊᖅᑎᓪᓗᒍ ᐃᖃᓗᖕᓂᑦ ᑐᓂᓯᖃᑦᑕᖅᑐᑦ ᓚᐃᓴᖃᖅᑐᓄᑦ ᐃᓂᐅᔪᓄᑦ ᐅᕝᕙᓘᓐᓃᑦ ᓂᐅᕕᖅᑐᓄᑦ ᐊᔾᔨᐅᙱᑦᑐᒧᑦ ᐊᑐᕐᓂᐊᕐᓗᒍ ᓚᐃᓴᓐᓯᒥᒃ, ᒫᓐᓇᐅᔪᖅ ᐃᒥᐊᓗᐃᑦ ᓂᐅᕕᕐᕕᒃᑕᖃᙱᑦᑐᖅ ᐃᓄᐃᑦ ᓂᐅᕕᕐᕕᒋᔪᓐᓇᖅᑕᖓᓐᓂᒃ ᐊᖏᕐᕋᒥᑦ ᐃᒥᕐᓂᐊᕐᓗᒍ. ᑕᒪᓐᓇ ᐊᓯᐊᙳᑐᐃᓐᓇᕆᐊᖃᖅᑐᖅ ᐃᓄᖕᓂᒃ ᐅᖃᖃᑎᖃᕐᓃᑦ ᐱᓚᐅᕐᒪᑕ ᐅᖃᐅᓯᖃᕐᓂᕐᒧᑦ ᐃᖃᓗᐃᑦ ᐋᖅᑭᒃᓯᓂᐊᕐᒪᖔᑦ ᐱᐊᓂᒃ ᐊᒻᒪᓗ ᐅᐊᐃᓂᓂᒃ ᓂᐅᕕᐊᒃᓴᖃᕐᓂᕐᒧᑦ ᓂᐅᕕᕐᕕᖕᒥᑦ. ᖃᔅᓯᐊᕐᔪᖕᓂᑦ ᓚᐃᓴᖃᖅᑐᓂᒃ ᓂᕆᕝᕕᒃᑕᖃᐅᖅᑐᖅ ᐊᒻᒪᓗ ᑲᑐᔾᔨᖃᑎᒌᓄᑦ ᐃᓂᐅᔪᓂᒃ ᐃᖃᓗᖕᓂᑦ, ᐊᒻᒪᓗ ᐃᓛᓐᓂᒃᑯᑦ ᐱᔨᑦᑎᖃᑦᑕᖅᑐᑦ ᑲᑐᔾᔨᖃᑎᒌᑦ ᐱᔪᓐᓇᖅᑐᑦ ᐊᔾᔨᐅᙱᑦᑐᒥᒃ ᓚᐃᓴᓐᓯᒥᒃ ᓄᓇᓕᖕᒥᑦ ᖃᓄᐃᓕᐅᕐᓂᐅᔪᓄᑦ. ᓄᓇᕗᑦ ᒐᕙᒪᒃᑯᖏᑦᑕ ᑮᓇᐅᔭᓕᕆᔨᒃᑯᖏᑦ ᐱᔭᒃᓴᐅᑎᒋᔭᖓᑦ ᖃᐅᔨᓴᐃᓂᕐᒧᑦ ᐃᒥᐊᓗᖕᓂᑦ ᐊᐅᓚᑕᐅᓂᖏᓐᓄᑦ ᐊᒻᒪᓗ ᑐᓂᐅᖅᑲᐅᑕᐅᓂᖏᓐᓄᑦ ᓄᓇᕗᒻᒥᑦ, ᖃᐅᔨᒋᐊᕈᓐᓇᖅᑕᐃᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖓᑦ ᑐᑭᓯᐅᒪᔾᔪᑎᒃᑲᓐᓂᕐᒥᒃ ᐋᖅᑭᐅᒪᔫᑉ ᒥᓵᓄᑦ ᐱᔪᒪᒍᕕᑦ.
