You are here

ᐃᖃᓗᒃᑑᑦᑎᐊᖅ

ᐃᖃᓗᒃᑑᑦᑎᐊᖅ

ᐊᕕᒃᑐᖅᓯᒪᓂᖓ: 
ᕿᑎᕐᒥᐅᓂ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (KitSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐅᑉᓗᒥᐅᔪᖅ ᐃᖃᓗᒃᑑᑦᑎᐊᖅ ᐱᖓᖕᓇᖅᐸᓯᖓᓃᑦᑐᖅ ᓯᒡᔭᖓᓂᑦ ᕕᒃᑐᕆᐊ ᕿᑭᖅᑕᐅᑉ, ᐱᒻᒪᕆᐅᒋᔭᐅᓚᐅᖅᑐᖅ ᒪᖃᐃᓐᓂᕐᒧᑦ ᐊᒪᓗ ᐃᖃᓗᒃᓯᐅᕐᕕᐅᖃᑦᑕᖅᖢᓂ ᑕᐃᔅᓱᒪᓂ Copper ᐃᓄᐃᑦ-ᖑᓚᐅᖅᑐᓄᑦ ᑕᐃᑲᓂ.  ᐊᑎᑐᖃᖓ ᐃᖃᓗᒃᑑᑦᑎᐊᖅ, ᑐᑭᖃᖅᑐᖅ “ᐃᖃᓗᒃᑕᓕᒃ ᐃᖃᓗᒃᓯᐅᕐᕕᒃ”.  ᓂᐅᕕᖅᑏᑦ (HBC) ᓴᓇᓚᐅᖅᑐᑦ ᑕᐅᕐᓰᕕᖕᒥᑦ ᑲᓇᖕᓇᖓᓂᑦ ᒫᓐᓇᐅᔪᖅ ᐃᓂᒋᔭᖓᓂᑦ ᓄᓇᓕᐅᑉ 1920-ᖏᑦ ᐱᒋᐊᓵᖅᑎᓪᓗᒍ.  ᐸᓖᓯᒃᑯᑦ ᓯᕗᓪᓕᖅᐹᒥᑦ ᐃᒡᓗᑖᓚᐅᖅᑐᑦ ᐃᖃᓗᒃᑑᑦᑎᐊᕐᒥᑦ 1926-ᒥᑦ ᐊᒪᓗ ᐊᔪᕿᖅᑐᐃᔨᒃᑯᑦ ᓴᖅᑭᑦᑎᓪᓗᑎᒃ ᑐᒃᓯᐊᕐᕕᖕᒥᑦ ᐊᕐᕌᒍᙳᑐᐊᕐᒪᑦ.  ᑭᓯᐊᓂ 1940-ᖏᑦ ᐃᓱᓕᓕᖅᑎᓪᓗᒍ ᐃᓂᐅᔪᖅ ᐃᓂᒋᔭᐅᒻᒪᕆᓕᓚᐅᕐᑐᖅ ᓄᓇᓕᖕᒧᑦ.  1947-ᒥᑦ, ᐅᖓᓯᒃᑐᒧᑦ ᐃᖏᕐᕋᓂᕐᒧᑦ ᖃᐅᔨᒪᔾᔪᑎ ᐃᓕᔭᐅᓚᐅᖅᑐᖅ ᐃᖃᓗᒃᑑᑦᑎᐊᕐᒥᑦ, ᑕᐃᑲᙵᑦ ᓴᓇᔪᖃᓕᖅᖢᓂ ᐅᓄᙱᑦᑐᓂᒃ ᐃᒡᓗᕐᔪᐊᓂᒃ.  1950-ᖏᑦ ᐱᒋᐊᓵᖅᑎᓪᓗᒋᑦ, ᐃᖃᓗᒃᑑᑦᑎᐊᖅ ᓂᕈᐊᖅᑕᐅᓚᐅᖅᑐᖅ ᐊᐅᓚᑦᑎᓂᕐᒧᑦ DEW (ᐅᖑᓯᒃᑐᒥᒃ ᖃᐅᔨᑎᑦᑎᓵᓪᓕᔾᔪᑎᒥᒃ) ᐃᓂᐅᔪᓂᒃ ᐅᑭᐅᖅᑕᖅᑑᑉ ᓯᒡᔭᒐᖓᓂᑦ, ᐊᒪᓗ ᕼᐋᒻᓚᙳᔪᖅ ᓅᖦᖢᓂ ᒫᓐᓇᐅᔪᖅ ᐃᓂᒋᔭᐅᓕᖅᑐᒧᑦ.  ᐃᓕᓴᕐᕕᓕᐅᖅᑳᖅᑎᓪᓗᒋᑦ, ᐃᓄᐃᑦ ᓄᓇᓕᖃᕐᑐᑐᖃᐃᑦ, ᐃᓅᓯᓗᒃᑖᖓᓐᓂᒃ ᓄᓇᒥᐅᑕᐅᓚᐅᖅᑐᑦ ᑕᐃᑉᓱᒪᓂ, ᑕᐃᑯᖓ ᓅᖁᔭᐅᓚᐅᖅᑐᑦ ᓱᕈᓯᖏᑦ ᐃᓕᓴᖁᔭᐅᓪᓗᑎᒃ.

 

ᐃᖃᓗᒃᑑᑦᑎᐊᖅ ᑲᔪᓯᓂᖃᖅᑐᖅ ᐱᕈᖅᐸᓪᓕᐊᔪᒻᒪᕆᐅᕗᑦ ᐊᑉᖁᓵᖅᑕᐅᖃᑦᑕᕐᓂᖓᓄᑦ ᕿᑎᕐᒥᐅᓂᑦ, ᑐᑦᑕᕐᕕᒋᔭᐅᓂᖓᓄᑦ ᐅᔭᕋᕐᓯᐅᕐᑐᓕᕆᔨᓄᑦ ᐱᖓᖕᓇᖓᓂᑦ ᓯᒡᔭᖓᓂᑦ ᓄᓇᕗᒻᒥᑦ, ᐊᒻᒪ ᐃᓚᖏᓐᓄᑦ ᓄᓇᕗᑦ ᒐᕙᒪᒃᑯᑦ ᐱᔨᑦᑎᕋᕐᑎᐅᔪᓄᑦ ᐊᓪᓚᒡᕕᖃᐅᑎᐅᓪᓗᓂ ᐊᒻᒪᓗ ᐃᓄᐃᑦ ᐃᑦᑕᕐᓂᓴᓕᕆᔩᑦ ᑎᒥᖁᑎᖏᓐᓄᑦ.  ᐊᖑᓇᓱᖕᓂᖅ ᐃᖃᓗᒃᓯᐅᕐᓂᕐᓗ ᐱᒻᒪᕆᐅᒋᔭᐅᔪᑦ ᓱᓕ ᑕᐃᑲᓂ, ᐱᓕᕆᐊᒃᓴᕐᑖᕐᑎᑦᑎᓲᑦ ᐊᖑᔭᒥᓂᒃ ᓯᐊᒻᒪᒃᑎᓪᖢᒋᓪᓗ ᓄᓇᕗᒻᒧ “ᐃᓄᐃᑦ ᓂᕿᖁᑎᖏᑦ” (ᓂᕐᔪᑏᑦ ᐊᖑᔭᐅᔪᑦ ᐅᕙᓘᓃᑦ ᐃᖃᓗᐃᑦ ᓂᕆᔭᒃᓴᐃᑦ) ᐆᒪᔪᓕᕆᔨᓄᑦ ᐊᔪᓐᖏᑎᑕᐅᒍᑎᒃ ᑭᓯᐊᓂ.  ᓄᓇᓕᐅᑉ ᐃᑦᑕᕐᓂᑕᖏᑦ ᑐᓴᒐᒃᓴᐅᔪᑦ ᐅᑯᐊ, ᓄᑕᐅᖏᑦᑐᖅ ᑑᓚᐃᓐ ᓴᐃᑦ ᐊᒻᒪ ᐅᒥᐊᕐᔪᐊ Maud ᐊᒥᐊᒃᑯᖏᑦ ᑕᐃᑲᓃᑦᖢᑎᒃ, Norwegian-ᒥᐅᑕᖅ ᕿᓂᖅᓴᖅᑎᐅᑉ ᕈᐊᓄᑦ ᐊᒪᓐᓴᓐ ᐅᒥᐊᕐᔪᐊᖓᑦ, ᐅᑎᖅᑎᑕᐅᓕᖅᑐᑦ ᓄᐊᐅᐃᒧᑦ.

 

ᓄᓇᕗᒻᒥ ᒐᕙᒪᒃᑯᖏᑦ (GN) ᐱᓕᕆᔨᖏᓐᓄᑦ ᓇᓗᓇᐃᔭᐃᓂᕐᒧᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᑐᓂᓯᖃᑦᑕᖅᑐᖅ ᐱᐅᔪᒻᒪᕆᖕᒥᑦ ᑲᑎᖅᓱᖅᓯᒪᔪᓂᒃ ᓇᑭᙶᕐᓂᖓᓂᑦ ᓄᓇᕗᒻᒥ, ᐊᑕᐅᑦᑎᒃᑯᑦ ᐃᓄᐃᑦ ᐱᖅᑯᓯᖏᑦ ᐊᒻᒪᓗ ᓇᑭᙶᕐᓂᖓᓂᒃ ᐊᒻᒪᓗ ᐅᖃᐅᓯᖃᖅᑐᖅ ᖃᓄᖅ ᐃᓄᐃᑦ ᐱᖅᑯᓯᖓᑦ ᐃᓚᐅᑎᑕᐅᖕᒪᖔᑕ ᒐᕙᒪᒃᑯᑦ ᐊᐅᓚᓐᓂᕆᔭᖓᓐᓄᑦ ᐊᒻᒪᓗ ᐱᔨᑦᑎᕋᐅᑎᖏᓐᓄᑦ.  ᕿᓂᕐᕕᐅᖁᔭᕗᑦ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᒃ ᐊᑐᐃᓐᓇᐅᓕᒃᑲᓐᓂᖅᐸᑦ ᐋᖅᑭᒃᓱᖅᑕᐅᕌᓂᒃᐸᑦ, ᒫᓐᓇᐅᔪᖅ ᓱᓇᑐᐃᓐᓇᓅᖓᔪᖓᑦ ᓄᓇᕗᑦ ᒐᕙᒪᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓᑦ ᐆᒃᑐᕈᓐᓇᖅᑕᐃᑦ ᑐᑭᓯᐅᒪᔾᔪᑎᓂᒃ.  http://www.gov.nu.ca/

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐃᖃᓗᒃᑑᑦᑎᐊᖅ ᒪᒃᑯᒃᑐᖃᐅᓛᖑᔪᖅ.  2011-ᒥᑦ ᓈᓴᕐᑕᐅᓃᑦ ᓇᓗᓇᐃᕐᓂᖏᑦ, ᕿᑎᕈᔪᐊᓂᑦ ᐊᕌᒍᓖᑦ 27.5-ᖑᔪᖅ.  550 ᓱᕈᓰᑦ 18 ᑐᖔᓂᑦ ᐊᕐᕌᒍᓖᑦ, 4%-ᑐᐃᓐᓇᐃᑦ 65 ᐅᖓᑖᓄᑦ ᐊᕐᕌᒍᖃᖅᑐᑦ, ᐊᒻᒪᓗ 85 ᐅᖓᑖᓄᑦ ᐊᕐᕌᒍᖃᙱᑦᑐᑦ.  ᐃᓐᓇᕆᔭᐅᔪᑦ ᑕᐃᒪᓐᓇᒧᑦ ᐱᒻᒪᕆᒋᔭᐅᔪᑦ ᖃᐅᔨᒪᓂᖏᓐᓄᑦ ᐃᓄᐃᑦ ᐱᖅᑯᓯᑐᖃᖏᓐᓂᑦ ᐊᒪᓗ ᐅᖃᐅᓯᑐᖃᕐᓂᖏᓐᓂᑦ.

 

ᕿᑎᕐᒥᐅᑦ ᐃᑦᑕᕐᓂᓴᓕᕆᔨᒃᑯᑦ ᑲᑎᒪᔨᖏᑦ (KHS) ᐱᓕᕆᐊᒃᓴᖃᕐᑐᑦ ᔭᒐᐃᑕᐃᓕᓪᓗᑎᒃ ᐱᖅᑯᓯᑐᖃᕐᓂᑦ, ᐱᖓᓱᓂᒃ ᐃᓐᓇᕐᓂᒃ ᐱᓕᕆᔨᖃᖅᖢᑎᒃ ᐅᖃᐅᓯᑐᖃᓕᕆᔨᐅᓪᓗᑎᒃ, ᐊᒻᒪ KHS ᐃᑦᑕᕐᓂᑕᓕᕆᔩᑦ ᐱᓕᕆᖃᑎᖃᖅᓯᒪᔪᑦ ᑮᓕᓂᒃ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᑐᓕᕆᔨᖏᓐᓂᒃ, ᒪᐃ ᕼᐊᑯᖓᒃ ᓄᓇᓕᖕᒥᑦ ᐅᖃᓕᒫᕐᕕᓕᕆᔨᓂᑦ, ᐃᖃᓗᒃᑑᑦᑎᐊᖅ ᐃᓕᓐᓂᐊᕐᑐᓕᕆᔨᐊᓛᓂᒡᓗ ᑮᓇᐅᔭᓂᒃ ᓇᐃᐱᑦᑎᒐᓱᐊᕐᖢᑎᒃ ᓴᓇᔭᐅᖁᓪᓗᒍ ᒪᐃ ᕼᐊᑯᖓᒃ ᓄᓇᓕᖕᒥᑦ ᐅᖃᓕᒫᕐᕕᒃ, ᐱᖅᑯᓯᓕᕆᕝᕕᒃᓗ ᐃᑯᐊᓪᓚᓚᐅᕐᑎᓪᓗᒍ ᓄᓇᓕᖕᒥᑦ ᐅᖃᓕᒫᕐᕕᒃ 1998-ᒥᑦ.  ᒪᑐᐃᓚᐅᖅᑐᖅ 2002-ᒥᑦ ᐅᖃᓕᒫᕐᕕᒃ, ᐱᓕᕆᕝᕕᒃ ᐊᒥᓱᓄᑦ ᐃᓂᒋᐅᓕᑐᖅ ᐅᑯᓄᖓ, ᑕᑯᓐᓇᒐᒃᓴᐃᑦ, ᐱᖅᑯᓯᓕᕆᕝᕕᒃ, ᐱᒪᑐᒃᑕᐅᓯᒪᔪᑦ, ᓴᓇᙳᐊᒐᖃᕐᕕᒃ, ᐃᓄᖕᓄᑦ ᑐᕌᖓᔪᖅ ᐅᖃᓕᒫᕐᕕᒃ ᐃᓕᓐᓂᐊᕐᕕᖕᒧᑦ ᐅᖃᓕᒫᕐᕕᓪᓗ.  “ᑖᒻᓇ ᐊᒥᓱᓄᑦ ᐃᓂᒋᔭᐅᓕᕐᑐᖅ ᐃᓕᓐᓂᐊᕐᑎᓄᑦ, ᓱᕈᓯᕐᓄᑦ, ᓱᕈᓰᑦ ᐊᖓᔪᖅᑳᖏᓐᓄᑦ, ᐊᖓᔪᒃᖄᑦᑎᐊᕆᔭᐅᔪᓄᓪᓗ ᑲᑎᑎᑦᑎᓂᕐᒥᒃ ᐊᑕᐅᓯᕐᒦᓪᓗᑎᒃ, ᑐᓂᔾᔪᑎᖃᑦᑕᐅᑐᓂᕐᒥᒃ ᐃᓱᒪᒋᔭᖏᓐᓂᒃ, ᐊᔪᙱᓐᓂᐅᔪᓂᒃ, ᖃᐅᔨᒪᓂᕐᒥᒃ ᐊᒻᒪ ᐃᒃᐱᒋᓂᕆᔭᐅᔪᓂᒃ ᑕᑯᒃᓴᐅᑎᑦᑎᔪᓂᒃ ᐱᖅᑯᓯᑐᖃᒃᑯᑦ ᐃᓅᖃᑎᒌᖕᓂᕆᔭᑦᑎᒍᑦ, ᐱᔨᑦᑎᕋᕐᓗᒋᑦᓗ ᐅᓪᓗᒥᐅᔪᖅ ᐱᔪᒪᓂᕆᔭᑦᑎᓐᓂᓪᓗ.”  (KHS, 2013) ᐃᓂᐅᔪᖅ KHS ᐃᑦᑕᕐᓂᑕᓕᕆᔨᒃᑯᑦ ᑕᑯᒃᓴᐅᑎᑦᑎᔪᓐᓇᕐᓯᔪᑦ ᐱᒻᒪᕆᐅᔪᒥᒃ ᐃᑦᑕᕐᓂᑕᓂᒃ ᑐᑭᓯᐅᒪᔾᔪᑎᓂᒡᓗ ᐃᑲᔫᑕᐅᔪᓐᓇᕐᑐᓂᒃ ᐃᓕᓐᓂᐊᕐᑎᓄᑦ, ᓄᓇᓕᖕᒥᐅᑕᓄᑦ ᐊᒻᒪ ᐳᓛᕐᑐᓄᑦ ᕿᑎᕐᒥᐅᓂᑦ. ᐃᑦᑕᕐᓂᑕᓕᕆᔨᒃᑯᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ (http://www.kitikmeotheritage.ca/)

 

ᐃᖃᓗᒃᑑᑦᑎᐊᕐᒥᐅᑕᐃᑦ “ᓄᓇᒦᓐᓂᕐᒥᒃ” ᖁᕕᐊᒋᔭᓖᑦ ᐊᖁᓯᐅᕐᓯᒪᓪᓗᑎᒡᓗ  ᓄᓇᓕᐅᑉ ᓯᓚᑖᓂᑦ ᐃᒡᓗᕐᔪᐊᕋᓛᖏᓐᓄᙵᐅᔪᓂᒃ ᐅᓄᕐᑐᑦ ᐃᓄᒐᓴᐃᑦ ᓯᓚᒥᑦ ᖃᓄᐃᓕᐅᕐᓂᖃᕐᕕᒋᖃᑦᑕᖅᖢᓂᔾᔪᒃ.  ᐊᑉᖁᑏᑦ Mount Pelly-ᒧᙵᐅᔪᑦ ᐊᒻᒪ ᑕᕆᐅᕐᒧᑦ.

 

ᐱᖓᓱᓂᒃ ᑐᒃᓯᐊᕐᕕᖃᖅᑐᖅ ᐃᖃᓗᒃᑑᑦᑎᐊᕐᒥᑦ.  ᓴᐃᓐ ᔪᐊᔨ ᐊᔪᕆᕐᑐᐃᔨᒃᑯᑦ, ᐃᒃᓯᕋᕐᔪᐊᒃᑯᑦ, ᒐᓛᑦ ᑕᐃᑎᖕᔅ ᑐᒃᓯᐊᕐᕕᒃ.

 

ᖃᑉᓗᓈᑎᑦᑐᑦ ᐅᖃᐅᓯᖅ ᑐᓴᕋᔪᒐᔭᕐᑕᐃᑦ ᐃᖃᓗᒃᑑᑦᑎᐊᕐᒥᑦ.  ᐃᓄᐃᓐᓇᖅᑐᓐ ᐃᓄᐃᑦ ᐅᖃᐅᓯᖓᑦ ᐃᖃᓗᒃᑑᑦᑎᐊᕐᒥᑦ ᐅᖃᐅᑕᐅᓂᕐᓴᐅᔪᖅ, 2011-ᒥᑦ ᓈᓴᕐᑕᐅᓃᑦ ᓇᓗᓇᐃᕐᓯᔪᑦ 255 ᐃᓄᐃᑦ ᓇᓗᓇᐃᕐᑐᑦ ᐅᖃᐅᓯᑐᖃᕆᓂᕋᕐᖢᒍ.  ᑭᓯᐊᓂ, 90-ᑐᐃᓐᓇᐃᑦ ᐃᓄᐃᑦ ᐅᖃᓚᐅᖅᑐᑦ ᐅᖃᐅᓯᖅ ᐊᑐᓗᐊᖃᑦᑕᕐᓂᖓᓐᓄᑦ ᐊᖏᕐᕋᖓᓐᓂᑦ (5%-ᖑᔪᐃᑦ ᐃᓅᔪᓂᑦ ᑕᐃᑲᓂ); 260-ᑲᓐᓃᑦ ᐅᖃᓚᐅᖅᑐᑦ ᐊᑐᕋᔪᖕᓂᖓᓐᓄᑦ ᐊᖏᕐᕋᒥᖕᓂᑦ.  ᐃᓄᐃᓐᓇᖅᑐᓐ ᑎᑎᕋᖅᑕᐅᖃᑦᑕᖅᑐᖅ ᖃᑉᓗᓈᑎᑑᖓᓪᓗᑎᒃ, ᐃᓄᒃᑎᑑᙱᑦᑐᖅ ᐊᑐᖅᑕᐅᖃᑦᑕᖅᑐᓂᒃ ᑭᕙᓪᓕᕐᒥᑦ ᐊᒻᒪᓗ ᕿᑭᖅᑖᓗᖕᒥᑦ.  ᐃᓄᐃᓐᓇᖅᑐᓐ ᐃᓕᓐᓂᐊᕐᑕᐅᖃᑦᑕᕐᑐᑦ ᐃᓕᓐᓂᐊᕐᕕᖕᒥᑦ. ᐊᒻᒪ ᕿᑎᕐᒥᐅᑦ ᐱᖅᑯᓯᓕᕆᔨᒃᑯᖏᓐᓄᑦ ᓄᓇᕗᒻᒥ ᐅᖃᓕᒫᓕᕆᓂᕐᒧᑦ ᑲᑎᒪᔨᖏᑦ ᐱᓕᕆᐊᖃᖅᑐᑦ ᐃᓄᐃᓐᓇᖅᑐᓐ ᔭᒐᐃᑦᑕᐃᓕᒪᓂᕐᒧᑦ ᖃᐅᑕᒫᑦ ᐃᓅᓯᕆᔭᐅᔪᒥᒃ ᐊᑐᓕᕐᓗᒍ ᕿᑎᕐᒥᐅᓂᑦ ᓲᕐᓗ ᓄᓇᒥᑦ ᓯᓂᒃᑕᕆᐊᖅᓯᒪᓂᒃᑯᑦ ᐅᖃᐅᓯᕆᔭᐅᔪᒥᒃ ᐱᔾᔪᑎᖃᖅᖢᑎᒃ, ᐱᖅᑯᓯᒥᒃ ᐊᔪᙱᓐᓂᕐᒧᑦ ᐱᓕᕆᐊᒃᓴᕆᔭᐅᔪᑦ, ᐃᓄᐃᓐᓇᖅᑐᑦ ᐅᖃᓕᒫᒐᓕᐅᕆᓂᕐᓃᓪᓗᑦ.  ᐃᓄᒃᑎᑐᑦ ᐅᖃᓪᓚᒃᓯᒪᒍᕕᑦ ᐊᓯᖏᓐᓂᑦ ᓄᓇᓕᖕᓂᑦ, ᐸᕐᓇᒃᓯᒪᒋᑦ ᐃᓕᑦᑎᓂᕐᒧᑦ ᐊᓯᖏᑦᑕ ᐅᖃᓪᓚᐅᓯᕆᖃᑦᑕᖅᑕᖏᓐᓂᑦ.  ᐅᐃᕖᑦ ᐅᖃᐅᓯᖓᑦ ᐃᓕᑕᕆᔭᐅᓯᒪᒐᓗᐊᖅᑎᓪᓗᒍ ᓄᓇᕗᒻᒥ, 10 ᑐᖔᓂᑦ ᐃᓄᐃᑦ ᐃᖃᓗᒃᑑᑦᑎᐊᕐᒥᑦ ᐅᖃᖅᓯᒪᔪᑦ ᐅᐃᕖᖑᓂᕋᖅᖢᑎᒃ 2011-ᒥᑦ ᓈᓴᕐᑕᐅᓚᐅᕐᑐᓂᒃ ᓇᓗᓇᐃᕐᓯᓯᒪᔪᑦ.  ᑭᓯᐊᓂ, ᐃᓄᐃᑦ ᐅᖃᐅᓯᖓᑦ (ᐃᓄᒃᑎᑐᑦ ᐊᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒪᓗ ᐅᐃᕖᑎᑐᑦ ᑕᒪᕐᒥᒃ ᐃᓕᑕᕆᔭᐅᓯᒪᔪᑦ ᓄᓇᕗᒻᒥᑦ, ᑕᐃᒪᓐᓇᒧᑦ ᐱᔪᖕᓇᐅᑎᖃᖅᑐᑎᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓂᒃ ᑲᒪᒋᔭᐅᑎᓪᓗᑎᑦ ᐅᖃᐅᓯᕐᒥᑦ ᓇᓕᑐᐃᓐᓇᖏᓐᓂᒃ ᐊᑐᕈᒪᓗᑎᑦ.

ᑮᓇᐅᔾᔭᒃᓴᕈᑕᐅᔪᑦ: 

ᐃᓚᒋᔭᐅᑉᓗᓂ ᐃᖏᕐᕋᔭᖕᓂᕐᒧᑦ ᑐᕌᖅᑕᕐᕕᐅᓂᖓᓄᑦ ᕿᑎᕐᒥᐅᓄᑦ, ᐃᖃᓗᒃᑑᑦᑎᐊᖅ ᓄᓇᕗᑦ ᒐᕙᒪᒃᑯᑦ ᐊᓪᓚᒡᕕᖃᕐᑐᑦ, ᐃᓱᒪᓕᕆᔨᒃᑯᑦ ᐊᒻᒪᓗ ᐊᔪᓕᕈᑎᖃᖅᓯᒪᔪᓕᕆᔨᒃᑯᑦ ᐋᓐᓂᐊᖃᖅᑕᐃᓕᒪᔪᓕᕆᔨᒃᑯᓐᓂᑦ.  ᐊᓪᓚᒡᕕᖃᐅᕐᒥᔪᑦ ᐃᓄᐃᑦ ᓄᓇᑖᕐᓂᕐᒨᖓᔪᓂᒃ ᑲᑐᔾᔨᖃᑎᒌᓂᑦ, ᓲᕐᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ, ᓄᓇᕗᑦ ᐊᕙᑎᓕᕆᔨᒃᑯ, ᓄᓇᕗᑦ ᐸᕐᓇᐃᔪᓕᕆᔨᒃᑯᑦ, ᓄᓇᓕᕆᔩᑦ ᐱᕝᕕᐅᔪᓕᕆᔨᒃᑯᓪᓗ ᓄᓇᕗᑦ ᑐᙵᕕᒃᑯᓐᓂᑦ.  ᕿᑎᕐᒥᐅᓂᑦ, ᐊᕕᒃᑐᕐᓯᒪᔫᑉ ᐅᔭᕋᕐᓯᐅᕐᑎᓄᑦ ᐱᕙᓪᓕᐊᓂᖃᕐᑐᓄᑦ ᐱᓕᕆᕝᕕᖃᐅᕆᓪᓗᑎᒃ, ᓲᕐᓗ Hope Bay Belt ᒎᓗᒧᑦ ᐱᓕᕆᐊᖅ.  ᐃᖃᓗᒃᑑᑦᑎᐊᖅ ᐊᖏᕐᕋᕆᔭᐅᔪᖅ ᕿᑎᕐᒥᐅᑦ ᓂᖀᑦ-ᓄᑦ, ᑲᓇᑕᐅᑉ ᒐᕙᒪᒃᑯᖏᓐᓄᑦ ᖃᐅᔨᓴᖅᑕᐅᓂᖃᖃᑦᑕᖅᑐᑐᐊᖅ ᓂᕿᓕᕆᕝᕕᒃ ᓄᓇᕗᒻᒥ ᐅᒥᖕᒪᐃᑦ ᓂᕿᖏᓐᓂᒃ ᓂᐅᕕᐊᒃᓴᖃᖃᑦᑕᖅᖢᑎᒃ, ᑭᓯᐊᓂᒃ ᐅᒥᖕᒪᖕᐃᑦ ᐊᖑᔭᐅᒍᑎᒃ.  ᓂᕿᓕᕆᕝᕕᒃ ᑕᕆᐅᕐᒥᑕᓂᒃ ᐃᖃᓗᖕᓂᒃ ᓂᐅᕕᐊᒃᓴᓕᐅᖃᑦᑕᕐᒥᔪᖅ.  ᓄᓇᓕᒃ ᓂᕆᐅᒃᑐᖅ ᐱᕈᒃᑲᓐᓂᕐᓂᐊᕐᓂᖓᓄᑦ ᓴᓇᔭᐅᓂᐊᕐᓂᖓᓄᑦ ᖁᑦᑎᒃᑐᒥᑦ ᐅᑭᐅᖅᑕᖅᑐᒥᑦ ᖃᐅᔨᓴᐃᕝᕕᒃ, ᐱᐊᓂᒐᔭᖅᑐᖅ 2017-ᒥᑦ.

ᕈᐊᔪᓪ ᐸᐃᓐᒃ ᑲᓇᑕᒥᑦ ᑮᓇᐅᔭᒃᑯᕕᒃᑕᖃᖅᑐᖅ ᐃᖃᓗᒃᑑᑦᑎᐊᕐᒥᑦ.  ᓂᐅᕕᖅᑏᑦ ᐊᒪᓗ ᑯᐊᐸᒃᑯᑦ ᑐᓂᓯᖃᑦᑕᖅᑐᑦ “ᑮᓇᐅᔭᓕᕆᓂᐅᔪᓂᒃ” ᐱᔨᑦᑎᕋᐅᑎᓂᒃ, ᑮᓇᐅᔭᓂᒃ ᐸᐸᑦᑎᕕᖃᕈᓐᓇᕐᑐ ᓂᐅᕕᕐᕕᒃᑯᑎᒍ, ᑮᓇᐅᔭᒃᓴᓂᒃ ᑮᓇᐅᔭᙳᖅᑎᑦᑎᓂᕐᓂᑦ, ᑕᒪᒃᑯᓂᙵᒐᓚᒃ.  ᐊᐅᒃᑕᔫᑦ ᐊᒻᒪ ᐊᑮᑦᑐᖅᓯᓂᕐᒧᑦ ᐊᐅᒃᑕᔫᑦ ᐊᑐᖅᑕᐅᔪᖕᓇᖅᑐᑦ ᐃᓚᖏᓐᓂᒃ ᓂᐅᕕᕐᕕᖕᓂᑦ.  ᑭᓯᐊᓂ, ᐃᓄᐃᑦ ᐊᑐᖃᑦᑕᕐᒥᔪᑦ ᖃᐅᔭᒃᕋᓴᐅᔭᒃᑯᑦ ᑮᓇᐅᔭᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᐊᒪᓗ ᖃᕋᓴᐅᔭᒃᑰᖓᔪᓂᒃ ᐊᑮᑐᓂᒃ ᐊᑭᓕᖅᑐᐃᓂᕐᒧᑦ, ᐱᓗᐊᖅᑐᒥᑦ ᑎᑎᖅᑲᕐᓂᐊᕐᕕᒃ ᓯᓚᕐᓘᖕᒧᑦ ᓄᖅᑲᖓᑎᑦᑎᔪᖕᓇᖅᑎᓪᓗᒍ ᐃᖏᕐᕋᔾᔪᑎᓂᒃ.

ᐆᒪᔪᐃᑦ: 

ᐃᖃᓗᒃᓯᐅᕐᕕᒃᑕᖃᑦᑎᐊᖅᑐᖅ ᐃᖣᕋᓂᑦ ᐊᒪᓗ ᑕᕆᐅᕐᒥᐅᑕᕐᓂᒃ ᑕᒫᓂ, ᑕᐃᒪᓐᓇ ᐊᑎᖃᕈᑎᒋᔭᖓ ᐃᖃᓗᒃᑑᑦᑎᐊᖅ, “ᐃᖃᓗᒃᑕᓕᒃ ᐃᖃᓗᒃᓯᐅᕐᕕᒃ”.  ᓄᓇᒥᐅᑕᐃᑦ ᓂᕐᔪᑏᑦ ᐃᓚᐅᑉᓗᑎᒃ ᐅᒥᖕᒪᐃᑦ, ᑐᒃᑐᐃᑦ, ᓇᓄᐃᑦ, ᐊᒃᖤᐃᑦ, ᐊᒪᕈᐃᑦ, ᑎᕆᒐᓂᐊᑦ ᐊᕕᙵᐃᓪᓗ.  ᐅᒥᖕᒪᖕᓂᒃ ᒪᓕᒐᑎᒍᑦ ᐊᐅᓚᑕᐅᑦᑎᐊᖅᑐᖅ ᐊᒥᓲᓂᖏᑦ ᐅᒥᖕᒪᐃᑦ ᓈᒻᒪᒋᔭᐅᒍᑎᒃ ᑭᓯᐊᓂ ᐊᖑᔭᐅᔪᓐᓇᕐᑐᑦ.

ᐅᖃᓕᒫᑲᓐᓂᕐᓃᑦ : 
  • Amundsen, Roald. Amundsen ᐊᔾᔩᑦ, ᐋᕿᒋᐊᖅᑕᐅᓯᒪᔪᑦ ᐊᒪᓗ ᑐᑭᓯᑎᑕᐅᓃᑦ Roland Hunford-ᒧᑦ. ᓂᐅ ᔪᐊᒃ: The Atlantic Monthly Press, 1987.
  • Bennett, John & Susan Rowley, eds. ᐅᖃᓗᕋᐃᑦ: ᐅᖃᐅᓯᖅ ᓇᑭᙶᕐᓂᖓᓂᑦ ᓄᓇᕗᑦ. Montreal & Kingston: McGill-Queen’s University Press, 2004.
  • Dorais, Louis-Jacques. ᐅᖃᐅᓯᖓᑦ ᐃᓄᖕᓄᑦ syntax, semantics ᐊᒻᒪᓗ ᐃᓅᖃᑎᒌᑦ ᐅᑭᐅᖅᑕᖅᑐᒥᑦ. Montreal & Kingston: McGill-Queen’s University Press, 2010.
  • Issenman, Betty Kobayashi. ᐊᓐᓄᕌᑦ ᐆᒪᓂᕐᒧᑦ: ᐆᒪᔪᑦ ᐃᓄᐃᑦ ᐊᓐᓄᕌᖏᑦ. Vancouver: UBC Press, 1997.
  • MacDonald, John. The Arctic sky: ᐃᓄᐃᑦ ᓯᓚᓕᕆᓂᖓᑦ, ᐅᓪᓗᕆᐊᓕᕆᓂᖅ. ᐃᖃᓗᐃᑦ & Toronto: Nunavut Research Institute and Royal Ontario Museum, 1998.
  • McGhee, Robert. The last imaginary place: ᐃᓄᐃᑦ ᓇᑭᙶᕐᓂᖏᑦ ᐅᑭᐅᖅᑕᖅᑐᒥᑦ. Toronto: Key Porter Books, Canadian Museum of Civilization, 2004.
  • Morrison, David and Georges-Hébert Germain. ᐃᓄᐃᑦ: ᑕᐃᔅᓱᒪᓂᒥᑦ ᐅᑭᐅᖅᑕᖅᑐᒥᑦ ᑕᑯᓂᖅ. Hull: Canadian Museum of Civilization, 1995.
  • Pauktuutit Inuit Women of Canada. ᐃᓄᐃᑦ ᐊᑐᖅᑕᖓᑦ: ᐊᑐᖅᑕᐅᔪᒃᓴᖅ ᐃᓄᐃᑦ ᐱᖅᑯᓯᖓᓄᑦ, rev. ed. Ottawa: ᐸᐅᒃᑑᑏᑦ ᐊᕐᓇᐃᑦ ᐃᓄᐃᑦ ᑲᓇᑕᒥᑦ, 2006. http://www.uqar.ca/files/boreas/inuitway_e.pdf