You are here

ᓴᓂᕋᔭᒃ

ᓴᓂᕋᔭᒃ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐃᓄᐃᑦ ᐅᓪᓗᒥᐅᔪᖅ ᓄᓇᓕᖓᓐᓂᑦ ᓴᓂᕋᔭᐅᑉ ᐊᑐᖃᑦᑕᖅᑐᑦ ᑕᐃᔅᓱᒪᓂᑐᖃᖅ ᐊᒻᒪᓗᐅᓪᓗᒥᐅᔪᖅ ᐱᔪᓂᒃ ᐃᒡᓗᓕᖕᒥᐅᓂᑦ, ᐃᓚᐅᓪᓗᑎᒃ ᑕᐃᑯᙵᖃᑦᑕᕐᓂᖏᑦ ᕿᓂᖅᑏᑦ ᐅᐃᓕᐊᒻ ᐱᐊᕆ, ᔪᐊᔾ ᕗᕌᓐᓯᔅ ᓚᐃᔭᓐ ᐊᒻᒪᓗᓴᕐᓕ ᕗᕌᓐᓯᔅ ᕼᐋᓪ, ᓴᓂᕋᔭᒃ ᑕᕝᕙᙵᑦ ᐊᑦᑎᖅᑕᐅᓯᒪᔪᖅ. ᐃᑦᑕᕐᓂᓴᖃᕐᓂᖅ ᑎᑭᑕᐅᓯᒪᓚᐅᕐᓂᖓᓄᑦ ᑕᐃᔅᓱᒪᓂᐊᓗᖕᒥᙶᖅᑐᖅ. ᐃᓄᒃᑎᑐᑦ ᐊᑎᖓ, ᓴᓂᕋᔭᒃ, ᑐᑭᖃᖅᑐᖅ “ᓯᒡᔭᑎᒍᑦ” ᐊᒻᒪᓗ ᖃᓂᒋᔭᖓᓂᒃ ᐱᔾᔪᑎᖃᖅᑐᖅ. ᓄᓇᓕᒃ ᓴᓂᕋᔭᒃ, 69 ᑭᓛᒥᑕᓪᓗᐊᖓᓂᑦ ᓂᒋᐊᓃᑦᑐᖅ ᐃᒡᓗᓕᐅᑉ ᓯᑯᓯᓚᕐᒥᐅᑦ ᐃᒪᖓᓐᓂᑦ, ᑕᐃᒪᙳᓚᐅᖅᑐᖅ ᓈᓚᒡᕕᒃ ᐃᓂᙳᓚᐅᕐᒪᑦ (ᐅᖑᓯᒃᑐᒥᒃ ᖃᐅᔨᑎᑦᑎᓵᓪᓕᔾᔪᑎ), ᓴᓇᔭᐅᓚᐅᖅᑐᖅ 1957-ᒥᑦ. ᖃᐅᔨᒪᔭᐅᔪᖅ FOX MAIN-ᒥᑦ, ᑭᓴᖅᓯᒪᕝᕕᐅᓚᐅᖅᑐᖅ ᖃᔅᓯᐊᕐᔪᖕᓄᑦ ᒥᑭᓂᖅᓴᓄᑦ ᐃᓂᐅᔪᓄᑦ ᕿᑭᖅᑖᓗᖕᒦᑦᑐᓄᑦ. ᐃᓂᐅᔪᖅ ᐊᖏᔪᒥᒃ ᕿᓂᕐᕕᒃᑕᖃᓚᐅᖅᑐᖅ ᐊᒻᒪᓗ ᒥᑦᑕᕐᕕᐅᔪᓐᓇᖅᖢᓂ ᐊᖏᔪᓄᑦ ᑎᖕᒥᓲᓄᑦ, ᓱᒃᑲᔪᓂᑦ, ᐊᖏᔪᖅ ᐅᖅᓱᐊᓘᓯᕝᕕᒃ ᐊᒻᒪᓗ ᐅᓇᑕᖅᑐᒃᓴᓄᑦ ᐊᑐᖅᑕᐅᔪᑦ ᐊᓯᖏᑦ. ᖃᖓᑐᖃᖅ ᓄᓇᙳᐊᑦ ᐊᒻᒪᓗ ᐊᔾᔩᑦ ᓈᓚᒡᕕᖕᒧᑦ ᐃᓂᐅᓚᐅᖅᑐᒧᑦ ᑕᐃᒪᐅᔪᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖕᒥᑦ. 7-ᖑᔪᑦ ᐃᒡᓗᕐᔪᐊᑦ ᑲᓇᑕᒧᑦ ᐱᒋᔭᐅᔪᑦ ᐃᑦᑕᕐᓂᓴᐅᓪᓗᑎᒃ ᐃᓂᐅᔪᑦ. ᐃᓂᐅᔪᖅ ᓈᓚᒡᕕᖕᒧᑦ ᐃᓂᒋᔭᐅᔪᖅ ᓱᓕ ᑭᓯᐊᓂ ᐊᖏᔪᑎᑐᑦ ᐃᓂᐅᔪᓐᓃᖅᑐᖅ.

ᓄᓇᕗᒻᒥ ᒐᕙᒪᒃᑯᖏᑦ (GN) ᐱᓕᕆᔨᖏᓐᓄᑦ ᓇᓗᓇᐃᔭᐃᓂᕐᒧᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᑐᓂᓯᖃᑦᑕᖅᑐᖅ ᐱᐅᔪᒻᒪᕆᖕᒥᑦ ᑲᑎᖅᓱᖅᓯᒪᔪᓂᒃ ᓇᑭᙶᕐᓂᖓᓂᑦ ᓄᓇᕗᒻᒥ, ᐊᑕᐅᑦᑎᒃᑯᑦ ᐃᓄᐃᑦ ᐃᓕᖅᑯᓯᖏᑦ ᐊᒻᒪᓗ ᓇᑭᙶᕐᓂᖓᓂᒃ ᐊᒻᒪᓗ ᐅᖃᐅᓯᖃᖅᑐᖅ ᖃᓄᖅ ᐃᓄᐃᑦ ᐃᓕᖅᑯᓯᖓᑦ ᐃᓚᐅᑎᑕᐅᖕᒪᖔᑕ ᒐᕙᒪᒃᑯᑦ ᐊᐅᓚᓂᕆᔭᖓᓐᓄᑦ ᐊᒻᒪᓗ ᐱᔨᑦᑎᕋᐅᑎᖏᓐᓄᑦ. ᕿᓂᕐᕕᐅᖁᔭᕗᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᐊᑐᐃᓐᓇᐅᓕᒃᑲᓐᓂᖅᐸᑦ ᐋᖅᑭᒃᓱᖅᑕᐅᕌᓂᒃᐸᑦ, ᒫᓐᓇᐅᔪᖅ ᓱᓇᑐᐃᓐᓇᓅᖓᔪᖓᑦ ᓄᓇᕗᑦ ᒐᕙᒪᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖓᑦ ᐆᒃᑐᕈᓐᓇᖅᑕᐃᑦ ᑐᑭᓯᐅᒪᔾᔪᑎᓂᒃ ᐱᓂᕐᒧᑦ.

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᓴᓂᕋᔭᖕᒥᐅᑕᐃᑦ ᐃᓕᖅᑯᓯᖃᖃᑎᖃᖅᑐᑦ ᐃᒡᓗᓕᖕᒥᐅᓂᑦ ᓯᓚᓪᓕᕆᔭᖏᑦᑎᑐᑦ ᐃᒡᓗᓕᖕᒥᐅᓂᑦ, ᐱᓕᕆᖃᑎᒋᖃᑦᑕᖅᑕᖏᑦ ᐃᓕᖅᑯᓯᑐᖃᒃᑰᖓᔪᓕᕆᓂᕐᒥᒃ ᖃᓄᐃᓕᐅᕐᓂᐅᔪᓂᒃ ᓲᕐᓗ ᕿᒧᒃᓯᐅᔾᔪᐊᕐᓂᖅ. ᐊᒥᓱᑦ ᖃᑕᙳᑎᒌᑦ ᒪᕐᕉᔫᖕᓂᑦ ᓄᓇᓕᖕᓂᑦ ᖃᓂᒌᖕᓂᖃᖅᑐᑦ. ᑐᒃᓯᐊᕐᓂᖅ ᐱᒻᒪᕆᐅᒋᔭᐅᖕᒥᔪᖅ ᓄᓇᓕᐅᑉ ᐊᒃᑐᐊᖃᑎᒌᖕᓂᖓᓄᑦ. ᓴᓂᕋᔭᒃ ᒪᕐᕉᖕᓂᒃ ᑐᒃᓯᐊᕐᕕᖃᖅᑐᖅ, ᓴᐃᓐᑦ ᕗᕌᓐᓯᔅ ᐃᒃᓯᕋᕐᔪᐊᒃᑯᑦ ᐊᒻᒪᓗ ᓴᐃᓐᑦ ᓴᐃᓕᔅ ᐊᔪᕆᖅᓱᐃᔨᒃᑯᑦ. ᓴᐃᓐᑦ ᓴᐃᓕᔅ ᐊᔪᕆᖅᓱᐃᔨᒃᑯᑦ ᐃᒡᓗᓕᖕᒥᑦ ᑐᒃᓯᐊᕐᕕᐅᑉ ᐃᓚᒋᔭᖓ ᐃᒃᓯᕋᕐᔪᐊᕆᔭᐅᔪᕐᓗ ᐃᒡᓗᓕᖕᒦᖦᖢᓂ. ᖃᐅᔨᒋᐊᕐᕕᒋᔭᕆᐊᖃᖅᑕᑎᑦ ᓄᓇᓕᖕᒥᐅᑕᐃᑦ ᒫᓐᓇᐅᔪᖅ ᓇᓗᓇᐃᔭᐅᑏᑦ ᒥᒃᓵᓄᑦ ᐅᖃᓘᑎᖃᙱᒻᒪᑕ.

ᐃᓄᒃᑎᑐᑦ ᐅᖃᐅᓯᖅ ᐅᖃᐅᓯᕆᔭᐅᓪᓗᐊᑕᖅᑐᖅ ᓄᓇᓕᖕᒥᑦ. 2011-ᒥᑦ ᓈᓴᖅᑕᐅᖕᒪᑕ, 95%-ᖑᔪᑦ ᑕᐃᑲᓂᕐᒥᐅᑕᐃᑦ ᐃᓄᒃᑎᑐᒻᒥᑦ ᐅᖃᐅᓯᖃᕐᓂᕋᓚᐅᖅᑐᑦ, ᐊᒻᒪᓗ 88%-ᖏᑦ ᑖᓐᓇ ᐅᖃᐅᓯᖅ ᐊᑐᖅᑕᐅᖃᑦᑕᕐᓂᖓᓄᑦ ᐊᖏᕐᕋᖓᓐᓂᑦ. ᑭᒃᑯᓗᒃᑖᑲᓴᐃᑦ ᖃᓪᓗᓈᑎᑑᖃᑦᑕᖅᑐᑦ, ᑭᓯᐊᓂ 18%-ᓗᐊᖏᑦ ᖃᓪᓗᓈᑎᑐᑦ ᐅᐃᕖᑎᑐᓪᓘᓃᑦ ᐅᖃᓪᓚᖕᓂᖅ ᐊᔪᖅᑐᑦ. 30%-ᓗᐊᑦ ᐊᑐᖃᑦᑕᖅᑐᑦ ᖃᓪᓗᓈᑎᑐᑦ ᐊᖏᕐᕋᖓᓐᓂᑦ ᓯᕗᓪᓕᖅᐸᐅᓪᓗᓂ ᐅᕝᕙᓘᓐᓃᑦ ᑐᒡᓕᕆᓪᓗᒍ ᐅᖃᐅᓯᖅ. ᓂᕆᐊᒍᓐᓇᖅᑐᑎᑦ ᐃᓄᓗᒃᑖᓂᒃ ᖃᓄᐃᓕᐅᖅᑎᑦᑎᓂᕐᓂᑦ ᐊᒻᒪᓗ ᑲᑎᒪᑎᑦᑎᓂᕐᓂᑦ ᑕᒪᐃᓐᓂᒃ ᐅᖃᐅᓰᒃ ᐊᑐᖅᑕᐅᑎᓪᓗᒋᑦ, ᑭᓯᐊᓂ ᐊᒥᓱᑦ ᐅᖃᓪᓗᕆᒃᓴᕐᓃᑦ ᐃᓄᒃᑎᑐᑐᐃᓐᓇᐅᖃᑦᑕᖅᑐᑦ, ᐊᒻᒪᓗ ᓂᕆᐅᒋᐊᖃᙱᑦᑐᑎᑦ ᐃᓄᒃᑎᑐᑦ ᐅᖃᓪᓗᕆᒃᓴᖅᑐᖃᖅᑎᓪᓗᒍ ᖃᓪᓗᓈᑎᑑᓕᖅᑐᖅᑕᐅᓂᐊᕐᓂᖓᓄᑦ ᖃᓪᓗᓈᖅᑕᖃᑐᐃᓐᓇᕐᓂᖓᓄᑦ. ᐃᓄᒃᑎᑐᑦ ᐅᖃᓪᓚᖕᓃᑦ ᐊᔾᔨᒌᖏᓐᓂᖃᖅᑐᑦ ᓄᓇᕗᒻᒥᑦ, ᐃᓄᒃᑎᑐᑦ ᐅᖃᓪᓚᖃᑦᑕᕈᕕᑦ ᓄᓇᓕᖕᒥᑦ, ᐸᕐᓇᒃᓯᒪᕙᒌᕐᓗᑎᑦ ᐃᓕᑦᑎᓂᕐᒧᑦ ᓄᑖᒥᒃ ᐅᖃᐅᓯᕐᒥᑦ ᐊᔾᔨᒌᙱᓐᓂᐅᔪᓂᒃ ᓄᓇᓕᐅᑉ ᐊᓯᐊᓄᐊᕈᕕᑦ ᐊᒻᒪᓗ ᐃᒪᖅᑳ ᑕᒻᒪᕈᕕᑦ ᐊᔪᕆᖅᓱᖅᑕᐅᓗᑎᑦ. ᐃᓄᐃᑦ ᐅᖃᐅᓯᖓᑦ (ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐊᑐᖅᑕᐅᔪᑦ ᐅᖃᐅᓯᕆᔭᐅᓂᕐᒧᑦ ᓄᓇᕗᒻᒥᑦ, ᑕᐃᒪᓐᓇᒧᑦ ᐱᔪᓐᓇᐅᑎᖃᖅᑐᑎᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓂᒃ ᑲᒪᒋᔭᐅᑎᓪᓗᑎᑦ ᐅᖃᐅᓯᕐᒥᑦ ᓇᓕᑐᐃᓐᓇᙱᓐᓂᒃ ᐊᑐᕈᒪᓗᑎᑦ.

ᓴᓂᕋᔭᒃ ᓄᓇᕗᒻᒥ ᓄᓇᓕᐅᖃᑕᐅᔪᖅ ᒪᒃᑯᒃᑐᓂᒃ ᐃᓄᖃᖅᖢᓂ. 2011-ᒥᑦ 85-ᖑᓚᐅᖅᑐᑦ ᐃᓕᓐᓂᐊᕆᐊᕐᓂᐊᓕᓵᖅᑐᑦ ᐊᒻᒪᓗ 150 ᐃᓕᓐᓂᐊᖅᑐᑦ ᓄᑕᖅᑲᐃᑦ 41%-ᖑᔪᖅ ᖃᔅᓯᐅᓂᖏᑦ ᐅᑭᐅᓖᑦ 18 ᑐᖔᓂᑦ. ᕿᑎᐊᓂᑦ ᐅᑭᐅᖃᖅᑐᑦ 21.2-ᓂᒃ ᐅᑭᐅᖃᖅᑐᑦ, ᐊᒻᒪᓗ 2%-ᖏᑦ ᖃᔅᓯᐅᓂᖏᑦᑕ 65 ᐅᖓᑖᓂᑦ ᐅᑭᐅᓖᑦ. ᐸᐃᕆᕝᕕᒃᑕᖃᙱᑦᑐᖅ ᓴᓂᕋᔭᖕᒥᑦ, ᐱᓕᕆᐊᖃᖅᑐᑦ ᖃᑕᙳᑎᒌᑦ ᐃᓕᓐᓂᐊᓕᓵᕐᓂᐊᖅᑐᓂᒃ ᓄᑕᖅᑲᖃᖅᑐᑦ ᓇᖕᒥᓂᖅ ᐸᐃᕆᔨᐅᕆᐊᖃᖃᑦᑕᖅᑐᑦ.

ᑮᓇᐅᔾᔭᒃᓴᕈᑕᐅᔪᑦ: 

ᐊᑐᖅᑕᐅᔪᓐᓃᖅᐸᓪᓕᐊᑎᓪᓗᒍ ᓈᓚᒡᕕᐅᔪᑦ ᐋᖅᑭᐅᒪᔪᖅ ᐅᐊᖕᓇᖓᓂᑦ ᐊᒥᐊᓕᑲᐅᑉ, ᓯᓚᑖᓂᑦ ᓴᓂᕋᔭᐅᑉ ᐱᕈᖅᐸᓪᓕᐊᓂᖓᓄᑦ ᐱᔪᖅ ᐊᖏᔪᒥᒃ ᒥᒃᖠᒋᐊᖅᓯᒪᔪᖅ. ᐱᕈᖅᐸᓪᓕᐊᓂᖅ ᑕᐅᑐᒐᖃᓗᐊᓕᖅᑐᖅ ᑐᓂᓯᓂᕐᒧᑦ ᐱᖁᑎᓂᒃ ᐊᒻᒪᓗ ᐱᔨᑦᑎᕋᐅᑎᓂᒃ ᓄᓇᓕᖕᒥᐅᓄᑦ. ᐊᒥᓱᑦ ᐊᖑᓇᓱᖃᑦᑕᖅᑐᑦ ᐃᖃᓗᒐᓱᒃᖢᑎᒡᓗ ᓂᕆᓂᐊᖅᑕᒥᓐᓂᑦ. ᓴᓂᕋᔭᒃ ᒐᕙᒪᒃᑯᑦ ᑎᑎᕋᕐᕕᖏᓐᓂᑦ ᐱᑕᖃᙱᒃᑲᓗᐊᖅᑎᓪᓗᒍ ᐱᕈᐃᑎᑦᑎᓂᖃᖅᑐᖅ ᐃᓚᖏᓐᓂᑦ ᓄᓇᓕᖕᓂᑦ ᓄᓇᕗᒻᒥᑦ, ᓲᕐᓗ ᖃᓂᒋᔭᖓᓂᑦ ᓄᓇᓕᒃ ᐃᒡᓗᓕᖕᒥᑦ, ᐳᓚᕋᖅᑐᓕᕆᓂᖅ ᑐᓂᓯᔪᖅ ᐱᕕᖃᕐᓂᐅᔪᓂᑦ ᓄᓇᓕᖕᒥᑦ ᐊᐅᓪᓚᖅᑕᕈᔾᔨᔨᐅᔪᓂᒃ. ᑕᐃᑯᙵᐅᔪᑦ ᐱᔪᒪᓂᖃᓗᐊᖃᑦᑕᖅᑐᑦ ᓯᑭᑑᒃᑯᑦ ᐊᒻᒪᓗ ᕿᒧᒃᓯᒃᑯᑦ, ᐊᒻᒪᓗ ᓯᑮᔨᖕᓂᕐᒥᑦ ᐅᑭᐅᒃᑯᑦ ᐊᒻᒪᓗ ᐅᐱᕐᖔᒃᑯᑦ, ᐊᒻᒪᓗ ᓂᕐᔪᑎᓂᒃ ᑕᐅᑐᖕᓂᖅ ᐱᐅᒋᔭᐅᔪᖅ ᐊᐅᔭᒃᑯᑦ, ᐊᒻᒪᓗ ᑕᑯᔭᖅᑐᐃᓂᖅ ᖃᓂᒋᔭᖓᓂᑦ ᐃᑦᑕᕐᓂᓴᖃᕐᕕᐅᔪᓂᑦ. ᓴᓂᕋᔭᖕᒥᑦ ᓴᓇᙳᐊᖅᑕᐅᔪᑦ ᖃᐅᔨᒪᔭᐅᖕᒥᔪᑦ ᐃᓄᐃᑦ ᓴᓇᙳᐊᒐᖏᓐᓂᑦ ᓄᓇᕐᔪᐊᕐᒥᑦ.

ᐊᒥᓱᓂᑦ ᓄᓇᕗᒻᒥ ᓄᓇᓕᐅᔪᑎᑐᑦ, ᑮᓇᐅᔭᒃᑯᕕᖃᙱᑦᑐᖅ ᓴᓂᕋᔭᖕᒥᑦ, ᐊᒻᒪᓗ ᑮᓇᐅᔭᑕᖃᑦᑎᐊᕈᓐᓃᕋᔪᒃᖢᓂ. ᓂᐅᕕᖅᑏᑦ ᐊᒻᒪᓗ ᑯᐊᐸᒃᑯᑦ “ᑮᓇᐅᔭᒃᑯᕕᓕᕆᓂᖄᕐᔪᒃᑐᑦ”, ᐊᖏᓗᐊᖏᑦᑐᒥᒃ ᑮᓇᐅᔭᓄᑦ ᑐᖅᑯᖅᓯᓯᒪᕝᕕᖃᕈᓐᓇᖅᖢᑎᒃ, ᐊᑭᒥᒃ ᐊᑭᓖᓗᑎᒃ ᑮᓇᐅᔭᙳᖅᑎᑦᑎᔪᓐᓇᖅᖢᑎᒃ ᑮᓇᐅᔭᒃᓴᓂᒃ, ᑕᒪᒃᑯᐊᒐᓗᐃᑦ. ᑮᓇᐅᔭᓂᒃ ᐊᒧᓯᔾᔪᑎᖃᖅᑐᖅ ᓂᐅᕕᕐᕕᖕᒥᑦ, ᑭᒡᓕᖃᖅᑐᒥᒃ ᑮᓇᐅᔭᖅᑕᖃᖅᖢᓂ. ᑕᐃᑯᙵᓵᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᒃᑯᕕᓕᕆᓂᕐᒥᒃ ᐋᖅᑭᒃᓯᖁᔭᐅᔪᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑮᑦᑐᓂᒃ ᐊᑭᓕᖅᑐᐃᓂᕐᒥᒃ, ᐱᓗᐊᖅᑐᒥᑦ ᑎᑎᖅᑲᓕᕆᕝᕕᒃᑰᖅᑎᑦᑎᓂᖅ ᓯᓚᕐᓘᒻᒧᑦ ᓄᖅᑲᖓᑎᑦᑎᔪᓐᓇᖅᑎᓪᓗᒍ ᐃᖏᕐᕋᔾᔪᑎᓂᒃ.

ᐆᒪᔪᐃᑦ: 

ᓴᓂᕋᔭᐅᑉ ᖃᓂᒋᔭᖓ ᐊᔾᔨᒌᙱᑦᑐᓂᒃ ᑕᕆᐅᕐᒥᐅᑕᖅᑕᖃᐅᖅᑐᖅ, ᕿᓚᓗᒐᐃᑦ, ᐊᐃᕖᑦ, ᓇᑦᑏᑦ, ᑑᒑᓖᑦ, ᐊᒻᒪᓗ ᓇᓄᐃᑦ. ᒪᓂᕋᕈᔫᔪᖅ ᓄᓇ ᑎᖕᒥᐊᖅᑕᖃᐅᕐᒥᔪᖅ ᐊᐅᔭᒃᑯᑦ, ᐱᓗᐊᖅᑐᒥᑦ ᓄᓇᒥᑦ ᐃᕙᕕᓕᐅᖃᑦᑕᖅᑐᑦ ᓲᕐᓗ ᒥᑏᑦ, ᑲᖑᐃᑦ, ᖃᖅᓴᐅᑦ, ᖁᓪᓕᖁᓕᐊᑦ, ᖃᐅᓪᓗᖅᑖᑦ ᐊᒻᒪᓗ ᐅᒃᐱᒡᔪᐊᑦ. ᒥᑭᑦᑐᑦ ᓂᕐᔪᑏᑦ ᑕᐃᒪᐅᔪᑦ ᑕᐃᑲᓂ. ᑕᕆᐅᕐᒥᐅᑕᐃᑦ ᐃᖃᓗᐃᑦ ᐊᒻᒪᓗ ᐃᖣᕋᐃᑦ ᐃᖃᓗᒐᓱᒃᑕᐅᖃᑦᑕᖅᑐᑦ ᑕᐃᑲᓂ.

ᐅᖃᓕᒫᑲᓐᓂᕐᓃᑦ : 
  • ᐸᓂᑦ, ᔮᓐ & ᓲᓴᓐ ᕉᓕ, ed. ᐅᖃᓗᕋᐃᑦ: ᐅᖃᐅᓯᖅ ᓇᑭᙶᕐᓂᖓᓂᑦ ᓄᓇᕗᑦ Montreal and Kingston: McGill-Queen’s University Press, 2004.
  • ᑐᕋᐃ, ᓗᐃ-ᔮᒃ, ᐅᖃᐅᓯᖓᑦ ᐃᓄᖕᓄᑦ syntax, semantics ᐊᒻᒪᓗ ᐃᓅᖃᑎᒌᑦ ᐅᑭᐅᖅᑕᖅᑐᒥᑦ. Montreal & Kingston: McGill-Queen’s University Press, 2010.
  • ᐃᓯᓐᒪᓐ, ᐸᑎ ᑯᐸᔭᓯ. ᐊᓐᓄᕌᑦ ᐆᒪᓂᕐᒧᑦ: ᐆᒪᔪᑦ ᐃᓄᐃᑦ ᐊᓐᓄᕌᖏᑦ. Vancouver: UBC Press, 1997.
  • ᒪᒃᑖᓄᑦ, ᔮᓐ. ᐅᑭᐅᖅᑕᖅᑐᒥ ᓯᓚᖓ: ᐃᓄᐃᑦ ᓯᓚᓕᕆᓂᖓᑦ, ᐅᓪᓗᕆᐊᓕᕆᓂᖅ. ᐃᖃᓗᐃᑦ & Toronto: Nunavut Research Institute and Royal Ontario Museum, 1998.
  • ᒪᒌ, ᕌᐳᑦ. ᑭᖑᓪᓕᖅᐹᖅ ᑕᐅᑐᙳᐊᕐᓂᕐᒧᑦ ᐃᓂᐅᔪᖅ: ᐃᓄᐃᑦ ᓇᑭᙶᕐᓂᖏᑦ ᐅᑭᐅᖅᑕᖅᑐᒥᑦ. Toronto: Key Porter Books, Canadian Museum of Civilization, 2004.
  • ᒧᐊᕆᓯᓐ, ᑕᐃᕕᑦ ᐊᒻᒪ ᔪᐊᔨᔅ-ᕼᐄᐳᑦ ᔨᕐᒪᐃᓐ. ᐃᓄᐃᑦ: ᑕᐃᔅᓱᒪᓂᒥᑦ ᐅᑭᐅᖅᑕᖅᑐᒥᑦ ᑕᑯᓂᖅ. Hull: Canadian Museum of Civilization, 1995.
  • ᐸᐅᒃᑑᑎᑦ ᐃᓄᐃᑦ ᐊᕐᓇᓄᑦ ᑲᓇᑕᒥ. ᐃᓄᐃᑦ ᐊᑐᖅᑕᖓᑦ: ᐊᑐᖅᑕᐅᔪᒃᓴᖅ ᐃᓄᐃᑦ ᐱᖅᑯᓯᖓᓄᑦ, rev. ed. Ottawa: ᐸᐅᒃᑑᑎᑦ ᐃᓄᐃᑦ ᐊᕐᓇᓄᑦ ᑲᓇᑕᒥ, 2006. http://www.uqar.ca/files/boreas/inuitway_e.pdf