You are here

ᓴᓪᓕᖅ

ᓴᓪᓕᖅ

ᐊᕕᒃᑐᖅᓯᒪᓂᖓ: 
Kivalliq School Operations (KSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᓴᓪᓕᖅ ᐊᑎᖓ ᐱᔭᖓᑦ ᑕᐃᔅᓱᒪᓂᑐᖃᖅ ᑐᒥᐅᔪᓂᑦ ᑕᐃᑲᓂ, ᐊᒻᒪᓗ ᑕᐃᔅᓱᒪᓂᑐᖃᕐᒥᑦ ᑎᑎᖅᑲᐅᔪᑦ ᑕᑯᒃᓴᐅᑎᑦᑎᔪᑦ ᐃᓄᐃᑦ ᓴᓪᓕᕐᓃᑉᐸᓚᐅᕐᓂᖏᓐᓄᑦ ᑕᐃᒪᙵᑦ ᑐᓂᕐᓄᑦ ᐃᓕᖅᑯᓯᕆᔭᐅᓚᐅᖅᑐᒥ (500 ᐅᑭᐅᑦ ᔩᓱᓯ ᐃᓅᖅᑲᖅᑎᓐᓇᒍᒥᑦ 1500 ᐅᑭᐅᑦ ᔩᓱᓯ ᐃᓅᔪᓐᓃᖅᑎᓪᓗᒍᒧᑦ). ᓴᓪᓕᖅ-ᒥᑦ ᑕᐃᔭᐅᔪᖅ, ᑐᑭᖃᖅᑐᖅ “ᐊᖏᔪᖅ ᒪᓂᕋᖅ ᕿᕿᖅᑕᖅ ᓄᓇᐅᑉ ᓵᖓᓂᑦ.” ᓯᕗᓪᓕᖅᐹᖅ ᑎᑎᖅᑲᐅᓯᐅᖅᑕᐅᓯᒪᔪᖅ ᑕᕆᐅᑉ ᐊᑭᐊᓂᙶᖅᑐᖅᑕᖃᕐᒪᑦ ᐳᕆᑎᔅ-ᒥᙶᖅᑐᖅ ᑖᒥᔅ ᐸᑎᓐ 1613-ᒥᑦ. ᑕᒪᕐᒥᒃᒥᑦ ᕿᓂᖅᖢᓂ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᕐᑯᒃ ᐊᖅᑯᑎᖓᒍᑦ ᐊᒻᒪᓗ ᑕᐃᒪᐅᓚᐅᕐᓂᖓᓄᑦ ᖃᓄᐃᓕᖕᒪᖔᑦ ᕼᐊᓄᕆ ᕼᐊᑦᓴᓐ, ᑕᐃᒪᓐᓇᒧᑦ ᐊᑎᕆᔭᖓ ᑕᕆᐅᖅ ᑕᐃᒪᙵᑦ 1611-ᒥᑦ. ᐸᑎᓐ ᐊᑦᑎᓚᐅᖅᑕᖓ ᕿᕿᖅᑕᖅ Earl of Southampton-ᒥᑦ ᑕᐃᔅᓱᒪᓂ. ᐊᕙᑖᓂ ᓴᓪᓕᐅᑉ ᐃᒪᐃᑦ ᐊᕐᕕᖅᓯᐅᕐᕕᙳᓚᐅᖅᓯᒪᔪᖅ. ᐊᕐᕕᖅᓯᐅᕐᓂᖅ ᐱᒋᐊᓚᐅᖅᑐᖅ 1700-ᖏᓐᓂᑦ ᑕᐃᑯᙵ 1900-ᖏᑦ ᐱᒋᐊᓵᖅᑎᓪᓗᒋᒧᑦ, ᐊᕐᕕᒃᑕᖃᓗᐊᕈᓐᓃᕐᒪᑦ ᐊᒻᒪᓗ ᐊᑐᖅᑕᐅᖃᑦᑕᓕᖅᑐᑦ ᐊᓯᖏᓐᓂᒃ ᐅᖅᓱᕐᒥᑦ ᐊᑐᖔᖃᑦᑕᓕᕐᒪᑕ. ᖃᐅᔨᒪᔭᐅᔪᖅ ᓴᓪᓕᕐᒥᐅᑦ, ᐃᒪᖅᑳ ᑭᖑᓪᓕᖅᐹᖑᓕᖅᑐᓂᑦ ᑑᓕ ᐃᓄᖕᓂᑦ, ᐃᓄᐃᑦ ᑕᐃᑲᓃᑦᑐᑦ ᐱᑕᖃᕈᓐᓃᓚᐅᖅᑐᑦ 1902-03-ᒥᑦ ᐋᓐᓂᐊᖅᑖᕐᒪᑕ ᓄᑮᕐᓇᕐᓂᑦ, ᓯᑳᑎᔅ-ᖑᔪᒥᑦ ᐊᕐᕕᖅᓯᐅᖅᑎᒧᑦ ᑎᑭᐅᔾᔭᐅᔪᖅ. ᐊᒥᐊᒃᑯᖏᑦ ᐃᓂᖃᕐᕕᐅᓚᐅᖅᑑᑉ ᑕᐃᒪᐅᔪᑦ Native Point-ᒥᑦ.

1912-1913 ᖃᓂᒋᔭᖓᓂᑦ, ᓇᐅᔮᕐᒥᐅᑕᐃᑦ ᐊᒻᒪᓗ ᐃᒡᓗᓕᒑᕐᔪᖕᒥᐅᑕᐃᑦ, ᐱᖓᓐᓇᖓᓂᑦ ᑕᓯᐅᔭᕐᔪᐊᑉ ᓯᒡᔭᖓᓃᑦᑐᑦ , ᓅᓚᐅᖅᑐᑦ ᕿᑭᖅᑕᕐᒧᑦ. ᓂᐅᕕᖅᑏᑦ (HBC) ᐃᓂᓕᐅᓚᐅᖅᑐᑦ ᓴᓪᓕᕐᓂᑦ 1924-ᒥᑦ Coats Island-ᒥᙶᖅᖢᑎᒃ. ᐃᓄᖕᓂᒃ ᑕᐃᑯᙵᐅᑎᑦᑎᓚᐅᖅᑐᖅ, ᕿᑭᖅᑕᕐᒥᑐᐃᓐᓇᐅᖏᑦᑐᓂᒃ, ᑭᓯᐊᓂ ᐅᖓᓯᒃᑐᒥᑦᑕᐅᖅ. ᑕᒪᕐᒥᒃ ᐊᔪᕆᖅᓱᐃᔨᒃᑯᑦ ᐊᒻᒪᓗ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖃᓕᓚᐅᖅᑐᑦ ᑕᐃᑲᓂ ᓂᐅᕕᖅᑎᒃᑯᑦ ᑕᐃᑯᙵᖅᑳᖅᑎᓪᓗᒋᑦ. ᑐᒡᓕᖓᓂᑦ ᓄᓇᕐᔪᐊᕐᒥᑦ ᐅᓇᑕᕕᒡᔪᐊᕐᒪᑕ, ᐊᒥᐊᓕᑲᒃᑯᑦ ᐅᓇᑕᖅᑐᒃᓴᖏᑦ ᒥᕝᕕᓕᐅᓚᐅᖅᑐᑦ ᐊᓯᖏᓐᓂᒡᓗ, ᐃᓚᒋᔭᐅᓕᓚᐅᖅᑐᖅ ᐅᑭᐅᖅᑕᖅᑐᒥᑦ ᑕᕆᐅᑉ ᐊᑭᐊᓄᑦ ᐊᖅᑯᑎᒋᔭᐅᓂᕐᒧᑦ (Crimson Route) ᓅᑦᑎᓂᕐᒧᑦ ᑎᖕᒥᓲᓂᒃ ᐊᒻᒪᓗ ᐱᖁᑎᓂᒃ. ᑕᐃᒪᐅᓂᖓᓄᑦ ᐃᓂᐅᔪᖅ ᐃᓂᒋᔭᐅᓕᓚᐅᖅᑐᖅ ᐱᕙᓪᓕᐊᔭᐅᓂᖓᓄᑦ ᓈᓚᒡᕕᓂᑦ (ᐅᖑᓯᒃᑐᒥᒃ ᖃᐅᔨᑎᑦᑎᓵᓪᓕᔾᔪᑎ) ᐃᓂᐅᔪᓂᒃ ᐅᓇᑕᕕᒡᔪᐊᕐᓂᒥᑦ ᑐᒡᓕᐊᓂᑦ ᓄᓇᕐᔪᐊᕐᒥᑦ ᐅᓇᑕᕕᒡᔪᐊᕌᓂᒃᑎᓪᓗᒍ. ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᓂᖃᖅᐸᓪᓕᐊᓕᓚᐅᖅᑐᑦ ᑕᐃᑲᓂ ᐃᓕᓐᓂᐊᕐᕕᓕᐅᖅᖢᑎᒃ 1950-ᒥᑦ, ᐋᓐᓂᐊᕐᕕᒃ 1963-ᒥᑦ, ᐊᒻᒪᓗ ᓄᓇᓕᖕᒥᑦ ᐃᒡᓗᕐᔪᐊᓂᒃ. ᓴᓪᓕᖅ ᕼᐋᒻᓚᙳᓚᐅᖅᑐᖅ 1972-ᒥᑦ.

ᓄᓇᕗᒻᒥ ᒐᕙᒪᒃᑯᖏᑦ (GN) ᐱᓕᕆᔨᖏᓐᓄᑦ ᓇᓗᓇᐃᔭᐃᓂᕐᒧᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᑐᓂᓯᖃᑦᑕᖅᑐᖅ ᐱᐅᔪᒻᒪᕆᖕᒥᑦ ᑲᑎᖅᓱᖅᓯᒪᔪᓂᒃ ᓇᑭᙶᕐᓂᖓᓂᑦ ᓄᓇᕗᒻᒥ, ᐊᑕᐅᑦᑎᒃᑯᑦ ᐃᓄᐃᑦ ᐃᓕᖅᑯᓯᖏᑦ ᐊᒻᒪᓗ ᓇᑭᙶᕐᓂᖓᓂᒃ ᐊᒻᒪᓗ ᐅᖃᐅᓯᖃᖅᑐᖅ ᖃᓄᖅ ᐃᓄᐃᑦ ᐃᓕᖅᑯᓯᖓᑦ ᐃᓚᐅᑎᑕᐅᖕᒪᖔᑕ ᒐᕙᒪᒃᑯᑦ ᐊᐅᓚᓂᕆᔭᖓᓐᓄᑦ ᐊᒻᒪᓗ ᐱᔨᑦᑎᕋᐅᑎᖏᓐᓄᑦ. ᕿᓂᕐᕕᐅᖁᔭᕗᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᒃ ᐊᑐᐃᓐᓇᐅᓕᒃᑲᓐᓂᖅᐸᑦ ᐋᖅᑭᒃᓱᖅᑕᐅᕌᓂᒃᐸᑦ, ᒫᓐᓇᐅᔪᖅ ᓱᓇᑐᐃᓐᓇᓅᖓᔪᖓᑦ ᓄᓇᕗᑦ ᒐᕙᒪᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᖅᑐᕐᕕᖓᑦ ᐆᒃᑐᕈᓐᓇᖅᑕᐃᑦ ᑐᑭᓯᐅᒪᔾᔪᑎᓂᒃ ᐱᓂᕐᒧᑦ.

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᓴᓪᓕᖅ ᐱᖅᑯᓯᖃᕐᓂᒃᑯᑦ ᓄᓇᓕᐅᔪᖅ ᐊᖑᓇᓱᖕᓂᖅ ᐊᒻᒪᓗ ᐃᖃᓗᒐᓱᖕᓂᖅᑕᖃᖅᖢᓂ ᖃᐅᑕᒫᑦ ᐃᓅᓯᕆᔭᐅᔪᓂᑦ. ᐃᓕᖅᑯᓯᕆᔭᖓᓐᓄᑦ ᑕᑯᒃᓴᐅᑎᑦᑎᔪᖅ, ᐊᒥᓱᑦ ᐊᕐᓇᐃᑦ ᖁᓕᑦᑕᐅᔭᓕᐅᖃᑦᑕᖅᑐᑦ, ᒥᖅᑯᓕᖕᓂᑦ ᐳᐊᓗᓂᒃ ᐊᒻᒪᓗ ᓇᑦᑎᕐᓂᑦ ᐅᖅᑰᔪᓂᒃ ᐊᓐᓄᕌᕆᔭᐅᓂᐊᖅᑐᓂᒃ ᖃᑕᙳᑎᖏᓐᓄᑦ. ᑐᒃᓯᐊᕐᕖᑦ ᐱᒻᒪᕆᐅᔪᒥᒃ ᐃᓚᒌᖕᓂᕐᒧᑦ ᐃᓚᒋᔭᐅᖕᒥᔪᑦ. ᓴᓪᓕᖅ ᐱᖓᓱᓂᒃ ᐅᒃᐱᕐᓂᓕᖕᓄᑦ ᑐᒃᓯᐊᕐᕕᖃᖅᑐᖅ: ᐃᒃᓯᕋᕐᔪᐊᑦ, ᐊᔪᕆᖅᓱᐃᔨᒃᑯᑦ ᐊᒻᒪᓗ Glad Tidings. ᑕᑯᓗᒍ ᑎᑎᕋᖅᓯᒪᔪᑦ ᖃᐅᔨᒋᐊᕐᕕᐅᓂᕐᒧᑦ ᐅᖃᓘᑎᖏᑦᑕ ᓈᓴᐅᑎᖏᓐᓄᑦ.

ᐅᖃᐅᓯᖅ ᐊᑐᖅᑕᐅᓗᐊᖃᑦᑕᖅᑐᖅ ᓴᓪᓕᕐᒥᑦ ᐃᓄᒃᑎᑐᑦ. 2011-ᒥᑦ ᓈᓴᖅᑕᐅᖕᒪᑕ, 92%-ᖑᔪᑦ ᑕᐃᑲᓂᕐᒥᐅᑕᐃᑦ ᐃᓄᒃᑎᑐᒻᒥᑦ ᐅᖃᐅᓯᖃᕐᓂᕋᓚᐅᖅᑐᑦ, ᐊᒻᒪᓗ 73%-ᖏᑦ ᑖᓐᓇ ᐅᖃᐅᓯᖅ ᐊᑐᖅᑕᐅᖃᑦᑕᕐᓂᖓᓄᑦ ᐊᖏᕐᕋᖓᓐᓂᑦ. ᑭᓯᐊᓂ, ᑕᒪᕐᒥᑲᓴᐃᑦ ᖃᓪᓗᓈᑎᑑᖃᑦᑕᖅᑐᑦ. 60%-ᓗᐊᖏᑦ ᐊᑐᖃᑦᑕᖅᑕᖓᑦ ᖃᓪᓗᓈᑎᑐᑦ ᐅᖃᐅᓯᖅ ᑐᒡᓕᕆᓪᓗᒍ ᐅᖃᐅᓯᖓᓐᓂᑦ ᐊᖏᕐᕋᖓᓐᓂᑦ ᐊᒻᒪᓗ 5%-ᓗᐊᑐᐃᓐᓇᐃᑦ ᖃᓪᓗᓈᑎᑐᑦ ᐅᕝᕙᓘᓐᓃᑦ ᐅᐃᕖᑎᑐᑦ ᐅᖃᓪᓚᒍᓐᓇᙱᖦᖢᑎᒃ. ᖃᔅᓯᐊᕐᔪᖕᓂᑦ ᐅᐃᕖᑎᑐᑦ ᐅᖃᓪᓚᒍᓐᓇᖅᑐᖅᑕᖃᖅᑐᖅ ᓴᓪᓕᕐᓂᑦ. ᓂᕆᐅᒍᓐᓇᖅᑐᑎᑦ ᐃᓄᓕᒫᓂᒃ ᑲᑎᒪᑎᑦᑎᓂᕐᓂᑦ ᑕᒪᐃᓐᓂᒃ ᐅᖃᐅᓰᒃ ᐊᑐᖃᑦᑕᖅᑐᑦ ᐊᒻᒪᓗ ᖃᓪᓗᓈᑎᑐᑦ ᐊᑐᖅᑕᐅᓂᖏᓐᓄᑦ, ᑭᓯᐊᓂ ᐊᒥᓱᑦ ᐅᖃᓪᓗᕆᒃᓴᕐᓃᑦ ᐃᓄᒃᑎᑐᑐᐃᓐᓇᐅᖃᑦᑕᖅᑐᑦ, ᐊᒻᒪᓗ ᓂᕆᐅᒋᐊᖃᙱᑦᑐᑎᑦ ᐃᓄᒃᑎᑐᑦ ᐅᖃᓪᓗᕆᒃᓴᖅᑐᖃᖅᑎᓪᓗᒍ ᖃᓪᓗᓈᑎᑑᓕᖅᑎᑕᐅᓂᐊᕐᓂᖓᓄᑦ ᖃᓪᓗᓈᖅᑕᖃᑐᐃᓐᓇᕐᓂᖓᓄᑦ. ᐃᓄᒃᑎᑐᑦ ᐅᖃᓪᓚᖕᓃᑦ ᐊᔾᔨᒌᙱᓐᓂᖃᖅᑐᑦ ᓄᓇᕗᒻᒥᑦ, ᐃᓄᒃᑎᑐᑦ ᐅᖃᓪᓚᖃᑦᑕᕈᕕᑦ ᓄᓇᓕᖕᒥᑦ, ᐸᕐᓇᒃᓯᒪᕙᒌᕐᓗᑎᑦ ᐃᓕᑦᑎᓂᕐᒧᑦ ᓄᑖᒥᒃ ᐅᖃᐅᓯᕐᒥᑦ ᐊᔾᔨᒌᙱᓐᓂᐅᔪᓂᒃ ᓄᓇᓕᐅᑉ ᐊᓯᐊᓄᐊᕈᕕᑦ ᐊᒻᒪᓗ ᐃᒪᖅᑳ ᑕᒻᒪᕈᕕᑦ ᐊᔪᕆᖅᓱᖅᑕᐅᓗᑎᑦ. ᐃᓄᐃᑦ ᐅᖃᐅᓯᖓᑦ (ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐊᑐᖅᑕᐅᔪᑦ ᐅᖃᐅᓯᕆᔭᐅᓂᕐᒧᑦ ᓄᓇᕗᒻᒥᑦ, ᑕᐃᒪᓐᓇᒧᑦ ᐱᔪᓐᓇᐅᑎᖃᖅᑐᑎᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓂᒃ ᑲᒪᒋᔭᐅᑎᓪᓗᑎᑦ ᐅᖃᐅᓯᕐᒥᑦ ᓇᓕᐊᑐᐃᓐᓇᓂᒃ ᐊᑐᕈᒪᓗᑎᑦ.

ᓴᓪᓕᕐᒥᑦ ᖃᔅᓯᐅᓂᖏᑦ ᒪᒃᑯᒃᑑᔪᑦ ᑲᓇᑕᐅᑉ ᒪᓕᒃᑕᖏᓐᓄᑦ, ᑭᓯᐊᓂ ᑭᑎᐊᓃᕈᔪᒃᖢᓂ ᓄᓇᕗᒻᒥ ᓄᓇᓕᐅᔪᓂᑦ. 2011-ᒥᑦ 125-ᖑᓚᐅᖅᑐᑦ ᐃᓕᓐᓂᐊᕆᐊᕐᓂᐊᓕᓵᖅᑐᑦ ᐊᒻᒪᓗ 215 ᐃᓕᓐᓂᐊᖅᑐᑦ ᓄᑕᖅᑲᐃᑦ 41%-ᖑᔪᖅ ᖃᔅᓯᐅᓂᖏᑦ ᐅᑭᐅᓖᑦ 18 ᑐᖔᓂᑦ; 4%-ᖏᑦ ᖃᔅᓯᐅᓂᖏᑦᑕ 65 ᐅᖓᑖᓂᑦ ᐅᑭᐅᓖᑦ, ᖃᔅᓯᐊᕐᔫᓪᓗᑎᒃ 85-ᓂᑦ ᐅᑭᐅᓖᑦ.

ᑮᓇᐅᔾᔭᒃᓴᕈᑕᐅᔪᑦ: 

ᕿᑎᐊᓃᕈᔪᒃᖢᓂ ᐱᖅᑯᓯᖃᖅᖢᑎᒃ ᓄᓇᓕᒃ, ᓴᓪᓕᐅᑉ ᐱᕈᖅᐸᓪᓕᐊᓂᖓ ᓄᓇᓕᖕᒦᖓᔪᖅ, ᐱᓕᕆᐊᖃᓗᐊᖅᖢᑎᒃ ᐱᔨᑦᑎᕋᐃᓂᕐᒥᑦ ᓄᓇᓕᖕᒥᐅᓄᑦ. ᐊᒥᓱᑦ ᐃᓄᐃᑦ ᐊᖑᓇᓱᖃᑦᑕᖅᑐᑦ ᐊᒻᒪᓗ ᐃᖃᓪᓕᐊᖅᖢᑎᒃ ᓂᕆᓂᐊᖅᑕᒥᖕᓂᑦ. ᓄᓇᓕᖕᒥᑦ ᒥᖅᓱᖅᑏᑦ ᓂᐅᕕᐊᒃᓴᖃᖃᑦᑕᖅᑐᑦ ᓴᓇᔭᖏᓐᓂᒃ ᐊᒻᒪᓗ ᐅᓪᓗᒥᐅᓕᖅᑐᖅ ᑲᒫᒋᔭᐅᔪᓂᒃ, ᐳᐊᓗᓂᒃ ᐊᒻᒪᓗ ᖁᓕᑦᑕᐅᔭᓂᒃ ᐊᔾᔨᒌᙱᑦᑐᓂᒃ. ᓄᓇᓕᖕᒥᑦ ᓴᓇᙳᐊᖅᑕᐅᔪᑦ ᐃᓚᐅᔪᑦ ᓴᓂᕋᕐᒧᐊᖅᑐᒃᓴᐃᑦ, ᕿᑐᙵᐅᔭᐃᑦ, ᐊᒻᒪᓗ ᓴᓇᙳᐊᖅᑕᐅᔪᑦ ᐅᒃᑯᓯᒃᓴᒧᑦ, ᕿᓚᓗᒐᐅᑉ ᓴᐅᓂᖏᓐᓂᑦ, ᐊᐃᕕᐅᑉ ᑑᒑᖏᓐᓂᑦ ᐊᒻᒪᓗ ᑐᒃᑐᐃᑦ ᓇᒡᔪᖏᓐᓂᑦ. ᓴᓪᓕᖅ ᒐᕙᒪᒃᑯᑦ ᑎᑎᕋᕐᕕᖏᓐᓂᑦ ᐱᑕᖃᙱᒃᑲᓗᐊᖅᑎᓪᓗᒍ ᐱᕈᐃᑎᑦᑎᓂᖃᑦᑎᐊᖅᑐᖅ ᐃᓚᖏᓐᓂᑦ ᓄᓇᓕᖕᓂᑦ ᓄᓇᕗᒻᒥᑦ, ᐅᑭᐅᑉ ᐃᓚᖓᒍᑦ ᐱᓕᕆᓂᖅ ᐱᒻᒪᕆᐅᔪᖅ ᑐᒃᑐᓯᐅᖃᑦᑕᖅᑐᓄᑦ ᓂᐅᕕᐊᒃᓴᐅᓂᐊᖅᑐᓂᒃ, ᓴᓇᔭᐅᕙᓪᓕᐊᔪᓂᑦ, ᐊᒻᒪᓗ ᓄᓇᓕᖕᒥᑦ ᐳᓚᕋᖅᑐᓕᕆᓂᖅ. ᐳᓚᕋᖅᑎᑦᑎᓂᖅ ᓄᓇᓕᖕᒥᐅᓂᒃ ᐳᓚᕋᖅᑐᓕᕆᔨᐅᔪᓂᒃ ᑕᐅᑐᒋᐊᖅᑐᖅᑎᑦᑎᓂᕐᒧᑦ ᑎᖕᒥᐊᓂᒃ ᐊᒻᒪᓗ ᑕᕆᐅᕐᒥᐅᑕᓂᒃ ᓂᕐᔪᑎᓂᒃ ᖁᕕᐊᒋᔭᐅᔪᖅ, Fossil Creek Trail ᒥᕐᖑᐃᖅᓯᕐᕕᖕᒧᓪᓗ ᐊᒻᒪᓗ ᐊᓯᖏᓐᓄᑦ ᖃᓂᑦᑐᓄᑦ ᐃᑦᑕᕐᓂᓴᖃᕐᕕᐅᔪᓄᑦ.

ᐊᒥᓱᓂᑦ ᓄᓇᕗᒻᒥ ᓄᓇᓕᐅᔪᑎᑐᑦ, ᑮᓇᐅᔭᒃᑯᕕᖃᙱᑦᑐᖅ ᓴᓪᓕᕐᒥᑦ, ᐊᒻᒪᓗ ᑮᓇᐅᔭᑕᖃᑦᑎᐊᕈᓐᓃᕋᔪᒃᖢᓂ. ᓂᐅᕕᖅᑏᑦ ᐊᒻᒪᓗ ᑯᐊᐸᒃᑯᑦ “ᑮᓇᐅᔭᒃᑯᕕᓕᕆᓂᖄᕐᔪᒃᑐᑦ”, ᐊᖏᓗᐊᙱᑦᑐᒥᒃ ᑮᓇᐅᔭᓄᑦ ᑐᖅᑯᖅᓯᓯᒪᕝᕕᖃᕈᓐᓇᖅᖢᑎᒃ, ᐊᑭᒥᒃ ᐊᑭᓖᓗᑎᒃ ᑮᓇᐅᔭᙳᖅᑎᑦᑎᔪᓐᓇᖅᖢᑎᒃ ᑮᓇᐅᔭᒃᓴᓂᒃ, ᑕᒪᒃᑯᐊᒐᓗᐃᑦ. ᑮᓇᐅᔭᓂᒃ ᐊᒧᓯᔾᔪᑎᖃᖅᑐᖅ ᓂᐅᕕᕐᕕᖕᒥᑦ, ᑭᒡᓕᖃᖅᑐᒥᒃ ᑮᓇᐅᔭᖅᑕᖃᖅᖢᓂ. ᐊᐅᒃᑕᔫᑦ ᐊᒻᒪᓗ ᐊᑮᑦᑐᖅᓯᔾᔪᑎᓂᒃ ᐊᐅᒃᑕᔫᓂᒃ ᐱᔨᑦᑎᕋᐅᑎᑕᖃᖅᑐᑦ ᓂᐅᕕᕐᕕᓗᒃᑖᑲᓴᐃᑦ. ᑕᐃᑯᙵᓵᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᒃᑯᕕᓕᕆᓂᕐᒥᒃ ᐋᖅᑭᒃᓯᖁᔭᐅᔪᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑮᑦᑐᓂᒃ ᐊᑭᓕᖅᑐᐃᓂᕐᒥᒃ, ᐱᓗᐊᖅᑐᒥᑦ ᑎᑎᖅᑲᓕᕆᕝᕕᒃᑰᖅᑎᑦᑎᓂᖅ ᓯᓚᕐᓘᖕᒧᑦ ᓄᖅᑲᖓᑎᑦᑎᔪᓐᓇᖅᑎᓪᓗᒍ ᐃᖏᕐᕋᔾᔪᑎᓂᒃ.

ᐆᒪᔪᐃᑦ: 

ᓴᓪᓕᖅ ᑕᕆᐅᕐᒥᐅᑕᖃᐅᑦᑎᐊᖅᑐᖅ, ᑕᐃᒪᙵᓂᐊᓗᒃ ᐊᕐᕕᖅᓯᐅᕐᕕᐅᖃᑦᑕᖅᓯᒪᓪᓗᓂ ᐊᒻᒪᓗ ᑕᕆᐅᕐᒥᐅᑕᓂᒃ. ᐊᒃᐸᑑᕐᔪᐊᖅ, ᖃᓂᑦᑑᔪᖅ, ᐊᐃᕕᖅᑕᖃᐅᖃᑦᑕᖅᑐᖅ. ᓇᓄᐃᑦ ᑕᐃᒪᐅᒐᔪᒃᖢᑎᒃ. ᒪᕐᕉᒃ ᑎᖕᒥᐊᖃᕐᕖᒃ, ᑲᓇᖕᓇᖓᓂᑦ ᐅᑎᖅᑕᖅᑐᓄᑦ ᑎᖕᒥᐊᖃᕐᕕᒃ ᐊᒻᒪᓗ Hᐃᐅᕆ ᒋᐱᓐᔅ ᐅᑎᖅᑕᖅᑐᓄᑦ ᑎᖕᒥᐊᖃᕐᕕᒃ, ᑎᖕᒥᐊᓂᒃ ᑕᐅᑐᒍᒪᔪᓄᑦ ᐅᕐᓂᒃᑕᐅᔪᒪᓲᑦ. ᑕᐅᓯᓐᖏᓐᓃᑐᑦ ᑎᖕᒥᐊᑦ, ᐊᒻᒪᓗ ᖁᕐᔪᐃᑦ, ᑕᑎᒡᒐᕐᔪᐊᑦ ᐊᒻᒪᓗ ᐊᓯᖏᑦ ᑎᖕᒥᐊᑦ, ᑕᐃᑯᖓ ᐅᑎᖃᑦᑕᖅᑐᑦ ᐅᐱᕐᖔᒃᑯᑦ. ᐊᑉᐸᐃᑦ, ᐱᑦᓯᐅᓛᑦ ᐊᒻᒪᓗ ᓇᐅᔭᔾᔪᐊᑦ ᐅᓪᓗᖃᖃᑦᑕᖅᑐᑦ ᑕᐃᑲᓂ. ᑭᖑᓪᓕᖅᐹᑦ ᑐᒃᑐᐃᑦ ᕿᑭᖅᑕᕐᒥᑦ 1950-ᖏᓐᓂᑦ ᐱᔭᐅᓚᐅᖅᑐᑦ, ᑭᓯᐊᓂ ᓄᑖᑦ ᓴᖅᑭᑎᑕᐅᒃᑲᓐᓂᓚᐅᖅᑐᑦ 1960 ᓄᙳᐊᓂᑦ. ᑐᒃᑐᑕᖃᐅᓗᐊᓕᓚᐅᕐᓂᖓᓄᑦ ᐊᖑᓇᓱᒃᑕᐅᖃᑦᑕᓕᓚᐅᖅᑐᑦ ᓂᐅᕕᐊᒃᓴᐅᓂᕐᒧᑦ ᐊᒥᓱᙳᓗᐊᓕᕐᒪᑕ, ᑭᓯᐊᓂ ᑲᑎᒪᐅᓕᖓᔪᑦ ᐊᒥᓲᔪᓐᓃᓚᐅᖅᑐᑦ ᒫᓐᓇᓵᐸᓗᒃ ᐅᑭᐅᓂᑦ ᐊᓂᒍᖅᑐᓂᑦ, ᐊᒻᒪᓗ ᐊᖑᓇᓱᒃᑕᐅᔪᑦ ᐊᐅᓚᑕᐅᑦᑎᐊᓕᖅᖢᑎᒃ.

ᐅᖃᓕᒫᑲᓐᓂᕐᓃᑦ : 
  • ᐸᓂᑦ, ᔮᓐ & ᓲᓴᓐ ᕉᓕ, ed. ᐅᖃᓗᕋᐃᑦ: ᐅᖃᐅᓯᖅ ᓇᑭᙶᕐᓂᖓᓂᑦ ᓄᓇᕗᑦ. Montreal & Kingston: McGill-Queen’s University Press, 2004.
  • ᑰᑉᓚᓐ, ᐊ. ᑕᑦᓕ. Coplalook: ᐃᓱᒪᑕᖅ ᑕᐅᖅᓰᖃᑎᖃᕐᓂᕐᒧᑦ, Hᐊᑦᓴᓐ ᐸᐃ ᑲᒻᐸᓂᒃᑯᑦ, 1923-39. Winnipeg: Watson & Dwyer, 1989.
  • ᑐᕋᐃ, ᓗᐃ-ᔮᒃ. ᐅᖃᐅᓯᖓᑦ ᐃᓄᖕᓄᑦ syntax, semantics ᐊᒻᒪᓗ ᐃᓅᖃᑎᒌᑦ ᐅᑭᐅᖅᑕᖅᑐᒥᑦ. Montreal & Kingston: McGill-Queen’s University Press, 2010.
  • ᐄᐳᕐ, ᑑᕈᑎ ᕼᐋᓕ. ᕿᓚᓗᒐᕋᓱᐊᖅᑏᑦ ᐅᑭᐅᖅᑕᖅᑐᒦᑎᓪᓗᒋᑦ. Montreal & Kingston: McGill-Queen’s University Press, 1989
  • ᕙᓯᑦ, ᕆᓇᐃ. ᐃᓅᓂᐊᕐᓗᓂ ᐃᓗᐃᓐᓂᖃᙱᑦᑐᒃᑯᑦ: ᐃᓄᐃᑦ ᐅᑭᐅᖅᑕᖅᑐᒥᐅᑕᐃᑦ, 1550-1940. Winnipeg: University of Manitoba Press, 2001.
  • ᐃᓯᓐᒪᓐ, ᐸᑎ ᑯᐸᔭᓯ. ᐊᓐᓄᕌᑦ ᐆᒪᓂᕐᒧᑦ: ᐆᒪᔪᑦ ᐃᓄᐃᑦ ᐊᓐᓄᕌᖏᑦ . Vancouver: UBC Press, 1997.
  • ᒪᒃᑖᓄᑦ, ᔮᓐ. ᐅᑭᐅᖅᑕᖅᑐᒥ ᓯᓚᖓ: ᐃᓄᐃᑦ ᓯᓚᓕᕆᓂᖓᑦ, ᐅᓪᓗᕆᐊᓕᕆᓂᖅ. ᐃᖃᓗᐃᑦ & Toronto: Nunavut Research Institute and Royal Ontario Museum, 1998.
  • ᒪᒌ, ᕌᐳᑦ. ᑭᖑᓪᓕᖅᐹᖅ ᑕᐅᑐᙳᐊᕐᓂᕐᒧᑦ ᐃᓂᐅᔪᖅ: ᐃᓄᐃᑦ ᓇᑭᙶᕐᓂᖏᑦ ᐅᑭᐅᖅᑕᖅᑐᒥᑦ . Toronto: Key Porter Books, Canadian Museum of Civilization, 2004.
  • ᒧᐊᕆᓯᓐ, ᑕᐃᕕᑦ ᐊᒻᒪ ᔪᐊᔨᔅ-ᕼᐄᐳᑦ ᔨᕐᒪᐃᓐ. ᐃᓄᐃᑦ: ᑕᐃᔅᓱᒪᓂᒥᑦ ᐅᑭᐅᖅᑕᖅᑐᒥᑦ ᑕᑯᓂᖅ. Hull: Canadian Museum of Civilization, 1995.
  • ᐸᐅᒃᑑᑎᑦ ᐃᓄᐃᑦ ᐊᕐᓇᓄᑦ ᑲᓇᑕᒥ. ᐃᓄᐃᑦ ᐊᑐᖅᑕᖓᑦ: ᐊᑐᖅᑕᐅᔪᒃᓴᖅ ᐃᓄᐃᑦ ᐱᖅᑯᓯᖓᓄᑦ, rev. ed. Ottawa: Pauktuutit Inuit Women of Canada, 2006. http://www.uqar.ca/files/boreas/inuitway_e.pdf
  • ᕉᓚᒻ, ᑲᕆᒻ. ᐅᕙᑦᑎᓂᑦ: ᐃᓄᐃᑦ ᐅᖓᓯᒃᑐᒥᑦ ᐅᑭᐅᖅᑕᖅᑐᒥᐅᑕᐃᑦ. Montreal: Stanké International, 2001.