You are here

ᐊᐅᓱᐃᑦᑐᖅ

ᐊᐅᓱᐃᑦᑐᖅ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐊᐅᓱᐃᑦᑐᖅ ᐊᔾᔨᐅᙱᓛᖑᓲᖅ ᓄᓇᕗᒥ ᒥᑭᓛᖑᓂᖓᓄᑦ ᓄᓇᓕᖓ ᐊᒻᒪᓗ ᐅᐊᖕᓇᖓᓃᓛᖑᓪᓗᓂ ᐃᓄᓕᒃ ᓄᓇᓕᐅᓪᓗᓂ ᑲᓇᑕᒥ. ᐃᓄᒃᑎᑐᑦ ᐊᑎᖓ ᐊᐅᓱᐃᑦᑐᖅ, ᑐᑭᓕᒃ “ᐊᐅᓱᐃᑦᑑᓂᖓᓂᒃ”. ᐅᓂᒃᑳᖅᑐᐊᖏᑦ ᑲᓛᖡᑦ ᓄᓈᓐᓂ ᐅᖃᖅᓯᒪᕗᑦ ᐃᓄᐃᑦ ᑕᒫᓃᓚᐅᖅᓯᒪᒻᒪᑕ ᐅᐊᑦᑎᐊᕈᐊᓗᒃ, ᑭᓯᐊᓂᓕ ᑕᒫᓃᑦᑐᒥᓂᐅᒋᐊᖏᓐᓂᒃ ᐃᑦᑕᕐᓂᓴᖃᙱᑦᑐᑦ ᓇᔪᖅᑕᒥᓂᐅᓂᖓᓂᑦ. ᓄᐊᕖᔭᓐ ᖃᐅᔨᓴᖅᑎ ᐋᑐ ᔅᕗᑐᕌᑉ ᐊᐅᓱᐃᑦᑐᕐᒥᒃ ᖃᓪᓗᓈᑎᑐᑦ ᐊᑦᑏᓚᐅᖅᓯᒪᔪᖅ, ᐃᓱᒪᓪᓗᓂ ᐊᒥᓱᑦ ᐊᐃᕖᑦ ᑕᒫᓃᓲᖑᒻᒪᑕ “ᒍᕇᔅ” − ᑰᑰᓰᑦ, ᓄᐊᕖᔭᓐ−ᑎᑐᑦ.

 

ᐊᒥᓱᑦ ᓄᓇᓖᑦ ᑕᐃᒪᐃᖔᖅᑎᓪᓗᒋᑦ ᓄᓇᕗᒥ ᐆᒪᔪᕐᓂᑦ ᒪᓕᖃᑦᑕᖅᑐᒥᓂᐅᓪᓗᑎᑦ ᓇᔪᒐᖃᓕᖅᑐᒥᓂᐅᔪᑦ, ᐊᐅᓱᐃᑦᑐᕐᓕ ᓄᓇᓕᕈᖅᓯᒪᔪᖅ ᓄᑦᑎᖅᑕᒥᓂᐅᓪᓗᑎᑦ ᐃᓄᐃᑦ ᑯᐸᑭᒥ ᐊᒻᒪᓗ ᒥᑦᑎᒪᑕᓕᒻᒥ ᐸᓖᓯᒃᑯᓐᓄᑦ ᖃᓂᒋᔭᖓᓂ ᑯᕋᐃᒡ ᐃᒪᖓᓂ 1953−ᖑᑎᓪᓗᒍ. ᐸᓖᓯᒃᑯᑦ ᑕᒫᓃᓐᓂᑰᒻᒪᑕ 1922-ᒥᓂᑦ. ᐃᓚᒌᑦ ᓄᑦᑎᖅᑕᐅᓚᐅᖅᓯᒪᔪᑦ ᑯᕋᐃᒡ ᑕᕆᐅᖓᓂ ᐅᓪᓗᒥᐅᓕᖅᑐᖅ ᓄᓇᓕᐅᔪᒧᑦ 1956−ᖑᑎᓪᓗᒍ, ᐊᒻᒪᓗ 1962−ᒥ ᑲᓇᑕᒥ ᒐᕙᒪᒃᑯᑦ ᐃᓕᓐᓂᐊᕐᕕᓕᐅᓕᓚᐅᖅᓯᒪᔪᑦ ᐃᒡᓗᓕᐅᖅᑐᑎᓪᓗ ᓄᓇᓕᐅᔪᒧᑦ. ᑲᓇᑕᒥ ᒐᕙᒪᒃᑯᑦ ᐃᓄᓐᓄᑦ ᒪᒥᐊᓚᐅᖅᓯᒪᔪᑦ 2008−ᖑᑎᓪᓗᒍ ᓄᑦᑎᖅᑕᒥᓂᐅᓂᖏᓐᓄᑦ, ᐊᒻᒪᓗ 2010-ᖑᑎᓪᓗᒍ ᓴᓇᙳᐊᖅᑕᐅᓯᒪᔪᖅ ᓇᓗᓇᐃᒃᑯᑕᓕᐊᕆᔭᐅᓪᓗᓂ ᓇᑉᐸᖅᑕᐅᓪᓗᓂ ᐃᖅᑲᐅᒪᔭᐅᖁᓪᓗᒋᑦ ᓄᑦᑎᖅᑕᒥᓂᐅᔪᑦ ᐃᓚᒌᓪᓗ ᑐᖁᔪᒥᓂᐅᔪᑦ ᐃᖅᑲᐅᒪᔭᐅᖁᓪᓗᒋᑦ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ. ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ. http://www.gov.nu.ca/

 

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐊᐅᓱᐃᑦᑐᕐᒥᐅᑕᐅᔪᑦ ᓱᖏᐅᑎᓯᒪᓕᕋᓗᐊᖅᑎᓪᓗᒋᑦ ᐅᓪᓗᒥᓕᓴᕐᓂᑦ ᐃᓅᓯᕐᒧᑦ ᓲᕐᓗᒃ ᐃᓕᓐᓂᐊᕆᐊᖃᑦᑕᓲᖑᓪᓗᑎᑦ, ᐊᓪᓚᕕᒻᒥ ᐃᖅᑲᓇᐃᔮᖃᓲᖑᓪᓗᑎᑦ, ᐊᒻᒪᓗ ᖃᕋᓴᐅᔭᓕᕆᔪᓐᓇᖅᑐᒡᒍᑕᐅᓪᓗᑎᑦ, ᐃᓅᓯᖏᑦ ᓱᓕ ᒪᓕᑦᑐᑦ ᐱᖅᓯᑯᑐᖃᕐᒥᒃ. ᐃᓄᐃᑦ ᐊᖑᓇᓱᓲᑦ, ᐃᖃᓪᓕᐊᖅᑐᑎᑦ, ᒥᖅᓱᓲᑦ, ᓴᓇᙳᐊᖅᑐᑎᑦ, ᕿᓚᐅᔾᔭᖅᑐᑎᑦ ᐊᒻᒪᓗ ᐊᓯᖏᓐᓂᑦ ᖃᓄᓕᐃᐳᕈᓘᔭᓲᑦ ᐸᐸᑕᐅᖁᓪᓗᒋ ᐃᓄᐃᑦ ᐱᖅᑯᓯᑐᖃᖏᑦ. ᖃᒧᑕᐅᔭᓪᓗ ᐊᑐᖅᑕᐅᓲᑦ ᖃᐅᑕᒫᑦ, ᑭᓯᐊᓂᓕ ᕿᒧᒃᓯᓲᑦ ᐱᖅᑯᓯᑐᖃᖅᑎᒍᑦ ᓇᓐᓂᐊᕐᓂᐊᖅᑐᑎᑦ.

 

ᐊᑕᐅᓯᑐᐊᑯᓗᒃ ᑐᒃᓯᐊᕐᕕᖓ ᐊᐅᓱᐃᑦᑐᕐᒥ. ᐃᔾᔪᓇᐃᑦᑐᖅ ᐲᑕ ᐋᓐᓕᑲᓐ ᑐᒃᓯᐊᕐᕕᖓ ᑲᑐᔾᔨᓲᖅ ᐋᓐᓕᑲᓐ ᑐᒃᓯᐊᕐᕕᖏᓐᓂ ᒥᑦᑎᒪᑕᓕᖕᒥ ᐊᒻᒪᓗ ᖃᐅᓱᐃᑦᑐᒥ. ᓄᓇᓕᒻᒥᐅᑦ ᑐᑭᓯᒋᐊᖅᑎᑦᑎᒍᓐᓇᖅᑐᑦ ᑐᒃᓯᐊᕐᕕᑉ ᒥᒃᓵᓄᑦ.

 

ᐊᐅᓱᐃᑦᑐᖅ ᐊᔾᔨᐅᙱᒻᒪᑦ ᓄᓇᕗᒥ ᒥᑭᑦᑐᑯᓘᓂᖓᓄᑦ ᐊᒻᒪᓗ, ᓄᓇᕗᑦ ᒪᓕᑦᑐᒋᑦ, ᐅᖓᓯᑦᑐᒻᒪᕆᐅᓂᖓᓄᑦ. ᐊᒥᓱᑦ ᕼᐊᒻᓚᐅᔪᒥ ᐃᓄᖏᑦ ᑕᐃᑲᙶᕐᓂᑰᕗᑦ ᒪᕐᕉᖕᓂᒃ ᐃᓚᒌᖕᓂᒃ ᑕᒪᐅᙵᖅᑎᑕᐅᓚᐅᖅᓯᒪᔪᑦ, ᑕᐃᒃᑯᐊ ᑯᐸᑭᒦᙶᖅᑐᑦ ᐊᒻᒪᓗ ᑕᐃᒃᑯᐊ ᕿᑭᖅᑖᓘᑉ ᐅᐊᓐᓇᖓᓃᙶᖅᑐᑦ. ᐃᓄᒃᑎᑑᕐᓂᖅᓴᐅᔪᑦ, 85%−ᖏᑦ ᐊᐅᓱᐃᑦᑐᕐᒥᐅᑦ ᐃᓄᒃᑎᑐᑦ ᐅᖃᐅᓪᓗᐊᑕᖃᕐᓂᕋᖅᑐᑎᑦ ᒪᓕᑦᑐᒋᑦ 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ. ᑕᐃᒃᑯᐊᓴᐃᓐᓇᐃᑦ ᐊᒥᓲᓂᖏᑦ ᐊᐅᓱᐃᑦᑐᕐᒥᐅᑦ ᐃᓄᒃᑎᑑᓲᑦ ᐊᖏᕐᕋᒥᓂᑦ ᐅᖃᐅᓯᕆᔭᐅᓂᖓᓄᑦ ᑭᖑᓪᓕᐅᓪᓗᓂᓘᓐᓃᑦ ᐅᖃᐅᓯᐅᒐᓗᐊᖅᑎᓪᓗᒍ. ᖃᑦᑏᓐᓇᑯᓗᐃᑦ ᐅᐃᕖᑎᑑᓲᑦ ᐊᐅᓱᐃᑦᑐᒥᕐ, ᐊᒻᒪᓗ ᑕᒪᐃᓐᓂ ᑭᓯᐊᓂ ᖃᑦᑏᓐᓇᑯᓗᐃᑦ ᐅᖃᓪᓚᓲᑦ ᖃᓪᓗᓈᑎᑐᑦ. ᐃᓄᐃᑦ ᑲᑎᒐᐃᒻᒪᑕ ᑭᒃᑯᑐᐃᓐᓇᐃᑦ ᐊᒻᒪᓗ ᑲᑎᒪᔪᖃᕋᐃᒻᒪᑦ ᑕᒪᒃᑮᓐᓂᒃ ᐅᖃᐅᓰᖕᓂᒃ ᐊᑐᖅᑐᓂᑦ ᓂᕆᐅᒍᓐᓇᖅᑐᑎᑦ, ᑭᓯᐊᓂᓕ ᓂᕆᐅᑦᑐᒃᓴᐅᓂᐊᙱᑦᑐᑎᑦ ᐃᓄᒃᑎᑑᖅᑐᑦ ᖃᓪᓗᓇᐅᔭᓕᖅᑎᑕᐅᑲᐅᑎᒋᓂᐊᕐᓂᖏᓐᓂᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᖑᔪᖅᑕᖃᕈᓗᒻᒪᑦ. ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ. ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

 

2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᖅᑕᐅᓯᒪᔪᑦ 10−ᖑᓚᐅᖅᑐᑦ ᐃᓕᓐᓂᐊᕆᐊᓕᓵᓲᑦ ᓱᕈᓯᓛᑦ ᐊᒻᒪᓗ 45 ᐃᓕᓐᓂᐊᕆᐊᓲᑦ ᓱᕈᓰᑦ, 42%−ᖑᓪᓗᑎᑦ ᐃᓄᖏᑦ ᐅᑭᐅᓖᑦ 18−ᓂ ᑐᖔᓂ. ᐅᑭᐅᕆᔭᐅᓗᐊᖅᑐᑦ 24.7, ᐊᒻᒪᓗ 2011-ᒥ, ᐅᑭᐅᓕᑦᑕᖃᓚᐅᙱᑦᑐᖅ 65-ᓂᑦ ᐅᖓᑖᓄᓪᓗ ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ. 

ᑮᓇᐅᔾᔭᒃᓴᕈᑕᐅᔪᑦ: 

ᓄᓇᓕᓐᓂ ᑮᓇᐅᔭᓕᐅᕋᓱᐊᖅᑐᑦ ᐊᐅᓱᐃᑦᑐᕐᒥ ᓂᐅᕕᐊᒃᓴᖃᕐᓂᕐᒧᑦ ᐱᔨᑦᑎᕋᕐᓂᒧᓪᓗ ᓄᓇᓕᒻᒥᐅᓄᑦ. ᐊᒥᓱᑦ ᐃᓄᐃᑦ ᐱᖅᑯᓯᑐᖃᖅᑎᒍᑦ ᓱᓕ ᓂᕿᑖᕋᓱᐊᓲᑦ ᐊᖑᓇᓱᐊᖅᑐᑎᑦ, ᐱᓗᐊᖅᑐᒥᒃ ᐳᐃᔨᓂᒃ ᐊᒻᒪᓗ ᐃᓛᓐᓂᒃᑯᑦ ᐅᒥᖕᒪᓂᑦ, ᐊᑭᑐᓗᐊᖅᑐᐊᓘᓂᖏᓐᓄᑦ ᓂᖀᑦ ᓄᓇᓕᒻᒥ. ᐊᐅᓱᐃᑦᑐᖅ ᑮᓇᐅᓕᐅᕋᓱᐊᕐᕕᖃᓗᐊᙱᑦᑐᖅ ᐊᒥᓱᑦ ᓄᓇᕗᒥ ᓄᓇᓖᑦ ᑕᐃᒪᓐᓂᖅᓴᐅᑎᓪᓗᒋᑦ, ᐱᓇᓱᐊᕐᓂᖅᓴᐅᓕᖅᑑᒐᓗᐊᑦ ᕼᐊᒻᓚᒃᑯᑦ ᐳᓚᕋᖅᑐᓕᕆᔪᓐᓇᕐᓂᖓ, ᐊᒥᓲᓂᖏᓐᓄᑦ ᐆᒪᔪᐃᑦ ᐊᒻᒪᓗ ᑲᔾᔮᓇᖅᑐᒻᒪᕆᐅᓄᖓᓄᑦ. ᐊᒥᓱᑦ ᓄᓇᓕᒻᒥᐅᑦ ᓂᐅᕕᐊᒃᓴᖃᓲᑦ ᓱᓇᑐᐃᓐᓇᕐᓂᑦ ᐊᐅᓪᓚᐅᔾᔨᕙᑦᑐᑎᓪᓗ ᓇᓐᓂᐊᖅᑎᓄᑦ, ᑕᒪᓐᓇ ᐊᐅᓚᑕᒻᒪᕆᐅᓪᓗᓂ ᐊᑐᐊᒐᑎᒍᑦ, ᑮᓇᐅᔭᖅᑖᕈᑕᒻᒪᕆᐅᓲᖅ ᓄᓇᓕᐅᔪᒧᑦ ᐱᕐᔪᐊᖑᓪᓗᓂ. ᐃᓛᓐᓂᒃᑯᑦ, ᓂᐅᕐᕈᔪᑦ ᖁᑦᑎᓂᖅᐹᖅ ᑲᓇᑕᒥ ᒥᕐᖑᐃᓯᕐᕕᖓᓄᑦ (http://www.pc.gc.ca/pn-np/nu/quttinirpaaq/index.aspx) ᑕᑯᔭᖅᑐᓲᑦ ᓄᓇᓕᐅᔪᒥ. ᓴᓇᙳᐊᖅᑏᑦ, ᓴᓇᙳᐊᖅᑏᑦ ᒥᖅᓱᑏᓪᓗ ᐱᖃᓯᐅᑎᓪᓗᒋᑦ, ᓂᐅᕕᐊᒃᓴᖃᓲᑦ ᓴᓇᐅᒐᕐᒥᓂᒃ ᑕᐃᑯᖓ ᑕᐃᒃᑯᑎᒎᓇᓗ ᑯᐊᐸᒃᑯᓐᓄᑦ.

 

ᐊᒥᓱᓂᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᐊᐅᓱᐃᑦᑐᖅ, ᐊᒻᒪᓗ ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ. ᑯᐊᐸᒃᑯᑦ “ᑮᓇᐅᔭᓕᕆᔪᓐᓇᕐᒥᔫᒐᓗᐊᑦ”, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖃᕐᕕᒋᒍᓐᓇᖅᑐᒋᑦ ᓂᐅᕕᕐᕕᒃᑯᑦ, ᓯᒃᑮᕐᕕᒃᓴᐅᓪᓗᑎᑦ, ᐊᓯᖏᓪᓗ. ᐊᐅᒃᑕᔫᓅᖅᑐᑦ ᑮᓇᐅᔭᖅᑎᒍᑦ ᐊᑭᓕᐅᑎᐅᕙᑦᑐᑦ ᐊᑭᓕᒃᓴᓂᒍᓐᓇᐅᑏᓪᓗ ᓂᐅᕕᕐᕕᓂ ᐊᑐᕋᒃᓴᐅᓲᑦ. ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᑕᒫᓃᑦᑐᓂ ᐊᐅᓱᐃᑦᑑᑉ ᕿᑭᖅᑕᖓᑕ ᓂᒋᐊᓂ, ᐊᐅᓱᐃᑦᑐᖅ ᐊᔾᔨᒌᙱᑦᑐᓂᑦ ᐆᒪᔪᖃᐅᖅᑐᖅ, ᐱᖃᓯᐅᑎᓪᓗᒋᑦ ᓇᑦᑏᑦ, ᑑᒑᓖᑦ, ᐊᐃᕖᑦ, ᕿᓚᓗᒐᐃᑦ ᐊᒻᒪᓗ ᓇᓄᐃᑦ. ᓇᓐᓂᐊᑎᑦᑎᓪᓗᑎᑦ ᑮᓇᐅᔭᓕᐅᓲᖑᒻᒥᔪᑦ ᓄᓇᓕᐅᔪᒥ, ᐊᒻᒪᓗ ᑕᒪᓐᓇ ᐆᒪᔪᕐᓂᑦ ᐊᑐᐊᒐᓕᕆᓂᕐᒧᑦ ᐊᐅᓚᑕᒻᒪᕆᐅᓪᓗᓂ. ᐅᒥᖕᒪᐃᑦ ᑕᑯᔭᐅᔪᓐᓇᕐᒥᔪᑦ ᖃᓂᒋᔭᖓᓂ, ᒥᑭᔪᐃᓪᓗ ᐆᒪᔪᐃᑦ, ᓲᕐᓗᒃ ᑎᕆᒐᓂᐊᑦ, ᐊᕕᙵᐃᑦ ᐊᒻᒪᓗ ᐊᒪᕈᐃᑦ. ᐊᐅᔭᒃᑯᑦ ᐊᔾᔨᒌᙱᑦᑐᑦ ᑎᖕᒥᐊᑦ ᑕᒪᐅᙵᓲᑦ ᐊᒻᒪᓗ ᓂᕆᔪᑎᖃᕐᕕᒃ ᑲᓇᑕᒥ ᐆᒪᔪᕐᓄᑦ ᐸᐸᑦᑎᕕᖓ (NWA) (http://www.ec.gc.ca/ap-pa/default.asp?lang=En&n=0B0F6D26-1) ᐃᓚᒋᔭᐅᕗᖅ ᑕᓪᓕᒪᓂ ᑕᒪᐃᓐᓂ ᑲᓇᑕᒥ ᐆᒪᔪᐃᑦ ᐸᐸᑦᑎᕕᖓᓂ ᓄᓇᕗᒥ. 100 km ᐊᖏᓂᓕᒃ ᐊᐅᓱᐃᑦᑐᕐᒥ, ᓂᕆᔪᑎᖃᕐᕕᒃ NWA ᑎᑎᖅᑕᐅᓚᐅᖅᓯᒪᕗᖅ 1995−ᖑᑎᓪᓗᒍ, ᐊᒻᒪᓗ ᖃᐅᔨᒪᔭᐅᑦᑎᐊᕐᒥᔪᑦ ᐃᓐᓈᕈᕐᒦᓲᑦ ᑎᖕᒥᐊᖃᖅᐸᓐᓂᖓᓄᑦ, ᐱᓗᐊᖅᑐᒥᒃ ᑯᕗᒡ ᕿᑭᖅᑕᖓ. ᐊᐅᔭᒃᑯᑦ, ᑕᑯᔪᓐᓇᖅᑐᑎᑦ 30,000−ᓂᑦ ᑎᕋᑎᕋᓂᑦ ᐊᒻᒪᓗ 160,000−ᓂᑦ ᐊᒃᐸᓂᑦ ᐃᓐᓈᕈᖏᓐᓂ ᑲᓇᓐᓇᖓᑕ ᓂᒋᐊᓂᓗ ᕿᑭᖅᑕᒥ. ᕼᐊᒻᓚᒃᑯᑦ ᐃᑭᐊᖅᑭᕕᖓ (http://grisefiord.ca/eng/wildlife.html) ᓇᓗᓇᐃᔭᐃᓯᒪᒻᒥᔪᖅ ᓄᓇᓕᓐᓂ ᐆᒪᔪᖏᓐᓂ ᐅᖃᖅᓯᒪᐅᑦᑎᐊᓂᖅᓴᐅᓪᓗᑎᑦ. 

ᐅᖃᓕᒫᑲᓐᓂᕐᓃᑦ : 
  • Bennett, John & Susan Rowley, eds. Uqalurait: an oral history of Nunavut. Montreal & Kingston: McGill-Queen’s University Press, 2004.
  • Canada Royal Commission on Aboriginal People. The High Arctic relocation. Ottawa: The Commission, 1994.
  • Dorais, Louis-Jacques. The language of the Inuit: syntax, semantics and society in the Arctic. Montreal & Kingston: McGill-Queen’s University Press, 2010.
  • Grant, Shelagh D. Sovereignty or security? Government policy in the Canadian North 1936-1950. Vancouver: University of British Columbia Press, 1988.
  • Issenman, Betty Kobayashi. Sinews of Survival: the living legacy of Inuit clothing. Vancouver: UBC Press, 1997.
  • MacDonald, John. The Arctic sky: Inuit astronomy, star lore and legend. Iqaluit & Toronto: Nunavut Research Institute and Royal Ontario Museum, 1998.
  • McGhee, Robert. The last imaginary place: a human history of the Arctic world. Toronto: Key Porter Books, Canadian Museum of Civilization, 2004.
  • Morrison, David and Georges-Hébert Germain. Inuit: glimpses of an Arctic past. Hull: Canadian Museum of Civilization, 1995.
  • Pauktuutit Inuit Women of Canada. The Inuit way: a guide to Inuit culture, rev. ed. Ottawa: Pauktuutit Inuit Women of Canada, 2006. http://www.uqar.ca/files/boreas/inuitway_e.pdf
  • Rholem, Karim. Uvattinnit: the people of the far north. Montréal: Stanké International, 2001.
  • Tester, Frank James and Kulchyski, Peter. Tammarniit (mistakes): Inuit relocation in the Eastern Arctic 1939-63. Vancouver: University of British Columbia Press, 1994.