You are here

ᑭᙵᐃᑦ

ᑭᙵᐃᑦ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᑭᙵᐃᑦ, ᑐᑭᓕᒃ “ᑭᙵᐃᑦ” ᐃᓄᐃᑦ ᐅᖃᐅᓯᖓᒍᑦ, ᐃᓄᓐᓄᑦ ᓇᔪᖅᑕᐅᖃᑦᑕᖅᓯᒪᔪᑐᖃᐅᕗᖅ ᑐᓂᖅᑕᖃᖅᑎᓪᓗᒍ.  ᑕᒪᒃᑯᐊ ᐃᓕᖅᑯᓯᖃᖅᑎᓪᓗᒋᑦ ᑕᐃᔅᓱᒪᓂ ᐊᑦᑎᖅᑕᐅᓚᐅᖅᓯᒪᔪᖅ ᐃᑦᑕᕐᓂᓴᑐᖃᐃᑦ ᐸᒃᑲᖅᑕᐅᑎᓪᓗᒋᑦ ᑭᙵᐅᓕᖅᑐᓂ, ᐃᑦᑕᕐᓂᓴᐃᑦ ᐱᔭᒥᓃᑦ ᐅᓪᓗᖃᖅᑐᑦ 3,500 ᐊᕐᕌᒎᓚᐅᖅᓯᒪᔪᓂᑦ.  ᐅᓂᒃᑳᖅᑐᐊᑐᖃᐃᑦ ᓄᓇᓕᓐᓂ ᓇᓗᓇᐃᖅᓯᓯᒪᕗᑦ ᐅᓪᓗᒥᐅᔪᖅ ᐃᓄᖏᑦ ᑭᕚᕆᔭᐅᕗᑦ ᑖᒃᑯᓄᖓ ᐃᓄᐃᑦ ᓯᕗᕚᖏᓐᓄᑦ ᑕᒫᓂᕐᒥᐅᑕᕈᓚᐅᖅᓯᒪᔪᑦ ᑭᖑᓂᐊᒍᑦ ᑐᓃᑦ.  ᓯᕗᓪᓕᖅᐹᖅ ᖃᓪᓗᓈᖅ ᑕᑯᔭᒥᓂᐅᔪᒃᓴᐅᕗᑦ 1000 AD, ᐃᑦᑕᕐᓴᑦ ᑕᑯᓪᓗᒋᑦ ᓇᓗᓇᐃᕈᑕᐅᒻᒪᑕ ᓯᔾᔭᖏᑦ ᑭᙵᑦ ᐊᒻᒪᓗ ᑭᒻᒥᕗᑦ ᑕᑯᒃᓴᐅᑎᑦᑎᒻᒪᑕ ᕙᐃᑭᖕᔅ ᑕᒪᐅᙵᖅᓯᒪᔪᒥᓂᐅᒻᒪᑕ ᑕᐃᔅᓱᒪᓂ.  ᖃᓪᓗᓈᑎᑑᑦ ᐊᑎᖓ ᐱᔭᒥᓂᐅᕗᖅ ᕿᓂᖅᑎᐅᔪᖅ ᖃᐅᔨᓴᖅᑎ ᓘᒃ ᕚᒃᓯ, ᑕᒪᐅᖓ ᐊᕕᑦᑐᖅᓯᒪᔪᒧᑦ ᐊᐅᓪᓚᓚᐅᖅᓯᒪᔪᖅ 1631-ᖑᑎᓪᓗᒍ ᕿᓂᖅᑐᓂ ᐅᑭᐅᖅᑕᖅᑐᑉ ᑕᕆᐅᖓᒍᑦ ᐊᖅᑯᑎᒥᒃ.  ᐃᓱᒪᒋᔭᐅᕗᖅ ᐊᑦᑏᓚᐅᖅᓯᒪᔪᒥᓂᐅᒋᐊᖓᓂᒃ ᑮᓇᐅᔭᖃᕐᕕᒋᔭᖓᓂᒃ, ᐆᕈᓪ ᑐᐊᓴᑦᒥ ᑕᐃᔅᓱᒪᓂ ᖃᐅᔨᓴᕆᐊᖅᓯᒪᑎᓪᓗᒍ.  ᓄᓇᓕᖓ ᑕᓯᐅᔭᕐᔪᐊᑉ ᑕᕆᐅᖓᓃᓐᓂᖓᓄᑦ, ᓂᐅᕐᕈᔭᐅᖃᑦᑕᖅᑐᒥᓂᐅᕗᖅ ᐊᕐᕕᓂᐊᖅᑎᓄᑦ 1800−ᖏᓐᓂ ᐊᒻᒪᓗ 1900 ᐱᒋᐊᓕᖅᑎᓪᓗᒋᑦ.

 

ᕼᐊᑦᓴᓐ ᕙᐃ ᑲᒻᐸᓂᖏᑦ ᓂᐅᕕᕐᕕᒃᑯᑦ (HBCH ᓂᐅᕕᕐᕕᑖᓚᐅᖅᓯᒪᔪᑦ 1913-ᖑᑎᓪᓗᒍ. ᑕᒪᒃᑮᒃ ᐃᒃᓯᕋᕐᔪᐊᒃᑯᑦ ᐋᓐᓕᑲᓐ−ᒃᑯᑦ ᑐᒃᓯᐊᕐᕕᖏᑦ ᑕᒫᓃᓚᐅᖅᓯᒪᔪᑦ, ᑭᓯᐊᓂᓕ ᐃᒃᓯᕋᕐᔪᐊᖅ ᑐᒃᓯᐊᕐᕕᖓ ᐋᖅᑭᒃᑕᐅᓚᐅᖅᓯᒪᔪᖅ 1938−ᖑᑎᓪᓗᒍ ᒪᑐᔭᐅᓚᐅᖅᓯᒪᔪᖅ 1960−ᖏᓐᓂ ᑖᒃᑯᐊ ᑭᙵᕐᒥᐅᑦ ᐋᓐᓕᑲᐅᓗᐊᕐᓂᖏᓐᓄᑦ.  ᐱᒻᒪᕆᐅᒻᒥᔪᖅ ᑭᙵᕐᓄᑦ ᐋᖅᑭᓱᖅᑕᐅᓚᐅᖅᓯᒪᓂᖓ ᕿᑭᖅᑖᓘᑉ ᐱᖓᓐᓇᖓᓂ ᑯᐊᐸᒃᑯᑦ 1959−ᖑᑎᓪᓗᒍ, ᐃᓄᐃᑦ ᓴᓇᙳᐊᒐᖏᓐᓂᑦ ᓄᓇᕐᔪᐊᕐᒧᑦ ᖃᐅᔨᒪᔭᐅᒃᑲᓕᖅᑎᑦᑎᓚᐅᖅᓯᒪᓪᓗᓂ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ.  ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ.  http://www.gov.nu.ca/iu

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᑭᙵᕐᒥᐅᑦ ᐃᓄᐃᑦ ᐃᓄᐃᑦ ᖃᓪᓗᓈᓪᓗ ᐃᓕᖅᑯᓯᖏᓐᓂᒃ ᐊᑐᕈᓐᓇᖅᓯᓯᒪᔪᑦ ᐱᐅᓛᖑᓗᑎᑦ ᐃᓅᓯᖏᓐᓄᑦ, ᓄᓇᓕᑉ ᖃᓪᓗᓈᓄᑦ ᑎᑭᑕᐅᒋᐊᙵᖃᑦᑕᓕᖅᑎᓪᓗᒋᑦ ᐅᐊᑦᑎᐊᕈᕐᓂᓴᐅᓂᖓᓄᑦ, ᓂᐅᕕᖅᑎᒃᑯᑦ ᐊᕐᕕᓂᐊᖅᑎᑯᓪᓗ, ᓄᓇᕐᔪᐊᑉ ᖃᐅᔨᒪᓕᖅᓯᒪᓕᕐᓂᖓᓗ ᓄᓇᓕᓐᓂ ᓴᓇᙳᐊᖅᑎᓄᑦ ᐋᖅᑭᒃᑕᐅᓚᐅᖅᑎᓪᓗᒍ ᕿᑭᖅᑖᓘᑉ ᐱᖓᓐᓇᖓᓂ ᑯᐊᐸᒃᑯᑦ.  ᐃᓄᐃᑦ ᐅᖃᐅᓯᖓ ᓴᙱᔫᕗᖅ ᐊᒻᒪᓗ ᓄᓇᒧᑦ ᐊᐅᓪᓚᖃᑦᑕᓲᖑᓪᓗᑎᑦ ᓱᓕ, ᐊᒻᒪᓗ ᐃᓄᐃᑦ ᐃᓕᖅᑯᓯᖓ ᓴᖅᑭᔮᕐᔫᒥᑎᑕᐅᓯᒪᓕᖅᑐᓂ ᓄᓇᕐᔪᐊᕐᒥ ᖃᐅᔨᒪᔭᒻᒪᕆᐅᔪᑦ ᓴᓇᐅᒐᐃᑦ ᓄᓇᓕᓐᓂ ᑮᓇᐅᔭᓕᐅᕈᑕᐅᔪᓐᓇᖅᓯᓯᒪᔪᖅ ᐊᒥᓲᓂᖅᓴᐃᑦ ᓄᓇᓖᑦ ᑕᐃᒪᐃᙱᓂᖅᓴᐅᓪᓗᑎᑦ ᐅᖓᓯᑦᑐᒦᓐᓂᖅᓴᐅᔪᓪᓗ.  ᓄᓇᓕᐅᔪᖅ ᐋᖅᑭᒃᓱᐃᖃᑦᑕᓲᑦ ᓇᓪᓕᐅᓂᖅᓯᐅᕈᓘᔭᖅᑐᑎᑦ ᐊᒻᒪᓗ ᓄᓇᓕᓐᓂ ᓂᕆᕕᔾᔪᐊᑎᑦᑎᔪᖃᓲᖅ.  ᑭᙵᐃᑦ ᐋᓐᓕᑲᓐ ᑐᒃᓯᐊᕐᕕᓕᒃ, ᐱᐊᓐᑐᑳᔅᑐᓪ ᑐᒃᓯᐊᕐᕕᓕᒃ, ᐊᒻᒪᓗ ᕙᐊᕼᐊᐃ ᑐᒃᓯᐊᕐᕕᖓ.

 

ᐃᓄᒃᑎᑐᑦ ᐅᖃᐅᓯᓪᓗᐊᑕᕆᔭᐅᕗᖅ ᑭᙵᕐᓂ. ᐃᓄᒃᑎᑑᖅᑐᒡᒍᑕᐅᕗᑦ ᓄᓇᓕᒻᒥ.  ᒪᓕᑦᑐᒋᑦ 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᐃᒪᓐᓇᐅᔪᑦ, 90%−ᖏᑕ ᑭᙵᕐᒥᐅᑦ ᐃᓄᖏᑦ ᐃᓄᒃᑎᑐᑦ ᐅᖃᐅᓯᓪᓗᐊᑕᖃᕐᓂᕋᖅᐳᑦ, 85%−ᖏᑦ ᐃᓄᒃᑎᑐᑦ ᐊᖏᕐᕋᒥᓂᒃ ᐅᖃᓪᓚᓲᖑᓪᓗᑎᑦ.  ᖃᓪᓗᓇᐅᔭᐃᓐᓇᓲᖑᓂᕋᖅᑐᑦ 9−ᖏᑕ ᐃᓄᖏᑦ, ᐊᒻᒪᓗ ᖃᑦᑏᓐᓇᑯᓗᐃᑦ ᐃᓄᐃᑦ ᓄᓇᓕᒻᒥᐅᑦ ᐅᐃᕖᑎᑑᓲᖑᓂᕋᕐᒥᔪᑦ ᐅᕝᕙᓘᓐᓃᑦ ᐊᓯᖏᓐᓂᑦ ᐅᖃᓯᐅᕐᒥᒃ ᐊᑐᓲᖑᓪᓗᑎᑦ.  ᐃᒪᓐᓇᐸᓗᒃ 20%−ᖑᔪᑦ ᐃᓄᒃᑎᑑᓲᑦ ᐃᓄᖏᑦ ᖃᓪᓗᓇᐅᔭᕈᓐᓇᖏᒻᒪᑕ ᐅᐃᕖᑎᑐᓪᓗ, ᑐᑭᓕᒃ, ᐃᓛᓐᓂᒃᑯᑦ, ᑕᒪᐅᙵᕆᐅᖅᑐᑦ ᓂᐅᕐᕈᐊᓪᓘᓐᓃᑦ ᓇᓂᓯᔭᕆᐊᖃᓲᑦ ᖃᓪᓗᓇᐅᔭᕈᓐᓇᖅᑐᒥᒃ ᑐᓵᔨᒋᓂᐊᖅᑕᒥᓂᒃ.  ᓂᕆᐅᒍᓐᓇᖅᐳᑎᑦ ᑲᑎᑦᑕᕋᐃᒻᒪᑕ ᐃᓄᑐᐃᓐᓇᐃᑦ ᐊᒻᒪᓗ ᑲᑎᒪᔪᖃᓕᕋᐃᒻᒪᑦ ᑕᒪᒃᑮᓐᓂᒃ ᐃᓄᒃᑎᑐᑦ ᖃᓪᓗᓈᑎᑐᓪᓗ ᐊᑐᓲᑦ, ᑭᓯᐊᓂᓕ ᓂᕆᐅᑦᑐᒃᓴᐅᓂᐊᙱᑦᑐᑎᑦ ᐃᓄᒃᑎᑑᖅᑐᑦ ᖃᓪᓗᓇᐅᔭᓕᖅᑎᑕᐅᑲᐅᑎᒋᓂᐊᕐᓂᖏᓐᓂᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᖑᔪᖅᑕᖃᕈᓗᒻᒪᑦ.  ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ.  ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

 

ᓄᓇᕗᑉ ᐊᑐᓲᖏᑦ ᒪᓕᑦᑐᒋᑦ, ᑭᙵᐃᑦ ᐊᖏᓂᖓ ᒥᑭᓗᐊᙱᓚᖅ, 10−ᖓᓃᑦᑐᖅ ᐃᓄᐃᑦ ᐊᒥᓲᓛᖏᑦ.  2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᖅᑕᒥᓃᑦ 170 ᐃᓕᓐᓂᐊᓕᓵᖅᑐᑦ ᐊᒻᒪᓗ 360 ᐃᓕᓐᓂᐊᕆᐊᖃᑦᑕᓲᑦ ᓱᕈᓰᑦ, 39%−ᖑᑎᓪᓗᑎᑦ ᐊᒥᓲᓂᖏᑦ ᐃᓄᓕᒫᓂᑦ ᐅᑭᐅᓖᑦ 18−ᓂᑦ ᑐᖔᓃᑦᑐᑦ.  ᐃᓐᓇᑐᖃᐃᑦ 65-ᓂᑦ ᐅᑭᐅᓖᑦ 4%−ᑐᐃᓐᓇᐅᕗᑦ ᐃᓄᓕᒫᓂᑦ, ᐊᒻᒪᓗ 85−ᓂᑦ ᐅᑭᐅᓕᒃᑕᖃᙱᓚᖅ ᐅᖓᑖᓃᑦᑐᓂᑦ.

ᑮᓇᐅᔾᔭᒃᓴᕈᑕᐅᔪᑦ: 

ᐊᓯᖏᑦ ᓄᓇᕗᒥ ᓄᓇᓕᖏᑦ ᐊᖏᕈᑎᖃᙱᑐᐃᓐᓇᕆᐊᖃᕋᓗᐊᖅᑎᓪᓗᒋᑦ, ᑭᙵᐃᑦ ᐃᒻᒥᓂᒃ ᓇᓗᓇᐃᖅᓯᓯᒪᕗᑦ “ᐃᓄᐃᑦ ᓴᓇᐅᒐᖏᓐᓂᒃ ᐊᖏᕐᕋᕆᔭᐅᓂᕋᖅᑐᓂ.” (http://www.capedorset.ca/en/index.asp) ᓴᓇᙳᐊᕐᓂᖅ ᐊᒻᒪᓗ ᑎᑎᖅᑐᒐᐅᔭᕐᓂᖅ ᑮᓇᐅᔭᓕᐅᕈᑎᒻᒪᕆᐅᓲᖑᕗᑦ ᑭᙵᕐᓂ, 22%-ᖑᔪᑦ ᓄᓇᓕᒻᒥᐅᑦ ᐃᖅᑲᓇᐃᔮᖃᖅᑐᑎᑦ ᑕᑯᔭᒐᒃᓴᓂᑦ.  ᑭᙵᐃᑦ ᑯᐊᐸᒃᑯᖏᑦ, ᖃᐅᔨᒪᔭᐅᔪᖅ ᓱᓕ ᕿᑭᖅᑖᓗᑉ ᐱᖓᓐᓇᖓᓂ ᑯᐊᐸᒃᑯᑦ, ᑐᙵᕕᒋᔭᐅᕗᖅ ᓄᓇᓕᓐᓂ ᓴᓇᙳᐊᖅᑐᓕᕆᕙᑦᑐᓂᑦ ᐱᕈᖅᐸᓪᓕᐊᓯᒪᔪᒻᒪᕆᐅᓪᓗᓂ ᓄᓇᕐᔪᐊᕐᒥ ᖃᐅᔨᒪᔭᐅᓕᖅᑐᓂ ᑕᐃᔅᓱᒪᓂᓂᑦ ᔭᐃᒥᓯ ᕼᐃᐅᔅᑕ ᑎᑭᓚᐅᖅᓯᒪᒻᒪᓂᑦ ᐊᒻᒪᓗ ᑲᔪᖏᖅᓴᐃᖃᑦᑕᓕᓚᐅᖅᓯᒪᑎᓪᓗᒍ ᓄᓇᓕᓐᓂ ᓴᓇᙳᐊᖅᑎᓂᑦ ᓴᓇᙳᐊᖃᑦᑕᖁᔨᒋᐊᓯᓪᓗᓂ 1953-ᒥᑦ.  ᖄᖓᒍᒃᑲᓐᓂᖅ ᓴᓇᙳᐊᖅᑐᓕᕆᕙᑦᑐᓄᑦ, ᑭᙵᐃᑦ ᐃᑲᔪᖅᑕᐅᓯᒪᓂᖃᕐᒥᔪᖅ ᐃᓚᒋᔭᐅᓪᓗᓂ ᓄᓇᓕᓐᓂ ᓄᓇᕗᒥ ᒐᕙᒪᒃᑯᓐᓄᑦ ᐊᓪᓚᕝᕕᖃᕐᕕᐅᓪᓗᓂ, ᐱᖃᓯᐅᑎᓪᓗᒋ ᐃᖏᕐᕋᔪᓕᕆᓂᕐᒧᑦ ᐱᓕᕆᐊᖏᑦ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓄᓪᓗ, ᓄᓇᓕᓐᓂ ᐱᕙᓪᓕᐊᔪᓕᕆᔨᒃᑯᓐᓄᑦ ᓄᓇᕘᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᐊᒥᓱᓪᓗ ᓄᓇᓕᓐᓄᑦ ᒐᕙᒪᓄᓪᓗ ᐱᔨᑦᑎᕋᖅᑎᒃᑯᑦ ᐃᖅᑲᓇᐃᔭᖅᑎᖏᑦ ᑕᐅᕙᓃᒃᑭᕗᑦ.

 

ᖄᖓᒍᒃᑲᓐᓂᖅ ᓴᓇᙳᐊᖅᑐᓕᕆᓂᕐᒧᑦ ᐊᒻᒪᓗ ᓄᓇᓕᓐᓂ ᒐᕙᒪᐅᔪᓄᓪᓗ ᐱᔨᑦᑎᕋᕐᓂᕐᒧᑦ ᑮᓇᐅᔭᓕᐅᕈᑕᐅᒐᓱᐊᖃᑦᑕᖅᑐᓂᑦ ᐱᑕᖃᖅᑎᓪᓗᒍ, ᐊᒥᓱᑦ ᑭᙵᕐᒥᐅᑦ ᐊᖑᓇᓱᓲᑦ ᐃᖃᓪᓕᐊᓲᖑᓪᓗᑎᓪᓗ.  ᐳᓚᕋᖅᑐᓕᕆᓂᖅ ᐱᒻᒪᕆᐅᓪᓗᓂ, ᒪᓪᓕᕐᔪᐊᖅ ᓄᓇᕗᒥ ᒥᕐᖑᐃᓯᕐᕕᒃ ᖃᓂᒋᔭᖓᓃᑦᑐᓂ ᓄᓇᓕᓐᓂ ᐊᐅᓪᓚᐅᔾᔨᔨᓄᑦ ᑮᓇᐅᔭᓕᐅᕈᑕᐅᓇᓱᐊᖅᐸᒃᑭᕗᖅ.

 

ᐊᒥᓱᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᑭᙵᐃᑦ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ.  ᓄᐊᑐᓐ ᓂᐅᕕᕐᕕᒃ, ᐊᒻᒪᓗ ᑯᐊᐸᒃᑯᑦ “ᑮᓇᐅᔭᓕᕆᔪᓐᓇᕐᒥᔫᒐᓗᐊᑦ”, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖃᕐᕕᒋᒍᓐᓇᖅᑐᒋᑦ ᓂᐅᕕᕐᕕᒃᑯᑦ, ᓯᒃᑮᕐᕕᒃᓴᐅᓪᓗᑎᑦ, ᐊᓯᖏᓪᓗ.  ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᑭᙵᐃᑦ ᐳᐃᔨᖃᐅᕈᓘᔭᖅᑐᖅ.  ᐱᖃᓯᐅᔾᔨᔪᖅ, ᕿᒥᕐᓗᖃᙱᑦᑐᐃᑦ ᑕᕆᐅᕐᒥᐅᑕᐃᑦ, ᐊᒻᒪᓗ ᓲᕐᓗᒃ ᐃᖃᓗᒃᐱᒃ, ᐊᒻᒨᒪᔪᑦ ᐊᒻᒪᓗ ᑭᖑᐃᑦ.  ᐳᐃᔩᑦ ᐊᒥᓲᒋᓪᓗᑎᑦ: ᕿᓚᓗᒐᐃᑦ, ᐊᕐᕖᑦ, ᐋᕐᓗᐃᑦ, ᖃᓯᒋᐊᑦ, ᖃᐃᕈᓖᑦ, ᐅᒡᔪᐃᑦ, ᐊᒻᒪᓗ ᐊᐃᕖᑦ.  ᐱᓱᒃᑏᑦ ᐊᒻᒪᓗ ᑎᖕᒥᐊᑦ ᑕᒫᓃᑦᑐᑦ ᑐᒃᑐᐃᑦ, ᓇᓄᐃᑦ, ᑎᕆᒐᓂᐊᑦ, ᐊᒪᕈᐃᑦ, ᐅᖃᓖᑦ, ᓂᕐᓖᑦ, ᒥᑏᑦ, ᐊᒻᒪᓗ ᐊᕿᒡᒌᑦ.

ᐅᖃᓕᒫᑲᓐᓂᕐᓃᑦ : 
  • ᕕᐊᓇᑦ, ᔮᓐ & ᓲᓴᓐ ᕉᓕ, ᐋᖅᑮᒋᐊᕆᔩᑦ.  ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2004.
  • ᑕᓪᑕᓐ, ᐋᓐᑕᓂ.  ᐅᑭᐅᖅᑕᖅᑐᒥ ᓄᓇᑐᐃᓐᓇᕐᒦᖃᑦᑕᓲᑦ: ᐃᓅᓯᖓ . ᑎᐅᕕ ᓲᐳᕐ. ᑐᕌᓐᑐ: ᑕᓐᑐᒃᓐ ᑎᑎᕋᖅᑎᖏᑦ, 2010.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᐅᖃᐅᓰᑦ ᐋᖅᑭᓱᖅᓯᒪᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᐃᓅᓯᖏᑦ ᐅᑭᐅᖅᑕᖅᑐᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2010.
  • ᐄᐳᕐ, ᑐᕈᐊᑎ ᕼᐊᕐᓕ: ᐊᕐᕕᓂᐊᖅᑏᑦ ᐅᑭᐅᖅᑕᖅᑐᒦᑦᑎᓪᓗᒋᑦᒪᓐᑐᕆᐊᓪ & ᑭᖕᔅᑕᓐ: ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 1989.
  • ᕼᐃᐅᔅᑕᓐ, ᔭᐃᒥᓯ.  ᖃᕿᐊᓕᖅᑐᑦ ᐃᒡᓗᕕᒐᕐᒥᐅᑦ.  ᑐᕌᓐᑐ: ᒪᒃᓕᓚᓐ ᐊᒻᒪᓗ ᓯᑑᕗᑦ, 1995.
  • ᐃᓴᓐᒪᓐ, ᕕᐊᑎ ᑯᕙᔭᓯ.  ᐃᕙᓗᖏᑦ ᐊᓐᓇᐅᒪᔾᔪᑏᑦ: ᐃᓄᐃᑦ ᐊᓐᓄᕌᖏᑦ ᖃᓄᐃᑦᑑᖃᑦᑕᓚᐅᖅᓯᒪᓂᖏᑦ.  ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ 1997.
  • ᒪᒃᑖᓄᓪᑦ, ᔮᓐ.  ᐅᑭᐅᖅᑕᖅᑐᑉ ᓯᓚᖓᐃᓄᐃᑦ ᐅᓪᓗᕆᐊᓂᓕᕆᓂᖏᑦ, ᐅᓪᓗᕆᐊᑦ ᐅᓂᒃᑳᖏᑦ ᐅᓂᒃᑳᖅᑐᐊᑐᖃᖏᓪᓗ ᐅᑉᐱᕆᔭᑦ.  ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑏᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪ ᑕᑯᔭᒐᖃᕐᕕᒃ, 1998.
  • ᒪᒌ, ᕌᕗᑦ.  ᑭᖑᓪᓕᖅᐹᖅ ᑕᐅᑐᙳᐊᖅᑕᐅᓯᒪᓂᑯ: ᐃᓄᐃᑦ ᐊᑐᖃᑦᑕᕐᓂᑯᒥᓂᖏᑦ ᐅᑭᐅᖅᑕᖅᑐᒥ.  ᑐᕌᓐᑐ: ᑮ ᐳᐊᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨᔅ−ᕼᕿᕗᑦ ᔪᒪᐃᓐ.  ᐃᓄᐃᑦ: ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᑕᑯᓇᓪᓗᒋᑦ.  ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 1995.
  • ᓄᐊᑕᓐ, ᑎᐅᕆᒃ ᐊᒻᒪᓗ ᓇᐃᔪᓪ ᐅᖃᓕᒫᖅᑕᐅᔪᑦ ᑭᙵᐃᑦ ᓴᓇᐅᒐᖏᑦ.  ᕚᓐᑰᕗᕐ: ᑕᒡᓚᔅ & ᒫᑭᓐᑕᐃᔪᕐ, 2005.
  • ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ.  ᐃᓄᐃᑦ ᐃᓕᖅᑯᓯᖓ: ᐃᓄᐃᑦ ᐃᓕᖅᑯᓯᖓᓄᑦ ᑐᑭᒧᐊᕈᑎᖏᑦ, ᐋᖅᑭᒋᐊᖅᑕᐅᓯᒪᔪᑦ ᐋᑐᕚ: ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ, 2006. (ᐊᒻᒪᓗ ᐊᑐᐃᓐᓇᐅᒻᒥᔪᑦ ᖃᕋᓴᐅᔭᒃᑯᑦ ᓄᓇᕗᑦ ᒐᕙᒪᖏᑕ ᐃᖅᑲᓇᐃᔭᖅᑎᑖᕆᔭᐅᕋᑖᖅᑐᑦ ᑐᑭᓯᒋᐊᖅᑎᑕᐅᓂᖏᓐᓄᑦ ᐃᑭᐊᖅᑭᕕᖓᓂ)(http://www.orientation.hr.gov.nu.ca/i18n/english/pdf/The%20Inuit%20Way.pdf)
  • ᐱᑦᓯᐅᓛᖅ, ᐲᑕ ᐊᒻᒪᓗ ᑐᕈᑎ ᕼᐊᕐᓕ ᐄᕗᕐ,  ᐃᓄᐃᑦ ᓄᓇᑦᑎᓃᙶᖅᓯᒪᔪᑦ: ᐅᓂᒃᑳᖅᑐᐊᖅ ᐊᔾᔨᙳᐊᖃᐅᖅᑐᓂ ᐊᒻᒪᓗ ᐅᖃᐅᑕᐅᓯᒪᓂᑯᑦ ᑭᒃᑰᒻᒪᖔᕐᒥᒃ ᑎᑎᕋᖅᑕᐅᓯᒪᔪᑦ.  ᒪᓐᑐᕆᐊᓪ & ᑭᖕᔅᑕᓐ: ᒥᒡᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᐅᓯᒪᔪᑦ, 1993.
  • ᕋᐃᔭᓐ, ᓕᐊᔅᓕ ᕗᐊᐃᑦ, ᐋᖅᑭᒋᐊᖅᑕᐅᓯᒪᔪᑦ.  ᑭᙵᕐᓂ ᑎᑎᖅᑐᒐᖅᑕᐅᓯᒪᔪᑦ: ᓇᓪᓕᐊᓂᖅᓯᐅᖅᑐᑦ ᐅᑭᐅᖃᓕᕐᓂᖓᓂ 50: 1959-2009. ᑲᓇᑕ: ᕿᑭᖅᑖᓘᑉ ᐱᖓᓐᓇᖓᓂ ᑯᐊᐸᒃᑯᑦ, 2009.
  • ᕚᓪᒃ, ᐊᓐᔅᒐᕐ: ᕿᓐᓄᐊᔪᐊᖅ: ᐃᓄᒃ ᓴᓇᙳᐊᖅᑎᑉ ᐃᓅᓯᖓ ᐅᓂᒃᑳᖅᑐᐊᕆᔭᐅᔪᖅ.  ᒪᓄᑎᒃ: ᐱᓄᒻᕗᕋ ᑎᑎᕋᖅᑎᖏᑦ, 1999.