You are here

ᐅᖅᓱᖅᑑᖅ

ᐅᖅᓱᖅᑑᖅ

ᐊᕕᒃᑐᖅᓯᒪᓂᖓ: 
ᕿᑎᕐᒥᐅᓂ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (KitSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐅᑭᐅᕋᖅ ᕿᑭᖅᑕᒦᑦᑐᖅ, ᒫᓐᓇᐅᔪᖅ ᐅᖅᓱᖅᑑᖅ ᓂᕈᐊᖅᑕᐅᓚᐅᖅᑐᖅ 1903-ᒥᑦ ᓄᐊᕖᔾᔨᓐᒥᐅᑕᖅ ᓇᓂᓯᓇᓱᒃᑎ ᕋᐅᑦ ᐊᒪᓐᓴᓐᒧᑦ, ᐊᒻᒪᓗ ᐊᑦᑎᖅᑕᐅᓯᒪᓪᓗᓂ ᐅᒥᐊᕐᔪᐊᖓᑕ ᐊᑎᖓᓂᑦ, ᐅᖅᓱᖅᑑᕐᒥᑦ, ᑐᓚᒃᑕᐅᓯᒪᓕᖅᑐᖅ ᑕᕆᐅᕐᒥᐅᑕᓂᒃ ᑕᑯᔭᒃᓴᐅᑎᖃᕐᕕᖕᒥᑦ, ᐋᔅᓘ, ᓄᐊᕖ-ᒥᑦ. ᐊᒪᓐᓴᓐ ᓯᕗᓪᓕᖅᐸᐅᓚᐅᖅᑐᖅ ᑕᕆᐅᑉ ᐊᑭᐊᓂᙶᖅᖢᓂ ᓇᓂᓯᓇᓱᒃᑐᖅ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓂᑦ ᓇᓂᓪᓗᓂᐅᒡᓗ, ᐅᑭᐅᒃᑯᑦ ᑕᐃᑲᓃᖦᖢᓂ ᑕᐃᔅᓱᒪᓂ. ᐃᓕᑦᑎᓚᐅᖅᑐᖅ ᐅᑭᐅᖅᑕᖅᑐᒥᑦ ᐆᒪᔪᓐᓇᖅᓯᓂᕐᒧᑦ ᓇᑦᑎᓕᖕᒥᐅᓂᑦ ᑕᐅᕙᓃᒐᔪᓚᐅᖅᑐᓂᑦ ᑕᐃᕙᒃᖢᒍ ᐅᖅᓱᖅᑑᕐᒥᑦ, ᐅᕝᕙᓘᓐᓃᑦ “ᐃᓂᐅᔪᖅ ᐅᖅᓱᖅᑕᖃᑦᑎᐊᖅᖢᓂ”. ᓇᓂᓯᓂᖓ ᓯᕗᓪᓕᖅᐸᐅᓪᓗᓂ ᑎᑭᐅᑎᓂᕐᒧᑦ ᐅᑭᐅᖅᑕᖅᑑᑉ ᑲᑉᔨᖓᓄᑦ ᐱᐊᓂᒍᓐᓇᕈᑎᒋᔭᖓ ᐱᖅᑯᓯᕆᔭᐅᔾᔪᑎᒍᑦ ᐊᔪᕈᓐᓃᕐᓂᕆᓚᐅᖅᑕᖓᓄᑦ. ᔮᓐ ᕌᔅ ᓇᓂᓯᓇᓱᒃᑐᑦ 1829-1833-ᒥᑦ ᑕᐃᑯᙵᓚᐅᖅᓯᒪᓪᓗᑎᒃ ᓯᕗᓂᐊᒍᑦ ᐊᒻᒪᓗ ᔮᓐ ᕗᕌᖕᒃᓕᓐ ᓇᓂᓯᓇᓱᒃᑎᖏᑦ 1845-ᒥᑦ ᐱᑕᖃᕈᓐᓃᓚᐅᖅᑐᑦ ᖃᓂᒋᔭᖓᓂᑦ, ᐅᖅᓱᖅᑑᖅ ᐊᖏᔫᑎᓕᖅᑎᑦᑎᓪᓗᓂ ᐃᓄᖕᓄᑦ ᑐᑭᓯᔪᒪᔪᓄᑦ ᖃᓄᐃᓕᖓᓂᕆᓚᐅᖅᑕᖓᓐᓄᑦ ᑕᕆᐅᑉ ᐊᑭᐊᓂᙶᖅᑐᐃᑦ ᓇᓂᓯᓇᓱᒃᖢᑎᒃ ᐅᑭᐅᖅᑕᖅᑐᒧᐊᖅᑐᓂᒃ. ᓄᓇᓕᖕᒧᐊᖅᐸᓪᓕᐊᓕᓚᐅᖅᑐᑦ ᓂᐅᕕᖅᑏᑦ ᑕᐃᑲᓂ ᐃᓂᑖᕐᒪᑕ Douglas Bay-ᒥᙶᖅᖢᑎᒃ 1927-ᒥᑦ. ᐅᖅᓱᖅᑑᖅ ᕼᐋᒻᓚᙳᓚᐅᖅᑐᖅ 1981-ᒥᑦ.

ᓄᓇᕗᒻᒥ ᒐᕙᒪᒃᑯᖏᑦ (GN) ᐱᓕᕆᔨᖏᓐᓄᑦ ᓇᓗᓇᐃᔭᐃᓂᕐᒧᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᑐᓂᓯᖃᑦᑕᖅᑐᖅ ᐱᐅᔪᒻᒪᕆᖕᒥᑦ ᑲᑎᖅᓱᖅᓯᒪᔪᓂᒃ ᓇᑭᙶᕐᓂᖓᓂᑦ ᓄᓇᕗᒻᒥ, ᐊᑕᐅᑦᑎᒃᑯᑦ ᐃᓄᐃᑦ ᐃᓕᖅᑯᓯᖏᑦ ᐊᒻᒪᓗ ᓇᑭᙶᕐᓂᖓᓂᒃ ᐊᒻᒪᓗ ᐅᖃᐅᓯᖃᖅᑐᖅ ᖃᓄᖅ ᐃᓄᐃᑦ ᐃᓕᖅᑯᓯᖓᑦ ᐃᓚᐅᑎᑕᐅᖕᒪᖔᑕ ᒐᕙᒪᒃᑯᑦ ᐊᐅᓚᓂᕆᔭᖓᓐᓄᑦ ᐊᒻᒪᓗ ᐱᔨᑦᑎᕋᐅᑎᖏᓐᓄᑦ. ᕿᓂᕐᕕᐅᖁᔭᕗᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᐊᑐᐃᓐᓇᐅᓕᒃᑲᓐᓂᖅᐸᑦ ᐋᖅᑭᒃᓱᖅᑕᐅᕌᓂᒃᐸᑦ, ᒫᓐᓇᐅᔪᖅ ᓱᓇᑐᐃᓐᓇᓅᖓᔪᖓᑦ ᓄᓇᕗᑦ ᒐᕙᒪᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖓᑦ ᐆᒃᑐᕈᓐᓇᖅᑕᐃᑦ ᑐᑭᓯᐅᒪᔾᔪᑎᓂᒃ ᐱᓂᕐᒧᑦ.

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐅᖅᓱᖅᑑᑉ ᖃᓂᒋᔭᖓ ᓇᑦᑎᓕᖕᒥᐅᓄᑦ ᐃᓂᒋᔭᐅᓯᒪᔪᖅ (ᐃᓄᐃᑦ ᓇᑦᑎᖅᑕᓕᖕᒥᑦ) ᐅᑭᐅᑦ ᑕᐅᓯᓐ-ᖏᓐᓃᑐᑦ ᐅᖓᑖᓂᑦ. ᐃᓄᒃᑎᑐᑦ ᐊᑎᖓ ᐅᖅᓱᖅᑑᖅ ᑐᑭᖃᖅᑐᖅ “ᐃᓂᐅᔪᖅ ᐅᖅᓱᖅᑕᖃᑦᑎᐊᖅᖢᓂ” ᓇᑦᑎᓕᖕᒥᐅᑦ ᐅᖃᐅᓯᖓᑦᑎᒍᑦ, ᓇᑦᑎᖅᑕᖃᑦᑎᐊᓚᐅᕐᓂᖓᓄᑦ ᑕᐃᑲᓂ. ᐃᓄᒃᑎᑐᑦ ᐅᖃᓪᓚᖕᓂᖅ ᐊᑐᖅᑕᐅᓗᐊᕌᓗᙱᒃᑲᓗᐊᖅᖢᓂ ᐊᒥᓱᑐᑦ ᐅᑭᐅᖅᑕᖅᑑᑉ ᑲᓇᖕᓇᖓᓂᕐᒥᐅᑕᑎᑐᑦ, ᐃᓄᐃᑦ ᐱᖅᑯᓯᕆᔭᖏᓐᓂᒃ ᐊᒥᓱᑦ ᐊᑐᖃᑦᑕᖅᑐᑦ, ᐊᒥᓱᑦ ᖃᑕᙳᑎᒌᑦ ᑕᖅᑭᓗᒃᑖᖅ ᒪᕐᕉᖕᓄᓪᓘᓃᑦ “ᓄᓇᓕᐊᖅᓯᒪᕙᒃᖢᑎᒃ” ᐊᐅᔭᒃᑯᑦ. ᐊᖑᓇᓱᖕᓂᖅ ᐊᒻᒪᓗ ᐃᖃᓗᒐᓱᖕᓂᖅ ᐱᒻᒪᕆᐅᒋᔭᐅᔪᑦ ᓂᕿᒋᔭᐅᓂᖏᓐᓄᑦ.

ᕿᑎᕐᒥᐅᑕᓗᒃᑖᑎᑐᖅᑲᓴᒃ, ᐃᓄᐃᑦ ᐅᖃᐅᓯᕐᒥᖕᓂᒃ ᐊᖏᔪᒥᒃ ᐊᓯᐊᔨᓯᒪᔪᑦ. ᑕᒪᕐᒥᓗᒃᑖᖅᑲᓴᑦ ᖃᓪᓗᓈᑎᑐᑦ ᐅᖃᓪᓚᖃᑦᑐᖅᑐᑦ 2%-ᑐᐃᓐᓇᖏᑦ ᑕᒪᐃᓐᓂᒃ ᐃᓄᒃᑎᑐᑦ ᐊᒻᒪᓗ ᖃᓪᓗᓈᑎᑐᑦ ᐅᖃᓪᓚᖃᑦᑕᖅᑐᑦ ᐃᓄᒃᑎᑐ. 2011-ᒥᑦ ᓈᓴᖅᑕᐅᖕᒪᑕ, 55%-ᖑᔪᑦ ᑕᐃᑲᓂᕐᒥᐅᑕᐃᑦ ᖃᓪᓗᓈᑎᑐᑦ ᐅᖃᐅᓯᖃᕐᓂᕋᓚᐅᖅᑐᑦ, ᐊᒻᒪᓗ 45%-ᖏᑦ ᐃᓄᒃᑎᑐᑦ; ᐅᐃᕖᑎᑑᖅᑐᖅᑕᖃᙱᑦᑐᖅ. ᐊᒥᓲᓂᖅᓴᐃᑦ ᖃᓪᓗᓈᑎᑐᑦ ᐅᖃᓪᓚᖃᑦᑕᖅᑐᑦ ᐊᖏᕐᕋᖓᓐᓂᑦ, ᑭᓯᐊᓂ 64%-ᖃᓴᐃᑦ ᐃᓚᖓᑦᑎᒍᑦ ᐃᓄᒃᑎᑐᑦ ᐅᖃᓪᓚᖃᑦᑕᖅᑐᑦ ᐊᖏᕐᕋᖓᓐᓂᑦ. ᓂᕆᐊᒍᓐᓇᖅᑐᑎᑦ ᐃᓄᓗᒃᑖᓂᒃ ᖃᓄᐃᓕᐅᖅᑎᑦᑎᓂᕐᓂᑦ ᐊᒻᒪᓗ ᑲᑎᒪᑎᑦᑎᓂᕐᓂᑦ ᑕᒪᐃᓐᓂᒃ ᐅᖃᐅᓰᒃ ᐊᑐᖅᑕᐅᑎᓪᓗᒋᑦ, ᐃᓄᒃᑎᑐᑦ ᐅᖃᓪᓚᖃᑦᑕᕈᕕᑦ ᓄᓇᓕᖕᒥᑦ. ᐃᓄᒃᑎᑐᑦ ᐅᖃᓪᓚᖕᓃᑦ ᐊᔾᔨᒌᙱᓐᓂᖃᖅᑐᑦ ᓄᓇᕗᒻᒥᑦ, ᐸᕐᓇᒃᓯᒪᕙᒌᕐᓗᑎᑦ ᐃᓕᑦᑎᓂᕐᒧᑦ ᓄᑖᒥᒃ ᐅᖃᐅᓯᕐᒥᑦ ᐊᔾᔨᒌᙱᓐᓂᐅᔪᓂᒃ ᓄᓇᓕᐅᑉ ᐊᓯᐊᓄᐊᕈᕕᑦ ᐊᒻᒪᓗ ᐃᒪᖅᑳ ᑕᒻᒪᕈᕕᑦ ᐊᔪᕆᖅᓱᖅᑕᐅᓗᑎᑦ. ᐃᓄᐃᑦ ᐅᖃᐅᓯᖓᑦ (ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐊᑐᖅᑕᐅᔪᑦ ᐅᖃᐅᓯᕆᔭᐅᓂᕐᒧᑦ ᓄᓇᕗᒻᒥᑦ, ᑕᐃᒪᓐᓇᒧᑦ ᐱᔪᓐᓇᐅᑎᖃᖅᑐᑎᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓂᒃ ᑲᒪᒋᔭᐅᑎᓪᓗᑎᑦ ᐅᖃᐅᓯᕐᒥᑦ ᓇᓕᐊᑐᐃᓐᓇᖏᓐᓂᒃ ᐊᑐᕈᒪᓗᑎᑦ.

ᐅᖅᓱᖅᑑᖅ ᐅᓪᓗᒥᐅᓕᖅᑐᖅ ᒪᒃᑯᒃᑐᓂᒃ ᐃᓄᖃᐅᖅᑐᖅ, ᖁᑦᑎᒃᑐᒥᒃ ᓄᑕᖅᑭᐅᖅᐸᓪᓕᐊᓂᖃᖃᑦᑕᖅᖢᑎᒃ. 2011-ᒥᑦ 170-ᖑᓚᐅᖅᑐᑦ ᐃᓕᓐᓂᐊᕆᐊᕐᓂᐊᓕᓵᖅᑐᑦ ᐊᒻᒪᓗ 385 ᐃᓕᓐᓂᐊᖅᑐᑦ ᓄᑕᖅᑲᐃᑦ 43%-ᖑᔪᖅ ᖃᔅᓯᐅᓂᖏᑦ ᐅᑭᐅᓖᑦ 18 ᑐᖔᓂᑦ. ᕿᑎᐊᓂᑦ ᐅᑭᐅᖃᖅᑐᑦ 21.2-ᓂᒃ. ᑭᓯᐊᓂ ᐅᖅᓱᖅᑑᖅ 60-ᖃᔭᕐᓂᑦ ᐃᓐᓇᕆᔭᐅᔪᖅᑕᓕᒃ, ᐊᒥᓲᓂᖅᓴᐅᔪᑦ ᐃᓐᓇᕆᔭᐅᔪᑦ (5%)-ᒥᒃ ᐅᖅᓱᖅᑑᕐᒥᑦ ᐊᓯᖏᓐᓂᑦ ᓄᓇᓕᐅᔪᓂᑦ ᓄᓇᕗᒻᒥ.

ᐊᔪᕆᖅᓱᐃᔨᒃᑯᑦ ᐊᒻᒪᓗ ᐃᒃᓯᕋᕐᔪᐊᑦ ᑎᑭᓚᐅᖅᑐᑦ ᐅᖅᓱᖅᑑᕐᒧᑦ 1950-ᖏᓐᓂᑦ, ᐊᒻᒪᓗ Pentecostal ᑐᒃᓯᐊᕐᕕᒃ 1990-ᖏᑦ ᓄᖑᓕᖅᑎᓪᓗᒍ. ᐱᖅᑯᓯᒃᑯᑦ ᐊᖓᒃᑯᓕᕆᓂᖅ ᐅᒃᐱᕈᓱᖕᓃᑦ ᑕᐃᒪᐅᔪᖅ ᓱᓕ ᐃᓚᖏᓐᓂᑦ ᐃᓄᖕᓄᑦ.

ᑮᓇᐅᔾᔭᒃᓴᕈᑕᐅᔪᑦ: 

ᐅᖅᓱᖅᑑᖅ ᐃᓂᒋᔭᐅᔪᖅ ᒪᕐᕉᖕᓄᑦ ᒐᕙᒪᒃᑯᑦ ᐊᕕᒃᑐᖅᓯᒪᔪᖏᓐᓄᑦ: ᐃᖏᕐᕋᔪᓕᕆᓂᕐᒧᑦ ᐊᑐᐊᒐᖅ ᐊᒻᒪᓗ ᐱᕙᓪᓕᐊᔪᓕᕆᔨᒃᑯᑦ ᓄᓇᒃᑰᕈᑎᓕᕆᔨᒃᑯᖏᑦ, ᐊᒻᒪᓗ ᒪᓕᒐᓕᕆᓂᕐᒧᑦ ᐱᔨᑦᑎᕋᐃᔨᒃᑯᑦ ᓄᓇᕗᒻᒥᑦ. ᑖᒃᑯᐊᒃ ᒪᕐᕉᒃ ᑎᑎᕋᕐᕖᒃ 20 ᑐᖔᓂᑦ ᐱᓕᕆᔨᖃᖅᑐᑦ, ᑭᓯᐊᓂ, ᐊᒥᓱᑦ ᐃᓄᐃᑦ ᐅᖅᓱᖅᑑᕐᒥᑦ ᐱᓕᕆᖃᑦᑕᖅᑐᑦ ᓄᓇᓕᖕᒥᑦ ᐱᔨᑦᑎᕐᓂᕐᒧᑦ ᐃᓂᐅᔪᓂᑦ (ᐃᓕᓐᓂᐊᖅᑎᑦᑎᔩᑦ, ᐃᓗᐊᖅᓴᐃᔩᑦ, ᕼᐋᒻᓚᒃᑯᓐᓄᑦ ᐱᓕᕆᔩᑦ) ᐅᕝᕙᓘᓐᓃᑦ ᒐᕙᒪᒃᑯᑦ ᓯᓚᑖᓂᑦ. ᐊᒥᓱᑦ ᐱᓕᕆᐊᑦ ᐅᑭᐅᑉ ᐃᓚᖓᓃᒐᔪᒃᑐᑦ, ᓴᓇᕙᓪᓕᐊᔪᓂᑦ, ᐳᓚᕋᖅᑐᓕᕆᓂᕐᒥᑦ, ᐊᒻᒪᓗ ᐊᖑᓇᓱᖕᓂᖅ ᐊᒻᒪᓗ ᐃᖃᓗᒐᓱᖕᓂᖅ ᐊᐅᔭᒃᑯᑦ. ᓴᓇᙳᐊᒐᐃᑦ, ᐱᓗᐊᖅᑐᒥᑦ ᓴᓇᙳᐊᖅᑕᐅᔪᑦ ᐊᒻᒪᓗ ᓴᓂᕋᕐᒥᐅᑕᐃᑦ, ᑮᓇᐅᔭᓕᐅᖅᑎᑦᑎᖃᑦᑕᖅᑐᖅ ᐃᓚᖏᓐᓄᑦ ᐃᓄᖕᓄᑦ. ᐅᖅᓱᖅᑑᕐᒥᑦ ᓴᓇᙳᐊᒐᐃᑦ ᐅᔾᔨᕆᔭᐅᖃᑦᑕᖅᑐᑦ ᕿᓂᕐᓂᖅᓴᐅᔪᒥᒃ ᑐᖑᔪᖅᑑᓂᖏᓐᓂᒃ ᐅᒃᑯᓯᒃᓴᖏᑦ ᐊᒻᒪᓗ ᓂᐅᕕᖅᑕᐅᖃᑦᑕᖅᑐᑦ ᖃᓂᑦᑐᒥᑦ ᐱᔭᐅᔪᓂᒃ ᓯᑭᑑᒃᑯᑦ ᐅᑭᐅᖑᑎᓪᓗᒍ.

ᖃᓂᑦᑐᒥᑦ, ᓄᓇᕗᒻᒥᑦ ᒥᕐᖑᐃᖅᓯᕝᕕᒃ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓂᑦ ᐊᑉᖁᑎ ᑕᑯᔪᒥᓇᖅᑐᒥᑦ ᐱᑕᖃᖅᑐᖅ ᐅᒡᓚᕋᖅᑐᓕᕆᓂᕐᒧᑦ, ᐊᒻᒪᓗ ᐊᑭᐊᓂᑦ ᐃᓗᐃᓪᓕᕐᒥ ᐅᖅᓱᖅᑑᕐᒥᑦ ᑲᓇᑕᐅᑉ ᐃᓗᐃᓪᓕᕐᒥ ᑎᖕᒥᐊᓄᑦ ᐃᓂᖃᕐᕕᖓᐅᓪᓗᓂ, ᐊᖏᓛᖅ ᑲᓇᑕᒥᑦ.

ᑮᓇᐅᔭᒃᑯᕕᖃᙱᑦᑐᖅ ᐅᖅᓱᖅᑑᕐᒥᑦ, ᐊᒻᒪᓗ ᑮᓇᐅᔭᑕᖃᑦᑎᐊᕈᓐᓃᕋᔪᒃᖢᓂ. ᑮᓇᐅᔭᓂᒃ ᐊᒧᓯᕕᐅᔪᓐᓇᖅᓂᑐᑦ ᑕᐃᒪᐅᔪᑦ ᓂᐅᕕᖅᑎᓂᑦ ᐊᒻᒪᓗ ᑯᐊᐸᒃᑯᓐᓂᑦ, ᑭᒡᓕᖃᖅᖢᑎᒃ ᑮᓇᐅᔭᐃᑦ. ᐊᐅᒃᑕᔫᑦ ᐊᒻᒪᓗ ᐊᑮᑦᑐᖅᓯᓂᕐᒧᑦ ᐊᐅᒃᑕᔫᓄᑦ ᐱᔨᑦᑎᕋᐅᑎᑕᖃᖅᑐᖅ ᑕᒪᒃᑭᓗᒃᑖᖅᑲᓴᐃᑦ ᓂᐅᕕᕐᕕᖕᓂᑦ. ᑕᐃᑯᙵᓵᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᒃᑯᕕᓕᕆᓂᕐᒥᒃ ᐋᖅᑭᒃᓯᖁᔭᐅᔪᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑮᑦᑐᓂᒃ ᐊᑭᓕᖅᑐᐃᓂᕐᒥᒃ, ᐱᓗᐊᖅᑐᒥᑦ ᑎᑎᖅᑲᓕᕆᕝᕕᒃᑰᖅᑎᑦᑎᓂᖅ ᓯᓚᕐᓘᒧᑦ ᓄᖅᑲᖓᑎᑦᑎᔪᓐᓇᖅᑎᓪᓗᒍ ᐃᖏᕐᕋᔾᔪᑎᓂᒃ.

ᐆᒪᔪᐃᑦ: 

ᐊᖏᓗᐊᙱᑦᑐᑦ ᐅᒥᖕᒪᐃᑦ ᑲᑎᙵᔪᑦ ᐊᒻᒪᓗ ᖃᔅᓯᐊᕐᔪᐃᑦ ᑐᒃᑐᐃᑦ ᑕᐃᒪᐅᔪᑦ ᐅᑭᐅᕋᖅ ᕿᑭᖅᑕᒥᑦ. ᐊᒥᓱᑲᓪᓚᐃᑦ ᑎᖕᒥᐊᑦ ᐅᑎᖅᑕᖃᑦᑕᖅᑐᑦ ᐅᐱᕐᖔᒃᑯᑦ, ᐊᒥᓱᑦ ᐃᕙᕕᓕᐊᖃᑦᑕᖅᖢᑎᒃ ᖃᓂᑦᑐᒥᑦ, ᐃᓚᐅᓪᓗᑎᒃ ᖃᖅᓴᐅᑦ, ᑲᖑᐃᑦ, ᒥᑏᑦ, ᐃᒥᖅᑯᑕᐃᓚᑦ, ᓯᒡᔭᕆᐊᕐᔪᑦᑭᒡᒐᕕᐊᕐᔪᑦ, ᖃᐅᓪᓗᖅᑖᑦ ᐊᒻᒪᓗ ᐅᒃᐱᒡᔪᐊᑦ. ᔫᓂ ᐊᒻᒪᓗ ᔪᓚᐃᒥᑦ, ᑲᖏᖅᖢᒃ ᐊᖏᕐᕋᕆᔭᐅᔪᖅ ᐃᖃᓗᖕᓄᑦ ᐊᒻᒪᓗ ᓇᑦᑎᕐᓄᑦ, ᐃᓚᖏᑦ ᓄᓇᓕᖕᒥᐅᑕᐃᑦ ᖃᓂᑦᑐᒧᙵᐅᖃᑦᑕᖅᑐᑦ ᐃᖃᓗᒐᓱᖕᓂᕐᒧᑦ ᑕᕆᐅᕐᒥᐅᑕᓂᒃ ᐋᒋᓯᒥᑦ ᐃᖏᕐᕋᓕᖅᑎᓪᓗᒋᑦ.

ᐅᖃᓕᒫᑲᓐᓂᕐᓃᑦ : 
  • ᐊᒪᓐᓴᓐ, ᕋᐅᑦ. The Amundsen ᐊᔾᔩᑦ, edited and introduced by Roland Huntford. New York: The Atlantic Monthly Press, 1987.
  • ᐸᓕᒃᑭ, ᐊᓯᓐ. ᓇᑦᑎᓕᒃ ᐃᓄᐃᑦ. New York: American Museum of Natural History Press, 1970.
  • ᐸᓂᑦ, ᔮᓐ & ᓲᓴᓐ ᕉᓕ, ed. ᐅᖃᓗᕋᐃᑦ: ᐅᖃᐅᓯᖅ ᓇᑭᙶᕐᓂᖓᓂᑦ ᓄᓇᕗᑦ. Montreal & Kingston: McGill-Queen’s University Press, 2004.
  • ᑐᕋᐃ, ᓗᐃ-ᔮᒃ, ᐅᖃᐅᓯᖓᑦ ᐃᓄᖕᓄᑦ syntax, semantics ᐊᒻᒪᓗ ᐃᓅᖃᑎᒌᑦ ᐅᑭᐅᖅᑕᖅᑐᒥᑦ. Montreal & Kingston: McGill-Queen’s University Press, 2010.
  • ᐄᐳᕐ, ᑑᕋᑎ ᕼᐋᓕ. ᑎᑭᐅᔾᔨᓃᑦ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓂᑦ: ᐃᓄᐃᑦ ᑲᑎᓯᔪᑦ ᓇᓂᓯᓇᓱᒃᑐᓂᒃ. Toronto: University of Toronto Press, 2008.
  • ᐃᓯᓐᒪᓐ, ᐸᑎ ᑯᐸᔭᓯ. ᐊᓐᓄᕌᑦ ᐆᒪᓂᕐᒧᑦ: ᐆᒪᔪᑦ ᐃᓄᐃᑦ ᐊᓐᓄᕌᖏᑦ. Vancouver: UBC Press, 1997.
  • ᒪᒃᑖᓄᑦ, ᔮᓐ. ᐅᑭᐅᖅᑕᖅᑐᒥ ᓯᓚᖓ: ᐃᓄᐃᑦ ᓯᓚᓕᕆᓂᖓᑦ, ᐅᓪᓗᕆᐊᓕᕆᓂᖅ. ᐃᖃᓗᐃᑦ & Toronto: Nunavut Research Institute and Royal Ontario Museum, 1998.
  • ᒪᒌ, ᕌᐳᑦ. ᑭᖑᓪᓕᖅᐹᖅ ᑕᐅᑐᙳᐊᕐᓂᕐᒧᑦ ᐃᓂᐅᔪᖅ: ᐃᓄᐃᑦ ᓇᑭᙶᕐᓂᖏᑦ ᐅᑭᐅᖅᑕᖅᑐᒥᑦ. Toronto: Key Porter Books, Canadian Museum of Civilization, 2004.
  • ᒧᐊᕆᓯᓐ, ᑕᐃᕕᑦ ᐊᒻᒪ ᔪᐊᔨᔅ-ᕼᐄᐳᑦ ᔨᕐᒪᐃᓐ. ᐃᓄᐃᑦ: ᑕᐃᔅᓱᒪᓂᒥᑦ ᐅᑭᐅᖅᑕᖅᑐᒥᑦ ᑕᑯᓂᖅ. Hull: Canadian Museum of Civilization, 1995.
  • ᐸᐅᒃᑑᑎᑦ ᐃᓄᐃᑦ ᐊᕐᓇᓄᑦ ᑲᓇᑕᒥ. ᐃᓄᐃᑦ ᐊᑐᖅᑕᖓᑦ: ᐊᑐᖅᑕᐅᔪᒃᓴᖅ ᐃᓄᐃᑦ ᐱᖅᑯᓯᖓᓄᑦ, rev. ed. Ottawa.: ᐸᐅᒃᑑᑎᑦ ᐃᓄᐃᑦ ᐊᕐᓇᓄᑦ ᑲᓇᑕᒥ, 2006. http://www.uqar.ca/files/boreas/inuitway_e.pdf