You are here

ᐊᕐᕕᐊᑦ

ᐊᕐᕕᐊᑦ

ᐊᕕᒃᑐᖅᓯᒪᓂᖓ: 
Kivalliq School Operations (KSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐊᕐᕕᐊᑦ ᓄᓇᓖᑦ ᐊᖏᓛᖏᓐᓂᒃ ᑭᖑᓪᓕᕆᔭᐅᓕᖅᐳᖅ ᐃᓄᒋᐊᓐᓂᖏᑎᒍᑦ, ᐊᒻᒪᓗ ᓂᒋᕐᒦᓛᖑᓪᓗᓂ ᕿᑭᖅᑕᒦᙱᑦᑐᓂ.  ᑕᐃᔭᐅᕙᓚᐅᖅᓯᒪᔪᖅ ᖃᓪᓗᓈᑎᑐᑦ ᐃᔅᑭᒨ ᐳᐊᓐᑦ, ᑕᓯᐅᔭᕐᔪᐊᑉ ᐱᖓᓐᓇᖓᓃᑦᑐᓂ, ᐊᒻᒪᓗ ᑰᒡᔪᐊᕌᓗᒃ, ᒫᓂᑑᕙᒧᑦ ᑲᓱᖅᑎᓯᒪᓪᓗᓂ, ᐅᒥᐊᒃᑯᑦ ᐊᐅᔭᐅᓕᕋᐃᒻᒪᑦ ᑎᑭᕝᕕᐅᔪᓐᓇᓲᖅ ᐊᒻᒪᓗ ᐅᑭᐅᒃᑯᑦ ᖃᒧᑕᐅᔭᒃᑯᑦ.

ᐊᕐᕕᐊᑦ ᑐᑭᓕᒃ “ᐊᕐᕕᖃᕐᕕᒃ.”  ᐃᓄᐃᑦ ᑕᒫᓂ ᓄᓇᖃᖅᓯᒪᔪᑦ ᐃᓄᐃᑦ ᓯᕗᕚᖏᑦ ᑕᒪᐅᙵᕆᐅᖅᑎᓪᓗᒋᑦ.  ᐊᐅᓪᓚᑲᑕᖃᑦᑕᖅᓯᒪᔪᑦ ᐊᒻᒪᓗ ᐃᓅᖃᑎᖃᕐᓂᑰᓪᓗᑎᑦ ᐊᓯᖏᓐᓂᒃ ᐃᓄᓐᓂᒃ, ᐊᓪᓚᓂᑦ ᑯᕇ ᐊᒻᒪᓗ ᑎᐊᓇᐃᓂᑦ ᓯᔾᔭᖅᐸᓯᐊᓃᑦᑐᓂᑦ.  ᑕᐃᒫᒃᓴᐃᓐᓇᖅ ᐊᓯᖏᑦ ᐱᖓᓐᓇᖓᓂ ᑕᓯᐅᔭᕐᔪᐊᕐᒥ. ᐊᕐᕕᐊᑦ ᐊᕐᕕᒐᓱᐊᕐᕕᐅᖃᑦᑕᖅᑐᒥᓂᐅᕗᖅ.  ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᓕᓴᖅᓯᓯᒪᕗᑦ ᑕᒪᔅᓱᒪᑉ ᐊᑐᖅᑕᐅᖃᑦᑕᖅᑐᑐᖃᐅᓂᖓᓂᑦ ᑐᓴᖅᑎᑦᑎᓚᐅᖅᓯᒪᓪᓗᑎᑦ ᑲᓇᑕᒥ ᓄᓇᒋᔭᐅᖃᑦᑕᖅᑐᑐᖃᒥᓂᐅᓂᖓᓂᑦ ᑕᐃᑲᓂ ᐊᕐᕕᐊ’ᕐᔪᐊᕐᒥ ᐊᒻᒪᓗ ᕿᑭᖅᑖᕐᔪᒻᒥ 1995−ᖑᑎᓪᓗᒍ. (http://www.historicplaces.ca/en/rep-reg/place-lieu.aspx?id=1161)

ᕼᐊᑦᓴᓐᔅ ᕙᐃ ᑲᒻᐸᓂᒃᑯᑦ ᓂᐅᕕᕐᕖᑦ (HBC) ᐅᒥᐊᕐᔪᐊᖏᑦ ᐊᕐᕕᐊᓅᖃᑦᑕᖅᑐᑐᖃᐅᓚᐅᖅᑐᑦ ᐊᒥᓱᓄᑦ ᐊᕐᕌᒍᓄᑦ ᑕᐅᖅᓰᕕᕈᓚᐅᖅᑳᖅᑎᓐᓇᒍ 1921-ᒥ.  ᐃᒃᓯᕋᕐᔪᐊᑦ ᐋᓐᓕᑲᓐ−ᒃᑯᓪᓗ ᑐᒃᓯᐊᕐᕕᖏᑦ ᑭᖑᓂᐊᒍᑦ ᑎᑭᑦᑐᒥᓂᐅᓪᓗᑎᑦ 1924−ᖏᓐᓂ ᐊᒻᒪᓗ 1926-ᖑᑎᓪᓗᒍ.  ᐊᓂᒍᖅᐸᓪᓕᐊᑎᓪᓗᒍ, ᐃᓄᐃᑦ ᐃᓚᒌᑦ ᑕᒪᐅᖓ ᓄᓇᑖᓕᓚᐅᖅᓯᒪᔪᑦ ᐊᔾᔨᒌᙱᑦᑐᕈᓘᔭᐃᑦ ᐱᔨᑦᑎᕋᕈᑏᑦ ᐱᓪᓗᒋᑦ ᑐᒃᓯᐊᕐᕕᑯᓐᓄᑦ ᐱᔨᑦᑎᕋᖅᑕᐅᔪᑦ.  ᐳᑭᖅᑕᓕᒃᑯᑦ 1937−ᖑᓕᖅᑎᓪᓗᒍ ᑕᒪᐅᙵᓚᐅᖅᓯᒪᔪᑦ, ᑲᓇᑕᑉ ᒐᕙᒪᖏᓐᓄᑦ ᐃᓕᓐᓂᐊᕐᕕᒃ ᓴᖅᑭᖅᑎᑕᐅᒋᓪᓗᓂ 1959−ᖑᑎᓪᓗᒍ.  ᐃᓱᐸᓗᖏᓐᓂᓕ 1940−ᖏᓐᓂ ᐊᒻᒪᓗ 19-50−ᖏᓐᓂ ᐊᒃᓱᕈᕐᓇᖅᑑᓚᐅᖅᓯᒪᔪᖅ ᐃᓄᓐᓄᑦ ᐆᒪᔪᐃᑦ ᓅᓐᓂᕆᖃᑦᑕᖅᑕᖏᑦ ᐊᓯᔾᔨᖅᑎᒥᓂᐅᓂᖏᓐᓄᑦ, ᑮᓇᐅᔾᔭᒃᓵᖏᓐᓂᑦ ᐊᑦᑐᐃᓂᖃᖅᑐᑎᑦ ᒥᑭᒋᔾᔭᖃᑦᑕᖅᑐᑎᑦ ᐊᒻᒪᓗ ᓂᕿᑖᕆᓲᖏᑦ ᓂᕐᔪᑎᓂ ᐃᓚᖏᓐᓄᑦ.  ᐊᒻᒪᓗᒃᑲᓐᓂᖅ, ᓄᓇᓕᒻᒥᐅᑦ ᐳᕙᓪᓗᖃᑦᑕᓕᓚᐅᖅᓯᒪᔪᑦ ᐊᒻᒪᓗ ᐃᒡᒋᐊᕐᓗᓇᖅᑐᖃᓕᖅᑐᓂ.  ᑕᐃᒪᐃᑦᑎᓪᓗᒋᑦ, ᑲᓇᑕᒻ ᒐᕙᒪᒃᑯᑦ ᓄᑦᑎᕆᓕᓚᐅᖅᓯᒪᔪᑦ ᐃᓄᖕᓂᑦ ᐊᕐᕕᐊᓄᑦ ᐊᓯᖏᓐᓃᙶᖅᑐᓂᑦ ᑕᒪᒃᑯᐊ ᐊᒃᓱᕈᕈᑕᐅᔪᑦ ᑲᒪᒋᔭᐅᓇᓱᐊᖅᑐᑎᑦ.  1989−ᖑᑎᓪᓗᒍ, ᕼᐊᒻᓚᖓ ᐊᓯᔾᔨᓚᐅᖅᓯᒪᔪᖅ ᐊᑎᖓᓂᒃ ᐃᐊᔅᑭᒧ ᐳᐊᓐᑦ−ᖑᓚᐅᕋᓗᐊᖅᑐᓂ ᐊᕐᕕᐊᑦ−ᖑᓂᕋᖅᑕᐅᓕᖅᑐᓂ.

ᓇᓂᓯᓂᖅ ᐊᕐᕕᐊᓂ ᐱᓕᕆᐊᖅ ᖃᕋᓴᐅᔭᒃᑯᑦ ᐱᓕᕆᐊᕆᔭᐅᔪᖅ ᒪᒃᑯᑦᑐᓄᑦ ᐃᓐᓇᑐᖃᕐᓄᓪᓗ, ᑎᑎᕋᖅᑕᐅᕙᑦᑐᑎᑦ ᐊᑐᖅᑕᐅᖃᑦᑕᓂᕐᑯᒥᓂᖏᑦ ᐃᓅᓯᕆᔭᐅᕙᓚᐅᖅᑐᑦ ᐊᒻᒪᓗ ᐃᓕᖅᑯᓯᖏᑦ ᐊᕐᕕᐊᑉ.  ᓄᓇᕗᑦ ᒐᕙᒪᖏᑦ (GN) ᐃᖅᑲᓇᐃᔭᓕᓵᖅᑐᓄᑦ ᑐᑭᓯᒋᐊᕈᑎᑕ ᐃᑭᐊᖅᑭᕕᖓ ᐱᐅᔪᒻᒪᕆᖕᓂᒃ ᑎᑎᕋᖅᓯᒪᔪᖁᑎᓕᒃ ᓄᓇᕗᕈᖅᐸᓪᓕᐊᑎᓪᓗᒍ ᖃᓄᐃᓕᐅᕈᑕᐅᖃᑦᑕᓚᐅᖅᓯᒪᔪᓂᑦ, ᐊᒻᒪᓗᑦᑕᐅᖅ ᓇᓗᓇᐃᔭᖅᑕᐅᓯᒪᓂᖏᑦ ᐃᓄᐃᑦ ᐃᓕᖅᑯᓯᖏᑦ ᐊᒻᒪᓗ ᐃᓅᓯᕆᕙᓚᐅᖅᑕᖏᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᖅᑕᐅᓇᓱᐊᖅᓯᒪᓕᕐᒪᑕ ᓄᓇᕗᑦ ᐊᐅᓚᓂᖏᓐᓄᑦ ᐊᒻᒪᓗ ᐱᔨᑦᑎᕋᕈᑎᖏᓐᓄᑦ.  ᑖᓐᓇ ᐃᑭᐊᖅᑭᕕᒃ ᐅᖃᓕᒫᖅᑕᐅᖁᒐᓗᐊᖅᐸᕗᑦ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᒌᕈᓂ, ᒫᓐᓇᐅᔪᕐᓕ ᑕᐃᒪ ᑕᑯᓂᐊᕈᓐᓇᖅᑕᑎᑦ ᓄᓇᕗᑦ ᒐᕙᒪᖏᑕ ᐃᑭᐊᖅᑭᕕᖓ ᑐᑭᓯᒋᐊᒃᑲᓐᓂᖁᓪᓗᑎᑦ. (http://www.gov.nu.ca/)

 

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐃᓄᐃᑦ ᐃᓕᖅᑯᓯᖓ ᐊᒻᒪᓗ ᐅᖃᐅᓯᖓ ᓴᙱᔫᕗᖅ ᐊᑐᖅᑕᐅᔪᒻᒪᕆᐅᓲᖑᓪᓗᑎᑦ ᐊᕐᕕᐊᓂ.  ᐊᕐᕕᐊᑦ ᐳᓚᕋᖅᑐᓕᕆᔨᖏᑦ ᐃᓕᖅᑯᓯᓕᕆᓂᕐᒧᑦ ᐃᓕᓐᓂᐊᑎᑦᑎᓲᑦ ᐊᑐᐃᓐᓇᐅᒪᔪᑦ ᓂᐅᕐᕈᐊᓄᑦ ᐊᒻᒪᓗ ᑕᒫᓂᒥᐅᑕᕈᕋᑖᖅᑐᓄᑦ, ᐱᖃᓯᐅᔾᔨᔪᑦ ᐃᓐᓇᑐᖃᐃᑦ ᐅᓂᒃᑳᖅᑐᐊᖏᓐᓂᑦ, ᑕᐅᑐᑦᑎᑦᑎᓪᓗᑎᑦ ᐱᖅᑯᓯᑐᖃᖅᑎᒍᑦ ᐋᕐᖔᖅᑐᑦ, ᐊᒻᒪᓗ ᐊᔾᔨᙳᐊᑐᖃᐃᑦ ᑕᑯᒃᓴᐅᑎᑕᐅᓪᓗᑎᑦ. (http://www.visitarviat.ca/index.php/sights-attractions/inuit-cultural-programs) ᒫᒡᒍᓚ ᐊᓂᒃᓴᖅ ᑐᑭᓯᒋᐊᕐᕕᖓᓂ ᐊᕐᕕᐊᓂ ᖃᓄᐃᓕᐅᕈᑕᐅᖃᑦᑕᖅᓯᒪᔪᓂᑦ ᐱᑕᖃᖅᑐᑦ ᑐᑭᓯᒋᐊᕈᑎᓂᑦ ᐊᒻᒪᓗ ᐃᓕᖅᑯᓯᕐᒨᖓᔪᓂᑦ ᑕᑯᒃᓴᐅᑎᑦᑎᓪᓗᑎᑦ ᑭᓱᑐᐃᓐᓇᕐᓂᑦ.  ᓇᓂᓯᓂᖅ ᐊᕐᕕᐊᓂ ᐱᓕᕆᐊᖅ ᐅᖃᓕᒫᒐᖃᕈᓘᔭᕐᒥᔪᖅ ᓄᓇᓕᓐᓂ ᐃᓕᖅᑯᓯᖓᓂ, ᐱᖃᓯᐅᑎᓪᓗᒋᑦ ᐊᒥᓱᑦ ᑕᕐᕆᔮᒃᓴᓕᐊᕆᔭᐅᓯᒪᔪᑦ ᐊᐱᖅᓱᖅᑕᐅᓪᓗᑎᑦ ᐃᓐᓇᑐᖃᐃᑦ.  ᓄᓇᑐᖃᕆᔭᐅᕙᓚᐅᖅᓯᒪᔪᖅ ᐸᐸᑕᐅᕗᖅ ᖃᓂᒋᔭᖏᓐᓂ ᐊᕐᕕᐊ’ᕐᔪᐊᖅ ᐊᒻᒪᓗ ᕿᑭᖅᑖᕐᔪᒃ ᓄᓇᑐᖃᕆᔭᐅᕙᓚᐅᖅᓯᒪᔪᒥᒃ.

ᐅᑉᐱᕐᓂᓕᕆᓂᕐᓗ ᑕᐃᒪ ᐱᒻᒪᕆᐅᕗᖅ ᓄᓇᓕᒻᒥᐅᓄᑦ.  ᑐᒃᓯᐊᕐᕕᖃᐅᕈᓘᔭᖅᑐᖅ ᐊᕐᕕᐊᓂ ᐊᔾᔨᒌᙱᑦᑐᓂᑦ ᐅᑉᐱᕐᓂᖃᐅᖅᑐᓂᑦ.  ᑕᑯᓂᐊᕐᓗᒋᑦ ᓄᓇᓕᓐᓂ ᐅᖄᓚᕕᒃᓴᑦ ᑐᑭᓯᒋᐊᕈᑎᖏᑕ ᑎᑎᖅᑐᖅᓯᒪᓂᖏᑦ.

ᐃᓄᒃᑎᑐᑦ ᐊᑐᖅᑕᐅᓛᖑᓲᖑᕗᖅ ᐊᕐᕕᐊᓂ.  ᐊᒥᓱᓄᑦ ᐃᓄᓐᓄᑦ ᐅᖃᐅᓯᓪᓗᐊᑕᕆᔭᐅᒻᒪᑦ, 94%−ᖑᔪᑦ ᐅᖃᐅᓯᓖᑦ ᐃᓄᒃᑎᑐᑦ 2011 ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ, ᐊᒻᒪᓗ 20%−ᖏᑦ ᐃᓄᐃᑦ ᐊᕐᕕᐊᓂ ᐃᓄᒃᑎᑐᑐᐊᖅ ᐅᖃᓪᓚᒍᓐᓇᕐᓂᕋᖅᓯᒪᓪᓗᑎᑦ.  ᐊᒥᓱᑦ ᐃᓕᓐᓂᐊᕆᐊᓕᓵᖅᑐᑦ ᐃᓕᓐᓂᐊᕐᕕᖏᑦ ᐃᓄᒃᑎᑑᓲᖑᒻᒪᑕ.  ᖃᓪᓗᓇᐅᔮᓲᑦ 80%−ᖏᑦ ᐃᓄᐃᑦ, ᖃᑦᑏᓐᓇᑯᓗᐃᑦ ᐅᐃᕖᑎᑑᓲᖑᓪᓗᑎᑦ.  ᐃᓄᐃᑦ ᑲᑎᒐᐃᒻᒪᑕ ᐊᒻᒪᓗ ᑲᑎᒪᓕᕋᐃᒻᒪᑕ ᒪᕐᕉᖕᓂᒃ ᐅᖃᐅᓰᖕᓂᒃ ᐊᑐᓗᐊᓲᖑᔪᑦ, ᑭᓯᐊᓂᓕ ᐃᓄᒃᑎᑑᖅᑐᓂᑦ ᖃᓪᓗᓈᑎᑑᓕᖅᓱᖅᑕᐅᑎᒋᑲᐅᑎᒋᔪᓂᑦ ᓂᕆᐅᓐᓂᐊᙱᓚᑎᑦ ᖃᓪᓗᓈᑎᑑᓲᕐᒥᒃ ᐃᓚᒋᔭᐅᔪᖃᕈᓗᒻᒪᑦ.  ᐊᒻᒪᓗᑦᑕᐅᖅ, ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᓐᓂᖃᐅᖅᐳᑦ ᓄᓇᕗᒥ, ᐃᓄᒃᑎᑑᓲᖑᓚᐅᖅᓯᒪᒍᕕᑦ ᐊᓯᐊᓂ ᓄᓇᓕᐅᔪᒥ, ᐅᐸᓗᖓᐃᖅᓯᒪᓕᕆᑦ ᐊᓯᐊᓂᑦ ᐃᓄᒃᑎᑐᑦ ᐅᖃᐅᖓᓂᒃ ᐃᓕᓐᓂᐊᕐᓗᑎᑦ ᐊᒻᒪᓗᖃᐃ ᐅᖃᐅᓯᖓᓂᒃ ᐊᑐᖁᔨᖔᖅᑐᒥᒃ ᐅᖃᐅᔾᔭᐅᓂᐊᕋᕕᑦ ᓂᕆᐅᓐᓂᖃᓕᕆᑦ ᓄᓇᓕᒻᒥᐅᓄᑦ.  ᐃᓄᐃᑦ ᐅᖃᐅᓯᖓ (ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᑕᒪᐃᓐᓂᓕ ᐃᓕᓴᕆᔭᐅᓯᒪᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᙱᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᔪᒪᓗᑎᑦ ᐃᓕᓴᕆᔭᐅᓯᒪᔪᒥᒃ ᐅᖃᐅᓯᕐᒥᒃ ᐊᑐᖁᔭᐃᑦ ᒪᓕᓪᓗᒍ.

ᐊᕐᕕᐊᑦ ᐃᓄᖏᑦ ᒪᒃᑯᑐᒡᒍᑕᐅᕗᑦ ᐊᒥᓱᒻᒪᕇᓪᓗ ᕿᑐᕐᖏᐅᓲᖑᓪᓗᑎᑦ ᐊᒻᒪᓗ ᐃᓕᓐᓂᐊᕐᕕᓕᐊᓲᑦ ᓱᕈᓰᑦ ᐊᒥᓱᕈᖅᐸᓪᓕᐊᑐᐃᓐᓇᖅᑐᑎᑦ.  2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᐃᓚᐅᖅᓯᒪᕗᑦ 320 ᐃᓕᓐᓂᐊᓕᓵᖅᑐᑦ ᓱᕈᓯᓛᑦ ᐊᒻᒪᓗ 700 ᓱᕈᓰᑦ ᐃᓕᓐᓂᐊᕆᐊᓲᑦ, 44%-ᖑᓪᓗᑎᑦ ᕼᐊᒻᓚᒥᐅᑕᖏᑦ 18 ᑐᖔᓂ ᐅᑭᐅᖃᖅᑐᑦ.  ᐊᕐᕌᒍᕆᔭᐅᓗᐊᖅᑐᑦ ᐃᓄᓐᓄᑦ 20−ᐅᕗᑦ.  3%-ᑐᐃᓐᓇᑯᓗᖏᑦ ᐃᓄᐃᑦ ᐅᑭᐅᓖᑦ 65-ᓂᑦ ᐅᖓᑖᓂᓗ.

ᑮᓇᐅᔾᔭᒃᓴᕈᑕᐅᔪᑦ: 

ᐊᕐᕕᐊ ᓄᓇᓕᐅᕗᖅ ᐃᑲᔪᖅᑕᐅᓯᒪᖃᑕᐅᔪᖅ ᑮᓇᐅᔭᓕᐅᕈᑎᖃᕋᓱᐊᖅᑎᑕᐅᔪᓂᑦ ᓄᓇᕗᑦ ᒐᕙᒪᖏᑦ ᐊᓪᓚᕝᕕᖃᕐᕕᐅᓪᓗᓂ.  ᐊᖓᒧᖅᑳᖃᕐᕕᖓ ᓄᓇᕗᑦ ᓯᓚᑦᑐᓴᕐᕕᑯᓐᓄᑦ, ᐃᓂᒋᔭᐅᔪᖅ ᓇᒻᒥᓂᖁᑎᓖᑦ ᐃᒡᓗᓂᑦ ᐱᓕᕆᐊᖏᑦ ᓄᓇᕘᒥ ᐃᒡᓗᓕᕆᔨᕐᔪᐊᒃᑯᑦ ᑯᐊᐳᕇᓴᓐ−ᑯᖏᓐᓄᑦ, ᐊᒻᒪᓗ ᐃᓐᓇᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᐃᓕᓐᓂᐊᕈᑎᒃᓴᓕᕆᔨᒃᑯᓪᓗ ᐃᓕᓐᓂᐊᕐᓂᓕᕆᔨᒃᑯᓐᓂ.  ᖄᖓᒍᒃᑲᓐᓂᖅ ᓄᓇᕗᑦ ᒐᕙᒪᖏᓐᓄᑦ ᐃᖅᑲᓇᐃᔮᖅᑖᕐᕕᐅᔪᓐᓇᖅᑐᓂ ᐊᒻᒪᓗ ᓄᓇᓕᓐᓂ ᐱᔨᑦᑎᕋᖅᑕᐅᔾᔪᑎᖃᐅᖅᑐᓂ ᑮᓇᐅᔾᔭᒃᓴᔪᓄᑦ, ᐊᒥᓱᑦ ᐊᕐᕕᐊᕐᒥᐅᑦ ᐱᖅᑯᓯᑐᖃᖏᑎᒍᑦ ᐊᖑᓇᓱᑉᐸᑉᐳᑦ ᐊᒻᒪᓗ ᐃᖃᓗᒐᓱᐊᖅᑐᑎᑦ ᓂᕿᖃᖅᑎᑎᓪᓗᑎᑦ ᐃᓚᒥᓄᑦ.  ᐊᒻᒪᓗᒃᑲᓐᓂᖅ, ᓄᓇᓕᒻᒥᐅᑦ ᒥᖅᓱᑲᒻᒪᕆᐅᕗᑦ ᓂᐅᕕᐊᒃᓴᖃᓲᖑᓪᓗᑎᑦ ᓴᓇᐅᒐᕐᒥᓂᒃ, ᐱᐅᔪᒻᒪᕆᐊᓗᖕᓂᑦ ᐊᒻᒪᓗ ᓈᒻᒪᑎᐊᖅᑐᓂᑦ ᓯᓚᒦᑦᑐᖅᓯᐅᑎᓂᑦ ᐊᓐᓄᕌᓕᐅᓲᑦ ᐱᖅᑯᓯᑐᖃᖅᑎᒍᑦ ᐊᑐᓲᖑᓪᓗᑎᑦ ᒥᖅᓱᕋᕐᓴᖏᓐᓂᑦ ᐊᒻᒪᓗ ᖃᓪᓗᓈᖅᑕᓂᑦ.  ᓄᓇᓕᓐᓂ ᓴᓇᙳᐊᓲᑦ ᐅᑦᑯᓯᒃᓴᒥᒃ ᓴᓇᙳᐊᖅᑎᐅᓪᓗᑎᑦ ᐊᒻᒪᓗ ᓇᔾᔪᓂᑦ ᓴᓇᙳᐊᓲᖑᓪᓗᑎᑦ.  ᐳᓚᕋᖅᑐᓕᕆᓂᕐᓗ ᐊᕐᕌᒍᑉ ᐃᓚᖓᒍᑦ ᐃᖅᑲᓇᐃᔭᕈᓐᓇᑎᑦᑎᔪᖅ ᐊᐅᓪᓚᑎᑦᑎᔨᓄᑦ ᐊᒻᒪᓗ ᓇᒻᒥᓂᖁᑎᖃᖅᑐᓄᑦ ᐊᐅᓪᓚᐅᔾᔨᔨᓄᑦ, ᐊᒻᒪᓗ ᐃᓕᖅᑯᓯᕐᒨᖓᔪᓂᑦ ᑕᐅᑐᕋᕐᓈᑎᑦᑎᔩᑦ.

ᐊᒥᓱᓂ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᐊᕐᕕᐊᑦ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ.  ᓄᐊᑐᓐ ᓂᐅᕕᕐᕕᒃ, ᐊᕐᕕᐊᓂ ᕿᔪᒃᑖᕐᕕᒃ (EPLS), ᐊᒻᒪᓗ ᑯᐊᐸᒃᑯᑦ “ᑮᓇᐅᔭᓕᕆᔪᓐᓇᕐᒥᔫᒐᓗᐊᑦ”, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖃᕐᕕᒋᒍᓐᓇᖅᑐᒋᑦ ᓂᐅᕕᕐᕕᒃᑯᑦ, ᓯᒃᑮᕐᕕᒃᓴᐅᓪᓗᑎᑦ, ᐊᓯᖏᓪᓗ.  ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᐊᕐᕕᐊᓂ ᕿᔪᒃᑖᕐᕕᒻᒥ ᐊᒻᒪᓗ ᑯᐊᐸᒃᑯᓐᓂ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ.  ᐊᐅᒃᑕᔫᕐᒥ ᓂᐅᕕᕈᓐᓇᐅᑎᒥ ᐊᑐᕐᕕᒃᓴᐅᕗᖅ ᓂᐅᕕᕐᓗᓂ ᐊᒻᒪᓗ ᐊᑭᓕᒃᓴᓂᓪᓗᓂ ᐊᐅᒃᑕᔫᑦ ᐊᑐᕐᓗᒋᑦ ᐊᒥᓱᓂᑦ ᓂᐅᕕᕐᕕᓂ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᐊᒥᒐᖅᓯᙱᑦᑎᐊᖅᑐᑦ ᓂᕐᔪᑎᓂᑦ ᐊᕐᕕᐊᓂ.  ᑕᓯᐅᔭᕐᔪᐊᕐᒦᓐᓂᖓᓄᑦ, ᓇᓄᐃᑦ ᑕᒪᐃᓈᓲᖑᔪᑦ, ᐊᕐᕕᐊᓅᓲᖑᒻᒪᑕ ᐊᕐᕌᒍᑉ ᐃᓚᖓᓂ − ᐅᓂᒃᑳᖅᑐᐊᕈᑕᐅᓲᖑᓪᓗᑎᑦ, ᖃᐅᔨᒐᔭᖅᑐᑎᑦ ᐅᖃᖃᑎᖃᕆᐊᙵᕈᕕᑦ ᐊᕐᕕᐊᕐᒥᐅᑕᕐᒥᒃ.  ᓂᕐᓖᑦ, ᐊᕿᒡᒌᑦ, ᐅᒃᐱᔾᔪᐊᑦ, ᖃᖅᓴᐅᑦ, ᒥᑏᑦ, ᐊᒻᒪᓗ ᖁᒡᔪᐃᑦ ᑎᖕᒥᐊᑦ ᐃᕙᔭᖅᑐᓲᑦ ᑕᒪᐅᖓ; ᐊᕐᕌᒍᑕᒫᑦ ᐅᑎᖅᑎᓪᓗᒋᑦ ᓂᕐᓖᑦ ᓇᓗᓇᐃᒃᑯᑕᐅᓲᖅ ᐊᖑᓇᓱᓐᓇᐅᓂᐊᓕᕐᒥᒻᒪᑦ ᒪᓐᓂᑦᑕᕐᓇᖅᓯᓗᓂᓗ ᐊᕐᕕᐊᒥᐅᑕᓄᑦ.  ᑰᒑᕐᔪᒃ ᑎᖕᒥᐊᓄᑦ ᓴᐳᔾᔭᐅᓯᒪᓕᖅᑐᖅ, 27 km ᓂᒋᐊᓂ ᐊᕐᕕᐊᓂ, ᓴᐳᔾᔭᐅᔪᑦ ᓄᓇ ᒪᓴ ᑕᓰᓪᓗ ᓄᓇᕐᔪᐊᕐᒧᑦ ᐱᒻᒪᕆᐅᓂᕋᖅᑕᐅᔪᓂᑦ 250,000−ᓂᑦ ᑎᖕᒥᐊᓂᑦ ᑕᒪᐅᙵᐸᑦᑐᓂᑦ, ᐱᓗᐊᖅᑐᒥᒃ ᑲᖑᐃᑦ. (http://www.bsc-eoc.org/iba/site.jsp?siteID=NU020) ᑎᖕᒥᐊᓂᑦ ᖃᐅᔨᔪᒪᖃᑦᑕᑐᒻᒪᕆᐅᔪᑦ ᐊᒥᓱᓂᑦ ᓯᔾᔭᕆᐊᓂᒃ ᑕᑯᔪᓐᓇᓲᖑᒻᒥᔪᑦ, ᓲᕐᓗᒃ ᐃᒥᖅᑯᑕᐃᓚᑦ, ᓯᔾᔭᕆᐊᕐᔪᑦ, ᐊᓯᖏᓪᓗ (ᓯᔾᔭᕆᐊᑦ ᐊᔾᔨᒌᙱᑦᑐᑦ, ᐊᒻᒪᓗᑦᑕᐅᖅ ᑐᓗᒐᖅᑕᖃᖅᑐᓂ ᐊᒻᒪᓗ ᐅᖃᓄᐊᑦ ᑕᒪᒃᑯᖓᓗ ᐅᑭᐅᖅᑕᖅᑐᓕᒫᒨᓲᖑᓪᓗᑎᑦ.  ᓇᑦᑏᑦ, ᖃᓯᒋᐊᑦ ᐊᒻᒪᓗ ᖃᐃᕈᓖᑦ, ᐊᒻᒪᓗᑦᑕᐅᖅ ᕿᓚᓗᒐᐃᑦ, ᑕᒪᐃᓐᓂᓕᒫᖅ ᑕᕆᐅᕐᒥᐅᑕᐅᔪᑦ.  ᑐᒃᑐᖃᐅᖅᑐᓂ, ᐊᔾᔨᒌᙱᑐᒡᒍᑕᐅᓲᖑᒐᓗᐊᑦ ᓅᖃᑦᑕᕐᓂᖏᑦ.  ᐃᖃᓗᐃᑦ ᓂᕿᒋᔭᐅᒃᑲᔪᑦᑐᑦ ᓄᓇᓕᒻᒥᐅᓄᑦ.

ᐊᐅᔭᐅᑎᓪᓗᒍ ᖁᐱᕐᕈᖃᕈᓘᔭᖃᑦᑕᖅᑐᖅ, ᐱᓗᐊᖅᑐᒥᒃ ᑭᑦᑐᕆᐊᖃᖅᑐᒻᒪᕆᐅᓲᖅ ᐊᒻᒪᓗ ᖃᐅᒪᔭᕐᓂᑦ; ᑭᑦᑐᕆᐊᖃᕐᓇᙱᑦᑐᖅᓯᐅᑎᖃᕈᔅᓯ ᐊᒻᒪᓗ ᐊᓐᓄᕌᖅᓯᒪᖃᑦᑕᕈᔅᓯ ᑭᑦᑐᕆᐊᖃᖅᑕᐅᓇᙱᑦᑐᓂᑦ ᐱᐅᒐᔭᖅᑐᖅ.

ᐅᖃᓕᒫᑲᓐᓂᕐᓃᑦ : 
  • ᕕᐊᓇᑦ, ᔮᓐ & ᓲᓴᓐ ᕉᓕ, ᐋᖅᑮᒋᐊᕆᔩᑦ.  ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2004.
  • ᑳᑉᓚᓐ, ᐃ.  ᑕᑦᓕ: ᑲᑉᓚᓘᒃ: ᐊᖓᔪᖅᑳᖅ ᑕᐅᖅᓰᔨ, ᕼᐊᑦᓴᓐ ᕙᐃ ᑲᒻᐸᓂᒃᑯᑦ, 1923-39.  ᕕᓂᐱᒡ: ᕙᑦᓴᓐ & ᑕᐃᔪᕐ, 1989.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᐅᖃᐅᓰᑦ ᐋᖅᑭᓱᖅᓯᒪᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᐃᓅᓯᖏᑦ ᐅᑭᐅᖅᑕᖅᑐᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2010.
  • ᐄᐳᕐ, ᑐᕈᐊᑎ ᕼᐊᕐᓕ: ᐊᕐᕕᓂᐊᖅᑏᑦ ᐅᑭᐅᖅᑕᖅᑐᒦᑦᑎᓪᓗᒋᑦᒪᓐᑐᕆᐊᓪ & ᑭᖕᔅᑕᓐ: ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 1989.
  • ᕚᓴᑦ, ᕆᓇᐃ:  ᐃᓅᓯᖃᖁᓪᓗᑕ ᐊᒃᓱᕈᕐᓇᙱᑦᑐᒥᑦ: ᐃᓄᐃᑦ ᕿᑎᕐᒥᐅᑦ, 1550-1940 ᕕᓂᐱᒡ, ᒫᓂᑑᕙ: ᒫᓂᑑᕙ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2001.
  • ᐃᓴᓐᒪᓐ, ᕕᐊᑎ ᑯᕙᔭᓯ.  ᐃᕙᓗᖏᑦ ᐊᓐᓇᐅᒪᔾᔪᑏᑦ: ᐃᓄᐃᑦ ᐊᓐᓄᕌᖏᑦ ᖃᓄᐃᑦᑑᖃᑦᑕᓚᐅᖅᓯᒪᓂᖏᑦ.  ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ 1997.
  • ᑲᓗᐊᒃ, ᒫᒃ.  ᐊᒥᕐᓂᑦ ᐊᑐᓚᐅᖅᑐᑎᑦ ᐅᑦᑯᓯᒃᓴᒥᒃ ᐊᑐᓕᖅᑐᑦ: ᓴᓇᙳᐊᖅᑐᓕᕆᖃᑦᑕᕐᓂᑯᖏᑦ ᐊᕐᕕᐊᓂ.  [ᐋᑐᕚ]: ᐃᓄᓕᕆᔨᑐᖃᒃᑯᑦ ᑲᓇᑕᒥ, 1993.
  • ᒪᒃᑖᓄᓪᑦ, ᔮᓐ.  ᐅᑭᐅᖅᑕᖅᑐᑉ ᓯᓚᖓᐃᓄᐃᑦ ᐅᓪᓗᕆᐊᓂᓕᕆᓂᖏᑦ, ᐅᓪᓗᕆᐊᑦ ᐅᓂᒃᑳᖏᑦ ᐅᓂᒃᑳᖅᑐᐊᑐᖃᖏᓪᓗ ᐅᑉᐱᕆᔭᑦ.  ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑏᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪ ᑕᑯᔭᒐᖃᕐᕕᒃ, 1998.
  • ᒫᔅ, ᑖᓄᓪᑦ: ᓄᓇᒥ ᖁᐊᕐᒥ ᐊᑭᐊᔪᑦ:  ᐃᐊᑦᒪᓐᑕᓐ: ᕼᐅᕐᑎᒡ, 1987.
  • ᒫᔅ, ᕕᓂᕗᕆᐊᑦ ᐱᐊᑦᓯ: ᐊᕚᓚᕿᐊᕐᒥᐅᑦ: ᐹᓪᓕᕐᒥᐅᑦ ᑐᒃᑐᐃᑦ ᐃᓄᖏᑦ ᑕᑯᒃᓴᐅᑎᑕᐅᔪᑦ ᐊᒥᐊᕆᔭᐅᓂᒃᑯᑦ.  ᑐᕌᓐᑐ: ᐊᔅᕗᑦ ᓯᓚᑦᑐᓴᕐᕕᕐᔪᐊᖓᓄᖅ ᑎᑎᕋᖅᑕᐅᓯᒪᔪᑦ, 1976.
  • ᒪᒌ, ᕌᕗᑦ.  ᑭᖑᓪᓕᖅᐹᖅ ᑕᐅᑐᙳᐊᖅᑕᐅᓯᒪᓂᑯ: ᐃᓄᐃᑦ ᐊᑐᖃᑦᑕᕐᓂᑯᒥᓂᖏᑦ ᐅᑭᐅᖅᑕᖅᑐᒥ.  ᑐᕌᓐᑐ: ᑮ ᐳᐊᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨᔅ−ᕼᕿᕗᑦ ᔪᒪᐃᓐ.  ᐃᓄᐃᑦ: ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᑕᑯᓇᓪᓗᒋᑦ.  ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 1995.
  • ᒧᐊᑦ, ᐹᓕ: ᐃᓄᐃᑦ ᑐᒃᑐᒥᐅᑦ; ᐊᔪᖅᓴᒻᒪᕆᑦᑐᑦ ᐃᓄᐃᑦ (ᐊᒥᓱᑦ ᑎᑎᕋᖅᑕᐅᓕᖅᑭᒃᓯᒪᔪᑦ ᐊᑐᐃᓐᓇᐅᒪᕗᑦ).
  • ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ.  ᐃᓄᐃᑦ ᐃᓕᖅᑯᓯᖓ: ᐃᓄᐃᑦ ᐃᓕᖅᑯᓯᖓᓄᑦ ᑐᑭᒧᐊᕈᑎᖏᑦ, ᐋᖅᑭᒋᐊᖅᑕᐅᓯᒪᔪᑦ ᐋᑐᕚ: ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ, 2006. (http://www.uqar.ca/files/boreas/inuitway_e.pdf)
  • ᕉᓕᐊᒻ, ᑲᕆᒻ: ᐅᕙᑦᑎᓐᓂ: ᐃᓄᐃᑦ ᐅᑭᐅᖅᑕᖅᑐᒥᐅᑕᒻᒪᕇᑦ. ᒪᓐᑐᕆᐊᓪ: ᔅᑕᓐᑭ ᓄᓇᕐᔪᐊᕐᒥ ᑎᑎᕋᖅᑎᖏᑦ, 2001.