You are here

ᕿᑭᖅᑕᕐᔪᐊᖅ

ᕿᑭᖅᑕᕐᔪᐊᖅ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐊᑎᖃᖅᑐᖅ ᕿᑭᖅᑕᕐᔪᐊᕐᒥ, ᑕᐃᔭᐅᕙᓚᐅᖅᓯᒪᔪᖅ ᕗᕉᑕᓐ ᐊᐃᓚᓐ−ᒥᒃ, ᐱᕈᖅᐸᓪᓕᐊᔪᒥᓂᖅ ᐅᓇᑕᖅᑏᑦ ᖃᐅᔨᓴᕐᕕᖓᓂ, ᐋᖅᑭᒃᑕᐅᓚᐅᖅᓯᒪᔪᖅ 1950−ᖏᓐᓂ ᑲᓇᑕᑉ ᐅᓇᑕᕐᓂᐅᓴᓪᓗᑎᑦ ᐅᐸᓗᖓᐃᖅᓯᒪᒋᐊᖃᓚᐅᖅᓯᒪᒻᒪᑕ. (http://www.lswilson.ca/fox5.htm) ᐅᓇᑕᖅᑏᑦ ᑎᑭᓚᐅᖅᑳᖅᑎᓐᓇᒋᑦ, ᐃᓄᐃᑦ ᑕᒫᓃᑦᑐᑐᖃᐅᕙᓚᐅᖅᓯᒪᔪᑦ ᐊᔾᔨᒌᙱᑦᑐᓂᑦ ᓯᔾᔭᖏᓐᓂ, ᐊᒥᓲᓂᖅᓴᐃᑦ ᐃᓄᐃᑦ ᑐᐱᖅᓯᒪᕙᑦᑐᑎᑦ ᕿᕕᑑᕐᒥ, ᐸᓪᓚᕝᕕᒻᒥᓗ ᐊᒻᒪᓗ ᑲᖏᖅᑐᖓᓂ ᐸᖕᓂᖅᑑᑉ.  ᐸᖕᓂᖅᑑᕐᒥ ᑲᖏᖅᑐᐊᓗᐊᓂ ᑕᐃᒪᓐᓇᐸᓗᒃ ᓂᒋᐊᓄᑦ, ᐊᕐᕕᓂᐊᖅᑏᑦ ᑕᕆᐅᑉ ᐊᑭᐊᓂᒦᙶᖅᑐᑦ ᐊᒻᒪᓗ ᒥᐊᓕᒐᕐᓂ ᑕᒫᓃᖃᑦᑕᓚᐅᖅᓯᒪᔪ 1800-ᖏᓐᓂ.  ᐊᕐᕕᖃᖅᑐᐊᓘᓂᖓᓄᑦ, ᐊᕐᕕᓂᐊᕐᕕᒃ ᓴᓇᔭᐅᓚᐅᖅᓯᒪᔪᖅ ᕿᕕᑑᕐᒥ.  ᐃᓄᐃᑦ ᕿᕕᑑᕐᒧᑦ ᓄᑦᑎᓚᐅᖅᓯᒪᔪᑦ ᕿᑭᖅᑖᕐᔪᐊᖑᓕᖅᑐᒥ ᐱᓂᕐᓗᒃᑐᖃᖅᑐᒥᓂᐅᓚᐅᖅᑎᓪᓗᒍ ᐊᒥᓱᒻᒪᕇᑦ ᓄᓇᓕᒻᒥᐅᑦ ᐃᐱᔪᒥᓂᐅᓚᖅᓯᒪᑎᓪᓗᒋᑦ.  1960-ᖏᓐᓂ, ᐊᓯᖏᑦ ᓄᓇᓕᕋᓛᓃᙶᖅᑐᑦ ᓄᓇᓕᓐᓄᑦ ᓄᑦᑎᓕᓚᐅᖅᓯᒪᔪᑦ, ᑲᓇᑕᒥ ᒐᕙᒪᒃᑯᖏᑦ ᐋᓐᓂᐊᕐᕕᓕᐅᓕᓚᐅᖅᓯᒪᒻᒪᑕ ᐊᒻᒪᓗ ᐃᓄᓐᓄᑦ ᑭᒃᑯᑐᐃᓐᓇᕐᓄᑦ ᐃᒡᓗᒃᓴᓂᑦ, ᐊᒻᒪᓗ ᓱᒃᑯᐊᕿᑎᑦᑎᕙᓕᖅᑐᑎᑦ ᐃᓄᓐᓄᑦ ᓄᓇᓕᓐᓄᑦ ᓄᑦᑎᖅᑐᓄᑦ ᓄᓇᓕᕋᓛᕐᓃᙶᖅᑐᓂᑦ.  ᓄᓇᓕᐅᔪᑉ ᐊᑎᖓ ᐊᓯᔾᔨᖅᑕᐅᓚᐅᖅᓯᒪᔪᖅ ᕗᕉᑕᓐ ᐊᐃᓚᓐ−ᒥᒃ ᐊᑎᖃᓕᖅᑐᓂ ᕿᑭᖅᑕᕐᔪᐊᖅ, ᑐᑭᓕᒃ “ᐊᖏᔪᖅ ᕿᑭᖅᑕᖅ,” ᓄᕖᕝᕙ 1998−ᒥ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ.  ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ.  http://www.gov.nu.ca/iu

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᕿᑭᖅᑕᕐᔪᐊᖅ ᒥᑭᔫᕗᖅ, ᐃᓄᒃᑎᑐᑦ ᐅᓪᓚᓲᖑᓪᓗᑎᑦ ᓄᓇᓕᒻᒥᐅᑕᖏᑦ, ᐅᓪᓗᒥᓕᓴᑦ ᑐᓴᖅᑑᑎᖏᑦ ᐊᒻᒪᓗ ᓴᓇᔭᐅᓯᒪᔪᑦ ᐊᑐᕋᒃᓴᑦ, ᓲᕐᓗᒃ ᑕᓚᕖᓴᐃᑦ, ᐃᑭᐊᖅᑭᔾᔪᑏᑦ ᐊᒻᒪᓗ ᖃᒧᑕᐅᔭᐃᑦ ᓱᑲᑦᑐᒻᒪᕇᑦ, ᐊᑐᖅᑕᐅᖃᑦᑕᓲᖑᔪᑦ ᐱᖅᑯᓯᑐᖃᖅᑎᒍᑦ ᐃᓄᐃᑦ ᖃᓄᐃᓕᐅᕈᑎᖏᓐᓄᑦ ᐱᕐᔪᐊᖑᔪᑦ ᓄᓇᓕᓐᓂ ᐃᓅᓯᖏᓐᓄᑦ.  ᐊᖑᓇᓱᓐᓂᖅ, ᐃᖃᓗᒐᓱᐊᕐᓂᖅ ᐊᒻᒪᓗ ᐊᓯᖏᑦ ᐱᖅᑯᓯᑐᖃᖅᑎᒍᑦ ᐱᓕᕆᐊᖑᕙᑦᑐᑦ, ᓲᕐᓗᒃ ᓄᓂᕙᑦᑐᑦ, ᐊᕐᕌᒍ ᐊᓯᔾᔨᐸᓪᓕᐊᑎᓪᓗᒍ ᖃᓄᐃᓕᐅᕈᑕᐅᓲᖑᕗᑦ.  ᕿᑭᖅᑕᕐᔪᐊᖅ ᒪᕐᕉᖕᓂᒃ ᑐᒃᓯᐊᕐᕕᓕᒃ, ᓄᓇᓕᒻᒥ ᐃᓅᖃᑎᒌᒍᑕᐅᓲᖑᓪᓗᓂ: ᐃᔾᔪᓇᐃᑦᑐᖅ ᒪᐃᑯ ᐊᒻᒪᓗ ᐊᐃᒡᒋᓕᓕᒫᑦ ᐊᓐᓕᑲᓐ ᑐᒃᓯᐊᕐᕕᖏᒃ (ᐃᔾᔪᓇᐃᑦᑐᖅ ᓘᑲᓯ ᑐᒃᓯᐊᕐᕕᖓᑕ ᐃᓚᖓ ᐸᖕᓂᖅᑑᕐᒥ), ᐊᒻᒪᓗ ᑲᑎᓯᕕᒃ ᓂᖅᑐᐃᕕᒃ ᑐᒃᓯᐊᕐᕕᖓ.

 

ᐃᓄᒃᑎᑑᖅᑐᒻᒪᕆᐅᓲᖑᕗᑦ ᕿᑭᖅᑕᕐᔪᐊᕐᒥ: ᐃᓄᒃᑎᑑᖅᑐᒡᒍᑕᐅᕗᑦ ᓄᓇᓕᒻᒥ.  ᒪᓕᑦᑐᒋᑦ 2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᐃᒪᓐᓇᐅᔪᑦ, 93%−ᖏᑕ ᑭᙵᕐᒥᐅᑦ ᐃᓄᖏᑦ ᐃᓄᒃᑎᑐᑦ ᐅᖃᐅᓯᓪᓗᐊᑕᖃᕐᓂᕋᖅᐳᑦ ᐊᒻᒪᓗ ᐊᖏᕐᕋᖏᓐᓂ ᐃᓄᒃᑎᑑᓲᖑᓪᓗᑎᑦ.  ᐊᒻᒪᓗᒃᑲᓐᓂᖅ ᖃᓪᓗᓇᐅᔭᐃᓐᓇᓲᖑᓂᕋᖅᑐᑦ 13%−ᖏᑕ ᐃᓄᖏᑦ ᖃᓪᓗᓇᐃᔭᕈᓐᓇᖏᑦᑐᑦ ᐅᐃᕖᑎᑐᓪᓗ, ᑐᑭᓕᒃ ᑕᒪᐅᙵᕆᐅᖅᑐᑦ ᓂᐅᕐᕈᔪᓪᓗ ᓇᓂᓯᔭᕆᐊᖃᓲᑦ ᑐᓵᔨᒥᒃ ᖃᓪᓗᓇᐅᔭᕈᓐᓇᖅᑐᒥᒃ.  ᖃᑦᑏᓐᓇᑯᓘᒐᓗᐊᖅᑎᓪᓗᒋᑦ ᐅᐃᕖᑎᑑᓲᑦ ᕿᑭᖅᑕᕐᔪᐊᕐᒥ, ᖃᓪᓗᓈᑎᑐᑦ ᐅᖃᐅᓯᖃᒃᑲᓂᕐᓂᕋᖅᑐᑦ 85%−ᖏᓐᓄᑦ ᐃᓄᖏᓐᓄᑦ.  ᐅᖓᑖᓄᑦ ᐊᕝᕙᓗᐊᕆᔭᖏᑦ ᓄᓇᓕᒻᒥᐅᑦ ᖃᓪᓗᓇᐅᔭᓲᑦ ᐅᖃᐅᓯᕆᔭᐅᒃᑲᓐᓂᕋᓗᐊᖅᑎᓪᓗᒍ ᐊᖏᕐᕋᒥᓂᒃ,

ᑭᓯᐊᓂᓕ ᓂᕆᐅᑦᑐᒃᓴᐅᓂᐊᙱᑦᑐᑎᑦ ᐃᓄᒃᑎᑑᖅᑐᑦ ᖃᓪᓗᓇᐅᔭᓕᖅᑎᑕᐅᑲᐅᑎᒋᓂᐊᕐᓂᖏᓐᓂᑦ ᖃᓪᓗᓈᑎᑐᑐᐊᖅ ᐅᖃᓪᓚᓲᖑᔪᖅᑕᖃᕈᓗᒻᒪᑦ.  ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ.  ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

 

ᕿᑭᖅᑕᕐᔪᐊᑉ ᐃᓄᖏᑦ ᒪᒃᑯᑐᒡᒍᑕᐅᙱᑦᑐᑦ ᓄᓇᕗᒥ ᒪᒃᑯᓛᖑᒐᑎᑦ, ᑭᓯᐊᓂᓕ ᐃᓄᖏᑦ ᒪᒃᑯᓂᖅᓴᐅᔪᑦ ᑲᓇᑕᒥᐅᑕᕐᓂᑦ.  2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᖅᑕᐅᓯᒪᔪᑦ 50−ᖑᓚᐅᖅᑐᑦ ᐃᓕᓐᓂᐊᕆᐊᓕᓵᓲᑦ ᓱᕈᓯᓛᑦ ᐊᒻᒪᓗ 140 ᐃᓕᓐᓂᐊᕆᐊᓲᑦ ᓱᕈᓰᑦ, 37%−ᖑᓪᓗᑎᑦ ᐃᓄᖏᑦ ᐅᑭᐅᓖᑦ 18−ᓂ ᑐᖔᓂ.  ᐅᑭᐅᕆᔭᐅᓗᐊᖅᑐᑦ 25.5, ᑭᓯᐊᓂᓕ 4%−ᑐᐃᓐᓇᑯᓗᐃᑦ ᐊᒥᓲᓂᖏᑦ ᐃᓄᐃᑦ ᐅᑭᐅᓖᑦ 65-ᓂᑦ ᐅᖓᑖᓄᓪᓗ. 

ᑮᓇᐅᔾᔭᒃᓴᕈᑕᐅᔪᑦ: 

ᐅᓇᑕᖅᑏᑦ ᖃᐅᔨᓴᕐᕕᖓ ᑲᓇᑕᒥ ᒥᐊᓕᒐᕐᓂᓗ ᐲᔭᖅᑕᐅᕙᓪᓕᐊᓕᖅᑎᓪᓗᒋᑦ, ᑖᓐᓇ ᕿᑭᖅᑕᕐᔪᐊᑉ ᓯᓚᑖᓃᙶᖅᑐᖅ ᐊᑦᑐᖅᑕᐅᔾᔪᑎᒋᓚᐅᖅᓯᒪᔭᖓ ᑮᓇᐅᔭᓕᐅᕈᑕᐅᒍᓐᓇᓚᐅᖅᑐᖅ ᒥᑭᓪᓕᕚᓪᓕᖅᓯᒪᓕᖅᑐᖅ.  ᓄᓇᓕᓐᓂ ᑮᓇᐅᔭᓕᐅᕈᑎᖃᕋᓱᐊᓗᐊᙳᐊᓲᑦ ᓂᐅᕕᐊᒃᓴᖃᖅᑐᑎᑦ ᐱᔨᑦᑎᕋᖅᑐᑎᓪᓗ ᓄᓇᓕᒻᒥᐅᑕᕐᓄᑦ.  ᓄᓇᕗᑦ ᒐᕙᒪᖏᑕ ᐊᓪᓚᕝᕕᖏᑦ ᑕᒫᓃᙱᒻᒪᑕ ᐊᓯᖏᓐᓂᑦ ᓄᓇᓕᐅᔪᓂᑦ ᐃᓂᖃᕐᕕᒋᓪᓗᓂᒋᑦ ᑮᓇᐅᔭᓕᐅᕈᑕᐅᒍᓐᓇᓲᖑᓪᓗᑎᑦ, ᓲᕐᓗᒃ ᖃᓂᒋᔭᖓᓂ ᐸᖕᓂᖅᑑᒥ.  ᑭᓯᐊᓂᓕ, ᐃᖃᓗᒐᓱᐊᕐᓂᖅ ᐱᕙᓪᓕᐊᓂᖃᓕᖅᑐᖅ ᓄᓇᓕᐅᔪᒥ.  ᐊᖅᑲᐅᒪᔨᖃᐅᕐᒥᔪᑦ ᐊᒻᒨᒪᔪᖅᑕᕆᐊᖅᑐᐸᑦᑐᑦ ᓂᐅᕕᐊᒃᓴᕆᔭᐅᓪᓗᑎᑦ ᓄᓇᓕᐅᔪᒥ.  ᐊᓪᓚᕝᕕᖃᖅᑎᑕᐅᒻᒥᔪᖅ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᐅᔪᐃᑦᑐᖅ ᒥᕐᖑᐃᓯᕐᕕᒻᒧᑦ, ᕿᑭᖅᑕᕐᔪᐊᖅ ᐃᓱᐊᓃᓐᓂᖓᓄᑦ ᐊᒃᓵᔪᖅ ᐱᓱᕝᕕᑉ ᐸᖕᓂᖅᑑᒦᙶᖅᑐᖅ.  ᐳᓚᕋᖅᑐᓕᕆᓂᖅ ᓄᓇᓕᒻᒥᐅᑕᓄᑦ ᐊᐅᓪᓚᐅᔾᔨᔨᓄᑦ.  ᓂᐅᕐᕈᔪᑦ ᖃᒧᑕᐅᔭᕈᒪᓲᑦ, ᕿᒧᒃᓯᕐᓗᑎᑦ, ᐊᒻᒪᓗ ᓯᐊᕐᕆᔮᕈᒪᓲᖑᓪᓗᑎᑦ ᐅᑭᐅᒃᑯᑦ ᐊᒻᒪᓗ ᐅᐱᕐᖔᒃᑯᑦ, ᐊᒻᒪᓗ ᐱᓱᕋᓲᑦ ᐊᒻᒪᓗ ᓂᕐᔪᑎᓂᑦ ᑕᐅᑐᒋᐊᖅᑐᓲᖑᓪᓗᑎᑦ ᐊᐅᔭᒃᑯᑦ.  ᓄᓇᓕᓐᓂ ᓴᓇᙳᐊᖅᑏᑦ ᖃᐅᔨᒪᔭᐅᑦᑎᐊᕐᒥᔪᑦ ᓴᓇᙳᐊᓲᖑᓂᖏᓐᓂᑦ ᑑᒑᓕᓐᓂᒃ.  ᐊᒥᓱᑦ ᐃᓄᐃᑦ ᐊᖑᓇᓱᐊᓲᑦ ᐃᖃᓗᒐᓱᐊᖅᑐᑎᓪᓗ ᓂᕿᒋᓂᐊᖅᑕᒥᓂᒃ ᓇᑦᑎᕐᓂᑦ, ᐊᐃᕕᕐᓂᑦ, ᑑᒑᓕᖕᓂᑦ ᐊᒻᒪᓗ ᐃᖃᓗᒃᐱᓂᑦ.

 

ᐊᒥᓱᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᕿᑭᖅᑕᕐᔪᐊᖅ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ.  ᓄᐊᑐᓐ ᓂᐅᕕᕐᕕᒃ ᐊᒻᒪᓗ ᑯᐊᐸᒃᑯᑦ “ᑮᓇᐅᔭᓕᕆᒐᓛᒍᓐᓇᖅᑑᒐᓗᐊᑦ”, ᖃᑦᑏᓐᓇᑯᓘᒐᓗᐊᓂᑦ ᑮᓇᐅᔭᖃᕐᕕᒃᓴᐅᒍᓐᓇᖅᑐᓂ, ᓯᒃᑮᕐᕕᒃᓴᐅᓗᓂ, ᐊᓯᖏᓪᓗ.  ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ.  ᐊᐅᒃᑕᔫᒃᑯᑦ ᐊᑭᓕᐅᑎᓂᑦ ᐊᒻᒪᓗ ᐊᑭᓕᒃᓴᓂᐅᑎᓂᑦ ᐊᑐᕐᕕᒃᓴᐅᓲᖅ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᕿᑭᖅᑖᓘᑉ ᐃᑭᕋᓴᖓᓃᑦᑐᓂ, ᐅᐊᓐᓇᖓᓂ ᐊᐅᔪᑦᑐᕐᒧᑦ ᐃᓯᕐᕕᑉ ᒥᕐᖑᐃᓯᕐᕕᖓᓄᑦ, ᕿᑭᖅᑕᕐᔪᐊᑉ ᖃᓂᒋᔭᖓ ᐊᔾᔨᒌᙱᑦᑐᕈᓘᔮᓗᖕᓂᒃ ᓂᕐᔪᑎᖃᐅᖅᐳᖅ.  ᑕᕆᐅᖓ ᓇᒧᖃᓲᖅ, ᐊᔾᔨᒌᙱᑦᑐᓂᓪᓗ ᓇᑦᑎᕐᓂᑦ, ᐊᒻᒪᓗ ᐊᕐᕕᓂᑦ, ᑑᒑᓕᖕᓂᒃ ᐊᒻᒪᓗ ᐊᕐᕕᓂᑦ.  ᐱᓱᒃᑏᑦ ᓂᕐᔪᑏᑦ ᒥᑭᔫᑕᐅᔪᑦ ᐆᒪᔪᑦ, ᓲᕐᓗᒃ ᐅᖃᓖᑦ, ᐊᕕᙵᐃᑦ, ᑎᕆᒐᓂᐊᑦ ᐊᒻᒪᓗ ᐊᒪᕈᐃᑦ.  ᑐᒃᑐᐃᑦ ᓄᓇᖅᐸᓯᖕᒦᒃᑲᓗᐊᖅᑎᓪᓗᒋᑦ, ᐊᒥᓲᓗᐊᕌᓗᙱᑦᑐᑦ.  ᐃᖃᓗᒃᐲᑦ ᓄᓇᓕᑉ ᓯᓚᑖᓂ ᐊᒥᓱᓃᑦᑐᑦ.  ᑎᖕᒥᐊᑦ ᐱᖃᓯᐅᑎᔪᑦ ᑭᒡᒐᕕᐊᕐᔪᑦ, ᐊᕿᒡᒌᑦ, ᐊᒻᒪᓗ ᖃᖁᓪᓗᐃᑦ, ᐃᒪᕐᒥᐅᑕᐃᑦ ᑎᖕᒥᐊᑦ, ᐱᓗᐊᖅᑐᒥᒃ ᖃᖁᓪᓗᐃᑦ ᐊᒻᒪᓗ ᐊᒃᐸᐃᑦ.  ᒪᕐᕉᒃ ᑲᓇᑕᒥ ᓂᕐᔪᑏᑦ ᐸᐸᑕᐅᕕᖓ (NWAs) ᐃᓕᓴᕆᔭᐅᓚᐅᖅᑐᖅ ᑕᒫᓂ ᕿᑭᖅᑕᕐᔪᐊᑉ ᖃᓂᒋᔭᖓᓂ 2010-ᖑᑎᓪᓗᒍ.  ᐊᒃᐸᐃᑦ NWA, ᐃᒪᓐᓇᐸᓗᒃ 130 km ᓂᒋᐊᓂ ᕿᑭᖅᑕᕐᔪᐊᑉ ᐅᐊᖕᓇᖓᓂ ᐸᖕᓂᖅᑑᑉ ᑲᖏᖅᑐᐊᓗᐊᓂ, ᐊᑦᑎᖅᑕᐅᓯᒪᕗᖅ ᐃᓄᒃᑎᑐᑦ ᐊᒃᐸᐃᑦ ᐊᒻᒪᓗ ᑕᕆᐅᖓᓗ ᐱᖃᓯᐅᑎᔪᑦ.  ᖃᖁᓪᓗᐃᑦ ᐆᒪᔪᕐᓄᑦ ᐸᐸᑕᐅᕕᒃ NWA ᑕᐅᕙᓃᑦᑐᖅ ᖃᖁᓪᓗᐃᑦ ᕿᑭᖅᑕᖓᓂ, ᐊᑦᑎᖅᑕᐅᓯᒪᔪᖅ ᖃᖁᓪᓗᖃᕐᓂᖓᓄᑦ, ᐊᒻᒪᓗ ᐱᖃᓯᐅᔾᔨᒻᒥᔪᖅ ᑕᕆᐅᕐᒥᒃ.  ᖃᖁᓪᓗᐃᑦ ᐸᐸᑕᐅᕕᖓ NWA ᑲᓇᑕᒥ ᐊᒥᓲᓛᖑᔪᑦ ᑎᖕᒥᐊᑦ ᖃᖁᓪᓗᐃᑦ ᑕᒪᐅᙵᓲᑦ, 22%−ᖏᑦ (ᐃᒪᓐᓇᐸᓗᒃ 44,000 ᐊᐃᑉᐸᕇᑦ) ᑕᒪᐃᓐᓂ ᑲᓇᑕᒥ ᐊᒥᓲᓂᖏᓐᓂᑦ ᑕᒪᐅᙵᓲᖑᓪᓗᑎᑦ.

ᐅᖃᓕᒫᑲᓐᓂᕐᓃᑦ : 
  • ᕕᐊᓇᑦ, ᔮᓐ & ᓲᓴᓐ ᕉᓕ, ᐋᖅᑮᒋᐊᕆᔩᑦ.  ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2004.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᐅᖃᐅᓰᑦ ᐋᖅᑭᓱᖅᓯᒪᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᐃᓅᓯᖏᑦ ᐅᑭᐅᖅᑕᖅᑐᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2010.
  • ᐄᕗᕐ, ᑐᕈᑎ ᕼᐊᕐᓕ.  ᐊᕐᕕᓂᐊᖅᑏᑦ ᐅᑭᐅᖅᑕᖅᑐᒦᑦᑎᓪᓗᒋᑦ.  ᒪᓐᑐᕆᐊᓪ & ᑭᖕᔅᑕᓐ: ᒥᒡᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᐅᓯᒪᔪ,  1989.
  • ᐃᓴᓐᒪᓐ, ᕕᐊᑎ ᑯᕙᔭᓯ.  ᐃᕙᓗᖏᑦ ᐊᓐᓇᐅᒪᔾᔪᑏᑦ: ᐃᓄᐃᑦ ᐊᓐᓄᕌᖏᑦ ᖃᓄᐃᑦᑑᖃᑦᑕᓚᐅᖅᓯᒪᓂᖏᑦ.  ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ 1997.
  • ᒪᒃᑖᓄᓪᑦ, ᔮᓐ.  ᐅᑭᐅᖅᑕᖅᑐᑉ ᓯᓚᖓᐃᓄᐃᑦ ᐅᓪᓗᕆᐊᓂᓕᕆᓂᖏᑦ, ᐅᓪᓗᕆᐊᑦ ᐅᓂᒃᑳᖏᑦ ᐅᓂᒃᑳᖅᑐᐊᑐᖃᖏᓪᓗ ᐅᑉᐱᕆᔭᑦ.  ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑏᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪ ᑕᑯᔭᒐᖃᕐᕕᒃ, 1998.
  • ᒪᒌ, ᕌᕗᑦ.  ᑭᖑᓪᓕᖅᐹᖅ ᑕᐅᑐᙳᐊᖅᑕᐅᓯᒪᓂᑯ: ᐃᓄᐃᑦ ᐊᑐᖃᑦᑕᕐᓂᑯᒥᓂᖏᑦ ᐅᑭᐅᖅᑕᖅᑐᒥ.  ᑐᕌᓐᑐ: ᑮ ᐳᐊᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨᔅ−ᕼᕿᕗᑦ ᔪᒪᐃᓐ.  ᐃᓄᐃᑦ: ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᑕᑯᓇᓪᓗᒋᑦ.  ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 1995.
  • ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ.  ᐃᓄᐃᑦ ᐃᓕᖅᑯᓯᖓ: ᐃᓄᐃᑦ ᐃᓕᖅᑯᓯᖓᓄᑦ ᑐᑭᒧᐊᕈᑎᖏᑦ, ᐋᖅᑭᒋᐊᖅᑕᐅᓯᒪᔪᑦ ᐋᑐᕚ: ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ, 2006. (ᐊᒻᒪᓗ ᐊᑐᐃᓐᓇᐅᒻᒥᔪᑦ ᖃᕋᓴᐅᔭᒃᑯᑦ ᓄᓇᕗᑦ ᒐᕙᒪᖏᑕ ᐃᖅᑲᓇᐃᔭᖅᑎᑖᕆᔭᐅᕋᑖᖅᑐᑦ ᑐᑭᓯᒋᐊᖅᑎᑕᐅᓂᖏᓐᓄᑦ ᐃᑭᐊᖅᑭᕕᖓᓂ) (http://www.orientation.hr.gov.nu.ca/i18n/english/pdf/The%20Inuit%20Way.pdf)
  •