You are here

ᐸᖕᓂᕐᑑᖅ

ᐸᖕᓂᕐᑑᖅ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᓄᓇᓕᖓ ᐸᖕᓂᖅᑑᑉ (ᐸᖕᓂᖅᑑᖅ “ᑐᑦᑐᓂᒃ ᐸᓐᓂᖃᓲᖅ), ᕿᑭᖅᑖᓗᒻᒦᑉᐳᖅ ᑲᖏᖅᑐᐊᓘᑉ ᐃᒪᖓᓂ, ᐃᓄᓐᓄᑦ ᓄᓇᖃᕐᕕᐅᓯᒪᕗᖅ ᑕᐃᒪᙵᓂᑐᖃᖅ ᑐᓂᖅᑕᖃᖃᑦᑕᖅᑐᕕᓂᐅᑎᓪᓗᒍ (2000-500 ᐊᕐᕌᒍᐃᑦ ᔩᓱᓯ ᐃᓅᓚᐅᖅᑎᓐᓇᒍ). ᐊᒻᒪᓗ ᐅᐸᒐᔅᓴᐅᓪᓗᓂ ᐃᒪᒃᑯᑦ, “ᐹᖕ” ᐃᓱᐊᓃᑉᐳᖅ ᐊᒃᓵᔪᒃ ᐊᖅᑯᑎᐅᑉ, ᐊᖅᑯᑦ ᐊᑐᖅᑕᐅᓲᒻᒪᕆᒃ ᐸᓐᓂᖅᑑᒥ ᕿᑭᖅᑕᕐᔪᐊᕐᒧᑦ ᐊᒻᒪᓗ ᐊᑐᖅᑕᑕᐅᓲᒻᒪᕆᐅᓪᓗᓂ ᐱᓱᑦᑐᓄᑦ ᓄᓇᒃᑯᑦ ᐊᖅᑯᑕᐅᓪᓗᓂ. ᓯᕗᓪᓕᖅᐹᒥ ᑕᕆᐅᑉ ᐊᑭᐊᓃᙶᖅᑐᓂᒃ ᑎᑭᑦᑐᖃᓚᐅᖅᐳᖅ ᓄᓇᓕᖓᓄᑦ ᖃᓂᒋᔮᓄᑦ ᔮᓐ ᑕᐃᕕᔅ, ᑎᑭᓚᐅᖅᑐᖅ ᕿᓂᖅᑐᓂ ᐅᑭᐅᖅᑕᖅᑑᑉ ᐃᒪᖓᒍᑦ ᐊᖅᑯᒻᒥᑦ 1585-ᖑᑎᓪᓗᖑ. 1838-ᒥ ᕕᓕᐊᓐ ᐱᐅᕆ, ᓯᑳᑎᔅ ᐊᕐᕙᒐᓱᐊᖅᑎ ᑎᑭᓚᐅᖅᐳᖅ ᑲᖏᖅᑐᐊᓗᒻᒧᑦ ᐊᕐᕙᒐᓱᕝᕕᑦᑎᐊᕙᒻᒥᑦ ᓇᓂᓯᓪᓗᓂ. 1840-ᒥ, ᓯᕗᓪᓕᖅᐹᖅ ᓴᓇᔭᐅᓚᐅᖅᐳᖅ ᐊᕐᕙᒐᓱᑦᑎᓄᑦ ᐅᖅᓱᐊᓗᓕᐅᕐᕕᒃ ᕿᑭᖅᑕᓂ, ᑲᖏᖅᑐᐊᓗᒻᒦᑦᑐᖅ. ᐊᒥᐊᓕᒐᐃᑦ ᐊᒻᒪᓗ ᓯᑳᑦᑏᑦ ᐊᕐᕙᒐᓱᐊᖅᑏᑦ ᓄᓇᓕᖓᓐᓄᑦ ᓅᓚᐅᖅᐳᑦ, ᓄᓇᓕᒻᒥᐅᑦ ᐃᓄᑦ ᖃᓂᒋᔭᖏᓐᓅᖅᐸᓪᓕᐊᓕᖅᑐᑎᒃ ᐊᕐᕙᒐᓱᕝᕕᐅᔪᑦ ᕿᑭᖅᑕᓂ ᐊᒻᒪᓗ ᐆᒻᒪᓇᕐᔪᐊᕐᒥ, ᑲᖏᖅᑐᐊᓘᑉ ᒥᒃᓵᓄᒋᐊᖅ ᐃᖅᑲᓇᐃᔭᕆᐊᖅᑐᖅᑐᑎᒃ ᐊᒻᒪᓗ ᑕᐅᖅᓱᐃᒋᐊᖅᑐᖅᑐᑎᒃ.

ᕼᐊᑦᓴᓐ ᕙᐃ ᑲᒻᐸᓂᒃᑯᑦ (ᑳᑉᐸᓂᓕᒃᑯᑦ) ᓂᐅᕕᕐᕕᓕᐅᓚᐅᖅᐳᑦ ᐸᖕᓂᖅᑑᒥ 1921-ᖑᑎᓪᓗᖑ ᐊᒻᒪᓗ ᐸᓖᓯᒃᑯᑦ ᑭᖑᓂᖓᒍᑦ ᐊᓪᓚᕝᕕᓕᐅᖅᑐᑎᑦ 1923-ᖑᑎᓪᓗᒍ. ᐋᖕᓕᑲᒃᑯᑦ ᑎᑭᓚᐅᖅᐳᑦ 1929-ᒥ ᓴᓇᓪᓗᑎᒃ ᓴᐃᓐ ᓘᒃ ᑐᒃᓯᐊᕐᕕᒻᒥ ᐊᒻᒪᓗ ᐋᓐᓂᐊᕕᒻᒥᑦ, ᐊᑐᖅᑕᐅᔪᒻᒪᕆᐅᓚᐅᖅᑐᓂ ᐅᑭᐅᖅᑕᖅᑑᑉ ᑲᓇᓐᓇᖓᓂᕐᒥᐅᓄᑦ. ᐊᒥᓱᑦ ᐃᓄᐃᑦ ᓄᑦᑎᖅᐸᓪᓕᐊᓕᓚᐅᖅᐳᑦ ᓄᓇᓕᖓᓐᓄᑦ 1960 ᐱᒋᐊᕋᑖᖏᓐᓂᑦ ᐋᓐᓂᐊᕐᓇᖅᑕᖃᓚᐅᖅᑎᓪᓗᒍ ᕿᒻᒦᑦ ᑐᖁᕋᖅᑐᑎᒃ. 1962-ᒥ ᒐᕙᒪᑐᖃᒃᑐᒃ ᐊᓪᓚᕝᕕᓕᐅᓚᐅᖅᐳᑦ ᐃᓪᓗᓕᐅᓕᖅᑐᑎᓪᓗ ᓄᓇᓕᖓᓐᓂ. ᐊᐅᔪᐃᑦᑐᖅ ᒥᕐᖑᐃᖅᓯᕐᕕᒃ (ᒫᓐᓇ ᑲᓇᑕᒥ ᒥᕐᖑᐃᖅᓯᕐᕕᐅᓕᖅᑐᖅ) ᐱᒋᐊᖅᑎᑕᐅᓚᐅᖅᐳᖅ 1970-ᖏᓐᓂᑦ, ᒥᕐᖑᐃᓯᕐᕕᒃ ᐸ1ᓂᖅᑑᒦᑦᑐᖅ ᐊᓪᓚᕝᕕᓐᓄᑦ ᑐᑦᑕᕐᕕᒋᔭᐅᓕᖅᑐᓂ ᒥᕐᖑᐃᖅᓯᕐᕕᒻᒧᑦ. ᓄᓇᓕᖓᓐᓂᑦ ᐊᑐᐃᓐᓇᐅᑦᑎᐊᖅᐳᑦ ᐃᒪᕐᒥᐅᑕᐃᑦ ᐱᕙᓪᓕᐊᑎᑦᑎᓯᒪᓪᓗᑎᓪᓗ ᐃᖃᓗᓕᕆᕕᒻᒥ ᓄᓇᓕᖓᓐᓂ. ᐊᒻᒪᓗ ᓴᖅᑮᓯᒪᕗᑦ ᓄᕕᖅᓴᕐᕕᒻᒥ ᐊᒻᒪᓗ ᑎᑎᖅᑐᒐᕐᕕᒻᒥ ᑯᐊᐸᒃᑯᑦ, ᐸᖕᓂᖅᑐᖅ ᐅᑭᐅᖅᑕᖅᑑᑉ ᑲᓇᓐᓇᖓᓂ ᐃᓄᐃᑦ ᓴᓈᖏᓐᓂᑦ ᐱᒋᐊᖅᑎᑦᑎᓚᐅᖅᐳᖅ. ᕼᐋᒻᒪᓚᒃᑯᑦ ᒪᑐᐃᓚᐅᖅᐳᑦ 1973-ᒥ ᐊᒻᒪᓗ 1999-ᖑᑎᓪᓗᒍ ᓄᓇᓕᖓ ᓯᐊᕐᒪᖅᑎᕐᕕᐅᖃᑕᐅᓚᐅᖅᐳᖅ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂᑦ.

ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᓕᕋᑖᓄᑦ ᓇᓗᓇᐃᖅᓱᐃᔾᔪᑎ ᖃᕋᓴᐅᔭᒃᑯᑦ ᑕᑯᒋᐊᖅᑕᐅᔪᓐᓇᖅᐳᑦ ᐱᐅᔪᒻᒪᕆᒻᒥᑦ ᐃᓗᓕᖃᖅᑐᓂᒃ ᖃᓄᐃᖃᑦᑕᖅᓯᒪᓂᖓᓂᒃ ᓄᓇᕗᒻᒥ, ᐃᓚᓕᐅᔾᔭᐅᓪᓗᑎᒃ ᑐᑭᓯᒋᐊᕈᑏᑦ ᐃᓄᐃᑦ ᐃᓕᖅᑯᓯᖓᓂ ᐊᒻᒪᓗ ᖃᓄᐃᖃᑦᑕᖅᓯᒪᓂᖏᓐᓂᑦ ᓇᓗᓇᐃᖅᓱᐃᓪᓗᓂᓗ ᖃᓄᖅ ᐃᓄᐃᑦ ᐃᓕᖅᑯᓯᑐᖃᖓᑦ ᐃᓚᓕᐅᔾᔭᐅᕙᓪᓕᐊᒻᒪᖔᖅ ᒐᕙᒪᒃᑯᑦ ᐊᐅᓚᑕᖏᓐᓄᑦ ᐊᒻᒪᓗ ᐱᔨᑦᓯᕈᑎᖏᓐᓄᑦ. ᑕᑯᒋᐊᑦᑎᐊᕈᓇᓛᖅᐳᑎᑦ ᖃᕋᓴᐅᔭᒃᑯᑦ ᐊᑐᐃᓐᓇᐅᒃᑲᓐᓂᓕᖅᐸᑦ ᓴᓇᔭᐅᑦᑎᐊᓚᐅᕐᓗᓂ, ᒫᓐᓇᒧᓪᓕ ᐆᑦᑐᕈᓐᓇᖅᐳᑦ ᓄᓇᕗᑦ ᒐᕙᒪᒃᑯᑦ ᑐᑭᓯᒋᐊᕐᕕᖓᓄᑦ ᖃᕋᓴᐅᔭᒃᑯᑦ ᐅᕗᖓ: http://www.gov.nu.ca/

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᓄᓇᓕᒻᒥᐅᑦ ᐃᓄᐃᑦ ᐊᑐᓕᖅᓯᒪᕗᑦ ᐊᒥᓱᓂᑦ ᖃᓪᓗᓈᓃᓐᖔᖅᑐᓂᒃ ᓴᓇᕐᕈᓯᓂᑦ ᐊᓯᔾᔩᓯᒪᓪᓗᑎᒃ ᓴᙱᓂᖃᖅᑐᒻᒪᕆᓐᓂᑦ ᐃᓄᐃᑦ ᐃᓕᖅᑯᓯᖓᓐᓂᑦ ᓴᖅᑮᔪᓂᒃ. ᐅᖅᑯᕐᒥᐅᑦ ᓴᓇᓯᒪᔪᖅᑖᕐᕕᒃ ᐃᓗᓕᖃᖅᐳᖅ ᐸᖕᓂᖅᑑᒥ ᓄᕕᖅᓴᕐᕕᒻᒥ, ᐱᒋᐊᖅᑎᑕᐅᓚᐅᖅᑐᖅ ᒪᑭᒪᒐᓱᐊᕐᓂᕐᒧᑦ ᐱᕙᓪᓕᐊᑎᑦᑎᔨᒃᑯᓐᓄᑦ ᓄᓇᑦᓯᐊᕐᒥ ᒐᕙᒪᒃᑯᑎᒍᑦ 1970-ᖏᓐᓂ, ᑭᓯᐊᓂ ᖃᐅᔨᒪᔮᖑᑦᑎᐊᖅᓕᖅᓯᒪᕗᖅ ᓯᓚᕐᔪᐊᓕᒫᒥ ᓴᖅᑭᔮᖅᑎᑦᑎᓂᖏᓐᓄᑦ ᐃᓄᐃᑦ ᐃᓅᓯᖏᓐᓂᑦ ᐊᒻᒪᓗ ᐅᓂᒃᑲᐅᓯᖏᓐᓂᑦ. ᐃᓗᓕᖃᕆᕗᖅ ᑎᑎᖅᑐᒐᕐᕕᒻᒥ, ᖃᐅᔨᒪᔭᐅᑦᑎᐊᖅᑐᓂ ᑎᑎᖅᑐᒐᕐᕕᒃ, ᑭᓯᐊᓂ ᐊᓯᖏᓐᓂᑦ ᐆᑦᑐᖃᑦᑕᖅᓯᒪᒋᕗᑦ ᓄᑖᓂᒃ ᑎᑎᖅᑐᒐᕈᓯᓂᒃ. ᐸᖕᓂᖅᑑᖅ ᐊᖏᕐᕋᕆᔭᐅᕗᖅ ᓴᓇᙳᐊᖅᑎᓄᑦ ᓴᖅᑭᔮᖅᑐᑎᒃ ᓴᓈᖏᑦ ᓇᒥᑐᐃᓐᓇᖅ ᓯᓚᕐᔪᐊᕐᒥ, ᒪᒃᑯᓐᓂᖅᓴᐃᑦ ᓴᓇᙳᐊᖅᑏᑦ ᐊᔾᔨᓕᐅᕆᔨᐅᒋᕗᑦ, ᓴᖅᑭᔮᖅᑎᑦᑎᓪᓗᑎᑦ ᓄᓇᓕᖓᓐᓂ ᐃᓅᓯᖏᓐᓂᑦ ᐊᒻᒪᓗ ᓄᓇᓕᖓᑕ ᑕᐅᑦᑐᖓᓂ ᓴᓇᔭᒥᒍᑦ.

ᐃᓕᖅᑯᓯᖅᓱᖅᑐᑎᒃ ᐊᖑᓇᓱᑉᐸᑦᑐᑦ ᐊᒻᒪᓗ ᐃᖃᓗᒐᓱᑉᐸᑦᑐᑦ “ᐃᓄᒃᓯᐅᑎᓂᒃ ᓂᕿᓂᒃ” (ᐆᒪᔪᐃᑦ ᐊᖑᓇᓱᑦᑕᐅᕙᑦᑐᑦ ᓂᕿᒃᓴᖅᒧᑦ) ᓲᕐᓗ ᑐᑦᑐᐃᑦ, ᕿᓚᓗᒐᐃᑦ ᐊᒻᒪᓗ ᐊᕿᒡᒌᑦ ᓱᓕ ᐱᒻᒪᕆᐅᒋᔭᐅᕗᑦ ᓄᓇᓕᖓᓐᓂ ᐃᓅᓯᕐᒥᓂᑦ, ᐊᒻᒪᓗ ᒥᖅᓱᕈᓐᓇᑦᑎᐊᖅᑐᑦ ᑲᔪᓯᓯᒪᕗᑦ ᐊᒥᕐᓂᑦ ᐊᖑᓇᓱᑦᑎᓂᑦ ᐱᔭᐅᕙᑦᑐᑦ ᑲᒥᒃᓴᓄᑦ ᐊᒻᒪᓗ ᐊᓯᖏᓐᓄᑦ ᐊᓐᓄᕌᒃᓴᓄᑦ.

ᐸᖕᓂᖅᑑᕐᒥᐅᑦ ᐅᐱᒍᓱᑦᑐᒻᒪᕆᐅᒐᓗᐊᖅᑐᑎᒃ ᐊᒻᒪᓗ ᓴᐳᔾᔨᑦᑎᐊᖅᑐᑎᒃ ᐃᓅᓯᖏᓐᓂᑦ ᐃᓕᖅᑯᓯᑐᖃᖅᑎᒍᑦ ᐊᒻᒪᓗ ᐃᓄᑦᑎᑐᑦ ᐅᖃᐅᓯᒃᑯᑦ, ᑲᑎᓯᖃᑦᑕᖅᓯᒪᕗᑦ ᖃᓪᓗᓈᓂᑦ ᕼᐋᓐᓇᓚᒐᓴᓂᑦ ᐊᕐᕌᒍᓂᑦ ᐊᒻᒪᓗ ᖃᓂᒋᔭᖃᑦᑎᐊᖅᑐᑎᒃ ᐊᒥᓱᓂᑦ ᐊᕐᕙᒐᓱᑦᑎᓂᒃ. ᐊᒥᓱᑦ ᐊᕐᕙᒐᓱᑦᑎᓂᑦ ᐃᓚᔮᖃᖅᐳᑦ ᑕᐅᕗᖓᑐᖃᖅ. ᐊᖕᒫᓕᒃ ᑐᑭᓯᒋᐊᕐᕕᒃ ᐊᒻᒪᓗ ᑲᓇᑕᒥ ᒥᕐᖑᐃᖅᓯᕐᕕᒻᒧᑦ ᐊᓪᓚᕝᕕᒃ, ᑕᒪᒃᑮᒃ ᕼᐋᒻᒪᓚᒃᑯᓐᓂ, ᐊᒻᒪᓗ ᕿᑭᖅᑕᓂ ᒥᕐᖑᐃᖅᓯᕐᕕᒃ, ᐱᖓᓱᓂᑦ ᐃᑲᕐᕋᓂᒃ ᐅᒥᐊᒃᑯᑦ ᑎᑭᒐᒃᓴᐅᔪᖅ, ᐃᓗᓕᖃᖅᐳᖅ ᓄᓇᓕᖓᓐᓂ ᐊᕐᕙᒐᓱᐊᖅᐸᑦᑐᕕᓂᕐᓂᕐ ᐊᒻᒪᓗ ᐱᔾᔪᑎᖃᖅᑐᓂᒃ ᓄᓇᓕᖓᓐᓂ ᐃᓄᐃᑦ ᐃᓕᖅᑯᓯᖓᓐᓂᑦ.

ᐋᖕᓕᑲᒃᑯᑦ ᑎᑭᓚᐅᖅᐳᑦ ᐸᖕᓂᖅᑑᒧᑦ 1929-ᒥ ᐊᒻᒪᓗ ᐱᒻᒪᕆᐅᓯᒪᓪᓗᑎᒃ ᐱᕙᓪᓕᐊᑎᑦᑎᓪᓗᑎᒃ ᓄᓇᓕᖓᓐᓂ. ᓴᓐ ᓘᒃ ᐋᓐᓂᐊᕕᒃ ᓴᓇᔭᐅᓚᐅᖅᐳᖅ 1930-ᒥ ᓯᕗᓪᓕᖅᐸᐅᓪᓗᓂ ᐋᓐᓂᐊᕕᓕᐊᖑᓪᓗᓂ ᕿᑭᖅᑖᓗᒻᒥ. ᐋᓐᓂᐊᕕᒃ ᒪᑐᔭᐅᓯᒪᓕᖅᑎᓪᓗᒍ ᐃᓪᓗ ᐊᑐᖅᑕᐅᓚᐅᖅᐳᖅ ᐊᔪᕆᖅᓱᐃᔨᒃᓴᐅᓂᕐᒧᑦ ᐃᓕᓐᓂᐊᕐᕕᐅᓕᖅᑐᓂ, ᐋᖕᓕᑲᒃᑯᑦ ᑐᒃᓯᐊᕐᕕᖓᓐᓄᑦ ᐊᔭᐅᖅᓱᐃᓪᓗᑎᒃ ᐃᓄᓐᓂᒃ ᐊᔪᕆᖅᓱᐃᔨᕈᖁᔨᓪᓗᑎᒃ. ᒫᓐᓇᓕ ᐊᒥᓲᓂᖅᓴᐃᑦ ᐃᓄᐃᑦ ᑐᒃᓯᐊᕐᕕᓕᕆᔩᑦ ᐋᖕᓕᑲᒃᑯᓐᓄᑦ ᐸᖕᓂᖅᑑᒥ ᐊᔪᕆᖅᓱᐃᔨᐅᓂᕐᒧᑦ ᐃᓕᓐᓂᐊᕐᕕᒻᒥ ᐃᓕᓐᓂᐊᕇᕐᓂᑰᕗᑦ. ᒪᕐᕉᓐᓂᒃ ᑐᒃᓯᐊᕐᕕᒃᑕᖃᖅᐳᖅ ᒫᓐᓇ, ᓴᐃᓐ ᓘᒃ ᐋᖕᓕᑲᒃᑯᑦ ᐊᒻᒪᓗ ᐱᓐᑎᑳᔅᑐᒃᑯᑦ (ᐅᖄᓚᐅᑎᖃᙱᑦᑐᑦ). ᐃᒃᓯᕋᕐᔪᐊᕐᒥ ᑎᑭᑦᑐᖃᓚᐅᓲᖑᓄᖅ ᐃᓛᓐᓂᒃᑯᑦ ᑭᓯᐊᓂ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖃᙱᓚᑦ.

ᑕᐃᒫᑦᑕᐅᖅ ᐊᒥᓲᓂᖅᓴᐃᑦ ᓄᓇᓖᑦ ᕿᑭᖅᑕᓂ ᐃᓄᑦᑎᑐᑦ ᐅᖃᐅᓯᖅ ᓴᙱᓂᖃᑦᑎᐊᖅᐳᖅ ᐸᖕᓂᖅᑑᒥ. ᑐᓵᓇᖅᐳᖅ ᓯᓚᒥᑐᐃᓐᓇᖅ ᖃᐅᑕᒫᑦ ᐃᓄᑦᑎᑑᖅᑐᓂᑦ. ᒪᓕᑦᑐᒋᑦ 2011-ᒥ ᑭᓪᓕᓯᓂᐊᖅᑕᐅᓚᐅᖅᑐᑦ, 93-ᐳᓴᖏᑦ ᐸᖕᓂᖅᑑᒥᐅᑦ ᐃᓄᑦᑎᑑᓲᖑᓂᕋᖅᐳᑦ ᐅᖃᐅᓯᓪᓚᑦᑖᕆᓪᓗᓂᐅᒃ, ᐊᒻᒪᓗ 4-ᐳᓴᐃᓐᓇᖏᑦ ᖃᓪᓗᓈᑎᑑᖏᓐᓇᖅᑐᑎᒃ. ᐱᖓᓱᑲᓴᐃᑦ ᑕᓪᓕᒪᐅᑎᓪᓗᒋᑦ ᐸᖕᓂᖅᑑᒥᐅᑦ ᖃᓪᓗᓇᐅᔭᓲᖑᕗᑦ, 26-ᐳᓴᖏᑦ ᖃᓪᓗᓇᐅᔭᖃᑦᑕᖅᑐᑎᒃ ᐃᓄᐃᑦ ᐊᖏᕐᕋᒥ, ᐊᒻᒪᓗ ᐅᐃᕖᑎᑑᓲᖅᑕᖃᐅᖅᑐᓂ. ᑭᓯᐊᓂᓕ 27-ᐳᓴᖏᑦ ᓄᓇᓕᒻᒥᐅᑦ ᐃᓄᑦᑎᑐᐃᓐᓇᖅ ᐅᖃᓪᓚᒍᓐᓇᖅᐳᑦ, ᑎᑭᒋᐅᖅᑐᑦ ᐅᕝᕙᓘᓐᓃᑦ ᐳᓛᕆᐊᖅᑐᑦ ᐃᓛᓐᓂᒃᑯᑦ ᓇᓂᓯᒋᐊᖃᓲᖑᕗᑦ ᖃᓪᓗᓇᐅᔭᕈᓐᓇᖅᑐᒥ ᑐᓵᔨᒃᓴᒥᒃ. ᐃᓄᑦᑎᑐᑦ ᐅᖃᐅᓯᖅ ᐊᑐᖅᑕᐅᓂᖅᓴᐅᕗᖅ ᐊᖏᕐᕋᒥ 88-ᐳᓴᖏᑦ, ᐊᒻᒪᓗ ᐊᒥᓱᑦ ᖃᓪᓗᓇᐅᔭᕈᓐᓇᖅᑐᑦ ᐃᓚᔮᕇᑦ ᐃᓄᑦᑎᑑᖏᓐᓇᖃᑦᑕᖅᐳᑦ ᐊᖏᕐᕋᒥ. ᑭᒃᑯᓕᒫᖅᑎᑦᑎᒐᐃᒻᒪᑕ ᑲᑎᒪᑎᑦᑎᓪᓗᑎᒃ ᖃᓪᓗᓇᐅᔭᖅᐸᑉᐳᑦ ᐃᓄᑦᑎᑐᓪᓗ, ᑭᓯᐊᓂ ᐊᒥᓱᑦ ᐅᖃᓪᓚᐃᓐᓇᖃᑦᑕᖅᐳᑦ ᐃᓄᑦᑎᑑᖏᓐᓇᖅᑐᑎᒃ, ᐊᒻᒪᓗ ᐃᓄᑦᑎᑑᖅᑐᖃᖅᑎᓪᓗᒍ ᖃᓪᓗᓈᑎᑐᑦ ᑐᓵᔨᖃᔅᓴᐃᓐᓇᖅᐸᙱᓚᑦ ᖃᓪᓗᓈᖅᑕᖃᕋᓗᐊᖅᑎᓪᓗᒍ. ᐃᓄᑦᑎᑐᑦ ᐅᖃᐅᓰᑦ ᐊᔾᔨᒌᙱᑦᑑᑕᐅᕗᑦ ᓄᓇᕗᓕᒫᒥ, ᐃᓄᑦᑎᑑᖃᑦᑕᕈᕕᑦ ᐊᓯᐊᓂᑦ ᓄᓇᓕᐅᔪᒥᑦ ᐃᓕᒍᓐᓇᖅᐳᑎᑦ ᐊᓯᖏᓐᓂᑦ ᐅᖃᐅᓯᕐᓂᑦ ᐃᓄᑦᑎᑐᑦ ᐊᒻᒪᓗ ᓄᓇᓕᒻᒥᐅᓄᑦ ᑕᒻᒪᕐᓂᕋᖅᑕᐅᓪᓗᑎᒃ ᐅᖃᐅᔾᔭᐅᒋᐊᖃᑦᑕᕐᓗᑎᑦ. ᐃᓄᑦᑎᑐᑦ ᐅᖃᐅᓯᖅ (ᐃᓄᑦᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᒻᒪᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᓯᖅᑕᐅᔪᓐᓇᖅᑐᑎᒃ ᐃᓕᓴᕆᔭᐅᓯᒪᔪᒥᑦ ᐅᖃᐅᓯᕐᒥᒃ ᐊᑐᕐᓗᑎᑦ ᐊᑐᕈᒪᔭᖕᓂᑦ.

ᐸᖕᓂᖅᑑᖅ ᐱᕈᖅᐸᓪᓕᐊᕗᖅ ᒪᒃᑯᑦᑑᑕᐅᓂᖅᓴᐅᓪᓗᑎᒃ ᐃᓄᖏᑦ. 2011-ᒥ ᑭᓪᓕᓯᓂᐊᖅᑕᐅᓚᐅᖅᑐᓂᑦ ᓈᓴᐃᓚᐅᖅᐳᑦ 175 ᐃᓕᓐᓂᐊᕆᐊᕈᓐᓇᖅᙱᑦᑐᑦ ᓱᕈᓰᑦ ᐊᒻᒪᓗ 420 ᐃᓕᓐᓂᐊᖅᑏᑦ ᓱᕈᓰᑦ, 41-ᐳᓴᒋᓪᓗᒋᑦ ᐃᓄᖏᑦ ᐅᑭᐅᓖᑦ 18 ᑐᖔᓂ. ᐅᑭᐅᓖᑦ ᐊᑭᓐᓂᖓᓃᑉᐳᑦ ᐃᓄᒋᐊᓐᓂᖅᐸᐅᓪᓗᑎᒃ 23, ᐊᒻᒪᓗ 5-ᐳᓴᐅᓪᓗᑎᒃ 65 ᐅᑭᐅᓖᑦ ᐅᖓᑖᓂ. ᐊᖕᒻᒫᓕᒃ ᑐᑭᓯᒋᐊᕐᕕ ᑲᑎᕝᕕᐅᖃᑦᑕᖅᐳᖅ ᐃᓐᓇᑐᖃᕐᓄᑦ ᓄᓇᖓᓐᓂᒥᐅᓄᑦ.

ᑮᓇᐅᔾᔭᒃᓴᕈᑕᐅᔪᑦ: 

ᐸᖕᓂᖅᑑᖅ ᐃᓚᒋᔭᐅᖃᑕᐅᕗᖅ ᐊᒥᓲᙱᑦᑐᓂᑦ ᓄᓇᓕᓐᓂ ᓄᓇᕗᒥ ᐊᔾᔨᒌᙱᑦᑑᑎᐅᓪᓗᑎᒃ ᒪᑭᒪᒐᓱᐊᕈᑏᑦ. ᐊᑯᓂᑲᓪᓚᐅᓕᖅᑐᖅ ᐳᓚᕋᖅᑐᓕᕆᓂᖅ ᐱᒻᒪᕆᐅᓯᒪᕗᖅ ᓄᓇᓕᖓᓐᓂ ᑮᓇᐅᔭᓕᐅᕈᑎᒋᔭᐅᖃᑦᑕᖅᑐᓂ. ᐸᖕᓂᖅᑑᖅ ᐊᖅᑯᑎᒋᔭᐅᕗᖅ ᓄᓇᕗᒥ ᐊᒻᒪᓗ ᑲᓇᑕᒥ ᒥᕐᖑᐃᖅᓯᕐᕕᓄᑦ, ᐊᒻᒪᓗ ᑲᔾᔮᓇᖅᑐᒻᒪᕆᐅᓪᓗᓂ ᐊᒡᒐᒻᒧᑦ ᓴᓇᓯᒪᔪᕈᓘᔭᖃᕐᕕᐅᓪᓗᓂ ᐳᓚᕋᖅᑎᓄᑦ ᐅᐸᑦᑕᐅᓲᓂᑦ. ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᖅᓯᕐᕕᒃ ᐋᖅᑭᑦᑕᓚᐅᖅᐳᖅ 1970-ᖏᓐᓂ ᐊᒻᒪᓗ ᒥᕐᖑᐃᖅᓯᕐᕕᓪᓚᑦᑖᕈᖅᑎᑕᐅᓪᓗᓂ ᐋᖅᑮᓚᐅᖅᑎᓪᓗᖏᑦ ᓄᓇᕗᑦ ᓄᓇᑖᕈᑕᐅᓂᖓᓄᑦ ᐊᖏᕈᑎᒥᑦ. ᑲᓇᑕᒥ ᒥᕐᖑᐃᖅᓯᕐᕕᒃ ᐊᓪᓚᕝᕕᒻᒪᕆᓕᐅᓚᐅᖅᐳᑦ ᐸᖕᓂᖅᑑᒥ ᒥᕐᖑᕐᐃᖅᓯᕐᕕᔾᔪᐊᕐᒧᑦ, ᐊᓪᓚᕝᕕᖃᖅᑐᑎᒃ ᖁᒻᒧᐊᑦᑎᑕᐅᓯᒪᔪᒃᑰᖅᑐᓂᒃ ᕿᑭᖅᑕᕐᔪᐊᕐᒥ. ᑲᓇᑕᒥ ᒥᕐᖑᐃᖅᓯᕐᕕᒃᑯᑦ ᓴᓇᓚᐅᕆᕗᑦ ᐳᓚᕋᖅᑐᓕᕆᕕᒻᒥ ᒥᕐᖑᐃᖅᓯᕐᕕᒻᒧᑦ ᐸᓐᓂᖅᑑᒥ 1992-ᖑᑎᓪᓗᒍ. ᕿᑭᖅᑕᓐ ᓄᓇᕗᒻᒥ ᒥᕐᖑᐃᖅᓯᕐᕕᒻᒥ ᐸᐸᑦᑎᕗᑦ ᐊᒻᒪᓗ ᑐᑭᓯᒋᐊᕐᕕᒃᓴᐅᕗᖅ ᖃᓄᐃᖃᑦᑕᖅᓯᒪᓂᖏᓐᓂᑦ ᐊᕐᕙᒐᓱᓐᓇᐅᑎᓪᓗᒍ, ᐊᖕᒫᓕᒃ ᑐᑭᓯᒋᐊᕐᕕᖓ ᐊᓪᓚᕝᕕᓪᓗᐊᑕᕆᔭᐅᓪᓗᓂ ᒥᕐᖑᐃᖅᓯᕐᕕᒻᒧ ᓄᓇᓕᖓᓐᓂ. ᓄᓇᓕᒻᒥᐅᑦ ᐊᐅᓪᓚᐅᔾᔨᔩᑦ ᐳᓚᕋᖅᑎᓂᑦ ᑕᒪᒃᑮᓐᓅᕈᔾᔨᔪᓐᓇᖅᐳᑦ ᒥᕐᖑᐃᖅᓯᕐᕖᓐᓄᒃ, ᐅᒥᐊᒃᑯᑦ ᐅᐱᕐᖔᖑᑎᓪᓗᒍ ᐊᒻᒪᓗ ᓯᑭᑑᒃᑯᑦ ᐅᑭᐅᖑᑎᓪᓗᒍ. ᐸᖕᓂᖅᑑᖅ ᐅᐸᑦᑕᐅᒐᔪᒃᑭᕗᖅ ᖃᖅᑲᓯᐅᖅᑎᓄᑦ. ᓯᓚᕐᔪᐊᕐᒥ ᐊᑭᑦᑎᓂᑰᓪᓗᓂ ᐊᑦᑐᓈᒃᑯᑦ ᖃᖅᑲᓯᐅᖅᑎ ᐊᐅᔪᐃᑦᑑᑉ ᖃᐃᖅᓱᐊᓗᐊᓂ.

ᐸᖕᓂᖅᑑᕐᒥ ᓯᐊᕐᒪᖅᑎᕐᕕᐅᓯᒪᒋᕗᖅ ᐊᓪᓚᕝᕕᓐᓂ ᓄᓇᕗᑦ ᒐᕙᒪᒃᑯᓐᓄᑦ, ᐃᓚᓕᐅᑎᓪᓗᒍ ᓄᓇᕗᒻᒥ ᑭᓪᓕᓯᓂᐊᖅᑎᒃᑯᑦ, ᓄᓇᓕᓐᓂ ᒪᑭᒪᒐᓱᐊᕐᓂᕐᒧᑦ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᑦ ᒪᑭᒪᒐᓱᐊᕐᓂᕐᒧᑦ ᐱᕙᓪᓕᐊᑎᑦᑎᔨᒃᑯᑦ ᐊᒻᒪᓗ ᐃᖏᕐᕋᔪᓕᕆᔨᒃᑯᑦ, ᐃᖅᑲᓇᐃᔭᖅᑐᓕᕆᕕᒃ, ᐃᓕᓐᓂᐊᓕᕋᑖᓄᑦ ᐊᒻᒪᓗ ᐃᓕᓐᓂᐊᕐᕕᓐᓄᑦ ᐱᔨᑦᓯᕋᕐᕖᑦ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕝᕕᖓᒍᑦ. ᑕᑯᓐᓇᖅᑐᒍ ᐃᒪᕐᒥᐅᑕᓕᕆᖃᑦᑕᕐᓂᖅ ᓄᓇᓕᖓᓐᓂ ᐱᕙᓪᓕᐊᑎᑦᑎᓯᒪᕗᑦ ᐃᖃᓗᒐᓱᓐᓂᕐᒥᑦ ᐊᒻᒪᓗ ᖃᓕᕋᓕᒐᓱᓐᓂᕐᒥᑦ, ᐊᒻᒪᓗ ᒫᓐᓇᓕᓴᐅᓂᖅᓴᖅ ᐅᒥᐊᒃᑯᕕᓕᐅᖅᓯᒪᓪᓗᑎᒃ ᐊᑐᖅᑕᐅᔪᓐᓇᖁᓪᓗᒍ ᐊᖏᓂᖅᓴᓄᑦ ᐅᒥᐊᕐᓄᑦ ᐊᒻᒪᓗ ᓂᐅᕋᐃᕕᐅᔪᓐᓇᖁᓪᓗᒍ ᐃᖃᓗᓐᓂ ᐃᖃᓗᓕᕆᕕᒻᒧᑦ. ᐸᖕᓂᖅᑑᖅ ᐃᓚᒋᔭᐅᖃᑕᐅᕗᖅ ᐅᑭᐅᖅᑕᖅᑑᑉ ᑲᓇᓐᓇᖓᓂ ᓴᓇᙳᐊᒐᖃᕐᕕᐅᓪᓗᐊᑕᖅᑐᓂ, ᐃᖅᑲᓇᐃᔮᓂᑦ ᐊᒥᓱᓂᒃ ᓴᖅᑮᓪᓗᓂ ᑎᑎᖅᑐᒐᖅᑎᓄᑦ/ᓴᓇᓐᖑᐊᖅᑎᓄᑦ/ᒥᖅᓱᖅᑎᓄᑦ. ᐃᓚᓕᐅᑎᓪᓗᒍ ᓄᓇᓕᖓᓐᓂ ᐱᔨᑦᓯᕈᑕᐅᔪᓄᑦ, ᐊᒥᓱᑦ ᓄᓇᓕᒻᒥᐅᑦ ᐊᖑᓇᓱᖃᑦᑕᕆᕗᑦ ᐊᒻᒪᓗ ᐃᖃᓗᒐᓱᖃᑦᑕᖅᑐᑎᒃ ᐃᓚᓕᐅᑎᓪᓗᒍ ᓄᓇᖓᓐᓂ ᓂᕿᒃᓴᖃᖅᑎᑦᑎᔾᔪᑕᐅᓪᓗᓂ.

ᐊᒥᓱᑲᓪᓚᐃᑦ ᐸᖕᓂᖅᑑᕐᒥ ᒪᑭᒪᒐᓱᐊᕈᑏᑦ ᑕᑯᓐᓇᖅᑕᐅᔪᓐᓇᖅᐳᑦ ᕼᐋᒻᒪᓚᒃᑯᑎᒍᑦ ᐊᐅᓚᔪᓂᒃ ᑕᑯᒃᓴᐅᑎᑕᖓᒍᑦ ᖃᕋᓴᐅᔭᒃᑯᑦ, ᓄᓇᓕᖓᓐᓂ ᐱᔨᑦᓯᕈᑎᐅᔪᓂᑦ (ᑕᑯᒃᓴᐅᔪᖅ ᐃᒻᒪᑦᑕᐅᔪᖅ ᐃᓪᓗ) ᑕᑯᒃᓴᐅᔪᓪᓗ ᐃᖃᓗᓕᕆᕕᒻᒥ ᐃᖃᓗᓕᕆᔪᑦ, ᐃᓗᐊᓂ ᓄᕕᖅᓴᕐᕕᐅᑉ, ᐊᒻᒪᓗ ᖃᕋᓴᐅᔭᒃᑯᑦ ᑕᑯᒃᓴᐅᑎᑦᑎᔪᑦ ᐊᖕᒫᓕᒃ ᑐᑭᓯᒋᐊᕐᕕᒻᒥ.

ᑕᐃᒫᑦᑕᐅᖅ ᐊᓯᖏᑎᑐᑦ ᐊᒥᓱᓂᑦ ᓄᓇᓕᓐᓂ ᓄᓇᕗᒻᒥ ᑮᓇᐅᔭᒃᑯᕕᑦᑕᖃᙱᓚᖅ ᐸᓐᓂᖅᑑᒥ ᐊᒻᒪᓗ ᑮᓇᐅᔭᓪᓚᑦᑖᑦ ᐊᒥᒐᖅᓯᖃᑦᑕᖅᑐᑎᒃ. ᑮᓇᐅᔭᓂᒃ ᐲᖅᓯᕖᑦ ᖃᕋᓴᐅᔭᒃᑰᖅᑐᑦ ᐊᑐᐃᓐᓇᐅᓪᓗᑎᒃ ᓂᐅᕕᕐᕕᒻᒥ ᐊᒻᒪᓗ ᑯᐊᐸᒃᑯᓐᓂ, ᑮᓇᐅᔭᓂᒃ ᐃᓱᓕᕝᕕᖃᖅᑐᑎᒃ. ᖃᕋᓴᐅᔭᒃᑰᖅᑐᒃᑯᑦ ᐊᐅᑦᑕᔫᒧᑦ ᐊᑭᓖᕕᒃᓴᐅᕗᑦ ᐊᒻᒪᓗ ᐊᑭᓕᒃᓴᓂᐅᑏᑦ ᐊᐅᑦᑕᔫᑦ ᐊᑐᕈᓐᓇᕆᓪᓗᑎᒃ ᓂᐅᕕᕐᕕᓕᒫᐸᓗᖏᓐᓂᑦ. ᐊᑐᖁᔭᐅᓂᖅᓴᐅᕗᖅ ᑎᑭᕋᑖᑦ ᓄᓇᖓᓐᓄᑦ ᐋᖅᑮᑉᐸᑕ ᖃᕋᓴᐅᔭᒃᑯᑦ ᑮᓇᐅᔭᓕᕆᔾᔪᑎᒥᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᒃᓴᓂᒃ ᐊᑭᓖᔾᔪᑎᓂᒃ, ᐱᔾᔪᑎᒋᓗᐊᖅᑐᒍ ᑎᑎᖅᑲᓂᐊᕐᕕᒃᑯᑦ ᑭᖑᕙᕈᑎᖃᑦᑕᕐᒪᑕ ᓯᓚᕈᔫᓂᖓᓄᑦ ᑎᑭᑕᐅᙱᒐᐃᒻᒪᑕ.

ᐆᒪᔪᐃᑦ: 

ᓯᓈᖓᓂᒥᐅᑕᐅᓪᓗᑎᒃ ᐸᓐᓂᖅᑑᑉ ᐃᒪᖓᑕ ᑲᖏᖅᑐᐊᓗᒻᒨᖓᓪᓗᓂ, ᐸᖕᓂᖅᑑᖅ ᑲᖏᖅᑐᐊᓗᒻᒨᖓᓪᓗᓂ ᐆᒪᔪᖃᑦᑎᐊᖅᐳᖅ ᐃᒪᕐᒥᐅᑕᓂᑦ. ᓄᓇᓕᖓᑕ ᖃᓂᒋᔮᓂ ᑕᐃᒃᓱᒪᓂᑐᖃᖅ ᐊᕐᕙᒐᓱᕝᕕᒻᒪᕆᐅᓚᐅᖅᐳᖅ ᐊᒻᒪᓗ ᐊᒥᓱᓂᑦ ᐊᕐᕙᒐᓱᑦᑎᓄᑦ ᐅᐱᕐᖏᕕᑦᑕᖃᐅᕐᓂᖅᑐᓂ. ᐊᒥᓱᓂᑦ ᐃᒪᕐᒥᐅᑕᖅᑕᖃᖅᐳᖅ ᐊᕐᕕᓂᑦ, ᕿᓚᓗᒐᕐᓂᑦ, ᑑᒑᓕᓐᓂᑦ (ᐊᓪᓚᙳᐊᑦ), ᐸᒥᐅᓕᒐᐃᑦ ᐊᒻᒪᓗ ᐋᕐᓗᐃᑦ, ᓱᓕ ᐱᑕᖃᓲᖑᕗᑦ, ᐊᒻᒪᓗ ᐊᐃᕕᖃᓲᖑᓪᓗᓂ, ᐊᔾᔨᒌᙱᑦᑑᑎᓂᑦ ᓇᑦᑎᕐᓂᑦ ᐊᒻᒪᓗ ᓲᖃᐃᒻᒪ ᓇᓄᕐᓂᑦ. ᐃᖃᓗᒐᓱᓐᓂᖅ ᓄᓇᓕᖓᓐᓂ ᐱᒻᒪᕆᐅᒋᔭᐅᕗᖅ ᒪᑭᒪᒐᓱᐊᕈᑕᐅᓪᓗᓂ ᐊᒻᒪᓗ ᑮᓇᐅᔭᓕᐅᕋᓱᐊᖅᑐᑎᒃ ᐃᖃᓗᒐᓱᑉᐸᑉᐳᑦ, ᖃᓕᒐᕋᓕᒐᓱᑦᑐᑎᒃ, ᓇᑖᕐᓇᑦᑕᖅᑐᑎᒃ ᐊᒻᒪᓗ ᑭᖑᑉᐸᑦᑕᖅᑐᑎᒃ. ᓄᓇᓕᖓᓐᓂ ᑐᒃᑐᑕᖃᖅᐸᙱᓚᖅ ᐊᒻᒪᓗ ᐊᖑᓇᓱᑦᑎᖏᑦ ᐊᐅᓪᓚᕆᐊᖃᖃᑦᑕᖅᐳᑦ ᐊᑭᐊᓄᑦ ᐅᕝᕙᓘᓐᓃᑦ ᓄᓇᖅᐸᓯᒻᒧᑦ ᑐᒃᑐᓯᐅᕆᐊᖅᑐᑎᒃ ᐊᒥᓲᙱᑦᑐᓂᒃ. ᐳᖅᑐᓂᖏᓐᓄᑦ ᐃᓐᓈᕈᐃᑦ ᐊᒻᒪᓗ ᑲᖏᖅᑐᒃᑭᐅᓪᓗᓂ ᑎᒻᒥᐊᖃᓲᓂᑦ ᓲᕐᓗ ᑭᒡᒐᕕᐊᕐᔪᓐᓂᑦ, ᐊᕿᒡᒋᓂᑦ, ᓇᐅᔭᕐᓂᑦ ᐊᒻᒪᓗ ᑎᑭᓲᓂᑦ ᖁᐸᓄᐊᓂᑦ. ᒥᑭᔫᑕᓂᑦ ᐆᒪᔪᖃᖅᑐᓂ ᓲᕐᓗᒃ ᐊᕕᓐᖓᐃᑦ, ᑎᕆᒐᓂᐊᑦ ᐊᒻᒪᓗ ᐊᒪᕈᐃᑦ ᑕᒪᔾᔭᐅᒋᕗᑦ. ᓇᓄᖅᑕᖃᓚᐅᓲᖑᕗᖅ ᓄᓇᓕᖓᑕ ᖃᓂᒋᔮᓂ, ᑖᓐᓇ ᑕᑯᔭᒃᓴᐅᒻᒥᔪᖅ ᐊᔾᔨᓕᐅᖅᑕᕕᓂᖅ ᑎᓯᐱᕆ 2012-ᒥ.

ᐅᖃᓕᒫᑲᓐᓂᕐᓃᑦ : 
  • ᕕᐊᓇᑦ, ᔮᓐ & ᓲᓴᓐ ᕋᐅᓕ, ᑎᑎᖅᑕᐅᓯᒪᔪᓂᑦ ᐋᖅᑭᒃᓱᐃᔩᑦ. ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ. ᒪᓐᑐᕆᐊᓕ: ᒥᒋᐅᓪ−ᑯᐃᑉ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᐅᓯᒪᔪᑦ. 2004.
  • ᕗᐊᔾ, ᕗᕌᓐᔾ, ᑭᕙᓪᓕᕐᒥᐅᑦ ᐃᓄᐃᑦ. ᓕᓐᑲᓐ: ᓂᕗᕌᔅᑲ ᓯᓚᑦᑐᓴᕐᕕᕐᔪᐊᖓᑕ ᑎᑎᕋᕐᕕᖓ, 1964.
  • ᑕᓪᑕᓐ, ᐋᓐᑕᓂ. ᐅᑭᐅᖅᑕᖅᑐᒥ ᓄᓇᑐᐃᓐᓇᕐᒦᖃᑦᑕᖅᑐᖅ: ᐃᓅᓯᖓ ᔨ. ᑎᐅᕕ ᓲᐳᕐ. ᑐᕌᓐᑐ: ᑕᓐᑐᓐ ᑎᑎᕋᖅᑎᖏᑦ, 2010.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᖃᓄᐃᓕᖓᓂᑦ, ᐋᖅᑭᓱᖅᓯᒪᓂᖏᑦ ᐊᒻᒪᓗ ᐃᓅᖃᑎᒌᑦᑐᑦ ᐅᑭᐅᖅᑕᖅᒥᑐ. ᒪᓐᑐᕆᐊᓪ: ᒥᒋᐅᓪ−ᑯᐃᑉ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᐅᓯᒪᔪᑦ. 2010.
  • ᐄᕗᕐ, ᑐᕈᑎ ᕼᐊᕐᓕ: ᐊᕐᕕᓂᐊᖅᑏᑦ ᐅᑭᐅᖅᑕᖅᑐᒦᑎᓪᓗᒋᑦ. ᒪᓐᑐᕆᐊᓪ & ᑭᖕᔅᑕᓐ: ᒥᒋᐅᓪ−ᑯᐃᑉ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᐅᓯᒪᔪᑦ. 1989.
  • ᕼᐊᓐᑭᓐᔅ, ᔨᐅᕈᓪ: ᓯᕿᓐᓂᓕᖅᐸᓪᓕᐊᔪᖅ ᐸᖕᓂᖅᑑᖅ: ᐋᑐ ᓴᐃᐳᑉ ᐅᓂᒃᑳᖏᑦ, ᓘᒃᑖᖅ. ᑳᓪᒍᕆ: ᐅᑭᐅᖅᑕᖅᑐᒥ ᖃᐅᔨᓴᕐᕕᒃ ᑲᓇᑕᒥ ᒥᐊᓕᒐᕐᓂᓗ, ᑲᓪᒍᕆᑉ ᓯᓚᑦᑐᓴᕐᕕᕐᔪᐊᖓ, 2000.
  • ᐊᐃᓴᓐᒪᓐ, ᕕᐊᑎ ᑯᐸᐃᔭᓯ. ᐃᕙᓗᐃᑦ ᐊᓐᓇᐅᒪᔾᔪᑎᕗᑦ: ᐃᓄᐃᑦ ᐊᓐᓄᕌᖏᑦ ᐃᖅᑲᐅᒪᒋᔭᐅᖏᓐᓇᖅᑐᑦ. ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᖓᓂ ᑎᑎᕋᖅᑕᐅᓯᒪᔪᑦ, 1997.
  • ᒪᒃᑖᓄᓪᑦ, ᔮᓐ. ᐅᑭᐅᖅᑕᖅᑐᑉ ᓯᓚᖓ: ᐃᓄᐃᑦ ᐅᓪᓗᕆᐊᓕᕆᔾᔪᓯᖏᑦ, ᐅᓪᓗᕆᐊᑦ ᑭᓲᙳᐊᕐᓂᖏᑦ ᐊᒻᒪᓗ ᐅᓂᒃᑲᐅᓯᑐᖃᐃᑦ. ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑐᓕᕆᔨᒃᑯᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪᒥ ᑕᑯᔭᒐᖃᕐᕕᒃ, 1998.
  • ᒪᒡᒌ, ᕌᕗᑦ. ᑭᖑᓪᓕᖅᐹᖅ ᑕᐅᑐᙳᐊᖅᑕᐅᔪᓐᓇᖅᑐᖅ ᓄᓇ: ᐃᓄᓐᓄᑦ ᐊᑐᖅᑕᐅᖃᑦᑕᖅᑐᒥᓂᖅ ᐅᑭᐅᖅᑕᖅᑐᖓ ᓄᓇᕐᔪᐊᕐᒥ. ᑐᕌᓐᑐ: ᑮ ᐳᐊᕐᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᒃ ᐃᓄᐃᑦ ᐊᑐᖃᑦᑕᕐᓂᑯᒥᓂᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨ−ᕼᐃᕗᑦ ᔪᒪᐃᓐ: ᐃᓄᐃᑦ: ᑕᑯᑲᐃᓐᓇᕐᓗᒋᑦ ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᕐᓂᑯᒥᓂᖏᑦ. ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᒃ ᐃᓄᐃᑦ ᐊᑐᖃᑦᑕᕐᓂᑯᒥᓂᖏᓐᓂᑦ, 1995.
  • ᐸᐅᒃᑑᑏᑦ ᐃᓄᐃᑦ ᐊᕐᓇᐃᑦ ᑲᓇᑕᒥ. ᐃᓄᑦᑎᒍᑦ: ᑐᑭᓯᒋᐊᕈᑎᑦ ᐃᓄᐃᑦ ᐃᓕᖅᑯᓯᖓᓂᑦ, ᐋᖅᑭᒋᐊᖅᑕᐅᓯᒪᔪᑦ, ᐋᑐᕚ: ᐸᐅᒃᑑᑏᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, 2006. (ᐊᑐᐃᓐᓇᐅᒪᒻᒥᔪᑦ ᖃᕋᓴᐅᔭᒃᑯᑦ ᓄᓇᕗᑦ ᒐᕙᒪᖏᑕ ᐃᑭᐊᖅᑭᕕᖓᓂ) http://www.orientation.hr.gov.nu.ca/i18n/english/pdf/The%20Inuit%20Way.pdf