You are here

ᑯᒑᕐᕈᒃ

ᑯᒑᕐᕈᒃ

ᐊᕕᒃᑐᖅᓯᒪᓂᖓ: 
ᕿᑎᕐᒥᐅᓂ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (KitSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᑯᒑᕐᔪᒃ, ᑕᐃᔭᐅᕙᓚᐅᖅᓯᒪᒻᒥᔪᖅ ᐱᐊᓕ ᕙᐃ (ᐊᑦᑎᖅᑕᒥᓂᐅᓪᓗᓂ ᔮᓐ ᐱᐊᓕᐅᓚᐅᖅᓯᒪᔪᒥᒃ, ᑯᐃᑉ ᑭᒡᒐᑐᖅᑎᖓ ᕼᐊᑦᓴᓐᔅ ᕙᐃ ᑲᒻᐸᓂᒃᑯᓐᓄᑦ), ᓇᑦᓯᓕᖕᒥᐅᑕᕐᓄᑦ ᑎᑭᕝᕕᐅᕙᓚᐅᖅᓯᒪᔪᖅ, ᑑᓕ ᐃᓄᐃᑦ ᓯᕗᕚᖏᓐᓂᒃ ᓯᕗᕚᓖᑦ.  ᑕᐃᕙᓚᐅᖅᓯᒪᔭᖓ ᐊᕐᕕᓕᒡᔪᐊᖅ, ᐊᕐᕖᑦ ᖃᑦᑏᓐᓇᕈᖅᑐᒻᒪᕆᐅᒐᓱᐊᕐᓂᖏᓐᓂᑦ ᐊᕐᕕᕐᓂᐊᕐᕕᐅᖃᑦᑕᖅᑐᑐᖃᐅᓂᖏᓐᓄᑦ ᑕᐅᕙᓂ.  ᑯᒑᕐᔪᒃ ᓯᑯᖃᒃᑲᐅᕗᖅ, ᑕᐃᒪᐃᓐᓂᖓᓄᑦ ᐊᕐᕕᓂᐊᕐᕕᒃᑖᕐᕕᐳᓚᐅᖅᓯᒪᙱᑦᑐᖅ ᓂᐅᕕᕐᕕᓂᓪᓗ, ᐊᒻᒪᓗ ᐊᒥᓱᑦ ᐃᓄᐃᑦ ᐱᖅᑯᓯᑐᖃᕐᒥᓂᒃ ᐊᑐᖅᑐᑎᑦ ᐃᓅᓯᖃᖃᑦᑕᓚᐅᖅᓯᒪᔪᑦ ᑎᑭᒐᓱᐊᕐᓂᖏᓐᓂᑦ 1900.  ᓲᕐ ᔮᓐ ᕌᔅ ᑕᐅᕙᓃᑦᑐᒥᓂᐅᓚᐅᖅᓯᒪᒐᓗᐊᖅᑎᓪᓗᒍ ᖃᓂᒋᔭᖓᓂ 1829−ᒥ, ᖃᓪᓗᓈᓂᑦ ᑕᑯᓗᐊᕌᓗᖃᑦᑕᓚᐅᙱᑦᑐᑦ.  1935-ᒥ, ᓯᕗᓪᓕᖅᐹᑦ ᑐᒃᓯᐊᕐᕖᑦ ᑎᑭᓚᐅᖅᓯᒪᔪᑦ ᑕᒪᐅᖓ ᐊᒻᒪᓗ ᐃᒃᓯᕋᕐᔪᐊᑦ ᑐᒃᓯᐊᕐᕕᖓ ᓇᑉᐸᖅᑕᐅᓪᓗᓂ 1937−ᖑᑎᓪᓗᒍ.  ᐅᖓᓯᑦᑐᒃᑯᑦ ᖃᐅᔨᓴᐅᑏᑦ ᐅᓇᑕᖅᑎᓄᑦ (DEW) ᐋᖅᑭᓱᖅᑕᐅᑎᓪᓗᒍ, ᖃᐅᔨᓴᕐᕕᒃ ᓴᓇᔭᐅᓕᓚᐅᖅᓯᒪᔪᖅ ᑕᒪᓐᓇ 1955-ᖑᑎᓪᓗᒍ.  ᓄᓇᓕᕈᖅᐸᓪᓕᐊᓕᖅᑐᓂ ᑕᒫᓂ ᖃᓂᒋᔭᖓᓂ ᐅᓇᑕᖅᑎᓄᑦ ᓇᔪᖅᑕᐅᔪᒧᑦ, ᐊᒻᒪᓗ 1968−ᖑᑎᓪᓗᒍ ᑲᓇᑕᒥ ᒐᕙᒪᒃᑯᑦ ᐃᒡᓗᓕᐅᖅᐸᓪᓕᐊᓕᓚᐅᖅᓯᒪᔪᑦ ᓄᓇᓕᐅᔪᒥ, ᑮᓇᐅᔾᔭᒃᓴᓂᒃᑯᑦ ᐃᖅᑲᓇᐃᔭᖃᑦᑕᕆᐊᓯᓪᓗᑎᑦ.  ᓄᓇᕗᑦ ᐱᙳᕐᒪᑦ 1999-ᖑᑎᓪᓗᒍ, ᓄᓇᓕᐅᔪᑉ ᐊᑎᖓ ᐅᑎᖅᑎᑕᐅᓚᐅᖅᓯᒪᔪᖅ ᑯᒑᕐᔫᓕᖅᑐᓂ, ᑰᒐᓛᖕᓂᖓᓄᑦ, ᖃᓂᒋᔭᖓᓃᑦᑐᖅ ᑰᒃ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ.  ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ.  http://www.gov.nu.ca/iu

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐆᒪᔪᑦ ᐅᓪᓗᒥ ᖃᑏᓐᓇᑯᓗᐃᑦ ᐃᓐᓇᑐᖃᐃᑦ ᑕᒫᓂᕐᒥᐅᑕᐅᓯᒪᕗᑦ ᐃᓅᓯᖏᑕ ᐊᕝᕙᓗᐊᕆᓕᖅᑕᖏᓐᓂ ᓇᑦᓯᓕᖕᒥᐅᑕᑐᖃᐅᓯᒪᓂᖏᓐᓄᑦ.  ᖃᐅᑕᒫᑦ ᐃᓅᓯᖓ ᓄᓇᓕᐅᔪᒥ ᐅᓪᓗᒥᐅᔪᖅ ᐊᑐᖅᑐᑦ ᖃᓪᓗᓈᑦ ᐃᓕᖅᑯᓯᖏᓐᓂᒃ ᐊᑐᓲᖑᓪᓗᑎᑦ ᐊᒻᒪᓗ ᐃᓄᐃᑦ ᐱᖅᑯᓯᑐᖃᖏᓐᓂᒃ ᐊᑐᖅᑐᑎᑦ.  ᐆᑦᑑᑎᒋᓗᒍ, ᐃᓚᒌᑦ ᑕᓚᕖᓴᑦᑐᑦ ᖃᐅᔨᔭᐅᔪᓐᓇᓲᖑᕗᑦ ᑲᐃᕗᒥ ᐊᑐᖅᑐᑎᑦ ᐅᕝᕙᓘᓐᓃᑦ ᖁᒻᒧᐊᑦᑎᑕᐅᓯᒪᔪᒃᑯᑦ ᑕᓚᕖᓴᑦᑐᑎᑦ, ᓂᕆᓯᓐᓈᑦ ᐃᓄᐃᑦ ᓂᕿᖏᓐᓂᒃ ᓲᕐᓗᒃ ᐃᖃᓗᒃ ᐆᓯᒪᙱᑦᑐᖅ ᑲᑐᔾᔭᐅᔪᖅ ᓇᑎᕐᒥ.  ᑯᒑᕐᔪᒃ ᐃᓕᓐᓂᐊᕐᕕᖓ ᓴᖅᑮᓯᒪᕗᖅ ᐃᑭᐊᖅᑭᕕᒻᒥ ᑕᑯᒃᓴᐅᑎᑦᑎᔪᑦ ᓄᓇᓕᒻᒥ ᐊᑐᖅᑕᐅᖃᑦᑕᖅᑐᑐᖃᕐᓂᑦ ᐊᒻᒪᓗ ᖃᓄᐃᓕᐅᕈᑕᐅᓲᕐᓂᑦ. (http://www.polarnet.ca/~pellybay/) ᐃᑭᐊᖅᑭᕕᒃ ᐱᑐᖃᒐᓛᖑᒐᓗᐊᖅᑎᓪᓗᒍ (2000), ᐊᔾᔨᙳᐊᖃᐅᖅᐳᑦ ᐊᒻᒪᓗ ᓇᓗᓇᐃᔭᖅᓯᒪᔪᖃᐅᖅᐳᑦ ᓄᓇᓕᐅᔪᒥᒃ ᐊᒻᒪᓗ ᐃᓕᓐᓂᐊᕐᕕᒻᒥ ᐃᓅᓯᕆᔭᐅᕙᑦᑐᓂᑦ.  ᐃᓐᓇᑐᖃᐃᑦ ᑯᒑᕐᔪᖕᒥ ᖃᔭᓕᐅᕐᓂᕐᒥᒃ ᐃᓕᓐᓂᐊᑎᑦᑎᖃᑦᑕᕐᓂᑰᒋᕗᑦ ᑕᒪᓐᓇ ᐃᓕᖅᑯᓯᑐᖄᓘᔪᖅ ᐊᓯᐅᓂᐊᙱᒻᒪᑦ. (http://www.kugaaruk.com/kayakbuildingslideshow1.htm) ᐅᐊᑦᑎᐊᕈᕐᓂᓴ ᐅᔭᕋᖕᓄᑦ ᓴᓇᔭᐅᓯᒪᔪᖅ ᑐᒃᓯᐊᕐᕕᖓ ᑯᒑᕐᔪᒻᒥ ᐃᒡᓗᑐᖃᐅᓂᕋᖅᑕᐅᓚᐅᖅᓯᒪᕗᖅ ᓴᐳᔾᔭᐅᒋᐊᖃᓕᖅᑐᓂ ᐊᒻᒪᓗ ᐋᖅᑭᒋᐊᖅᑕᐅᓪᓗᓂ 1995-ᖑᑎᓪᓗᒍ, ᑭᓯᐊᓂᓕ ᓄᓇᓕᐅᔪᖅ ᓄᑖᕐᒥᒃ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓᓄᑦ ᑐᒃᓯᐊᕆᐊᓲᑦ. (http://www.arcticomi.ca/2kugaaruk.html) ᐋᓐᓕᑲᓐ ᑐᒃᓯᐊᕐᕕᖃᙱᑦᑐᑦ.

 

ᐊᒥᓲᓂᖅᓴᐃᑦ ᐃᓄᖏᑦ ᑯᒑᕐᔪᒻᒥ ᐃᓅᒐᓗᐊᖅᑎᓪᓗᒋᑦ, ᖃᓪᓗᓇᐅᔭᕈᓐᓇᖏᑦᑐᑦ ᐃᓄᒃᑎᑐᑐᐊᖅ ᐅᖃᓪᓚᓲᑦ 2%-ᑐᐃᓐᓇᐅᕗᑦ ᓄᓇᓕᒻᒥ.  ᐊᒥᐊᒃᑯᖏᓪᓕ ᖃᓪᓗᓇᐅᔭᓲᑦ, ᐊᒻᒪᓗ ᐃᒪᓐᓇᐸᓗᒃ 80%-ᖏᑦ ᖃᓪᓗᓈᑎᑐᑐᐊᖅ ᐅᖃᐅᓯᖃᓲᑦ ᐊᖏᕐᕋᒥᓂᑦ.  ᑭᓯᐊᓂᓕ 67%−ᖑᔪᑦ ᐃᓄᒃᑎᑐᑦ ᐅᖃᐅᓯᓪᓗᐊᑕᕐᓂᕋᖅᑐᑦ, 20%-ᖑᔪᑦ ᐅᖃᖅᓯᒪᓪᓗᑎᑦ ᐅᖃᐅᓯᕆᔭᐅᓲᖑᓂᕋᖅᑐᓂ ᐊᖏᕐᕋᒥ, ᐊᒻᒪᓗ 59%−ᖑᔪᑦ ᐅᖃᖅᓯᒪᔪᑦ ᐃᓄᒃᑎᑑᓲᖑᒻᒪᑕ ᐊᖏᕐᕋᒥᓂᒃ ᐊᒻᒪᓗ ᐅᖃᐅᓯᕆᔭᐅᒃᑲᓂᕐᓂᕋᖅᑕᒥᓂᐅᓪᓗᓂ.  ᐸᐸᑕᐅᓂᖓ ᐃᓄᐃᑦ ᐅᖃᐅᓯᖓ ᐃᓱᒫᓘᑎᒋᔭᐅᕗᖅ, ᐃᓕᓐᓂᐊᕐᕕᒻᒥ ᐃᓄᒃᑎᑐᑦ ᐃᓕᓐᓂᐊᑎᑦᑎᓲᑦ ᖁᑦᑎᓐᓂᑖᕋᓱᐊᕐᓂᖏᓐᓂᑦ 2.  ᓂᕆᐅᒍᓐᓇᖅᐳᑎᑦ ᑲᑎᑦᑕᕋᐃᒻᒪᑕ ᐃᓄᑐᐃᓐᓇᐃᑦ ᐊᒻᒪᓗ ᑲᑎᒪᔪᖃᓕᕋᐃᒻᒪᑦ ᑕᒪᒃᑮᓐᓂᒃ ᐃᓄᒃᑎᑐᑦ ᖃᓪᓗᓈᑎᑐᓪᓗ ᐊᑐᓲᑦ, ᑭᓯᐊᓂᓕ ᓂᕆᐅᑦᑐᒃᓴᐅᓂᐊᙱᑦᑐᑎᑦ ᐃᓄᒃᑎᑑᖅᑐᑦ ᖃᓪᓗᓇᐅᔭᓕᖅᑎᑕᐅᑲᐅᑎᒋᓂᐊᕐᓂᖏᓐᓂᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᖑᔪᖅᑕᖃᕈᓗᒻᒪᑦ.  ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ.  ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

 

ᑯᒑᕐᔪᒻᒥ ᐊᒥᓲᓂᖏᑦ ᐃᓄᐃᑦ ᒪᒃᑯᑐᒡᒍᑕᐅᕗᑦ.  2011-ᖑᑎᓪᓗᒍ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᐃᓚᐅᖅᓯᒪᔪᑦ 110−ᖑᔪᑦ ᐃᓕᓐᓂᐊᓕᓵᖅᑎᐅᒻᒪᑕ ᐊᒻᒪᓗ 270−ᐅᔪᑦ ᐃᓕᓐᓂᐊᕆᐊᓲᖑᓪᓗᑎᑦ ᓱᕈᓰᑦ, 49%−ᖏᑦᖏ ᐅᑭᐅᓖᑦ 18-ᓂᑦ ᑐᖔᓂᓗ, ᓄᓇᓕᒻᒥ ᐅᑭᐅᕆᔭᐅᓂᖅᓴᐅᓪᓗᓂ.  3%-ᑐᐃᓐᓇᑯᓗᖏᑦ ᐃᓄᖏᑦ ᐅᑭᐅᓖᑦ 65−ᓂᑦ ᐅᖓᑖᓄᓪᓗ.

ᑮᓇᐅᔾᔭᒃᓴᕈᑕᐅᔪᑦ: 

ᑯᒑᕐᔪᖕᒥ ᐱᖅᑯᓯᑐᖃᖅᑎᒍᑦ ᐃᓱᓕ ᐃᓅᓯᖃᐅᖅᑑᒻᒪᑕ, ᓄᓇᓕᓐᓂ ᑮᓇᐅᔭᓕᐅᕈᑎᖃᕋᓱᐊᓲᑦ ᓂᐅᕕᕐᓂᒃᑯᑦ ᐊᒻᒪᓗ ᐱᔨᑦᑎᕋᕐᓂᒃᑯᑦ ᓄᓇᓕᒻᒥᐅᔪᑦ.  ᐃᓄᐃᑦ ᐊᒥᓱᑦ ᐊᖑᓇᓱᒋᐊᓲᑦ ᐊᒻᒪᓗ ᐃᖃᓗᒐᓱᐊᖅᑐᑎᑦ.  ᐊᒻᒪᓗᒃᑲᓐᓂᖅ, ᐃᓚᖏᓪᓗ ᖃᐅᔨᒪᔭᐅᔪᒻᒪᕆᐅᕗᑦ ᓴᓇᙳᐊᖅᑏᑦ ᐃᓄᖏᑦ.  ᐃᒪᓕ ᐃᓗᐃᑦᑐᖅ, ᐃᓅᒍᓐᓃᓚᐅᖅᓯᒪᔪᖅ 2012-ᖑᑎᓪᓗᒍ, ᖃᐅᔨᒪᔭᐅᕗᖅ ᓴᓇᙳᐊᓲᒥᓂᐅᓂᖓᓄᑦ ᑑᒑᕐᓂᒃ ᐊᑐᖅᑐᓂ (http://www.spiritwrestler.com/catalog/index.php?artists_id=353), ᐊᒻᒪᓗ ᐃᕐᓂᖏᒃ ᓕᑐᕆᒃ ᒪᐃᑯ, ᑕᒪᒃᑮᒃ ᓴᓇᙳᐊᖅᑎᐅᕘᒃ.  ᐊᒡᓂᔅ ᐃᖅᑯᒐᖅᑐᖅ ᐊᓪᓚᓯᒪᔪᓂᑦ ᓂᕕᖓᑖᓕᐅᖃᑦᑕᕐᓂᑰᓯᒪᒋᕗᖅ ᐊᕙᓗᒥᐅᑕᕐᓂᑦ.  ᑯᒑᕐᔪᒃ ᒐᕙᒪᒃᑯᓐᓄᑦ ᐊᓪᓚᕝᕕᖃᕐᕕᐅᙱᒃᑲᓗᐊᖅᑎᓪᓗᒍ ᑮᓇᐅᔭᓕᐅᕐᕕᐅᓗᐊᓲᖑᓪᓗᑎᑦ ᓄᓇᕗᒥ ᐊᒥᓱᓂᑦ ᓄᓇᓕᓐᓂ, ᓄᓇᓕᓐᓂ ᐊᐅᓪᓚᐅᔾᔨᔩᑦ ᐱᔨᑦᑎᕋᓲᑦ ᓂᐅᕐᕈᐊᓂᑦ ᐊᐅᓪᓚᕈᒪᔪᓄᑦ ᑕᑯᔭᖅᑐᕐᓗᑎᑦ ᓄᓇᑐᐃᓐᓇᕐᒥ ᓂᕐᔪᑎᖏᓐᓂᓪᓗ.

 

ᐊᒥᓱᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᑯᒑᕐᔪᒃ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ.  ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᑯᐊᐸᒃᑯᓐᓂ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᑯᒑᕐᔪᒃ ᖃᓂᒋᔭᖓ ᓂᕐᔪᑎᓕᒻᒪᕆᐅᕗᖅ.  ᓄᓇᓕᓐᓂ ᐳᐃᔩᑦ ᐅᑯᐊᖑᕗᑦ ᐊᕐᕖᑦ, ᑑᒑᓖᑦ, ᕿᓚᓗᒐᐃᑦ, ᐊᒻᒪᓗ ᓇᑦᑏᑦ.  ᐃᖃᓗᒃᐲᑦ ᑰᖕᒦᓲᖑᓪᓗᑎᑦ.  ᓯᔾᔭᖏᑦ ᖃᐃᖅᓱᒡᒍᑕᐅᓪᓗᑎᑦ ᐅᔭᕋᖃᐅᖅᑐᑎᑦ ᐊᒻᒪᓗ ᓄᓇᖓ ᓇᔪᒐᕆᔭᐅᓲᖅ ᐅᑲᓕᕐᓄᑦ, ᑎᕆᒐᓂᐊᓄᑦ, ᐊᕿᒡᒋᓄᑦ, ᑭᒡᒐᕕᐊᕐᔪᒃ ᐊᒻᒪᓗ ᑐᑦᑐᐃᑦ.  ᓇᓄᐃᑦ ᑕᒫᓂ ᓄᓇᒥ ᐃᒪᕐᒥᓗ ᑕᑯᔭᐅᓲᖑᒻᒥᔪᑦ.

ᐅᖃᓕᒫᑲᓐᓂᕐᓃᑦ : 
  • ᕙᓕᑭ, ᐊᐃᓴᓐ.  ᓇᑦᓯᓕᖕᒥᐅᑦ ᐃᓄᖏᑦᓂᐅ ᔪᐊᒃ: ᒥᐊᓕᒐᕐᓂ ᑕᑯᔭᒐᖃᕐᕕᒃ ᐊᑐᖅᑕᐅᖃᑦᑕᖅᓯᒪᔪᓂᑦ ᑎᑎᕋᖅᑎᖏᑦ, 1970.
  • ᕕᐊᓇᑦ, ᔮᓐ & ᓲᓴᓐ ᕉᓕ, ᐋᖅᑮᒋᐊᕆᔩᑦ.  ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2004.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᐅᖃᐅᓰᑦ ᐋᖅᑭᓱᖅᓯᒪᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᐃᓅᓯᖏᑦ ᐅᑭᐅᖅᑕᖅᑐᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2010.
  • ᐃᓴᓐᒪᓐ, ᕕᐊᑎ ᑯᕙᔭᓯ.  ᐃᕙᓗᖏᑦ ᐊᓐᓇᐅᒪᔾᔪᑏᑦ: ᐃᓄᐃᑦ ᐊᓐᓄᕌᖏᑦ ᖃᓄᐃᑦᑑᖃᑦᑕᓚᐅᖅᓯᒪᓂᖏᑦ.  ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ 1997.
  • ᒪᒃᑖᓄᓪᑦ, ᔮᓐ.  ᐅᑭᐅᖅᑕᖅᑐᑉ ᓯᓚᖓᐃᓄᐃᑦ ᐅᓪᓗᕆᐊᓂᓕᕆᓂᖏᑦ, ᐅᓪᓗᕆᐊᑦ ᐅᓂᒃᑳᖏᑦ ᐅᓂᒃᑳᖅᑐᐊᑐᖃᖏᓪᓗ ᐅᑉᐱᕆᔭᑦ.  ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑏᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪ ᑕᑯᔭᒐᖃᕐᕕᒃ, 1998.
  • ᒪᒌ, ᕌᕗᑦ.  ᑭᖑᓪᓕᖅᐹᖅ ᑕᐅᑐᙳᐊᖅᑕᐅᓯᒪᓂᑯ: ᐃᓄᐃᑦ ᐊᑐᖃᑦᑕᕐᓂᑯᒥᓂᖏᑦ ᐅᑭᐅᖅᑕᖅᑐᒥ.  ᑐᕌᓐᑐ: ᑮ ᐳᐊᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨᔅ−ᕼᕿᕗᑦ ᔪᒪᐃᓐ.  ᐃᓄᐃᑦ: ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᑕᑯᓇᓪᓗᒋᑦ.  ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 1995.
  • ᑲᑎᒪᔨᖏᑦ ᑲᓇᑕᒥ, 2006. (ᐊᒻᒪᓗ ᐊᑐᐃᓐᓇᐅᒻᒥᔪᑦ ᖃᕋᓴᐅᔭᒃᑯᑦ ᓄᓇᕗᑦ ᒐᕙᒪᖏᑕ ᐃᖅᑲᓇᐃᔭᖅᑎᑖᕆᔭᐅᕋᑖᖅᑐᑦ ᑐᑭᓯᒋᐊᖅᑎᑕᐅᓂᖏᓐᓄᑦ ᐃᑭᐊᖅᑭᕕᖓᓂ)(http://www.orientation.hr.gov.nu.ca/i18n/english/pdf/The%20Inuit%20Way.pdf)