You are here

ᑲᖏᖅᖠᓂᖅ

ᑲᖏᖅᖠᓂᖅ

ᐊᕕᒃᑐᖅᓯᒪᓂᖓ: 
Kivalliq School Operations (KSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐅᓪᓗᒥᐅᔪᖅ ᑲᖏᖅᖠᓂᑉ ᖃᓂᒋᔭᖓᓂ, ᐱᖓᓐᓇᖓᓃᑦᑐᖅ ᑕᓯᐅᔭᕐᔪᐊᑉ ᑕᕆᐅᖓᓂ, ᑐᓃᑦ ᓯᕗᕚᖏᑦ ᑕᒫᓃᖃᑦᑕᓚᐅᖅᓯᒪᔪᑦ (2000-500 BC), ᐃᓄᐃᑦ ᑕᒪᐅᙵᖃᑦᑕᖅᑐᒥᓂᐅᕗᑦ ᐆᒪᔪᕐᓂᑦ ᒪᓕᑦᑐᑎᑦ.  ᐊᒻᒪᓗᒃᑲᓐᓂᖅ ᐊᕐᕕᖅᑕᖃᖅᑐᓂ, ᐊᕐᕕᓂᐊᖅᑏᑦ ᐅᒥᐊᕐᔪᐊᖏᓐᓄᑦ ᐅᐸᑦᑕᐅᖃᑦᑕᓕᓚᐅᖅᓯᒪᔪᖅ 1800−ᖏᓐᓂ, ᑕᐃᔭᓐ ᐊᒻᒪᓗ ᒥᓕᐊᑎᓐ ᑰᖏᒃ ᐃᖃᓗᒐᓱᕝᕕᐅᖃᑦᑕᕐᕕᒃᓴᐅᒻᒪᑦ ᐃᖃᓗᒃᐲᑦ ᑕᒪᐅᙵᖃᑦᑕᖅᑐᑎᑦ ᑕᕆᐅᕐᒧᓗ.  ᐃᓄᒃᑎᑐᑦ ᕌᓐᑭᓐ ᐊᑎᖃᖅᑐᖅ, ᑲᖏᖅᖠᓂᖅ ᑐᑭᓕᒃ ᑲᖏᖅᑐᒦᓐᓂᖓᓂᑦ.  ᑲᖏᖅᖠᓂᖅ ᖃᓪᓗᓈᓄᑦ ᐅᐸᑦᑕᐅᖃᑦᑕᖅᑐᒥᓂᐅᒻᒪᕆᐅᕗᖅ, ᐱᒋᐊᖅᑐᒋᑦ 1600, ᑲᖏᖅᖠᓂᖅ ᐊᑦᑎᖅᑕᐅᓚᐅᖅᓯᒪᓪᓗᓂ ᔮᓐ ᕌᓐᑭᓐ ᕗᕆᑎᔅ ᐅᒥᐊᕐᔪᐊᒃᑯᑦ ᐅᓇᑕᖅᑐᓂᑦ.  ᑰᒡᔪᐊᕌᓗᖕᒥ ᑐᑦᑕᕐᕕᖃᐅᖅᑐᑎᑦ, ᕼᐊᑦᓴᓐᔅ ᕙᐃ ᑲᒻᐸᓂᐅᔪᖅ (HBC) ᑕᐅᒪᙵᖃᑦᑕᖅᑐᒥᓂᐅᕗᑦ ᑕᐅᖅᓰᖃᑎᖃᕆᐊᖅᑐᖅᑐᑎᑦ ᐃᓄᖕᓂᑦ, ᐊᒻᒪᓗ ᐃᓄᐃᑦ ᐃᖅᑲᓇᐃᔭᓕᓚᐅᖅᓯᒪᔪᑦ ᕗᕆᑎᔅ ᐊᒻᒪᓗ ᒥᐊᓕᒐᑦ ᐊᕐᕕᓂᐊᖅᑎᓄᑦ ᐃᓱᓕᑦᑎᒐᓱᐊᕐᓂᖓᓄᑦ 1900-ᖏᓐᓄᑦ.

 

ᐅᓪᓗᒥᐅᔪᖅ ᓄᓇᓕᒃ ᑕᐅᕙᑦᑐᖅ ᓴᓇᕕᐅᓂᑯᒥᓂᕐᒥᒃ ᑲᖏᖅᖠᓂᖅ ᓴᕕᕋᔭᑦᑕᕐᕕᒻᒥ 1955-ᖑᑎᓪᓗᒍ, ᐊᐅᓚᓂᖃᓚᐅᖅᓯᒪᔪᖅ 1962-ᕈᕋᓱᐊᕐᓂᖓᓂ.  ᐅᔭᕋᓐᓂᐊᕐᕕᒃ ᐃᖅᑲᓇᐃᔭᕐᕕᐅᕙᓚᐅᖅᓯᒪᔪᖅ ᑮᓇᐅᔾᔭᓴᓪᓗᑎᑦ ᐊᒻᒪᓗ ᐃᓄᐃᑦ ᑕᒪᐅᙵᖅᑐᒥᓂᐅᓪᓗᑎᑦ ᑭᕙᓪᓕᕐᒥᐅᑕᐃᑦ.  ᒪᑐᔭᐅᓚᐅᖅᑎᓪᓗᒋᑦ ᐅᔭᕋᓐᓂᐊᕐᕕᒃ ᐊᒻᒪᓗ ᓯᖃᑦᑎᕕᖓ, ᑲᓇᑕᒥ ᒐᕙᒪᒃᑯᑦ ᐱᒋᐊᖅᑎᑦᑎᓚᐅᖅᓯᒪᕗᑦ ᐱᓕᕆᐊᓂᑦ ᐋᖅᑭᒃᓱᐃᓪᓗᑎᑦ ᐃᖅᑲᓇᐃᔮᒃᓴᖅᐅᓂᐊᖅᑐᓂᑦ, ᐆᑦᑐᕋᖅᑐᑎᑦ ᐱᕈᖅᓴᐃᓂᕐᒥᒃ ᐊᒻᒪᓗ ᓴᓇᙳᐊᖅᑐᓕᕆᓂᕐᒥᒃ.  1970−ᖏᓐᓂ, ᒐᕙᒪᒃᑯᑦ ᓅᑦᑎᑦᑎᓚᐅᖅᓯᒪᔪᑦ ᐊᐅᓚᑦᑎᕕᖓᑕ ᐃᖅᑲᓇᐃᔭᕐᕕᖓᓂ ᑰᒡᔪᐊᕌᓗᖕᒥ ᑲᖏᖅᖠᓂᕐᒧᑦ, ᐊᒻᒪᓗ ᓄᓇᓕᐅᔪᖅ ᐊᕕᑦᑐᖅᓯᒪᔪᓂᑦ ᐃᖏᕐᕋᔪᓕᕆᕕᐅᓕᓚᐅᖅᓯᒪᔪᖅ ᐊᒻᒪᓗ ᓱᓇᒃᑯᑖᖅᑖᕐᕕᐅᓕᖅᑐᓂ, ᐃᑎᔪᒥᒃ ᑐᓚᑦᑕᕐᕕᖃᕐᓂᖓᓄᑦ ᐊᒻᒪᓗ ᒥᕝᕕᖓ ᐱᓪᓗᒍ.  ᓄᓇᕗᑖᕐᒪᑕ 1999-ᒥ, ᑲᖏᖅᖠᓂᖅ ᓄᓇᕗᑦ ᒐᕙᒪᖏᑕ ᐊᓪᓚᕝᕕᖏᓐᓄᑦ ᒪᑐᐃᕐᕕᐅᓕᓚᐅᖅᓯᒪᔪᖅ ᐱᓕᕆᕝᕕᖏᓐᓄᑦ ᐱᔨᑦᑎᕋᖅᑎᖏᓐᓄᓪᓗ.  ᐅᔭᕋᒃᓴᑦ ᐊᑭᑦᑐᕆᐊᕐᒪᑕ ᐊᒻᒪᓗ ᓄᓇᕗᑦ ᓄᓇᑖᕈᑕᐅᓂᖓᓄᑦ ᐊᒻᒪᓗ ᒐᕙᒪᒃᑯᑦ ᐋᖅᑭᓱᖅᓯᒪᓂᖏᓐᓄᑦ, ᐅᔭᕋᓐᓂᐊᖅᑐᓕᕆᓂᖅ ᐱᕙᓪᓕᐊᓂᖃᒃᑲᓂᖅᓯᒪᔪᖅ, ᑕᒫᓂ ᐱᕙᓪᓕᐊᖏᓐᓇᖅᑐᓂ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ.  ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ.  http://www.gov.nu.ca/

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

 

ᐳᓛᕐᕕᒃ ᖃᑉᓗ ᐃᓚᓐᓇᕇᖕᓂᐅᑉ ᒥᒃᓵᓄᑦ ᑲᑎᕝᕕᒃ ᐋᖅᑭᒃᓱᐃᓲᖅ ᖃᓄᐃᓕᐅᕈᓘᔭᕈᑕᐅᔪᓂᑦ ᐃᓅᖃᑎᒌᔾᔪᑎᓂᑦ, ᐱᖅᑯᓯᑐᖃᕐᓅᖓᔪᓂᑦ ᐃᓕᖅᑯᓯᕐᓅᖓᔪᓂᓪᓗ ᐱᓕᕆᐊᖃᖅᑎᑦᑎᓲᖅ ᑲᖏᖅᖠᓂᕐᒥᐅᓄᑦ ᐊᒻᒪᓗ ᑭᕙᓪᓕᕐᒥᐅᓄᑦ ᐸᐸᑦᑎᓇᓱᐊᖃᑦᑕᖅᑐᑎᑦ ᐃᓄᐃᑦ ᐃᓕᖅᑯᓯᖓᓂᒃ.  ᐱᖃᓯᐅᔾᔨᔪᖅ ᐱᓕᕆᐊᓕᐅᖅᑐᑎᑦ ᒪᒃᑯᑦᑐᓄᑦ ᐃᓐᓇᑐᖃᕐᓄᓪᓗ, ᑎᑎᕋᖃᑦᑕᖅᑐᑎᑦ ᓂᐱᓕᐅᕆᓪᓗᑎᑦ ᐃᓕᓐᓂᐊᑎᑦᑎᓪᓗᑎᓪᓗ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓕᖅᑯᓯᖏᓐᓂᒃ, ᓲᕐᓗᒃ ᐅᐱᕐᖏᓂᕐᒥᒃ ᓄᓇᑐᐃᓐᓇᕐᒥ, ᐃᒡᓗᕕᒐᓕᐅᕐᓂᕐᒥᒃ, ᒥᖅᓱᑎᑦᑎᓲᖑᓪᓗᑎᑦ ᐊᒥᕐᓂᑦ ᐊᒻᒪᓗ ᕿᒧᒃᓯᓂᑦ ᐋᖅᑭᐅᒪᑎᑦᑎᓂᕐᒧᑦ.  ᑲᑎᕝᕕᑉ ᐃᑭᐊᖅᑭᕕᖓ ᐊᔾᔨᙳᐊᖃᕈᓘᔭᖅᑐᖅ, ᑲᓱᖅᑕᕈᑎᓂᑦ ᐊᓯᖏᓐᓄᑦ ᐃᑭᐊᖅᑭᕕᓄᑦ ᐊᒻᒪᓗ ᐊᑐᕋᒃᓴᓄᑦ ᑭᓱᑐᐃᓐᓇᕐᓂᒃ. (www.pulaarvik.ca)

 

ᑲᖏᖅᖠᓂᖅ ᐊᒥᓱᓄᑦ ᒐᕙᒪᒃᑯᓐᓄᑦ ᑮᓇᐅᔭᓕᐅᕈᑎᒃᓴᓂᑦ ᓴᖅᑭᕐᕕᐅᓯᒪᓂᖓᓄᑦ ᐱᓕᕆᐊᖃᖅᑎᑦᑎᕙᓚᐅᖅᓯᒪᓪᓗᑎᑦ 1960-ᖏᓐᓂ ᐊᒻᒪᓗ 1970−ᖏᓐᓂ, ᑲᖏᖅᖠᓂᕐᒥ ᐊᔾᔨᒌᙱᑦᑐᕈᓘᔮᓗᖕᓂᒃ ᓴᓇᙳᐊᖅᑐᓕᕆᓲᖑᕗᑦ, ᓴᓇᐅᒐᖃᓲᑦ ᓇᑭᑐᐃᓐᓈᖓᔪᑦ ᓴᓇᐅᒐᖏᓐᓂᒃ ᐊᑐᖅᑐᑎᑦ.  ᓄᓇᓕᑑᕗᖅ ᓄᓇᕗᒥ ᐃᓄᐃᑦ ᓴᓇᙳᐊᖅᑏᑦ ᔭᕐᕋᐅᔭᓕᐅᖅᓲᖑᓪᓗᑎᑦ.  ᓯᕗᓪᓕᖅᐹᖏᓐᓂ ᔭᕐᕋᐅᔭᓕᐅᓂᕐᒧᑦ ᐃᓕᓐᓂᐊᑎᑦᑎᔪᖃᖃᑦᑕᓚᐅᖅᓯᒪᔪᖅ 1963−ᖏᓐᓂ 1977−ᒧᑦ, ᐊᒻᒪᓗ ᐃᓕᓐᓂᐊᖅᑕᐅᒃᑲᓐᓂᖃᑦᑕᓚᐅᖅᓯᒪᓪᓗᓂ ᓴᓇᙳᐊᖃᑦᑕᑲᓐᓂᓕᖅᑐᑎᑦ 1990−ᖏᓐᓂ.  ᑲᖏᖅᖠᓂᖅ ᓴᓇᙳᐊᒐᖃᕐᕕᖓ ᐊᒻᒪᓗ ᐃᓕᓐᓂᐊᕐᕕᒃ ᓴᓇᙳᐊᖅᑐᓕᕆᓂᕐᒧᑦ ᐅᖃᓕᒫᕆᐅᖅᓴᓂᕐᒧᓪᓗ ᐱᓕᕆᐊᖃᐅᖅᑐᖅ ᑲᒪᒋᔭᐅᓪᓗᓂ ᓴᓇᙳᐊᒐᖃᕐᕕᒻᒥ ᑕᐃᒪᙵᓂᑦ 1995-ᖏᓐᓂ, ᐊᒻᒪᓗ ᒫᓐᓇᐅᔪᖅ ᓴᓇᐅᒐᒃᑯᕕᓕᐅᖅᑐᓂ ᔭᕐᕋᐅᔭᓂᑦ, ᑎᑎᖅᑐᒐᐅᔭᖅᓯᒪᔪᓂᑦ, ᓴᓇᙳᐊᖅᓯᒪᔪᓂᑦ ᐊᒻᒪᓗ ᐊᓯᖏᓐᓂᑦ ᐊᑐᖅᑐᑎᑦ ᓴᓇᙳᐊᖅᓯᒪᔪᖃᐅᖅᑐᓂ ᑕᑯᔭᒐᖃᕐᕕᒃ ᓂᐅᕕᕐᕕᒃ. (www.matchboxgallery.com/KCAL.html)

 

ᑲᖏᖅᖠᓂᖅ ᑐᒃᓯᐊᕐᕕᖃᐅᕈᓘᔭᖅᑐᖅ: ᓅᑐᕆ ᑖᒻ ᑐ ᑲᒻ ᐃᒃᓯᕋᕐᔪᐊᑉ ᑐᒃᓯᐊᕐᕕᖓ, ᐋᓐᑲᓐᑯᑦ ᑐᒃᓯᐊᕐᕕᖓ, ᐊᒻᒪᓗ Glad Tidings ᒐᓛᑦ ᑕᐃᑎᖕᔅ ᓂᖅᑐᐃᔨᒃᑯᑦ ᑐᒃᓯᐊᕐᕕᒃ.

 

ᓄᓇᕗᒥ ᐊᓯᖏᑦ ᐊᕕᑦᑐᖅᓯᒪᔪᓂᑦ ᐊᐅᓪᓚᖃᑦᑕᕐᕕᐅᓲᖅᑎᑐᑦ ᐊᒻᒪᓗ ᐊᐅᓚᑦᑎᕕᓕᑎᑐᑦ ᐱᓕᕆᕝᕕᓂ, ᐃᖃᓗᓐᓂ ᐊᒻᒪᓗ ᐃᖃᓗᒃᑑᑦᓯᐊᕐᒥ, ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᕗᑦ ᑲᖏᖅᖠᓂᕐᒥ ᑕᐃᒪᐃᙱᓂᖅᓴᐅᓪᓗᑎᑦ ᒥᑭᓐᓂᖅᓴᓂ ᓄᓇᕗᑉ ᓄᓇᓕᖏᓐᓂ, ᖃᓪᓗᓈᑎᑑᖅᑐᒡᒍᑕᐅᓪᓗᑎᑦ ᐃᖅᑲᓇᐃᔭᕐᕕᖏᓐᓂ.  2011 ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ, 35%−ᖑᔪᑦ ᐃᓄᖏᑦ ᖃᓪᓗᓈᑎᑐᑦ ᐅᖃᐅᓯᖃᕐᓂᕋᖅᓯᒪᔪᑦ, 1%−ᖑᔪᑦ ᐃᓄᖏᑦ ᐅᐃᕖᑎᑐᑦ, 59% ᐃᓄᒃᑎᑐᑦ, ᐊᒻᒪᓗ 4% ᐊᓯᖏᓐᓂᒃ ᐅᖃᐅᓯᖃᖅᑐᑎᑦ.  ᑭᓯᐊᓂᓕ, ᖃᓪᓗᓇᐅᔭᕐᓂᖅᓴᐅᓲᑦ ᐊᖏᕐᕋᖏᓐᓂ 63% ᐃᓄᖏᑦ.  ᐃᓄᒃᑎᑐᑦ ᐅᖃᐅᓯᖅ ᐊᑐᖅᑕᐅᓲᖑᕗᖅ ᐊᖏᕐᕋᓂ 32%-ᖑᔪᓄᑦ ᐃᓄᖏᓐᓄᑦ.  ᑲᖏᖅᖠᓂᕐᒥ ᐱᓕᐲᓄᒡᒍᑕᐅᒻᒪᑕ ᐅᖃᐅᓯᓖᑦ ᑕᒐᓚᒡ ᐊᖏᕐᕋᒥᓂ (2%).  ᖃᓪᓗᓇᐃᔭᓲᑦ 95%−ᖏᑦ ᐃᓄᐃᑦ ᑲᖏᖅᖠᓂᕐᒥᐅᑦ ᐊᒻᒪᓗ 2%−ᑐᐃᓐᓇᑯᓗᐃᑦ ᐃᓄᒃᑎᑐᑐᐊᖅ ᐅᖃᓪᓚᓲᑦ.  ᐊᒥᓲᓂᖅᓴᐃᑦ ᓄᐃᑦ ᒪᕐᕉᖕᓂᒃ ᐅᖃᐅᓯᖃᓲᑦ, ᐃᓄᒃᑎᑑᙱᓂᖅᓴᐅᔪᑦ ᑕᐃᒪᐃᑦᑎᓪᓗᒋᑦ ᐊᓯᖏᓐᓂ ᓄᓇᕗᒥ, 68% ᐃᓄᐃᑦ ᐊᒥᓲᓂᖏᑦ ᐅᖃᖅᓯᒪᔪᑦ ᐃᓄᒃᑎᑑᓲᖑᒻᒪᑕᒎᖅ ᐊᖏᕐᕋᒥᓂ.  ᑭᒃᑯᑐᐃᓐᓇᐃᑦ ᑲᑎᑦᑕᕋᐃᒻᒪᑕ ᐊᒻᒪᓗ ᑲᑎᒪᔪᖃᕋᐃᒻᒪᑦ ᑕᒪᒃᑮᓐᓂᒃ ᐅᖃᐅᓰᓐᓂᒃ ᐊᑐᕈᓐᓇᖅᑐᑦ.  ᐊᒻᒪᓗᒃᑲᓐᓂᖅ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ.  ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

 

ᑕᐃᒪᓐᓇᑐᑦ ᐊᓯᖏᑎᑐᑦ ᐊᕕᑦᑐᖅᓯᒪᔪᓂ ᐊᖓᔪᖅᑳᖃᕐᕕᓂ, ᐃᖃᓗᒃᑑᑦᓯᐊᕐᒥ ᐊᒻᒪᓗ ᐃᖃᓗᖏᓐᓂ ᑕᐃᒪᐃᑦᑐᑎᑦ, ᑲᖏᖅᖠᓂᖅ ᓄᓇᕗᑉ ᒪᒃᑯᓂᖅᓴᒡᒍᑕᐅᑎᓪᓗᒋᑦ ᐃᓄᖏᑦ ᐊᖓᔪᑦᑎᐅᓂᖅᓴᐅᕗᑦ.  2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᖅᑕᐅᓯᒪᔪᑦ 240−ᖑᓚᐅᖅᑐᑦ ᐃᓕᓐᓂᐊᕆᐊᓕᓵᓲᑦ ᓱᕈᓯᓛᑦ ᐊᒻᒪᓗ 585 ᐃᓕᓐᓂᐊᕆᐊᓲᑦ ᓱᕈᓰᑦ, 36%−ᖑᓪᓗᑎᑦ ᐃᓄᖏᑦ ᐅᑭᐅᓖᑦ 18−ᓂ ᑐᖔᓂ.  ᐅᑭᐅᕆᔭᐅᓗᐊᖅᑐᑦ 25.4, ᑭᓯᐊᓂᓕ 3%−ᑐᐃᓐᓇᑯᓗᐃᑦ ᐊᒥᓲᓂᖏᑦ ᐃᓄᐃᑦ ᐅᑭᐅᓖᑦ 65-ᓂᑦ ᐅᖓᑖᓄᓪᓗ. 

ᑮᓇᐅᔾᔭᒃᓴᕈᑕᐅᔪᑦ: 

ᑲᖏᖅᖠᓂᖅ ᐊᔾᔨᒌᙱᑦᑐᕈᓘᔭᖅᑎᒍᑦ ᑮᓇᐅᔭᓕᐅᕋᓱᐊᕐᕕᐅᓲᖑᕗᖅ ᓄᓇᓕᐅᔪᖅ ᑐᑦᑕᕐᕕᒋᔭᐅᓪᓗᐊᕐᒪᑦ ᐊᐅᓪᓚᐸᑦᑐᓄᑦ ᐊᒻᒪᓗ ᐊᕕᑦᑐᖅᓯᒪᔪᓂᑦ ᐊᐅᓚᑦᑎᕕᐅᓪᓗᓂ.  ᐊᒥᓱᑦ ᐊᐅᓪᓚᖃᑦᑕᖅᑐᑦ ᑭᕙᓪᓕᕐᒥ ᑲᖏᖅᖠᓂᒃᑰᓲᖑᒻᒪᑕ, ᐊᐅᓪᓚᖅᑐᑦ ᑎᑭᑉᐸᑦᑐᑎᑦ ᖃᖓᑕᓲᒃᑯᑦ ᐊᖏᓂᖅᓴᒃᑯᑦ ᓄᓇᓕᖕᓄᑦ ᐊᓯᖏᓐᓅᓲᖑᓪᓗᑎᑦ ᐊᓯᐊᒍᑦ ᒥᑭᓂᖅᓴᒃᑯᑦ ᖃᖓᑕᓲᒃᑯᑦ.  ᑭᓱᕈᓘᔭᐃᑦ ᐅᓯᔭᐅᓲᑦ ᐅᒥᐊᕐᔪᐊᒃᑯᑦ ᐊᐅᔭᐅᑎᓪᓗᒍ ᐊᒻᒪᓗ ᖃᖓᑕᓲᒃᑯᑦ ᐅᑭᐅᖑᓕᕋᐃᒻᒪᑦ.  ᐊᕕᑦᑐᖅᓯᒪᔪᓂ ᑐᑦᑕᕐᕕᐅᓪᓗᓂ, ᑲᖏᖅᖠᓂᖅ ᐊᒥᓱᓂᑦ ᓄᓇᕗᑦ ᒐᕙᒪᖏᑕ ᐊᒻᒪᓗ ᑲᓇᑕᒥ ᒐᕙᒪᖏᑕ ᐊᓪᓚᕝᕕᖃᕐᕕᒋᕚ, ᐊᕕᑦᑐᖅᓯᒪᔪᓂ ᐋᓐᓂᐊᕐᕕᖃᖅᑐᓂ, ᐃᑲᔪᖅᑕᐅᕝᕕᖃᖅᑐᓂ, ᐊᒻᒪᓗ ᐊᕕᑦᑐᖅᓯᒪᔪᓂ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᕕᓕᒃ ᓄᓇᕘᒥ ᓯᓚᑦᑐᓴᕐᑉᕕᑯᓐᓂ, ᐱᖃᓯᐅᑎᓪᓗᒋᑦ ᓄᓇᕘᒥ ᓴᓇᔪᓕᕆᓂᕐᒧᑦ ᐃᓕᓐᓂᐊᕐᕕᒃ.  ᓄᓇᕗᑦ ᒐᕙᒪᖏᑕ ᐊᓪᓚᕝᕕᖏᑦ ᐅᑯᐊᖑᕗᑦ ᐃᒥᐊᓗᓕᕆᔨᒃᑯᑦ ᐊᓪᓚᕝᕕᖏᑦ ᑮᓇᐅᔭᓕᕆᔨᒃᑯᓐᓂ, ᐃᖏᕐᕋᔪᓕᕆᓂᕐᒧᑦ ᐱᓕᕆᐊᑦ ᐱᕙᓪᓕᐊᔪᓕᕆᔨᒃᑯᓐᓂ ᐃᖏᕐᕋᔪᓕᕆᔨᒃᑯᓐᓂᓗ, ᐊᒻᒪᓗ ᐊᖓᔪᖅᑳᖃᕐᕕᐅᓪᓗᓂ ᓄᓇᕘᒥ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᙵ.  ᐊᕕᑦᑐᖅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᑦ, ᓲᕐᓗᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ, ᑕᒫᓃᒻᒥᔪᑦ ᓄᓇᓕᐅᔪᒥ.

 

ᓄᓇᓕᐅᔪᕐᓗ ᓄᓇᓕᓐᓂ ᐅᔭᕋᓐᓂᐊᕐᕕᓕᕆᖃᑕᐅᓲᖅ ᐊᒻᒪᓗ ᐃᑲᔪᖅᑐᐃᓪᓗᑎᑦ ᐊᓯᖏᓐᓂᑦ ᐊᕕᑦᑐᖅᓯᒪᔪᓂᑦ ᓄᓇᓕᐅᔪᓂᑦ ᐊᐅᓚᑦᑎᔪᑦ ᐅᔭᕋᓐᓂᐊᕐᕕᒻᒥ ᐊᒻᒪᓗ ᐅᔭᕋᓐᓂᐊᕐᕕᐅᓛᖅᑐᓂᑦ.  ᐱᕙᓪᓕᐊᔪᑦ ᓄᑖᑦ ᒎᓗᑕᕐᕕᒃ ᐅᔭᕋᓐᓂᐊᕐᕕᒃ ᖃᓂᒋᔭᖓᓂ ᐊᑦᑐᐃᓂᖃᖅᑐᒻᒪᕆᐅᓯᒪᕗᖅ, ᒪᑐᐃᓛᕐᓂᐊᕐᓂᕋᖅᑕᐅᓪᓗᓂ 2017−ᒥ.  ᐳᓚᕋᖅᑐᓕᕆᓂᖅ ᐊᒻᒪᓗ ᓴᓇᙳᐊᖅᑐᓕᕆᓂᖅ ᑲᖏᖅᖠᓂᕐᒥ ᑮᓇᐅᔭᖃᖅᑎᑦᑎᓲᑦ ᐊᒥᓱᓄᑦ ᓄᓇᓕᒻᒥᐅᓄᑦ ᐊᐅᓪᓚᐅᔾᔨᔩᑦ ᑲᒻᐸᓂᖏᓐᓄᑦ, ᑐᔪᕐᒥᕕᓐᓄᑦ ᐊᒻᒪᓗ ᓂᕆᕕᓐᓄᑦ ᓂᐅᕕᐊᒃᓴᖃᓲᖑᓪᓗᑎᑦ, ᐊᒻᒪᓗ ᓂᐅᕕᕐᕕᓄᑦ ᓴᓇᙳᐊᒐᖃᕐᕕᓕᖕᓄᑦ ᑕᑯᔭᒐᖃᕐᕕᓕᖕᓄᓪᓗ.  ᓄᓇᓕᓐᓂ ᐱᔨᑦᑎᕋᖅᑏᑦ ᑮᓇᐅᔭᓕᐅᕋᓱᐊᖅᑐᑦ, ᐊᒥᓱᑦ ᐃᓛᒃᑰᖓᐅᖅᑐᑦ ᓇᒻᒥᓂᖁᑎᖃᐅᖅᑐᑎᑦ ᐊᒻᒪᓗᑦᑕᐅᖅ ᓄᓇᓕᓐᓄᑦ ᐱᔨᑦᑎᕋᖅᑏᑦ ᓄᓇᓕᓐᓄᑦ ᐊᒻᒪᓗ ᐅᔭᕋᓐᓂᐊᖅᑎᓄᑦ ᐱᔨᑦᑎᕋᓲᖑᒻᒥᔪᑦ.

 

ᑮᓇᐅᔭᒃᑯᕕᓕᒃ ᕈᐊᔭᓪ ᕚᓐᒃ ᑲᓇᑕᒥ ᐊᒻᒪᓗ ᑲᓇᐃᑎᓐᐊ ᐃᒻᐱᐅᕆᔪ ᕚᓐᒃ ᑲᓇᑕᒥ ᑮᓇᐅᔭᒃᑯᕕᒃ ᑲᖏᖅᖠᓂᕐᒥ.  ᓄᐊᑐᓐ ᓂᐅᕕᕐᕕᖓ “ᑮᓇᐅᔭᓕᕆᒐᓛᓲᖑᒻᒥᔫᒐᓗᐊᑦ”, ᖃᑦᑏᓐᓇᓂᒃ ᑮᓇᐅᔭᖃᕐᕕᖃᕈᓐᓇᖅᑐᑎᑦ ᐃᓄᐃᑦ, ᓯᒃᑮᕈᓐᓇᖅᑐᑎᑦ ᐃᓄᐃᑦ, ᐊᓯᖏᓪᓗ.  ᐊᐅᒃᑕᔫᒃᑯᑦ ᓂᐅᕕᕈᓐᓇᐅᑎᒥᒃ ᐊᑭᓕᒃᓴᓂᒍᓐᓇᐅᑎᒥᓪᓗ ᐊᑐᕐᕕᒃᓴᐅᕗᑦ ᓂᐅᕕᕐᕕᓂ ᑕᒪᐃᓐᓂᑲᓴᒃ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᑲᖏᖅᖠᓂᖅ ᐱᖓᓐᓇᖓᓃᒻᒪᑦ ᑕᓯᐅᔭᕐᔪᐊᑉ ᐊᒻᒪᓗ ᐳᐃᔨᖃᐅᕈᓘᔭᖅᑐᓂ ᐱᓱᒃᑎᓂᓪᓗ.  ᖃᓂᒋᔭᖓᓂ ᑰᒃ, ᐃᖃᓗᒑᕐᔫᑉ ᑰᖓ ᐊᒻᒪᓗ ᑕᐃᔮᓐ ᑰᖓ, ᐃᖃᓗᖃᕐᕕᐅᔪᖅ.  ᓇᑦᑏᑦ, ᕿᓚᓗᒐᐃ,ᑦ ᐊᐃᕖᑦ ᐊᒻᒪᓗ ᓇᓄᐃᑦ ᑕᒫᓂ ᓄᓇᓕᑉ ᖃᓂᒋᔭᖓᓃᓲᑦ, ᐊᒻᒪᓗ ᑐᒃᑐᐃᑦ ᓄᓇᖅᐸᓯᕐᒨᓲᑦ ᒥᑭᔫᑕᐅᓂᖅᓴᐃᓪᓗ ᐆᒪᔪᐃᑦ ᑕᒫᓃᓯᓐᓇᕆᓪᓗᑎᑦ ᓲᕐᓗᒃ ᐊᕕᙵᐃᑦ, ᑎᕆᒐᓂᐊᑦ, ᐊᒪᕈᐃᑦ ᐊᒻᒪᓗ ᓯᒃᓰᑦ.  ᓄᓇᖓᓗ ᑎᖕᒥᐊᖃᕈᓘᔭᕈᓐᓇᕐᒥᔪᖅ, ᐃᓐᓈᕈᕐᒥᐅᑕᕐᓂᑦ ᐊᒻᒪᓗ ᐃᕙᓲᑦ ᖃᐅᓯᖅᑐᒥ, ᒪᓂᕋᕐᒥ ᓄᓇᒥ.  ᑖᒃᑯᐊ ᑎᖕᒥᐊᑦ ᐅᑯᐊᖑᓪᓗᑎᑦ ᐊᕿᒡᒌᑦ, ᓂᕐᓖᑦ, ᒥᑏᑦ, ᓂᐱᑦᑎᐊᕆᑦᑐᑦ ᖁᐸᓄᐊᑦ, ᓯᔾᔭᕆᐊᑦ, ᖁᓪᓕᖁᓕᐊᑦ, ᐃᓯᒐᔮᓖᑦ ᑯᑭᖏᑦ ᐃᐱᑦᑐᑦ ᐊᓯᒃᑲᓐᓂᒻᒪᕆᒋᓪᓗ.

ᐅᖃᓕᒫᑲᓐᓂᕐᓃᑦ : 
  • ᕕᐊᓇᑦ, ᔮᓐ & ᓲᓴᓐ ᕉᓕ, ᐋᖅᑮᒋᐊᕆᔩᑦ.  ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2004.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᐅᖃᐅᓰᑦ ᐋᖅᑭᓱᖅᓯᒪᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᐃᓅᓯᖏᑦ ᐅᑭᐅᖅᑕᖅᑐᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2010.
  • ᐄᐳᕐ, ᑐᕈᑎ ᕼᐊᕐᓕ: ᐊᕐᕕᓂᐊᖅᑏᑦ ᐅᑭᐅᖅᑕᖅᑐᒦᑦᑎᓪᓗᒋᑦᒪᓐᑐᕆᐊᓪ & ᑭᖕᔅᑕᓐ: ᒥᒡᒋᐅᓪ−ᑯᐃᑉ ᓯᓚᑦᑐᓴᕐᕕᔪᐊᖓᓂ ᑎᑎᕋᖅᑕᐅᔪᑦ, 1989
  • ᕚᓴᑦ, ᕆᓇᐃ: ᐃᓅᓯᖃᑦᑎᐊᖁᓪᓗᑕ: ᕿᑎᕐᒥᐅᑦ ᐃᓄᖏᑦ, 1550-1940. ᕕᓂᐱᒡ: ᒫᓂᑑᕙᑉ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᐅᓯᒪᔪᑦ, 2001.
  • ᐃᓴᓐᒪᓐ, ᕕᐊᑎ ᑯᕙᔭᓯ.  ᐃᕙᓗᖏᑦ ᐊᓐᓇᐅᒪᔾᔪᑏᑦ: ᐃᓄᐃᑦ ᐊᓐᓄᕌᖏᑦ ᖃᓄᐃᑦᑑᖃᑦᑕᓚᐅᖅᓯᒪᓂᖏᑦ.  ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ 1997.
  • ᒪᒃᑖᓄᓪᑦ, ᔮᓐ.  ᐅᑭᐅᖅᑕᖅᑐᑉ ᓯᓚᖓᐃᓄᐃᑦ ᐅᓪᓗᕆᐊᓂᓕᕆᓂᖏᑦ, ᐅᓪᓗᕆᐊᑦ ᐅᓂᒃᑳᖏᑦ ᐅᓂᒃᑳᖅᑐᐊᑐᖃᖏᓪᓗ ᐅᑉᐱᕆᔭᑦ.  ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑏᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪ ᑕᑯᔭᒐᖃᕐᕕᒃ, 1998.
  • ᒪᒌ, ᕌᕗᑦ.  ᑭᖑᓪᓕᖅᐹᖅ ᑕᐅᑐᙳᐊᖅᑕᐅᓯᒪᓂᑯ: ᐃᓄᐃᑦ ᐊᑐᖃᑦᑕᕐᓂᑯᒥᓂᖏᑦ ᐅᑭᐅᖅᑕᖅᑐᒥ.  ᑐᕌᓐᑐ: ᑮ ᐳᐊᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨᔅ−ᕼᕿᕗᑦ ᔪᒪᐃᓐ.  ᐃᓄᐃᑦ: ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᑕᑯᓇᓪᓗᒋᑦ.  ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 1995.
  • ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ.  ᐃᓄᐃᑦ ᐃᓕᖅᑯᓯᖓ: ᐃᓄᐃᑦ ᐃᓕᖅᑯᓯᖓᓄᑦ ᑐᑭᒧᐊᕈᑎᖏᑦ, ᐋᖅᑭᒋᐊᖅᑕᐅᓯᒪᔪᑦ ᐋᑐᕚ: ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ, 2006. (ᐊᒻᒪᓗ ᐊᑐᐃᓐᓇᐅᒻᒥᔪᑦ ᖃᕋᓴᐅᔭᒃᑯᑦ ᓄᓇᕗᑦ ᒐᕙᒪᖏᑕ ᐃᖅᑲᓇᐃᔭᖅᑎᑖᕆᔭᐅᕋᑖᖅᑐᑦ ᑐᑭᓯᒋᐊᖅᑎᑕᐅᓂᖏᓐᓄᑦ ᐃᑭᐊᖅᑭᕕᖓᓂ)(http://www.orientation.hr.gov.nu.ca/i18n/english/pdf/The%20Inuit%20Way.pdf)