You are here

ᓇᐅᔮᑦ

ᓇᐅᔮᑦ

ᐊᕕᒃᑐᖅᓯᒪᓂᖓ: 
Kivalliq School Operations (KSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐃᓄᐃᑦ ᓇᐅᔮᑦ ᖃᓂᒋᔭᖓᓂᕐᒥᐅᑕᐅᓯᒪᔪᑦ ᑕᐃᒪᙵᓂᑦ Thule ᐃᓄᐃᑦ-ᖑᓚᐅᖅᑎᓪᓗᒋᑦ. ᐃᓄᒃᑎᑐᑦ ᐊᑎᖓ ᓇᐅᔮᑦ, ᑐᑭᖃᖅᑐᖅ “ᐃᕙᕝᕕᖓᑦ ᓇᐅᔭᔾᔪᐊᓄᑦ”, ᐱᔾᔪᑎᖃᖅᑐᖅ ᖃᓂᑦᑐᒥᑦ ᓇᐅᔭᔾᔪᐊᓄᑦ ᐃᕙᕝᕕᖕᓂᑦ. ᑕᐃᔅᓱᒪᓂᑐᖃᖅᑐᑦ ᐃᓅᓚᐅᖅᑐᑎᑐᑦ, ᐃᓄᐃᑦ ᐊᐅᓪᓛᖅᐸᓚᐅᖅᑐᑦ ᓇᒧᑐᐃᓐᓇᖅ ᑕᒫᓂ. ᖃᐅᔨᒪᓐᓇᖅᑐᖃᖅᑐᖅ ᐃᖏᕐᕋᔭᒃᐸᓚᐅᖅᑐᑦ ᐊᑯᓐᓂᖓᓐᓂᑦ ᓇᐅᔮᓪᓗ ᐊᒥᑦᑐᕐᒥᐅᓪᓗ (ᐃᒡᓗᓕᒃ-ᓴᓂᕋᔭᖅ) ᖃᓂᒋᔭᖓᓂ ᐅᖅᓱᕆᐊᕐᒥᑦ. ᓯᕗᓪᓕᖅᐹᖅ ᑎᑎᕋᐅᓯᐅᓯᒪᔪᖅ ᑕᕆᐅᑉ ᐊᑭᐊᓂᙶᖅᑐᖅ 1742-ᒥᐅᓚᐅᖅᑐᖅ, ᑯᕆᔅᑕᕗ ᒥᑐᑕᓐ ᖃᐅᔨᓴᐃᖕᒪᑦ ᑕᓯᐅᔭᕐᔪᐊᕐᒥᑦ ᓇᓂᓯᓇᓱᒃᖢᓂ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓂᑦ. ᓇᓗᒋᔭᐅᔪᖅ ᐊᑎᖓ ᓇᐅᔮᑦ ᖃᓪᓗᓈᑎᑐᑦ ᒥᑐᑎᓐ-ᒥᙶᓚᐅᕐᒪᖔᑦ ᐅᕝᕙᓘᓐᓃᑦ ᑕᕆᐅᑉ ᐊᑭᐊᓂᙶᖅᑐᒥᑦ ᐅᒥᐊᕐᔪᐊᕐᒥᙶᓚᐅᕐᒪᖔᑦ. ᐊᕐᕕᒃᓯᐅᖃᑦᑕᖅᑎᓪᓗᒋᑦ 1800-ᖏᓐᓂᑦ, ᑕᒪᕐᒥᒃ ᐊᒥᐊᓕᑲᒥᐅᑕᐃᑦ ᐊᒻᒪᓗ ᑕᕆᐅᑉ ᐊᑭᐊᓂᙶᖅᑐᑦ ᐊᑐᖃᑦᑕᓚᐅᖅᑕᖓᑦ ᓇᐅᔮᑦ ᐃᓂᒋᓂᕐᒧᑦ ᐊᒻᒪᓗ ᐱᓕᕆᔨᖃᖅᖢᑎᒃ ᐃᓄᖕᓂᑦ ᐃᑲᔪᖅᑎᒋᓪᓗᒋᑦ ᐊᕐᕕᒃᓯᐅᕐᓂᕐᒧᑦ. ᐊᒥᓱᑦ ᐊᕐᕕᒃᓯᐅᖅᑏᑦ ᐅᑭᐅᒃᑯᑦ ᕿᑭᖅᑕᓃᑦᑐᒪᖃᑦᑕᓚᐅᖅᑐᑦ, ᑕᓯᐅᔭᕐᔪᐊᖅ ᓯᑯᐃᖅᑳᖅᑎᓐᓇᒍ ᐊᕐᕕᖅᓯᐅᕆᐊᖅᐸᓪᓕᐊᔪᓐᓇᖅᖢᑎᒃ. ᕿᑭᖅᑕᐃᑦ ᓴᐳᔾᔨᓯᓂᖃᖅᐳᑦ ᑲᖏᖅᖢᕐᒥᑦ, ᑕᐃᒪᓐᓇᒧᑦ ᒥᒃᖠᒋᐊᖅᑎᑦᑎᓪᓗᓂ ᓯᑯᒧᑦ ᓱᕈᖅᑕᐅᓂᖏᑦ ᐅᒥᐊᕐᔪᐊᑦ.

19 ᓴᓐᑐᕆ ᐃᓱᓕᑉᐸᓪᓕᐊᑎᓪᓗᒍ, ᓂᐅᕕᖅᑏᑦ (HBC) ᑕᐃᑯᙵᐅᑎᑦᑎᓚᐅᖅᑐᑦ, ᐃᓚᐅᓪᓗᓂ ᔮᓐ ᕋᐃ, ᓇᓂᓯᓚᐅᖅᑐᖅ ᕗᕌᖕᒃᓕᓐ ᓇᓂᓯᓇᓱᒃᑎᓂᙶᖅᑐᓂᒃ ᐅᑎᖅᑎᖦᖢᒋᓪᓗ ᑕᕆᐅᑉ ᐊᑭᐊᓄᑦ. ᓂᐅᕕᖅᑏᑦ ᓂᐅᕕᕐᕕᖕᒥᑦ ᐅᒃᑯᐃᖅᓯᓚᐅᖅᑐᑦ 1916-ᒥᑦ, ᐊᒻᒪᓗ Revillon Frères ᒪᑐᐃᖅᓯᓪᓗᑎᒃ 1923-ᒥᑦ, ᑖᒃᑯᐊ ᖃᔅᓯᐊᕐᔪᖕᓂᑦ ᒪᑐᐃᖅᓯᓯᒪᖃᑕᐅᓚᐅᖅᑐᑦ ᖃᓂᒋᔭᖓᓂᑦ ᐃᓂᐅᔪᓂᒃ. ᐃᒃᓯᕋᕐᔪᐊᑦ ᑕᐃᑯᙵᓚᐅᖅᑐᑦ 1932-ᒥᑦ. ᐃᓕᓐᓂᐊᕐᕕᒃ ᐊᒻᒪᓗ ᐃᒡᓗᕐᔪᐊᑦ 1960-ᖏᓐᓂᑦ ᑕᐃᒪᙳᖅᖢᑎᒃ, ᓄᓇᓕᙳᖅᓯᒪᓕᖅᖢᓂ ᓇᐅᔮᑦ ᐅᓪᓗᒥᐅᔪᖅ.

ᓄᓇᕗᒻᒥ ᒐᕙᒪᒃᑯᖏᑦ (GN) ᐱᓕᕆᔨᖏᓐᓄᑦ ᓇᓗᓇᐃᔭᐃᓂᕐᒧᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᑐᓂᓯᖃᑦᑕᖅᑐᖅ ᐱᐅᔪᒻᒪᕆᖕᒥᑦ ᑲᑎᖅᓱᖅᓯᒪᔪᓂᒃ ᓇᑭᙶᕐᓂᖓᓂᑦ ᓄᓇᕗᒻᒥ, ᐊᑕᐅᑦᑎᒃᑯᑦ ᐃᓄᐃᑦ ᐱᖅᑯᓯᖏᑦ ᐊᒻᒪᓗ ᓇᑭᙶᕐᓂᖓᓂᒃ ᐊᒻᒪᓗ ᐅᖃᐅᓯᖃᖅᑐᖅ ᖃᓄᖅ ᐃᓄᐃᑦ ᐃᓕᖅᑯᓯᖓᑦ ᐃᓚᐅᑎᑕᐅᖕᒪᖔᑕ ᒐᕙᒪᒃᑯᑦ ᐊᐅᓚᓂᕆᔭᖓᓐᓄᑦ ᐊᒻᒪᓗ ᐱᔨᑦᑎᕋᐅᑎᖏᓐᓄᑦ. ᕿᓂᕐᕕᐅᖁᔭᕗᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᐊᑐᐃᓐᓇᐅᓕᒃᑲᓐᓂᖅᐸᑦ ᐋᖅᑭᒃᓱᖅᑕᐅᕌᓂᒃᐸᑦ, ᒫᓐᓇᐅᔪᖅ ᓱᓇᑐᐃᓐᓇᓅᖓᔪᖓᑦ ᓄᓇᕗᑦ ᒐᕙᒪᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖓᑦ ᐆᒃᑐᕈᓐᓇᖅᑕᐃᑦ ᑐᑭᓯᐅᒪᔾᔪᑎᓂᒃ ᐱᓂᕐᒧᑦ.

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐃᓅᓯᖅ ᓇᐅᔮᓂᑦ ᑕᑯᒃᓴᐅᑎᑦᑎᔪᖅ ᐊᔾᔨᖏᓐᓂᒃ ᒥᑭᓂᖅᓴᓂᒃ ᐃᓄᐃᑦ ᓄᓇᓕᒋᔭᖓᓐᓂᑦ ᐅᓪᓗᒥᐅᔪᖅ, ᐅᓪᓗᒥᐅᓕᖅᑐᖅ ᐊᑐᖅᑕᐅᖃᑦᑕᖅᑐᑦ ᐅᖃᓘᓯᕆᓃᑦ ᐊᒻᒪᓗ ᑲᑉᐳᔾᔭᓅᖅᑐᑦ, ᓲᕐᓗ ᑕᓚᕖᓴᐃᑦ, ᖃᕋᓴᐅᔭᐃᑦ ᐊᒻᒪᓗ ᐱᓕᕆᕐᔪᐊᒃᑲᐃᑦ ᓯᑭᑑᑦ, ᑕᐃᒪᐅᖃᑕᐅᔪᑦ ᐱᖅᑯᓯᒃᑯᑦ ᐊᖑᓇᓱᖕᓂᕐᒧᑦ ᐊᑐᖅᑕᐅᖃᑦᑕᖅᑐᓂᑦ ᐊᒻᒪᓗ ᐃᖃᓗᒐᖕᓯᓂᐅᖃᑦᑕᖅᑐᓂᑦ. ᑕᐃᑲᓂᕐᒥᐅᑕᐃᑦ ᐱᖅᑯᓯᑐᖃᓂᒃ ᐊᔪᙱᓐᓂᕐᒥᒃ ᐸᐸᑦᑎᔪᑦ, ᓲᕐᓗ ᒥᖅᓱᕐᓂᖅ ᐊᓐᓄᕌᓂᒃ ᐅᓪᓗᒥᐅᖓᔪᓂᒃ ᐊᒻᒪᓗ ᐃᓄᐃᑦ ᐊᑐᖅᐸᓚᐅᖅᑕᑐᖃᖏᓐᓂᒃ, ᕿᒻᒥᖃᖅᖢᑎᒃ ᕿᒧᖅᓯᕐᓂᕐᒧᑦ, ᓯᓚᓗ ᐊᑐᖅᖢᒍ ᖁᐊᖅᓰᕝᕕᒋᓂᕐᒧᑦ ᐅᑭᐅᖑᑎᓪᓗᒍ.

ᐱᖓᓱᓂᒃ ᑐᒃᓯᐊᕐᕕᖃᖅᑐᖅ ᓇᐅᔮᑦ: ᐊᔪᕆᖅᓱᐃᔩᑦ, ᐃᒃᓯᕋᕐᔪᐊᑦ, ᐊᒻᒪᓗ Glad Tidings.

ᐃᓄᒃᑎᑐᑦ ᐅᖃᐅᓯᖅ ᐊᑐᖅᑕᐅᓗᐊᖃᑦᑕᖅᑐᖅ ᓇᐅᔮᓂᑦ. 2011-ᒥᑦ ᓈᓴᖅᑕᐅᖕᒪᑕ, 94%-ᖑᔪᑦ ᑕᐃᑲᓂᕐᒥᐅᑕᐃᑦ ᐃᓄᒃᑎᑐᒻᒥᑦ ᐅᖃᐅᓯᖃᕐᓂᕋᓚᐅᖅᑐᑦ, ᐊᒻᒪᓗ 86%-ᖏᑦ ᑖᓐᓇ ᐅᖃᐅᓯᖅ ᐊᑐᖅᑕᐅᖃᑦᑕᕐᓂᖓᓄᑦ ᐊᖏᕐᕋᖓᓐᓂᑦ. ᑭᓯᐊᓂ, ᐊᒻᒪᓗ 6%-ᖑᔪᑦ ᐊᑐᖃᑦᑕᖅᑕᖓᑦ ᐅᖃᐅᓯᖅ ᑐᒡᓕᕆᓪᓗᒍ. 10%-ᓗᐊᑦ ᖃᓪᓗᓈᑎᑐᑦ ᐅᕝᕙᓘᓐᓃᑦ ᐅᐃᕖᑎᑐᑦ ᐅᖃᓪᓚᒍᖕᓇᙱᖦᖢᑎᒃ, ᑐᑭᖃᖅᑐᖅ ᖃᑯᑎᒃᑯᑦ ᑎᑭᓵᑦ ᓇᓂᓯᔭᕆᐊᖃᖃᑦᑕᖅᑐᑦ ᖃᓪᓗᓈᑎᑐᑦ ᐅᖃᓪᓚᒍᓐᓇᖅᑐᒥᒃ ᑐᓵᔨᒋᓗᒍ, ᐱᓗᐊᖅᑐᒥᑦ ᐃᓐᓇᕆᔭᐅᔪᓂᒃ ᐅᖃᓪᓚᖃᑎᖃᕐᓂᐊᕈᑎᒃ. ᖃᔅᓯᐊᕐᔪᖕᓂᑦ ᐅᐃᕖᑎᑐᑦ ᐅᖃᓪᓚᒍᓐᓇᖅᑐᖃᕋᓗᐊᖅᑎᓪᓗᒍ ᓇᐅᔮᓂᑦ, ᖃᓪᓗᓈᑎᑐᑦ ᐅᖃᓪᓚᖕᓂᖅ ᑐᒡᓕᕆᔭᐅᔪᖅ ᐃᓄᒃᑎᑑᕐᓂᕐᒧᑦ 89%-ᖏᓐᓂᑦ ᐊᑐᖅᑕᐅᖃᑦᑕᖅᑐᖅ ᑕᐃᑲᓂᕐᒥᐅᓄᑦ. 55%-ᓄᑦ ᐃᓄᖕᓄᑦ ᐊᑐᖅᑕᐅᖃᑦᑕᖅᑐᖅ ᖃᓪᓗᓈᑎᑐᑦ ᐅᖃᓪᓚᖕᓂᖅ ᐊᖏᕐᕋᖓᓐᓂᑦ. ᓂᕆᐅᒍᓐᓇᖅᑐᑦ ᐃᓄᓕᒫᓂᒃ ᑲᑎᒪᑎᑦᑎᓂᕐᓂᑦ ᑕᒪᐃᓐᓂᒃ ᐅᖃᐅᓰᒃ ᐊᑐᖃᑦᑕᖅᑐᑦ ᐊᒻᒪᓗ ᖃᓪᓗᓈᑎᑐᑦ ᐊᑐᖅᑕᐅᓂᖏᓐᓄᑦ, ᑭᓯᐊᓂ ᐊᒥᓱᑦ ᐅᖃᓪᓗᕆᒃᓴᕐᓃᑦ ᐃᓄᒃᑎᑐᑐᐃᓐᓇᐅᖃᑦᑕᖅᑐᑦ, ᐊᒻᒪᓗ ᓂᕆᐅᒋᐊᖃᙱᑦᑐᑎᑦ ᐃᓄᒃᑎᑐᑦ ᐅᖃᓪᓗᕆᒃᓴᖅᑐᖃᖅᑎᓪᓗᒍ ᖃᓪᓗᓈᑎᑑᓕᖅᑐᖅᑕᐅᓂᐊᕐᓂᖓᓄᑦ ᖃᓪᓗᓈᖅᑕᖃᑐᐃᓐᓇᕐᓂᖓᓄᑦ. ᐃᓄᒃᑎᑐᑦ ᐅᖃᓪᓚᖕᓃᑦ ᐊᔾᔨᒌᖏᓐᓂᖃᖅᑐᑦ ᓄᓇᕗᒻᒥᑦ, ᐃᓄᒃᑎᑐᑦ ᐅᖃᓪᓚᖃᑦᑕᕈᕕᑦ ᓄᓇᓕᖕᒥᑦ, ᐸᕐᓇᒃᓯᒪᕙᒌᕐᓗᑎᑦ ᐃᓕᑦᑎᓂᕐᒧᑦ ᓄᑖᒥᒃ ᐅᖃᐅᓯᕐᒥᑦ ᐊᔾᔨᒌᙱᓐᓂᐅᔪᓂᒃ ᓄᓇᓕᐅᑉ ᐊᓯᐊᓄᐊᕈᕕᑦ ᐊᒻᒪᓗ ᐃᒪᖅᑳ ᑕᒻᒪᕈᕕᑦ ᐊᔪᕆᖅᓱᖅᑕᐅᓗᑎᑦ. ᐃᓄᐃᑦ ᐅᖃᐅᓯᖓᑦ (ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐊᑐᖅᑕᐅᔪᑦ ᐅᖃᐅᓯᕆᔭᐅᓂᕐᒧᑦ ᓄᓇᕗᒻᒥᑦ, ᑕᐃᒪᓐᓇᒧᑦ ᐱᔪᓐᓇᐅᑎᖃᖅᑐᑎᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓂᒃ ᑲᒪᒋᔭᐅᑎᓪᓗᑎᑦ ᐅᖃᐅᓯᕐᒥᑦ ᓇᓕᐊᑐᐃᓐᓇᖏᓐᓂᒃ ᐊᑐᕈᒪᓗᑎᑦ.

ᓄᓇᕗᒻᒥ ᒪᒃᑯᒃᑐᖅᑕᖃᐅᖅᑐᒥᑦ, ᓇᐅᔮᑦ ᒪᒃᑯᓛᖑᖃᑕᐅᔪᖅ ᓄᓇᓕᐅᓪᓗᓂ. 2011-ᒥᑦ 175-ᖑᓚᐅᖅᑐᑦ ᐃᓕᓐᓂᐊᕆᐊᕐᓂᐊᓕᓵᖅᑐᑦ ᐊᒻᒪᓗ 295 ᐃᓕᓐᓂᐊᖅᑐᑦ ᓄᑕᖅᑲᐃᑦ 50%-ᖑᔪᖅ ᖃᔅᓯᐅᓂᖏᑦ ᐅᑭᐅᓖᑦ 18 ᑐᖔᓂᑦ. ᓄᓇᓕᖕᒥᑦ ᕿᑎᐊᓂᑦ ᐅᑭᐅᓖᑦ 18.2-ᖑᔪᑦ, ᐊᒻᒪᓗ 2%-ᖏᑦ ᖃᔅᓯᐅᓂᖏᑦᑕ 65 ᐅᖓᑖᓂᑦ ᐅᑭᐅᖃᖅᖢᑎᒃ.

ᑮᓇᐅᔾᔭᒃᓴᕈᑕᐅᔪᑦ: 

ᒥᑭᑦᑑᓪᓗᓂ ᓄᓇᓕᒃ ᓇᑉᐸᖏᑦ ᐃᓕᓐᓂᐊᖅᑎᐅᓪᓗᑎᒃ ᓱᓕ, ᐱᕈᖅᐸᓪᓕᐊᓂᕐᒧᑦ ᓇᐅᔮᑦ ᑕᐅᑐᒐᖃᓗᐊᖅᑐᖅ ᑐᓂᓯᓂᕐᒧᑦ ᐱᔨᑦᑎᕋᐅᑎᓂᒃ ᓄᓇᓕᖕᒥᐅᓄᑦ. ᐃᓚᖏᑦ ᐅᔭᕋᖕᓂᐊᖅᑐᓕᕆᓃᑦ ᑕᐃᒪᐅᖃᑦᑕᖅᑐᑦ ᖃᓂᒋᔭᖓᓂᑦ, ᐃᑲᔪᐃᓂᖄᕐᔪᒃᖢᓂ ᓯᓚᑖᓂᙶᖅᑐᓂᑦ. ᐳᓚᕋᖅᑐᓕᕆᓂᖅ ᐱᒻᒪᕆᐅᖕᒥᔪᖅ ᐅᑭᐅᑉ ᐃᓚᖓᒍᑦ ᐱᓕᕆᐊᖃᕐᓂᕐᒧᑦ. ᓇᐅᔮᑦ ᐊᑉᖁᑎᒋᔭᐅᔪᖅ ᐅᒃᑯᓯᒃᓴᓕᒃ ᒥᕐᖑᐃᖅᓯᕝᕕᖕᒧᑦ ᐊᒻᒪᓗ ᖃᓂᒋᔭᖓᓄᑦ ᐅᒃᑯᓯᒃᓴᓕᐅᑉ, 145 ᑭᓛᒥᑕᒥᒃ ᐅᖓᓯᒃᑎᒋᔪᖅ ᓄᓇᓕᖕᒥᑦ. 15 ᒥᓂᑦ ᑎᖕᒥᓲᒃᑯᑦ ᑕᐃᑯᙵᕐᓇᖅᑐᖅ, ᐅᕝᕙᓘᓐᓃᑦ ᐅᒥᐊᒃᑯᑦ ᑕᐃᑯᙵᕈᓐᓇᖅᖢᑎᒃ, ᓯᑭᑑᒃᑯᑦ ᕿᒧᒃᓯᒃᑯᓪᓘᓐᓃᑦ, ᐅᑭᐅᑉ ᐃᓚᖓ ᐊᑐᕐᓗᒍ. ᕿᓚᓗᒐᕐᓂᒃ ᑕᐅᑐᒃᑎᑦᑎᓂᕐᒧᑦ ᐊᒻᒪᓗ ᐊᓯᖏᓐᓂᒃ ᓂᕐᔪᑎᓂᒃ ᐱᔾᔪᔾᔨᔨᑕᖃᖃᑦᑕᖅᑐᖅ ᓄᓇᓕᖕᒥᑦ ᐊᐅᓪᓚᖅᑕᕈᔾᔨᔨᓂᑦ, ᐊᐅᔭᒃᑯᓗᐊᖅ.

ᐊᒥᓱᓂᑦ ᓄᓇᕗᒻᒥ ᓄᓇᓕᐅᔪᑎᑐᑦ, ᑮᓇᐅᔭᒃᑯᕕᖃᙱᑦᑐᖅ ᓇᐅᔮᓂᑦ, ᐊᒻᒪᓗ ᑮᓇᐅᔭᑕᖃᑦᑎᐊᕈᓐᓃᕋᔪᒃᖢᓂ. ᓂᐅᕕᖅᑏᑦ ᐊᒻᒪᓗ ᑯᐊᐸᒃᑯᑦ “ᑮᓇᐅᔭᒃᑯᕕᓕᕆᓂᖄᕐᔪᒃᑐᑦ”, ᐊᖏᓗᐊᖏᑦᑐᒥᒃ ᑮᓇᐅᔭᓄᑦ ᑐᖅᑯᖅᓯᓯᒪᕝᕕᖃᕈᓐᓇᖅᖢᑎᒃ, ᐊᑭᒥᒃ ᐊᑭᓖᓗᑎᒃ ᑮᓇᐅᔭᙳᖅᑎᑦᑎᔪᓐᓇᖅᖢᑎᒃ ᑮᓇᐅᔭᒃᓴᓂᒃ, ᑕᒪᒃᑯᐊᒐᓚᐃᑦ. ᑮᓇᐅᔭᓂᒃ ᐊᒧᓯᔾᔪᑎᖃᖅᑐᖅ ᓂᐅᕕᕐᕕᖕᒥᑦ, ᐊᒻᒪᓗ ᑯᐊᐸᒃᑯᑦ ᐊᐅᒃᑕᔫᖏᓐᓂᒃ ᑮᓇᐅᔭᓂᒃ ᐊᒧᓯᑎᑦᑎᔪᓐᓇᖃᑦᑕᖅᖢᑎᒃ, ᑭᒡᓕᖃᖅᑐᒥᒃ ᑮᓇᐅᔭᖅᑕᖃᖅᖢᓂ. ᐊᐅᒃᑕᔫᑦ ᐊᒻᒪᓗ ᐊᑮᑐᖅᓯᔾᔪᑎᓂᒃ ᐊᐅᒃᑕᔫᓂᒃ ᐱᔨᑦᑎᕋᐅᑎᑕᖃᖅᑐᑦ ᓂᐅᕕᕐᕕᓗᒃᑖᑲᓴᐃᑦ. ᑕᐃᑯᙵᓵᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᒃᑯᕕᓕᕆᓂᕐᒥᒃ ᐋᖅᑭᒃᓯᖁᔭᐅᔪᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑮᑦᑐᓂᒃ ᐊᑭᓕᖅᑐᐃᓂᕐᒥᒃ, ᐱᓗᐊᖅᑐᒥᑦ ᑎᑎᖅᑲᓕᕆᕝᕕᒃᑰᖅᑎᑦᑎᓂᖅ ᓯᓚᕐᓘᒻᒧᑦ ᓄᖅᑲᖓᑎᑦᑎᔪᓐᓇᖅᑎᓪᓗᒍ ᐃᖏᕐᕋᔾᔪᑎᓂᒃ.

ᐆᒪᔪᐃᑦ: 

ᓇᐅᔮᑦ, “ᐃᕙᕕᖓᑦ ᓇᐅᔭᔾᔪᐊᑦ”, ᐊᔾᔨᒌᙱᑦᑐᓂᒃ ᑎᖕᒥᐊᖅᑕᖃᐅᖅᑐᖅ ᐊᐅᔭᒃᑯᑦ, ᐃᓚᐅᓪᓗᑎᒃ ᖃᐅᓪᓗᖅᑖᑦ, ᖃᖅᓴᐅᑦ, ᒥᑏᑦ, ᐅᒃᐱᒡᔪᐊᑦ, ᐃᓱᙵᖅ, ᐃᒥᖅᑯᑕᐃᓚᐃᑦ, ᖁᒡᔪᐃᑦ, ᐊᒻᒪᓗ ᓂᕿᑐᖅᑏᑦ, ᓲᕐᓗ ᑭᒡᒐᕕᐊᕐᔪᐃᑦ, ᐊᒻᒪᓗ ᓇᒃᑐᕋᓖᑦ, ᐊᓯᖏᓪᓗ. ᕿᓚᓗᒐᐃᑦ ᑕᐃᒫᓘᖃᑦᑕᖅᑐᑦ, ᑑᒑᓖᑦ, ᕿᓚᓗᒐᐃᑦ, ᐊᕐᕖᑦ ᐊᒻᒪᓗ ᐋᕐᓗᐃᑦ. ᐊᓯᖏᑦ ᑕᕆᐅᕐᒥᐅᑕᐃᑦ ᓇᑦᑏᑦ, ᐅᒡᔪᐃᑦ ᖃᐃᕈᓖᓪᓗ, ᓇᓄᐃᑦ ᐊᒻᒪᓗ ᐊᐃᕖᑦ. ᓄᓇᒥᐅᑕᐃᑦ ᑐᒃᑐᐃᑦ, ᐅᑲᓕᐊᕐᔪᐃᑦ, ᐊᒪᕈᐃᑦ, ᑎᕆᒐᓂᐊᑦ ᐊᒻᒪᓗ ᒥᑭᓂᖅᓴᐃᑦ.

ᐅᖃᓕᒫᑲᓐᓂᕐᓃᑦ : 
  • ᐸᓂᑦ, ᔮᓐ & ᓲᓴᓐ ᕉᓕ, ed. ᐅᖃᓗᕋᐃᑦ: ᐅᖃᐅᓯᖅ ᓇᑭᙶᕐᓂᖓᓂᑦ ᓄᓇᕗᑦ. Montreal & Kingston: McGill-Queen’s University Press, 2004.
  • ᑰᑉᓚᓐ, ᐊ. ᑕᑦᓕ. ᑯᐸᓗᒃ. ᐃᓱᒪᑕᖅ ᑭᐳᒃᑕᖅᑎᕆᔨ, ᓂᐅᕕᖅᑎᒃᑯᑦ, 1923-39. Winnipeg: Watson & Dwyer, 1989.
  • ᑐᕋᐃ, ᓗᐃ-ᔮᒃ. ᐅᖃᐅᓯᖓᑦ ᐃᓄᖕᓄᑦ syntax, semantics ᐊᒻᒪᓗ ᐃᓅᖃᑎᒌᑦ ᐅᑭᐅᖅᑕᖅᑐᒥᑦ. Montreal & Kingston: McGill-Queen’s University Press, 2010.
  • ᐄᐳᕐ, ᑐᐊᕈᑎ ᕼᐋᓕ. When the whalers were up North. Montreal & Kingston: McGill-Queen’s University Press, 1989
  • Fossett, Renee. ᐃᓅᓂᐊᕐᓗᓂ ᐃᖢᐃᓐᓂᖃᙱᑦᑐᒃᑯᑦ: ᐃᓄᐃᑦ ᐅᑭᐅᖅᑕᖅᑐᒥᐅᑕᐃᑦ, 1550-1940. Winnipeg: University of Manitoba Press, 2001.
  • ᐃᓯᓐᒪᓐ, ᐸᑎ ᑯᐸᔭᓯ. ᐊᓐᓄᕌᑦ ᐆᒪᓂᕐᒧᑦ: ᐆᒪᔪᑦ ᐃᓄᐃᑦ ᐊᓐᓄᕌᖏᑦ. Vancouver: UBC Press, 1997.
  • ᒪᒃᑖᓄᑦ, ᔮᓐ. ᐅᑭᐅᖅᑕᖅᑐᒥ ᓯᓚᖓ: ᐃᓄᐃᑦ ᓯᓚᓕᕆᓂᖓᑦ, ᐅᓪᓗᕆᐊᓕᕆᓂᖅ. ᐃᖃᓗᐃᑦ & Toronto: Nunavut Research Institute and Royal Ontario Museum, 1998.
  • ᒪᒌ, ᕌᐳᑦ. ᑭᖑᓪᓕᖅᐹᖅ ᑕᐅᑐᙳᐊᕐᓂᕐᒧᑦ ᐃᓂᐅᔪᖅ: ᐃᓄᐃᑦ ᓇᑭᙶᕐᓂᖏᑦ ᐅᑭᐅᖅᑕᖅᑐᒥᑦ. Toronto: Key Porter Books, Canadian Museum of Civilization, 2004.
  • ᒧᐊᕆᓯᓐ, ᑕᐃᕕᑦ ᐊᒻᒪ ᔪᐊᔨᔅ-ᕼᐄᐳᑦ ᔨᕐᒪᐃᓐ. ᐃᓄᐃᑦ: ᑕᐃᔅᓱᒪᓂᒥᑦ ᐅᑭᐅᖅᑕᖅᑐᒥᑦ ᑕᑯᓂᖅ. Hull: Canadian Museum of Civilization, 1995.
  • ᐸᐅᒃᑑᑎᑦ ᐃᓄᐃᑦ ᐊᕐᓇᓄᑦ ᑲᓇᑕᒥ. ᐃᓄᐃᑦ ᐊᑐᖅᑕᖓᑦ: ᐊᑐᖅᑕᐅᔪᒃᓴᖅ ᐃᓄᐃᑦ ᐱᖅᑯᓯᖓᓄᑦ, rev. ed. Ottawa: ᐸᐅᒃᑑᑎᑦ ᐃᓄᐃᑦ ᐊᕐᓇᓄᑦ ᑲᓇᑕᒥ, 2006. http://www.uqar.ca/files/boreas/inuitway_e.pdf
  • ᕈᓕ, ᒍᕋᐃᔭᒻ W. ᓂᒡᓕᓇᖅᑐᖅ ᐃᖢᕆᓇᖅ: ᓇᒡᓕᖕᓂᖃᓕᕐᕕᒋᔭᕋ ᐅᑭᐅᖅᑕᖅᑐᖅ. Montreal & Kingston: McGill-Queen’s University Press, 1996.