You are here

ᑭᒻᒥᕈᑦ

ᑭᒻᒥᕈᑦ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᑭᒻᒥᕈᑦ (ᑕᐃᔭᐅᕙᓚᐅᖅᓯᒪᔪᖅ ᓚᐃᒃ ᕼᐊᕐᐳᕐ ᖃᓪᓗᓈᑎᑐᑦ) ᓇᔪᖅᑕᐅᖃᑦᑕᖅᑐᒥᓂᐅᓂᖓᓂᒃ ᐃᑦᑕᕐᓂᓴᖃᐅᕈᓘᔭᖅᑐᖅ ᑐᓃᑦ ᓯᕗᕚᖏᓐᓄᑦ, ᑐᓂᕐᓄᑦ, ᐃᓄᐃᓪᓗ ᓯᕗᕚᖏᓐᓄᑦ. ᑕᓯᐅᔭᕐᔪᐊᕐᒦᓐᓂᖓᓄᑦ, ᑕᓯᐅᔭᕐᔪᐊᕐᒨᕐᕕᒃᓴᐅᓪᓗᓂ, ᓄᓇᓕᒻᒥᐅᑦ ᖃᓪᓗᓈᓂᑦ ᖃᐅᔨᔪᒥᓂᐅᓚᐅᖅᓯᒪᔪᑦ 1600−ᖏᓐᓂ, ᖃᐅᔨᓴᖅᑏᑦ ᑕᒪᐅᓈᖅᑐᒥᓂᐅᓪᓗᑎᑦ ᐊᒻᒪᓗ ᕼᐊᑦᓴᓐᔅ ᕙᐃ ᑲᒻᐸᓂᖏᑦ ᑕᐅᖅᓰᖃᑦᑕᕆᐊᓯᔪᒥᓂᐅᓪᓗᑎᑦ ᐊᑎᑖᖅᑐᒥᓂᐅᓪᓗᓂᓗ ᑕᓯᐅᔭᕐᔪᐊᖅ ᖃᓪᓗᓈᑎᑐᑦ ᕼᐊᑦᓴᓐᔅ ᕙᐃ. ᓄᓇᓕᖓ ᑕᒫᓃᑎᑕᒥᓂᐅᕗᖅ, ᑕᕆᐅᑉ ᐊᑭᐊᓃᙶᖅᑐᑦ ᐊᒻᒪᓗ ᒥᐊᓕᒐᐃᑦ ᐊᕐᕕᓂᐊᕐᕕᐅᖃᑦᑕᖅᑐᒥᓂᐅᕗᖅ 1800−ᖏᓐᓂ. ᐋᓐᓕᑲᓐ ᑐᒃᓯᐊᕐᕕᖓᓗ ᐋᖅᑭᒃᑕᐅᓚᐅᖅᓯᒪᕗᖅ 1909−ᖑᑎᓪᓗᒍ, ᑭᖑᓂᐊᒍᑦ ᕼᐊᑦᓴᓐᔅ ᕙᐃ ᑲᒻᐸᓂᖓ ᓂᐅᕕᕐᕕᑖᖅᑐᓂ 1911-ᒥ. ᓚᐃᒃ ᕼᐊᕐᐳᕐ ᐊᒥᓱᓄᑦ ᐅᑭᐅᓄᑦ ᐊᐅᓚᑦᑎᕕᐅᕙᓚᐅᖅᓯᒪᕗᖅ ᑐᒃᓯᐊᕐᕕᓕᕆᕙᑦᑐᓂᑦ ᐊᒻᒪᓗ ᕼᐊᑦᓴᓐᔅ ᕙᐃ ᑲᒻᐸᓂᖏᑕ ᐃᖅᑲᓇᐃᔭᖅᑎᖏᓐᓄᑦ ᐊᐅᓪᓚᖃᑦᑕᑎᓪᓗᒋᑦ ᐊᓯᖏᓐᓄᑦ ᓄᓇᓕᐅᔪᓄᑦ ᓂᒋᐊᓂ ᕿᑭᖅᑖᓘᑉ. ᑐᕕ ᓲᐳᕐ, ᑲᓇᑕᒥ ᐆᒪᔪᓕᕆᔨ, ᓴᓇᙳᐊᖅᑎ ᐊᒻᒪᓗ ᐅᑭᐅᖅᑕᖅᑐᒥ ᖃᐅᔨᓴᖅᑎᐅᔪᖅ, ᓄᓇᓕᒻᒥᐅᑕᐅᓚᐅᖅᓯᒪᔪᖅ 1930−ᖏᓐᓂ ᖃᐅᔨᓴᖅᑐᓂ ᑕᒫᓂ ᐆᒪᔪᖏᓐᓂᑦ. ᐃᒡᓗᖓ ᓱᓕ ᓇᑉᐸᖓᔪᖅ ᐅᓪᓗᒥ, ᐊᒻᒪᓗ ᑰᖓ ᐊᒻᒪᓗ ᑕᓯᖓ ᐊᑎᓕᒃ ᑖᔅᓱᒪᙵᑦ. ᔮᓐᓄᐊᕆ 19960ᖑᑎᓪᓗᒍ, ᓄᓇᓕᐅᔪᑉ ᐊᑎᑐᖃᖓ ᑕᓱᖅᑕᐅᓚᐅᖅᓯᒪᕗᖅ ᐃᓄᒃᑎᑐᑦ, ᑭᒻᒥᕈᑦ, ᑐᑭᓕᒃ “ᑭᒻᒥᙳᐊᖑᓂᖓᓄᑦ” ᖃᖅᑲᖓ ᐃᒪᖓᑕ ᓴᓂᐊᓂ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ. ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ. http://www.gov.nu.ca/

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᑭᒻᒥᕈᑦ ᖃᐅᔨᒪᔭᐅᒻᒪᑦ ᒥᑭᔫᓂᖓᓂᒃ, ᑐᙵᓇᕐᓂᖏᓐᓂᓪᓗ ᐃᓄᖏᑦ, ᐱᖅᑯᓯᑐᖃᖅᑎᒍᑦ ᐃᓕᖅᑯᓯᖃᖅᑐᑎᑦ ᓱᓕ. ᓇᖅᓴᖓ ᑕᒫᓂ ᐱᕈᖅᑐᓕᕕᔾᔪᐊᕌᓗᒃ ᓄᓇᓕᓐᓂ ᐆᒪᔪᕐᓄᑦ ᓇᔪᒐᖃᕐᕕᐅᓪᓗᓂ, ᐊᒻᒪᓗ ᐊᒥᓱᑦ ᑭᒻᒥᕈᕐᒥᐅᑦ ᐊᖑᓇᓱᓲᑦ ᓱᓕ ᐊᒻᒪᓗ ᐃᖃᓗᒐᓱᐊᖅᑐᑎᑦ ᓂᕿᒋᓂᐊᖅᑕᖏᓐᓂᑦ ᐊᒻᒪᓗ ᓴᓇᙳᐊᕈᓘᔭᓲᖑᓪᓗᑎᑦ. ᐃᒡᓗᖏᑦ ᑭᒻᒥᕈᑦ ᐱᒋᐊᕋᑖᖅᑐᒥᓂᐅᑎᓪᓗᒍ ᓱᓕ, ᐱᖃᓯᐅᔾᔨᕗᑦ ᐳᑭᖅᑕᓕᒃᑯᑦ (1915), ᕼᐊᑦᓴᓐᔅ ᕙᐃ ᑲᒻᐸᓂᖓᑕ ᐃᒡᓗᖁᑎᖏᑦ, ᐊᒻᒪᓗ ᑎᐅᕕ ᓲᐳᕐ ᐃᒡᓗᖓ, ᒫᓐᓇ ᓴᓇᙳᐊᒐᕐᓄᑦ ᑕᑯᔭᒐᖃᕐᕕᐅᓕᖅᑐᖅ ᓂᐅᕕᕐᕕᒃ, ᓇᑉᐸᖅᓯᒪᕗᑦ ᓱᓕ ᐊᒻᒪᓗ ᐱᓱᓪᓗᓂ ᑕᑯᔪᒥᓇᖅᑑᓪᓗᑎᑦ. ᑭᒻᒥᕈᑦ ᑐᒃᓯᐊᕐᕕᑐᐊᖓ, ᐃᔾᔪᓇᐃᑦᑐᖅ ᐸᐅᓗᓯ ᐋᓐᓕᑲᓐ ᑐᒃᓯᐊᕐᕕᖓ, ᑕᐃᒪᙵᑐᖄᓗᒃ ᑕᒫᓃᑦᑐᖅ 1909−ᖑᔪᒻᒪᓂᑦ. ᐋᓐᓕᑲᓐ−ᒃᑯᑦ ᐱᓕᕆᐊᖏᓐᓄᑦ ᑐᑦᑕᕐᕕᐅᕙᑦᑐᒥᓂᐅᕗᖅ ᕿᑭᖅᑖᓘᑉ ᓂᒋᐊᓂ ᐊᒻᒪᓗ ᐊᑐᖅᑕᐅᖃᑦᑕᖅᑐᖅ ᓱᓕ.

 

ᑭᒻᒥᕈᑦ ᕿᑭᖅᑖᓗᒻᒥ ᐃᓄᒃᑎᑐᑦ ᐅᖃᓪᓚᓲᖑᒻᒪᑕ ᓱᓕ. 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ, 91%−ᖑᔪᑦ ᐃᓄᖏᑦ ᐃᓄᒃᑎᑐᑦ ᐅᖃᐅᓯᕆᔭᐅᖅᑳᕐᓂᕋᖅᓯᒪᕗᑦ, ᐊᒻᒪᓗ 89%−ᖏᑦ ᐊᑐᓲᑦ ᐅᖃᐅᓯᕐᒥᓂᒃ ᐊᖏᕐᕋᒥ. 16%−ᑐᐃᓐᓇᑯᓗᐃᑦ ᖃᓪᓗᓇᐅᔭᕈᓐᓇᖏᓐᓂᕋᖅᓯᒪᔪᑦ ᐅᐃᕖᑎᑐᓪᓗ, ᑐᑭᓕᒃ ᑕᒪᐅᙵᕆᐅᕋᑖᖅᑐᑦ ᓂᐅᕐᕈᐊᓘᓐᓃᑦ ᓇᓂᓯᒋᐊᖃᓲᑦ ᖃᓪᓗᓇᐅᔭᕈᓐᓇᖅᑐᒥᒃ ᑐᓵᔨᒋᔭᐅᓂᐊᖅᑐᒥᒃ. ᑭᓯᐊᓂᓕ 83% ᓄᓇᓕᒻᒥᐅᑦ ᖃᓪᓗᓇᐃᔭᓲᑦ ᐊᒻᒪᓗ 77% ᖃᓪᓗᓇᐅᔭᓲᑦ ᐊᖏᕐᕋᒥᓂᑦ ᐅᖃᐅᓯᕆᖅᑳᖅᑐᓂᐅᒃ ᐅᖃᐅᓯᕆᒃᑲᓐᓂᖅᑐᓂᐅᓪᓘᓐᓃᑦ. ᐃᓄᐃᑦ ᑲᑎᒐᐃᒻᒪᑕ ᑭᒃᑯᑐᐃᓐᓇᐃᑦ ᐊᒻᒪᓗ ᑲᑎᒪᔪᖃᕋᐃᒻᒪᑦ ᑕᒪᒃᑮᓐᓂᒃ ᐅᖃᐅᓰᖕᓂᒃ ᐊᑐᖅᑐᓂᑦ ᓂᕆᐅᒍᓐᓇᖅᑐᑎᑦ, ᑭᓯᐊᓂᓕ ᓂᕆᐅᑦᑐᒃᓴᐅᓂᐊᙱᑦᑐᑎᑦ ᐃᓄᒃᑎᑑᖅᑐᑦ ᖃᓪᓗᓇᐅᔭᓕᖅᑎᑕᐅᑲᐅᑎᒋᓂᐊᕐᓂᖏᓐᓂᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᖑᔪᖅᑕᖃᕈᓗᒻᒪᑦ. ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ. ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

 

ᑭᒻᒥᕈᕐᒥ ᒪᒃᑯᑦᑑᕗᑦ ᐃᓄᖏᑦ, ᑕᐃᒪᐃᒻᒥᒻᒪᑕᑦᑕᐅᖅ ᐊᓯᖏᓐᓂᑦ ᒥᑭᔪᓂᑦ ᓄᓇᕗᑉ ᓄᓇᓕᖏᓐᓂ. 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᖅᑕᐅᓯᒪᔪᑦ 55−ᖑᓚᐅᖅᑐᑦ ᐃᓕᓐᓂᐊᕆᐊᓕᓵᓲᑦ ᓱᕈᓯᓛᑦ ᐊᒻᒪᓗ 125 ᐃᓕᓐᓂᐊᕆᐊᓲᑦ ᓱᕈᓰᑦ, 40%−ᖑᓪᓗᑎᑦ ᐃᓄᖏᑦ ᐅᑭᐅᓖᑦ 18−ᓂ ᑐᖔᓂ. ᐅᑭᐅᕆᔭᐅᓗᐊᖅᑐᑦ 23.4. ᑭᒻᒥᕈᑦ ᐊᒥᓲᓂᖅᓴᓂᑦ ᐳᓴᓐᑎᖃᐅᖅᐳᖅ ᐃᓄᓕᒃ ᐅᑭᐅᓖᑦ 65−ᓂᑦ ᐅᖓᑖᓄᓪᓗ ᑕᐃᒪᐃᙱᓂᖅᓴᐅᓪᓗᑎᑦ ᓄᓇᕗᑉ ᓄᓇᓕᖏᑦ: 6% ᐃᓄᐃᑦ ᑕᒪᐃᓐᓂ ᐊᒥᓲᓂᖏᑦ ᐃᓐᓇᑐᖃᒡᒍᑕᐅᓪᓗᑎᑦ. 

ᑮᓇᐅᔾᔭᒃᓴᕈᑕᐅᔪᑦ: 

ᑭᒻᒥᕈᕐᒥ ᓴᓇᙳᐊᖅᑐᒡᒍᑕᐅᓂᖅᓴᐅᓲᖑᕗᑦ. ᑭᒻᒥᕈᑦ ᓴᓇᙳᐊᒐᓕᐅᓲᑦ ᐊᔾᔨᐅᙱᑦᑐᓂᑦ ᑐᖑᔪᕈᔪᒃᑑᓪᓗᑎᑦ ᐅᑦᑯᓯᒃᓴᖏᑦ, ᐊᒻᒪᓗ ᓄᓇᕐᒃᔪᐊᕐᒥ ᖃᐅᔨᒪᔭᐅᑦᑎᐊᖅᑐᑦ ᓴᓇᙳᐊᖅᑎᖏᑦ. ᐅᔭᕋᓐᐊᓂᕐᕕᑕᓕᒃ, ᐱᓗᐊᖅᑐᒥᒃ ᖃᐅᔨᓴᖅᑐᑦ ᐅᔭᕋᐅᔭᓂᑦ ᐊᑐᖅᑕᐅᓲᑦ ᓇᒡᒍᐊᕐᒥᕆᔭᐅᓪᓗᑎᑦ ᐊᓯᖏᓪᓗ ᐊᔾᔨᒌᙱᑐᒡᒍᑏᑦ ᑕᒪᒃᑯᐊ ᐅᔭᕋᒃᓴᑦ ᓇᓂᔭᐅᖃᑦᑕᕐᓂᑰᕗᑦ. ᒫᓐᓇᒫᕈᓗᒃ, ᓄᓇᓕᓐᓂ ᓴᓇᙳᐊᖅᑎᖏᑦ ᐅᔭᒥᕈᓘᔭᕐᓂᑦ ᓇᒡᒍᐊᕐᒥᓂᓪᓗ ᓴᓇᙳᐊᖃᑦᑕᕆᐊᓯᕋᑖᕐᓂᑰᕗᑦ, ᐱᓗᐊᖅᑐᒥᒃ ᑕᒪᒃᑯᓂᖓ ᐅᔭᕋᓐᓂᐊᖅᑕᐅᓲᕐᓂᑦ ᐊᑐᖅᑐᑎᑦ. ᓄᓇᓕᓐᓂ ᐊᐃᕖᑦ ᑑᒑᖏᓐᓂᒃ ᓴᓇᙳᐊᓲᖑᓪᓗᑎᑦ, ᐊᕐᕕᓂᐊᖃᑦᑕᑎᓪᓗᒋᑦ ᐃᓕᑕᒥᓂᐅᔪᒃᓴᐅᒻᒪᑕ. ᑕᒪᒃᑯᐊ ᖃᓄᐃᓕᐅᕈᑕᐅᓲᑦ ᖄᖓᒍᒃᑲᓐᓂᖅ ᐊᒻᒪᓗ ᓄᓇᓕᓐᓂ ᐱᔨᑦᑎᕋᖅᑐᑎᑦ ᑮᓇᐅᔭᓕᐅᕋᓱᐊᓲᖑᓪᓗᑎᑦ, ᓄᓇᓕᒻᒥᐅᑦ ᐊᖑᓇᓱᓲᑦ ᐃᖃᓗᒐᓱᐊᖅᑐᑎᓪᓗ ᓂᕿᒋᓂᐊᖅᑕᒥᓂᑦ. ᑭᒻᒥᕈᑦ ᓄᓇᕗᑦ ᒐᕙᒪᖏᓐᓄᑦ ᐊᓪᓚᕝᕕᖃᕐᕕᐅᒐᓂ, ᑮᓇᐅᔭᓕᐅᕋᓱᐊᓲᑦ ᖃᓂᒋᔭᖓᓂ ᑲᑕᓐᓂᓕᒃ ᓄᓇᕗᒥ ᒥᕐᖑᐃᓯᕐᕕᖃᕐᓂᖓᓄᑦ ᐊᒻᒪᓗ ᓲᐳᕐ ᑰᖓ, ᑕᒪᒃᑮᒃ ᐊᐅᔭᒃᑯᑦ ᓂᐅᕐᕈᐊᓄᑦ ᐅᐸᑦᑕᐅᒃᑲᔪᑦᑐᑎᑦ.

 

ᐊᒥᓱᓂᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᑭᒻᒥᕈᕐᒥ ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ. ᓄᐊᑐᓐ ᓂᐅᕕᕐᕕᒃ “ᑮᓇᐅᔭᓕᕆᔪᓐᓇᕐᒥᔫᒐᓗᐊᑦ”, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖃᕐᕕᒋᒍᓐᓇᖅᑐᒋᑦ ᓂᐅᕕᕐᕕᒃᑯᑦ, ᓯᒃᑮᕐᕕᒃᓴᐅᓪᓗᑎᑦ, ᐊᓯᖏᓪᓗ. ᐊᐅᒃᑕᔫᓅᖅᑐᑦ ᑮᓇᐅᔭᖅᑎᒍᑦ ᐊᑭᓕᐅᑎᐅᕙᑦᑐᑦ ᐊᑭᓕᒃᓴᓂᒍᓐᓇᐅᑏᓪᓗ ᓂᐅᕕᕐᕕᓂ ᐊᑐᕋᒃᓴᐅᓲᑦ. ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ. ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

 

ᐆᒪᔪᐃᑦ: 

ᑭᒻᒥᕈᑉ ᓇᔪᒐᕆᔭᖓ ᐱᓪᓗᒍ ᑕᕆᐅᕐᒥᐅᑕᓂᑦ ᐳᐃᔨᖃᐅᕈᓘᔭᖅᑐᖅ ᐊᒻᒪᓗ ᐱᓱᒃᑎᓂᑦ. ᓇᑦᑏᑦ, ᕿᓚᓗᒐᐃᑦ, ᐊᐃᕖᑦ, ᐊᕐᕖᑦ ᐊᒻᒪᓗ ᓇᓄᐃᑦ ᑕᒫᓃᒍᓐᓇᓲᑦ ᓯᔾᔭᒥ. ᓄᓇᓕᒻᒥᐅᑦ ᐆᒐᕐᓂᐊᓲᑦ ᐃᖃᓗᒃᐱᓂᓪᓗ. ᓄᓇᑐᐃᓐᓇᕐᒥ ᐆᒪᔪᐃᑦ ᑐᒃᑑᕗᑦ, ᐊᒪᕈᑦ, ᐊᒻᒪᓗ ᒥᑭᔪᑦ ᐆᒪᔪᐃᑦ, ᓲᕐᓗᒃ ᐅᑲᓖᑦ, ᐊᒻᒪᓗ ᐊᔾᔨᒌᙱᑦᑐᑦ ᑎᖕᒥᐊᑦ, ᓲᕐᓗᒃ ᖁᐸᓄᐊᑦ, ᑭᒡᒐᕕᐊᕐᔪᑦ, ᓂᕐᓖᑦ, ᐊᕿᒡᒌᑦ, ᐊᒻᒪᓗ ᐅᒃᐱᔾᔪᐊᑦ.

ᐅᖃᓕᒫᑲᓐᓂᕐᓃᑦ : 
  • Bennett, John & Susan Rowley, eds. Uqalurait: an oral history of Nunavut. Montreal & Kingston: McGill-Queen’s University Press, 2004.
  • Copland, A. Dudley. Coplalook: Chief Trader, Hudson’s Bay Company, 1923-39. Winnipeg: Watson & Dwyer, 1989.
  • Dalton, Anthony. Arctic naturalist: the life of J. Dewey Soper. Toronto: Dundurn Press, 2010
  • Dorais, Louis-Jacques. The language of the Inuit: syntax, semantics and society in the Arctic. Montreal & Kingston: McGill-Queen’s University Press, 2010.
  • Eber, Dorothy Harley. When the whalers were up North. Montreal & Kingston: McGill-Queen’s University Press, 1989
  • Issenman, Betty Kobayashi. Sinews of Survival: the living legacy of Inuit clothing. Vancouver: UBC Press, 1997.
  • MacDonald, John. The Arctic sky: Inuit astronomy, star lore and legend. Iqaluit & Toronto: Nunavut Research Institute and Royal Ontario Museum, 1998.
  • McGhee, Robert. The last imaginary place: a human history of the Arctic world. Toronto: Key Porter Books, Canadian Museum of Civilization, 2004.
  • Morrison, David and Georges-Hébert Germain. Inuit: glimpses of an Arctic past. Hull: Canadian Museum of Civilization, 1995.
  • Pauktuutit Inuit Women of Canada. The Inuit way: a guide to Inuit culture, rev. ed. Ottawa: Pauktuutit Inuit Women of Canada, 2006. http://www.uqar.ca/files/boreas/inuitway_e.pdf