You are here

ᑲᖏᖅᑐᒑᐱᒃ

ᑲᖏᖅᑐᒑᐱᒃ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᑕᐃᒪᐃᑦᑐᒡᒍᑕᐅᒻᒥᒻᒪᑕ ᕿᑭᖅᑖᓗᒻᒥ, ᑲᖏᖅᑐᒑᐱᑉ ᖃᓂᖏᔭᖓ ᐃᓄᓐᓄᑦ ᑐᐱᕐᕕᐅᖃᑦᑕᖅᑐᑐᖃᐅᓯᒪᕗᖅ ᓄᑦᑎᖃᑦᑕᖅᑐᒥᓂᐅᓪᓗᑎᑦ ᐊᕐᕌᒍ ᐊᓂᒍᖅᐸᓪᓕᐊᑎᓪᓗᒍ ᐆᒪᔪᐃᑦ ᐊᒻᒪᓗ ᐊᑐᕋᒃᓴᑦ ᐊᑐᐃᓐᓇᐅᒪᔪᑦ ᒪᓕᑦᑕᐅᓪᓗᑎᑦ.  ᐃᓄᒃᑎᑐᑦ ᑲᖏᖅᑐᒑᐱᒃ ᑐᑭᓕᒃ “ᑲᖏᖅᑐᖓ ᐱᐅᔫᓂᖓᓄᑦ.”  ᐊᕐᕕᓂᐊᖅᑏᑦ ᑕᒪᐅᙵᓚᐅᖅᓯᒪᑎᓐᓇᒋᑦ ᓱᓕ 1800-ᖏᓐᓂ, ᐃᓄᐃᑦ ᐊᖑᓇᓱᖃᑦᑕᖅᑐᒥᓂᐅᕗᑦ ᐊᕐᕕᓂᑦ ᑕᒪᐅᙵᕋᐃᒻᒪᑕ.  ᐃᓕᓴᕆᔭᐅᓗᓂ ᑕᒪᓐᓇ ᐱᒻᒪᕆᐅᓂᖓ ᐊᕐᕕᓂᐊᕐᓂᑉ, ᐃᒐᓕᖅᑑᖅ ᑕᕆᐅᖓ, ᓄᓇᓕᑉ ᓯᓚᑖᓃᑦᑐᖅ, ᓴᓂᕐᕙᖅᑕᐅᓚᐅᖅᓯᒪᕗᖅ ᓯᕗᓪᓕᖅᐸᐅᓪᓗᓂ ᑲᓇᑕᒥ ᐊᕐᕕᓄᑦ ᐸᐸᑕᐅᕕᖓ 2010-ᖑᑎᓪᓗᒍ.

 

ᑎᑎᕋᖅᑕᐅᓯᒪᔪᑦ ᑕᑯᒃᓴᐅᑎᑦᑎᕗᑦ ᓯᕗᓪᓕᖅᐹᕐᒥᒃ ᖃᓪᓗᓈᑦ ᕙᐃᑭᖕᔅ−ᖑᓂᕋᖅᑕᐅᔪᑦ ᑕᒪᐅᙵᓚᐅᖅᓯᒪᒻᒪᑕ 1000 AD ᐊᕐᕌᒍᖏᓐᓂ.  ᑭᖑᓪᓕᕐᒥ ᑎᑎᕋᖅᑕᐅᓯᒪᓂᑯᑦ ᖃᓪᓗᓈᑦ ᑕᒪᐅᙵᖅᑐᒥᓂᐅᓪᓗᑎᑦ 1616-ᒥ, ᕌᕗᑦ ᕙᐃᓚᑦ ᐊᒻᒪᓗ ᐅᐃᓕᐊᒻ ᕚᐸᓐ ᖃᐅᔨᓴᖅᑐᒥᓂᐅᓪᓗᑎᑦ ᓄᓇᙳᐊᓕᖅᓱᐃᓪᓗᑎᑦ.  ᔮᓐ ᕌᔅ ᐊᑏᓚᐅᖅᓯᒪᕗᖅ ᖃᓪᓗᓈᑎᑐᑦ ᑖᔅᓱᒥᖓ, ᑲᓚᐃᑦ ᕆᕗᕐ, 1818−ᖑᑎᓪᓗᒍ.  ᐊᕐᕕᖃᓗᐊᕐᓂᖓᓄᑦ ᑕᒪᒃᑮᒃ ᒥᐊᓕᒐᐃᑦ ᐊᒻᒪᓗ ᓯᒃᑳᑦᑏᑦ ᑕᒪᐅᙵᓕᓚᐅᖅᓯᒪᔪᑦ 1820−ᖏᓐᓂ ᐊᒻᒪᓗ ᐊᖑᓇᓱᒃᑐᑎᑦ 1900−ᕈᕋᓱᐊᕐᓂᖓᓂᑦ, ᖃᑦᑏᓐᓇᕈᖅᑐᒥᓂᐅᑎᓪᓗᒋᑦ ᐊᕐᕖᑦ.  1924−ᖑᑎᓪᓗᒍ ᕼᐊᑦᓴᓐᔅ ᕙᐃ ᑲᒻᐸᓂᖓ ᓂᐅᕕᕐᕕᓕᐅᓕᓚᐅᖅᓯᒪᔪᖅ, ᐃᓄᐃᑦ ᐊᔾᔨᒌᙱᑦᑐᓃᙶᖅᑐᑎᑦ ᑕᒪᐅᙵᖃᖅᑕᖅᑐᒥᓂᐅᓪᓗᑎᑦ.  ᒥᐊᓕᒐᕐᓂ ᐅᒥᐊᕐᔪᐊᖏᑦ ᓯᓚᓐᓂᐊᕐᕕᓕᐅᓚᐅᖅᓯᒪᔪᑦ 1940−ᖏᓐᓂ ᐱᖑᐊᕐᔪᖕᒥ ᖃᓂᒋᔭᖓᓃᑦᑐᖅ ᑲᖏᖅᑐᒑᐱᑉ, ᑭᖑᓂᐊᒍᑦ ᐃᓕᓐᓂᐊᕐᕕᓕᐅᖅᑐᖃᓕᕆᓪᓗᓂ 1960−ᖏᓐᓂ.  ᑲᖏᖅᑐᒑᐱᒃ ᓄᑦᑎᖅᑕᐅᓚᐅᖅᓯᒪᔪᖅ ᐸᑐᕆᓴ ᑕᕆᐅᖓᓄᑦ ᐅᓪᓗᒥᐅᓕᖅᑐᖅ ᐃᓂᒋᓕᖅᑕᖓ ᑕᐅᕙᓂ 1967−ᖑᑎᓪᓗᒍ ᐊᒻᒪᓗ 1970−ᖏᓐᓂ ᐃᒡᓗᓕᐅᕐᕕᐅᑦᑎᐊᓂᖅᓴᐅᒍᓐᓇᕐᓂᖓᓄᑦ, ᓲᕐᓗᒃ ᐃᒪᒃᓴᖃᕐᓗᑎᑦ, ᓄᓇᓕᓐᓂ ᒥᕝᕕᓕᐅᕐᓗᑎᑦ, ᐊᒻᒪᓗ ᓄᓇᓕᐅᔪᖅ ᐱᕈᖅᐸᓪᓕᐊᒍᓐᓇᖁᓪᓗᒍ. 

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ.  ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ.  http://www.gov.nu.ca/ 

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓕᖅᑯᓯᖓ ᐱᕐᔪᐊᖑᕗᖅ ᐊᑐᖅᑕᐅᓲᖑᓪᓗᓂ ᑲᖏᖅᑐᒑᐱᖕᒥᐅᑕᕐᓄᑦ, ᐊᒻᒪᓗ ᐊᖑᓇᓱᖃᑦᑕᓲᖑᕗᑦ ᓱᓕ ᖃᐅᑕᒫᑦ ᐃᓅᖏᓐᓂ.  ᐱᖅᑯᓯᓕᕆᕝᕕᒃ ᐃᓄᐃᑦ ᐃᓕᓐᓂᐊᕐᕕᖓ (www.piqqu.ca), ᐱᓕᕆᐊᖑᕗᖅ ᓄᓇᕗᑦ ᒐᕙᒪᖏᑕ ᐃᓕᖅᑯᓯᓕᕆᔨᒃᑯᖏᓐᓄᑦ ᐊᒻᒪᓗ ᒫᓐᓇᐅᔪᖅ ᐊᐅᓚᑕᐅᓕᖅᑐᓂ ᓄᓇᕗᑦ ᓯᓚᑦᑐᓴᕐᕕᖓᓄᑦ, ᑕᒫᓃᑦᑐᓂ.  ᐱᔾᔪᑎᒋᔭᖓ ᐃᓕᓐᓂᐊᑎᑦᑎᓗᑎᑦ ᐃᓄᐃᑦ ᐅᖃᐅᓯᖓᓂᑦ, ᐃᓕᖅᑯᓯᖓᓂᑦ, ᐱᒻᒪᕆᒋᔭᖏᓐᓂᑦ ᐊᒻᒪᓗ ᐱᖅᑯᓯᖏᓐᓂᑦ.  ᐊᒻᒪᓗᒃᑲᓐᓂᖅ, ᑲᖏᖅᑐᒑᐱᖕᒥ ᐃᓕᓴᖅᓯᕕᒃᑕᓕᒃ, ᓄᓇᓕᒻᒥ ᑐᙵᕕᓖᑦ ᖃᑭᒍᑎᒃᓴᓕᐅᙱᑦᑐᑦ ᑲᑐᔾᔨᖃᑎᒌᖑᔪᑦ ᓄᓇᓕᐅᔪᒥᒃ ᖃᓄᐃᑦᑕᐃᓕᑎᑦᑎᓇᓱᐊᓲᑦ.  ᐱᔨᑦᑎᕋᐅᑎᓂᑦ ᐊᔾᔨᒌᙱᑦᑐᓂᑦ ᐊᑐᐃᓐᓇᐅᒪᑎᑦᑎᓲᑦ, ᓲᕐᓗᒃ ᐃᓱᒪᓕᕆᕙᒃᑐᑎᑦ ᐊᒻᒪᓗ ᖃᓄᐃᑦᑕᐃᓕᓂᕐᒧᑦ ᐱᓕᕆᐊᖃᐅᕈᓘᔭᖅᑐᑦ ᐃᑲᔪᖅᑐᐃᓪᓗᑎᑦ ᓄᓇᓕᓐᓂ ᐅᖃᓕᒫᒐᖃᕐᕕᖓᓂ ᐊᒻᒪᓗ ᐃᓄᐃᑦ ᑭᒃᑯᑐᐃᓐᓇᐃᑦ ᖃᕋᓴᐅᔭᕐᒥᒃ ᐊᑐᕈᓐᓇᓲᖑᔪᑦ.  ᐱᓕᕆᐊᖃᐅᕈᓘᔭᕐᒥᔪᑦ ᒪᒃᑯᑦᑐᓄᑦ ᐊᒻᒪᓗ ᐃᓐᓇᑐᖃᕐᓄᑦ ᐊᒻᒪᓗ ᐊᖅᑭᒃᓱᐃᓲᑦ ᐱᓕᕆᐊᕐᓂᑦ ᓲᕐᓗᒃ ᓄᓇᑐᐃᓐᓇᕐᒧᑦ ᐊᐅᓪᓚᓂᕐᒥᒃ ᐱᓕᕆᐊᑦ, ᐃᓕᓐᓂᐊᑎᑦᑎᒍᒪᓪᓗᑎᑦ ᐊᒻᒪᓗ ᐋᖅᑭᐅᒪᑎᑦᑎᒍᒪᓪᓗᑎᑦ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓕᖅᑯᓯᖏᓐᓂᒃ ᐊᔪᙱᑕᖏᓐᓂᑦ, ᐊᒻᒪᓗ ᑕᕐᕆᔮᒃᓴᓕᐅᕐᓂᕐᒧᑦ ᑕᑯᓐᓇᒐᒃᓴᓕᐅᕐᓂᒧᓪᓗ ᐃᓕᓐᓂᐊᑎᑦᑎᓲᑦ.  ᐃᓕᓴᖅᓯᕕᒃ ᐋᖅᑮᓯᒪᒻᒥᔪᖅ ᐃᑦᑕᖅ ᐃᓕᖅᑯᓯᓕᕆᓂᕐᒧᑦ ᐱᖅᑯᓯᓕᕆᕕᒻᒥ ᖃᐅᔨᓴᕐᕕᒥᓪᓗ (http://ittaq.ca/) ᐊᒻᒪᓗ ᐋᓐᓕᑲᓐ ᑐᒃᓯᐊᕐᕕᖃᖅᑐᑎᑦ ᑲᖏᖅᖠᓂᕐᒥ.

 

ᑲᖏᖅᑐᒑᐱᖕᒥ ᐃᓄᒃᑎᑑᖅᑐᒡᒍᑕᐅᕗᑦ ᓄᓇᓕᒻᒥᐅᑦ.  2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ, 96%−ᖑᔪᑦ ᐃᓄᖏᑦ ᐃᓄᒃᑎᑐᑦ ᐅᖃᐅᓯᕆᔭᐅᖅᑳᕐᓂᕋᖅᓯᒪᕗᑦ ᐊᒻᒪᓗ ᐊᖏᕐᕋᒥᓂᒃ ᐅᖃᓪᓚᓲᖑᓪᓗᑎᑦ ᑖᒃᑯᐊᑎᒋ.  ᐃᒪᓐᓇᐸᓗᒃ 20%−ᖏᑦ ᑲᖏᖅᑐᒑᐱᖕᒥᐅᑦ ᖃᓪᓗᓇᐅᔭᕈᓐᓇᖏᑦᑐᑦ ᐅᐃᕖᑎᑐᓪᓘᓐᓃᑦ, ᐃᓛᓐᓂᒃᑯᑦ ᑕᒪᐅᙵᕆᐅᖅᑐᑦ ᐅᕝᕙᓘᓐᓃᑦ ᓂᐅᕐᕈᔪᑦ ᖃᓪᓗᓇᐅᔭᓲᕐᒥᒃ ᓇᓂᓯᒋᐊᖃᓲᑦ ᑐᓵᔨᖃᕐᓗᑎᑦ.  16%−ᑐᐃᓐᓇᑯᓗᖏᑦ ᐃᓄᖏᑕ ᐊᒻᓲᓂᖏᑦ ᖃᓪᓗᓇᐅᔭᓲᑦ ᐊᖏᕐᕋᒥᓂᒃ ᐅᖃᐅᓯᕆᔭᐅᒃᑲᓐᓂᕋᓗᐊᖅᑎᓪᓗᒍ ᐊᒻᒪᓗ ᖃᑦᑏᓐᓇᑯᓗᐃᑦ ᐅᐃᕖᑎᑑᓲᖑᓪᓗᑎᑦ.  ᑭᓯᐊᓂᓕ, 80%−ᖑᔪᑦ ᐅᖃᖅᑐᒥᓂᐅᓪᓗᑎᑦ ᖃᓪᓗᓇᐅᔭᓲᖑᒋᐊᖏᓐᓂᒃ.  ᐃᓄᐃᑦ ᑲᑎᒐᐃᒻᒪᑕ ᑭᒃᑯᑐᐃᓐᓇᐃᑦ ᐊᒻᒪᓗ ᑲᑎᒪᔪᖃᕋᐃᒻᒪᑦ ᑕᒪᒃᑮᓐᓂᒃ ᐅᖃᐅᓰᖕᓂᒃ ᐊᑐᖅᑐᓂᑦ ᓂᕆᐅᒍᓐᓇᖅᑐᑎᑦ, ᑭᓯᐊᓂᓕ ᓂᕆᐅᑦᑐᒃᓴᐅᓂᐊᙱᑦᑐᑎᑦ ᐃᓄᒃᑎᑑᖅᑐᑦ ᖃᓪᓗᓇᐅᔭᓕᖅᑎᑕᐅᑲᐅᑎᒋᓂᐊᕐᓂᖏᓐᓂᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᖑᔪᖅᑕᖃᕈᓗᒻᒪᑦ.  ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ.  ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

ᑲᖏᖅᑐᒑᐱᒻᒥ ᒪᒃᑯᑐᒡᒍᑕᒻᒪᕆᐅᕗᑦ ᐃᓄᖏᑦ.  2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᖅᑕᐅᓯᒪᔪᑦ 125−ᖑᓚᐅᖅᑐᑦ ᐃᓕᓐᓂᐊᕆᐊᓕᓵᓲᑦ ᓱᕈᓯᓛᑦ ᐊᒻᒪᓗ 290 ᐃᓕᓐᓂᐊᕆᐊᓲᑦ ᓱᕈᓰᑦ, 44%−ᖑᓪᓗᑎᑦ ᐃᓄᖏᑦ ᐅᑭᐅᓖᑦ 18−ᓂ ᑐᖔᓂ.  ᐃᓐᓇᑐᖃᐃᑦ ᖃᑦᑏᓐᓇᑯᓗᐃᑦ ᑲᖏᖅᑐᒑᐱᖕᒥ ᐊᒥᓱᑦᓂ ᐱᓕᕆᐊᓂᑦ ᐃᓚᐅᖃᑕᐅᓲᖑᕗᑦ ᓲᕐᓗᒃ ᐃᓕᓴᖅᓯᕕᒃ ᑲᑐᔾᔨᖃᑎᒌᓄᑦ ᑲᒪᒋᔭᐅᕙᑦᑐᑦ, ᐃᓄᐃᑦ ᐱᖅᑯᓯᑐᖃᖏᑦ ᐱᒻᒪᕆᒋᔭᖏᑦ ᐊᒻᒪᓗ ᖃᐅᔨᒪᔭᖏᑦ ᐃᓕᓐᓂᐊᖅᑎᑕᐅᕙᑦᑐᑎᑦ ᒪᒃᑯᓂᖅᓴᓄᑦ ᐊᒻᒪᓗ ᑎᑎᕋᖅᑕᐅᓪᓗᑎᑦ ᐃᓚᒌᑦ ᐊᑐᖃᑦᑕᖅᑕᒥᓂᑯᖏᑦ.  

ᑮᓇᐅᔾᔭᒃᓴᕈᑕᐅᔪᑦ: 

ᑲᖏᖅᑐᒑᐱᑦ ᐱᖅᑯᓯᑐᖃᖅᑎᒍᑦ ᐊᑐᖅᑐᑎᑦ ᓄᓇᓕᒻᒦᒻᒪᑕ ᓄᓇᓕᒻᒥᐅᑦ ᑮᓇᐅᔭᓕᐅᕋᓱᐊᓲᑦ ᓂᐅᕕᐊᒃᓴᖃᖅᑐᑎᑦ ᐱᔨᑦᑎᕋᖅᑐᑎᓪᓗ ᓄᓇᓕᒻᒥᐅᑕᓄᑦ.  ᐊᒥᓱᑦ ᐃᓄᐃᑦ ᐊᖑᓇᓱᓲᑦ ᓂᕿᒋᓂᐊᖅᑕᖏᓐᓄᑦ.  ᑲᖏᖅᑐᒑᐱᒃ ᒐᕙᒪᒃᑯᓐᓄᑦ ᐊᓪᓚᕝᕕᖃᕐᕕᐅᙱᒃᑲᓗᐊᖅᑎᓪᓗᒍ ᑮᓇᐅᔭᓕᐅᕈᑎᒋᔭᐅᓗᐊᓲᖑᓪᓗᑎᑦ ᐊᓯᖏᓐᓂᒃ ᓄᓇᕗᑉ ᓄᓇᓕᖏᓐᓂᑦ, ᐱᓇᓱᐊᕐᓂᖅᓴᐅᔪᑦ ᕼᐊᒻᓚᒃᑯᑦ ᐳᓚᕋᖅᑐᓕᕆᔪᓐᓇᕐᓂᖓ, ᐊᒥᓱᓂᑦ ᐆᒪᔪᖃᕐᓂᖓᓄᑦ, ᑲᔾᔮᓇᖅᑐᒻᒪᕆᐅᓂᖓᓄᑦ, ᐊᒻᒪᓗ ᖃᓂᒋᔭᖓᓂ ᐊᕐᕕᓄᑦ ᐸᐸᑦᑎᕕᑕᖃᖅᑐᓂ.  ᓂᐅᕐᕈᐊᑦ ᑲᖏᖅᑐᒑᐱᖕᒨᓲᑦ ᖃᖅᑲᓯᐅᕆᐊᖅᑐᖅᑐᑎᑦ, ᐱᓗᐊᖅᑐᒥᒃ ᖃᓂᒋᔭᖓᓄᑦ ᓵᒻ ᑕᕆᐅᖓᓂ, ᓄᓇᕐᔪᐊᕐᒥ ᖃᐅᔨᒪᔭᐅᓛᖑᔪᖅ ᐃᓐᓈᕈᒻᒪᕆᐅᓂᖓᓂᑦ.  ᐊᐅᓪᓚᐅᔾᔨᔩᓪᓗ ᐊᐅᓪᓚᑎᑦᑎᓲᑦ ᐅᒥᐊᖅᑐᑎᑦᑎᓪᓗᑎᑦ ᑕᑯᔭᖅᑐᑎᑎᓪᓗᑎᑦ ᓯᓈᖓᓄᑦ ᐅᐱᕐᖔᒃᑯᑦ ᐅᕝᕙᓘᓐᓃᑦ ᐊᕐᕖᑦ ᐸᐸᑕᐅᕝᕕᖓᓄᑦ ᓯᑰᙱᑎᓪᓗᒍ. 

 

ᐊᒥᓱᓂᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᑲᖏᖅᑐᒑᐱᖕᒥ ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ.  ᓄᐊᑐᓐ ᓂᐅᕕᕐᕕᒃ “ᑮᓇᐅᔭᓕᕆᔪᓐᓇᕐᒥᔫᒐᓗᐊᑦ”, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖃᕐᕕᒋᒍᓐᓇᖅᑐᒋᑦ ᓂᐅᕕᕐᕕᒃᑯᑦ, ᓯᒃᑮᕐᕕᒃᓴᐅᓪᓗᑎᑦ, ᐊᓯᖏᓪᓗ.  ᐊᐅᒃᑕᔫᓅᖅᑐᑦ ᑮᓇᐅᔭᖅᑎᒍᑦ ᐊᑭᓕᐅᑎᐅᕙᑦᑐᑦ ᐊᑭᓕᒃᓴᓂᒍᓐᓇᐅᑏᓪᓗ ᓂᐅᕕᕐᕕᓂ ᐊᑐᕋᒃᓴᐅᓲᑦ.    ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ. 

ᐆᒪᔪᐃᑦ: 

ᕿᑭᖅᑖᓘᑉ ᐃᑭᕋᓴᖓᓃᑦᑐᓂ, ᐳᐃᔩᑦ ᐊᒥᓲᕗᑦ ᑕᒫᓂ ᓄᓇᓕᑉ ᖃᓂᒋᔭᖓᓂ ᐃᒪᕐᒥ, ᓇᓄᐃᑦ, ᓇᑦᑏᑦ, ᐊᒻᒪᓗ ᐊᕐᕖᑦ ᐊᖑᓇᓱᒃᑕᐅᕙᑦᑐᑎᑦ.  ᐃᖃᓗᐃᑦ ᐊᒻᒪᓗ ᒥᑭᔪᑦ ᐆᒪᔪᐃᑦ ᑕᒫᓃᓲᖑᒻᒥᔪᑦ ᓄᓇᓕᑉ ᖃᓂᒋᔭᖓᓂ, ᓲᕐᓗᒃ ᐊᕿᒡᒌᑦ, ᑎᕆᒐᓂᐊᑦ, ᐅᑲᓖᑦ, ᓂᕐᓖᑦ ᐊᒻᒪᓗ ᒥᑏᑦ ᑕᒪᐅᙵᓲᖑᓪᓗᑎᑦ.  ᑐᑦᑐᖃᓲᖑᒻᒥᔪᑦ ᑕᑯᔭᐅᔪᓐᓇᖅᑐᑎᑦ ᓄᓇᖅᐸᓯᒻᒨᖅᑐᖃᕈᓂ ᐊᒻᒪᓗ ᑎᖕᒥᐊᑦ ᐊᒥᓱᓃᓲᑦ ᓇᒥᕈᓘᔭᖅ ᐊᐅᔭᐅᑎᓪᓗᒍ, ᐊᒻᒪᓗ ᐃᓐᓈᕈᕐᓂᑦ ᐃᕙᔭᖅᑐᓲᖑᓪᓗᑎᑦ.

 

ᐊᕐᕖᑦ ᐸᐸᑕᐅᕝᕕᖓ ᓴᓂᕐᕙᖅᑕᐅᓚᐅᖅᓯᒪᔪᖅ 2010−ᖑᑎᓪᓗᒍ ᐃᒐᓕᖅᑑᕐᒥ ᑕᕆᐅᖓᓂ ᓂᖏᖓᓂᒃ ᑲᓇᑕᒥ ᐆᒪᔪᐃᑦ ᐸᐸᑕᐅᕕᖓᓂ (NWA). (http://www.ec.gc.ca/ap-pa/default.asp?lang=En&n=2A61DE20-1) ᐊᖏᓛᖑᕗᖅ NWA−ᓂ ᑲᓇᑕᒥ, ᐊᖏᓂᖃᖅᑐᓂ 336 000 ᓄᓇᖏᑦ ᐊᖏᓂᖏᑦ ᕼᐃᐊᒃᑎᐅᕐᔅ.  120 km ᓂᒋᐊᓃᑦᑐᓂ ᑲᖏᖅᑐᒑᐱᑉ, ᐅᐊᖕᓇᖓᓂ ᕿᑭᖅᑖᓘᑉ, ᑖᓐᓇ ᐸᐸᑦᑎᕕᖓ ᐱᖃᓯᐅᔾᔨᔪᖅ ᓯᔾᔭᖏᓐᓂ ᕿᑭᖅᑕᖏᓐᓂᓪᓗ ᐃᒐᓕᖅᑑᕐᒥ ᐊᒻᒪᓗ ᑐᑭᐊᓂ ᑕᕆᐅᖓᓄᑦ 12 ᒪᐃᔪᓪᔅ ᐅᖓᓯᓐᓂᓕᒃ ᓯᔾᔭᒥ.  ᐃᓄᒃᑎᑐᑦ ᑕᐃᔭᐅᓲᖅ ᓂᖏᖓᓂᖅ ᓴᔅᓯᓲᖑᓂᖓᓄᑦ.  ᓄᓇᕐᔪᐊᕐᒥ ᐊᕐᕕᓄᑦ ᐸᐸᑦᑎᕕᐅᖅᑳᑎᖅᐹᖑᓯᒪᕗᖅ ᐊᒻᒪᓗ ᐋᖅᑭᒃᑕᐅᓚᐅᖅᓯᒪᔪᖅ ᐱᓕᕆᖃᑎᒌᒍᑕᐅᓪᓗᓂ ᐃᓄᐃᑦ ᓄᓇᕗᑦ ᓄᓇᑖᖅᓯᒪᔪᓄᑦ ᐊᒻᒪᓗ ᑲᓇᑕᒥ ᒐᕙᒪᒃᑯᓐᓄᑦ ᐱᔪᓐᓇᖅᑎᑕᐅᓪᓗᑎᑦ ᓄᓇᕗᑦ ᓄᓇᑖᕈᑕᐅᓂᖓᓄᑦ ᐊᖏᕈᑎᖓ.

ᐅᖃᓕᒫᑲᓐᓂᕐᓃᑦ : 
  • Bennett, John & Susan Rowley, eds. Uqalurait: an oral history of Nunavut. Montreal & Kingston: McGill-Queen’s University Press, 2004.
  • Dorais, Louis-Jacques. The language of the Inuit: syntax, semantics and society in the Arctic. Montreal & Kingston: McGill-Queen’s University Press, 2010.
  • Eber, Dorothy Harley. When the whalers were up North. Montreal & Kingston: McGill-Queen’s University Press, 1989
  • Issenman, Betty Kobayashi. Sinews of Survival: the living legacy of Inuit clothing. Vancouver: UBC Press, 1997.
  • MacDonald, John. The Arctic sky: Inuit astronomy, star lore and legend. Iqaluit & Toronto: Nunavut Research Institute and Royal Ontario Museum, 1998.
  • McGhee, Robert. The last imaginary place: a human history of the Arctic world. Toronto: Key Porter Books, Canadian Museum of Civilization, 2004.
  • Morrison, David and Georges-Hébert Germain. Inuit: glimpses of an Arctic past. Hull: Canadian Museum of Civilization, 1995.
  • Pauktuutit Inuit Women of Canada. The Inuit way: a guide to Inuit culture, rev. ed. Ottawa: Pauktuutit Inuit Women of Canada, 2006. http://www.uqar.ca/files/boreas/inuitway_e.pdf