You are here

ᖁᕐᓗᖅᑐᖅ

ᖁᕐᓗᖅᑐᖅ

ᐊᕕᒃᑐᖅᓯᒪᓂᖓ: 
ᕿᑎᕐᒥᐅᓂ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (KitSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᕼᐊᒻᓚᖓ ᖁᕐᓗᖅᑐᑉ ᑕᐃᔭᐅᕙᓚᐅᖅᓯᒪᒻᒥᔪᖅ ᑳᐳᒪᐃᓐ, ᐊᑎᖓ ᑰᑦᑐᖅ ᐃᓪᓚᐅᓕᖅᑑᕐᒧᑦ ᑕᐅᕙᓃᒻᒪᑦ.  ᖃᓪᓗᓈᑎᑐᑦ ᐊᑎᖓ ᑕᐃᔅᓱᒪᓂᑐᖄᓗᒃ ᐊᑦᑎᖅᑕᐅᓚᐅᖅᓯᒪᕗᖅ ᖃᐅᔨᓴᖅᑎ ᓵᒧ ᕼᐅᕐᓐ ᑕᒪᐅᙵᓚᐅᖅᓯᒪᒻᒪᑦ 1771-ᖑᑎᓪᓗᒍ ᓴᕕᕋᔭᐅᔭᓐᓂᒃ ᐊᓯᖏᓐᓂᓪᓗ ᑮᓇᐅᔭᓕᐅᕈᑎᒃᓴᓂᑦ ᕿᓂᖅᑐᓂ ᐃᖅᑲᓇᐃᔭᖅᑎᓪᓗᒍ ᕼᐊᑦᓴᓐ ᕙᐃ ᑲᒻᐸᓂᒃᑯᖏᓐᓄᑦ.  ᐃᓄᐃᑦ ᓯᕗᕚᖏᓐᓂᑦ ᓯᕗᕚᖃᖅᑐᑎᑦ ᐃᓄᐃᑦ ᑕᒫᓃᖃᑦᑕᕐᓂᑰᕗᑦ, ᓄᓇᓕᓐᓂ ᐃᓄᖏᑦ ᑕᐃᔭᐅᕙᓚᐅᖅᓯᒪᔪᑦ “ᑳᐳᕐ ᐃᓄᖏᑦ” ᐊᒥᓱᑦ ᐊᕐᕌᒍᓄᑦ ᐊᒥᓱᑦ ᓴᕕᕋᔭᐅᔭᖕᓂᒃ ᐊᑐᖃᑦᑕᖅᑐᒥᓂᐅᒻᒪᑕ ᐃᒋᕐᕈᑎᖏᑦ ᑰᑉ ᓴᓂᐊᓂ.  ᔮᓐ ᕗᕌᓐᑭᓕᓐ ᑕᒪᐅᙵᓚᐅᖅᓯᒪᒻᒥᔪᖅ ᓄᓇᖅᐸᓯᒃᑰᖅᑐᓂ (1819-1822) ᖁᕐᓗᖅᑐᑉ ᑰᖓᒍᑦ ᓄᓇᙳᐊᓕᖅᓱᐃᓪᓗᓂ ᓯᔾᔭᒥ ᐊᒻᒪᓗ ᓇᓂᓯᓇᓱᐊᖅᑐᓂ ᐅᑭᐅᖅᑕᖅᑐᒃᑯᑦ ᐊᖅᑯᑎᖓᓂᒃ ᑕᕆᐅᒃᑯᑦ.  ᔮᓐ ᕆᑦᓱᑦᓴᓐ ᐊᒻᒪᓗ ᔪᐊᔾᔨ ᕚᒃ ᐊᐃᑉᐸᖃᓚᐅᖅᓯᒪᔫᒃ ᕗᕌᓐᑭᓕᓐ−ᒥᒃ ᑕᒪᐅᙵᑎᓪᓗᒍ ᐊᒻᒪᓗ ᖃᐅᔨᒪᔮᕆᔭᐅᓪᓗᑎᑦ ᓇᒻᒥᓂᖅᓱᖅᑐᑎᑦ ᖃᐅᔨᓴᖅᑐᒥᓂᐅᒻᒥᒻᒪᑎᒃ.

 

ᐱᖓᓐᓇᖅᐸᓯᖓᓂ ᓄᓇᕗᑉ ᖁᕐᓗᖅᑐᒦᑦᑐᖅ ᑰᖓᓂ, ᑕᒪᓐᓇ ᑕᒪᒃᑮᖕᓄᒃ ᐃᓄᓐᓄᑦ ᐊᒻᒪᓗ ᐊᓪᓚᐃᑦ ᑎᐊᓇᐃᒃᑯᓐᓄᑦ ᓇᔪᖅᑕᐅᕙᓚᐅᖅᓯᒪᔪᖅ, ᐅᓇᑕᖅᑐᒻᒪᕆᐅᓪᓗᑎᒃ ᑖᒃᑯᐊ ᐃᓄᐃᑦ ᐊᓪᓚᐃᓪᓗ.  ᖁᕐᓗᖅᑐᖅ, ᖃᓂᒋᔭᖓᓃᑦᑐᖅ ᓄᓇᓕᑉ, ᐃᓄᐃᑦ ᐊᓪᓚᐃᓪᓗ ᑎᐊᓇᐃ ᐅᓇᑕᕐᕕᒋᕙᓚᐅᖅᓯᒪᔭᖓ ᐊᒥᓱᓪᓗ ᑐᖁᕋᖅᑐᒥᓂᐅᓯᒪᓪᓗᑎᑦ.  1996-ᖑᑎᓪᓗᒍ, ᒪᒥᓴᓚᐅᖅᓯᒪᔪᑦ ᐅᐊᑦᑎᐊᕈᕐᓂᖅᓴᐃᑦ ᐊᔾᔨᒌᙱᓐᓂᕆᓯᒪᔭᖏᑦ ᐊᒻᒪᓗ ᐊᐳᕈᑎᒋᓯᒪᔭᖏᑦ ᑖᒃᑯᐊᒃ ᒪᕐᕉᒃ ᐃᓕᖅᑯᓯᖃᖃᑎᒌᙱᑦᑑᒃ ᐋᖅᑭᒍᑎᒋᓇᓱᐊᖅᑐᓂᒋᑦ.

 

ᒫᓐᓇᒫᓕᓴᕐᓕ, ᖁᕐᓗᖅᑐᖅ ᐊᒥᓱᓄᑦ ᖃᐅᔨᓴᕆᐊᕐᕕᐅᕙᑦᑐᒥᓂᐅᕗᖅ ᖃᓄᐃᓕᐅᕈᓘᔭᕐᕕᐅᓪᓗᓂᓗ, ᓲᕐᓗ ᑐᑦᑕᕐᕕᐅᓪᓗᓂ ᐃᓕᖅᑯᓯᓂᑦ ᖃᐅᔨᓴᖅᑐᓂ ᑎᑎᕋᖃᑦᑕᖅᑐᒥᓂᐅᔪᖅ ᑲᓇᑕᑉ ᐅᑭᐅᖅᑕᖅᑐᖓᓅᖅᑐᓂ ᑕᐃᒪᓐ ᔨᐊᓇᔅ 1913-ᒥ ᐊᒻᒪᓗ 1916−ᒥ.  ᕼᐊᑦᓴᓐᔅ ᕙᐃ ᑲᒻᐸᓂᖏᑦ ᐋᖅᑮᓚᐅᖅᓯᒪᔪᑦ ᓂᐅᕕᕐᕕᓂ 1927−ᖑᑎᓪᓗᒍ, ᐋᓐᓕᑲᓐ ᑐᒃᓯᐊᕐᕕᖏᑦ ᑭᖑᓂᐊᒍᑦ ᑕᒪᐅᙵᖅᑐᑎᑦ 1928−ᒥ, ᐳᑭᖅᑕᓕᒃᑯᓪᓗ 1932−ᒥ ᑕᒪᐅᙵᖅᑐᒥᓂᐅᓪᓗᑎᑦ.  ᓯᓚᓐᓂᐊᕐᕕᒃ ᐊᒻᒪᓗ ᐊᓯᖏᑦ ᑲᓇᑕᑉ ᒐᕙᒪᖏᓐᓄᑦ ᐱᓕᕆᕝᕖᑦ ᐋᖅᑭᒃᑕᐅᓕᓚᐅᖅᓯᒪᔪᑦ 1940−ᖏᓐᓂ.  ᐅᔭᕋᓐᓂᐊᕋᒃᓴᓂᑦ, ᐅᖅᓱᐊᓗᒃᓴᓂᑦ ᒑᓯᒃᓴᓂᓪᓗ ᕿᓂᖅᑐᖃᖃᑦᑕᓚᐅᖅᓯᒪᔪᖅ 1970−ᖏᓐᓂ, ᐱᓕᒻᒪᓴᕐᕕᒃᓴᓂᑦ ᐃᖅᑲᓇᐃᔮᒃᓴᓂᓪᓗ ᓴᖅᑮᓯᒪᓪᓗᑎᑦ.  ᕼᐊᒻᓚᖓᑕ ᐊᑎᖓ ᐊᓯᔾᔨᓚᐅᖅᓯᒪᔪᖅ ᖁᕐᓗᖅᑐᒧᑦ 1996-ᖑᑎᓪᓗᒍ, ᑕᐃᓐᓇ ᑰᑉ ᐊᑎᖓ ᐊᑐᖅᑕᐅᓪᓗᓂ (ᖁᕐᓗᖅ).

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ.  ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ.  http://www.gov.nu.ca/iu

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᖁᕐᓗᖅᑐᖅ ᐃᓕᖅᑯᓯᕐᒧᑦ ᑐᑭᓯᒋᐊᕐᕕᖓ ᑕᑯᔭᒐᖃᕐᕕᖓᓗ ᐅᐊᑦᑎᐊᕈᕐᓂᓴᓂᑦ ᐃᓕᖅᑯᓯᕐᒥᓪᓗ ᑐᑭᓯᒋᐊᕐᕕᒃᓴᐅᕗᖅ ᖁᕐᓗᖅᑐᑉ ᒥᒃᓵᓄᑦ, ᐊᒻᒪᓗ ᑕᑯᒃᓴᐅᑎᑦᑎᔪᖅ ᓄᓇᓕᓐᓂ ᓴᓇᐅᒐᕐᓂᑦ.  ᕿᑎᕐᒥᐅᑦ ᐱᖅᑯᓯᑐᖃᓕᕆᔩᑦ ᑎᒥᖓ (http://www.kitikmeotheritage.ca/) ᐊᒻᒪᓗ ᓄᓇᕘᒥ ᐅᖃᓕᒫᕆᐅᖅᓴᓂᕐᒧᑦ ᑲᑎᒪᔨᖏᑦ ᐃᖅᑲᓇᐃᔮᓖᑦ ᐊᑐᓕᖅᑎᑕᐅᒃᑲᓐᓂᕋᓱᐊᖅᑐᓂ ᐃᓄᐃᓐᓇᖅᑐᓐ ᐅᖃᐅᓯᖅ ᖃᐅᑕᒫᑦ ᐃᓅᓯᖏᓐᓂ ᕿᑎᕐᒥᐅᓂ ᐱᖅᑯᓯᑐᖃᖅᑎᒍᑦ ᐱᓕᕆᐊᖃᐅᕈᓘᔭᖅᑎᑎᓪᓗᑎᑦ, ᐃᓄᐃᓐᓇᖅᑐᓐ ᐅᖃᓕᒫᒐᕐᓂᑦ ᓴᖅᑮᕈᓘᔭᖃᑦᑕᖅᑐᑎᑦ ᐊᒻᒪᓗ ᐊᓯᖏᓐᓂᑦ ᖃᓄᐃᓕᐅᕈᓘᔭᖅᑐᑎᑦ.  ᐋᓐᓕᑲᓐ ᑐᒃᓯᐊᕐᕕᖓ ᑕᐅᕙᓃᒻᒪᑦ ᖁᕐᓗᖅᑐᒥ ᑕᐃᒪᙵᓂᑦ 1920−ᖏᓐᓂ.  ᐃᔾᔪᓇᐃᑦᑐᖅ ᐋᓐᓄᓗᑉ ᐋᓐᓕᑲᓐ ᑐᒃᓯᐊᕐᕕᖓ ᐊᒻᒪᓗ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓ, Xᑑᓯ ᑭᖕ, ᓄᓇᓕᓐᓂ ᑐᒃᓯᐊᕐᕕᒋᔭᐅᓲᖑᕗᑦ.

ᖁᕐᓗᖅᑐᖅ ᐃᓄᐃᑦ ᐅᖃᐅᓯᖓᓂᒃ ᐊᑐᓲᑦ ᐃᓄᐃᓐᓇᖅᑐᓐ, ᐱᖓᓐᓇᒥᐅᑦ ᐅᖃᐅᓯᖓ ᖃᓕᐅᔮᖅᐸᐃᓂᑦ ᑎᑎᕋᐅᓯᓖᑦ ᖃᓂᐅᔮᖅᐸᐃᖑᙱᑦᑐᓂᑦ.  ᑭᓯᐊᓂᓕ, ᖃᓪᓗᓈᑎᑐᑦ ᐅᖃᐅᓯᓪᓗᐊᑕᓖᑦ ᐊᖏᕐᕋᒥᓂᑦ 89%−ᖏᑦ ᖁᕐᓗᖅᑐᒥ, ᐊᓯᐊᓂᒃ ᐅᖃᐅᓯᓪᓗᐊᑕᖃᖅᑳᕋᓗᐊᖅᑎᓪᓗᒋᑦ.  10%−ᑐᐃᓐᓇᑯᓗᖏᑦ ᐃᓄᐃᓐᓇᖅᑐᓐ ᐅᖃᓪᓚᓲᑦ ᐊᖏᕐᕋᒥᓂᑦ, ᓯᕗᓪᓕᐅᓪᓗᒍ ᑭᖑᓪᓕᐅᓪᓗᒍᓘᓐᓃᑦ ᐅᖃᐅᓯᐅᒐᓗᐊᕈᓂ, ᐊᒻᒪᓗ 5% ᐃᓄᐃᓐᓇᖅᑐᒥ ᐅᖃᐅᓯᓪᓗᐊᑕᕆᔭᐅᓂᕋᖅᐳᑦ.  ᖁᕐᓗᖅᑐᒥ ᐊᓯᐊᓂᒃ ᖃᓪᓗᓈᑎᑑᙱᑦᑐᒥᒃ ᐅᖃᐅᓯᖃᕐᓂᕋᖅᑐᑦ, ᓄᓇᕗᒦᑦᑎᓪᓗᒍ, ᐃᓄᐃᑦ ᐅᖃᐅᓯᓪᓗᐊᑕᖃᕐᓂᕋᖅᑐᑦ ᐊᓯᐊᓂᒃ ᖃᓪᓗᓈᑎᑐᑦ, ᐅᐃᕖᑎᑐᑦ ᐅᕝᕙᓘᓐᓃᑦ ᐃᓄᐃᑦ ᐅᖃᐅᓯᖓᓂᒃ ᐊᓯᐊᓂᒃ ᐅᖃᐅᓯᖃᕐᓂᕋᖅᑐᑦ, 19%-ᖏᓐᓃᑦᑐᑦ.  ᐊᒥᓱᓂᑦ ᐊᖏᕐᕋᓂ ᐅᖃᐅᓯᓖᑦ ᐊᒥᓱᓂᑦ.  ᐃᓄᒃᑎᑐᑦ ᐅᖃᐅᓯᖏᑦ ᐊᔾᔨᒌᙱᑐᒡᒍᑕᐅᒻᒪᑕ ᓄᓇᕗᒥ, ᐊᓯᐊᓂ ᓄᓇᓕᐅᔪᒥᒃ ᐃᓄᒃᑎᑑᓲᖑᓐᓂᕈᕕᑦ, ᐅᐸᓗᖓᐃᖅᓯᒪᒋᑦ ᐊᓯᐊᓂᒃ ᐃᓄᒃᑎᑐᑦ ᐅᖃᓪᓚᐅᓯᕐᒥᒃ ᐃᓕᓐᓂᐊᕐᓂᐊᕐᓗᑎᑦ ᐊᒻᒪᓗ ᓄᓇᓕᒻᒥᐅᓄᑦ ᐃᓄᒃᑎᑐᑦ ᐅᖃᐅᓯᖏᓐᓂᑦ ᐊᑐᓕᖁᔭᐅᓗᑎᑦ.  ᐃᓄᐃᑦ ᐅᖃᐅᓯᖏᑦ (ᐃᓄᒃᑎᑐᑦ ᐃᓄᐃᓐᓇᑐᓪᓗ), ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ ᐃᓕᓴᕆᔭᐅᓯᒪᔪᐃᓐᓇᐅᕗᑦ ᐅᖃᐅᓰᑦ ᓄᓇᕗᒥ, ᑕᐃᒪᐃᓐᓂᖓᓄᑦ ᐱᔪᓐᓇᐅᑎᖃᖅᐳᑎᑦ ᒐᕙᒪᒃᑯᓐᓄᑦ ᐱᔨᑦᑎᖅᑕᐅᓗᑎᑦ ᐅᖃᐅᓯᖅ ᐊᑐᕈᒪᔭᐃᑦ ᒪᓕᓪᓗᒍ.

ᑲᓇᑕᒥ ᐊᓯᖏᓐᓂᑦ ᒪᓕᑦᑐᒋᑦ ᖃᓄᐃᑦᑑᓂᖏᑦ, ᖁᕐᓗᖅᑐᖅ ᓄᓇᖓ ᒪᒃᑯᑦᑐᑯᓘᕗᖅ, ᑭᓯᐊᓂᓕ ᐅᑭᐅᓖᑦ 24.3-ᖑᒃᑲᔪᑦᑐᑦ ᐊᖓᔪᑦᑎᒡᒍᑕᐅᓂᖅᓴᐅᓪᓗᑎᑦ ᐊᒥᓱᓂᑦ ᓄᓇᕗᒥ ᐊᓯᖏᓐᓂᒃ ᓄᓇᓕᖏᑦ ᑕᑯᓪᓗᒋᑦ.  2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᒪᓕᑦᑐᒋᑦ 195−ᐸᓗᖏᓐᓂᑦ ᐃᓕᓐᓂᐊᓕᓵᖅᑐᒥᓂᐅᓂᕋᐃᓯᒪᔪᑦ ᓱᕈᓯᓛᓂᑦ ᐊᒻᒪᓗ 340−ᓂᑦ ᐃᓕᓐᓂᐊᖅᑐᓂᑦ ᓱᕈᓯᑕᖃᕐᓂᕋᐃᓪᓗᑎᑦ, ᑕᐃᒪᐃᓐᓂᖏᓐᓄᑦ 37%−ᖑᔪᑦ ᐃᓄᖏᑦ ᐊᒥᓱᑦ ᐅᑭᐅᓖᑦ ᑐᖔᓂ 18, ᐊᒻᒪᓗ 5%−ᖑᔪᑦ ᐃᓄᖏᑦ ᐅᖓᑖᓃᑦᑐᑦ 65−ᓂᑦ.

ᑮᓇᐅᔾᔭᒃᓴᕈᑕᐅᔪᑦ: 

ᖁᕐᓗᖅᑐᖅ ᑮᓇᐅᔭᓕᐅᕐᕕᐅᓇᓱᐊᖃᑦᑕᕐᓂᑯᑐᖃᐅᒻᒪᑦ.  ᐱᕈᖅᐸᓪᓕᐊᓂᖏᑦ ᐅᔭᕋᓐᓂᐊᕐᕖᑦ ᑕᒫᓂ ᑮᓇᐅᔭᓕᐅᕈᑎᖃᕋᓱᐊᕐᓂᕐᒧᑦ ᕿᓂᖅᑐᖃᖃᑦᑕᖅᑐᒥᓂᐅᓂᖓ ᑲᔪᓯᑎᑕᐅᑐᐃᓐᓇᕐᓂᑰᕗᖅ ᑕᐃᔅᓱᒪᓂ ᕼᐅᕐᓐ ᑕᒪᐅᙵᓚᐅᖅᓯᒪᒻᒪᓂᑦ.  ᖄᖓᒍᒃᑲᓐᓂᖅ ᐅᔭᕋᓐᓂᐊᕋᒃᓴᓂᑦ, ᐅᖅᓱᐊᓗᒃᓴᓂᑦ, ᐊᒻᒪᓗ ᒑᓯᒃᓴᓂᑦ ᕿᓂᖅᑐᑎᑦ, ᐊᒥᓱᑦ ᓄᓇᓕᒻᒥᐅᑦ ᐊᓯᖏᓐᓄᑦ ᓄᓇᓕᐅᔪᓄᑦ ᐊᐅᓪᓚᖅᓯᒪᓂᑰᓕᖅᑐᑦ ᓄᓇᑦᓯᐊᕐᒧᑦ ᕼᐃ ᕆᕗᕐ ᐱᓕᕆᐊᖏᓐᓂᑦ ᐃᖅᑲᓇᐃᔮᖃᕆᐊᖅᑐᖅᓯᒪᓪᓗᑎᑦ (ᓄᓇᒃᑰᕈᑎᑯᑖᒃᑯᑦ ᐊᖅᑯᑎᖓ ᓴᓇᔭᐅᓪᓗᓂ), ᔭᓗᓇᐃᑉ−ᒧᑦ (ᐅᔭᕋᓐᓂᐊᕐᕕᓄᑦ ᐊᒻᒪᓗ ᐃᖏᕐᕋᔪᓕᕆᓂᕐᒧᑦ) ᐊᒻᒪᓗ ᐅᑭᐅᖅᑕᖅᑐᑉ ᑕᕆᐅᖓ (ᐅᖅᓱᐊᓗᓕᕆᓂᕐᒧᑦ ᒑᓯᓕᕆᓂᕐᒧᓪᓗ).  ᑮᓇᐅᔭᓕᐅᕈᑎᖃᕐᓂᒃᑯᑦ ᐃᑲᔫᑎᖏᑦ ᐅᔭᕋᓐᓂᐊᕐᓂᕐᒥᒃ ᐊᒥᓱᕈᕐᓂᖅᓴᐅᓲᑦ ᐅᓪᓗᒥᐅᔪᖅ ᐃᖅᑲᓇᐃᔭᕐᕕᒃᓴᖏᑦ ᒪᓕᑦᑐᒋᑦ, ᑭᓯᐊᓂᓕ ᑕᒪᓐᓇ ᓄᓇᒦᙶᖅᑐᓂᑦ ᐊᑐᕈᓐᓇᑐᖅᐹᓗᐃᑦ ᑮᓇᐅᔭᓕᐅᕈᑎᒋᔭᐅᓇᓱᐊᕈᓐᓇᖅᑐᑎᑦ.

ᖁᕐᓗᖅᑐᖅ ᓄᓇᕗᑦ ᒐᕙᒪᖏᑕ ᐱᓕᕆᐊᖃᕐᕕᒋᒻᒪᒍ ᐊᓪᓚᕝᕕᖃᐅᖅᑐᓂᓗ.  ᐊᒥᓱᑦ ᒐᕙᒪᒃᑯᓐᓄᑦ ᐃᖅᑲᓇᐃᔮᒃᓴᑦ ᖁᕐᓗᖅᑑᒦᒃᓯᒪᔪᑦ, ᐊᓪᓚᕝᕖᑦ ᓲᕐᓗᒃ ᑐᑭᓕᐅᕆᕕᒃ, ᐱᙳᐊᖅᑐᓕᕆᔨᒃᑯᑦ, ᓄᓇᓕᓐᓄᑦ ᒐᕙᒪᓄᓪᓗ ᐱᔨᑦᑎᕋᖅᑏᑦ ᑕᒫᓃᑦᑐᑎᑦ.  ᕿᑎᕐᒥᐅᑦ ᐃᓕᓐᓂᐊᕐᕖᑦ ᐊᐅᓚᑕᐅᓂᖏᓐᓄᑦ ᐊᓪᓚᕝᕕᐊ ᑕᒫᓃᒃᑭᕗᖅ, ᐊᕕᑦᑐᖅᓯᒪᔪᓂ ᐃᓕᓐᓂᐊᕐᕕᓂ ᑲᒪᓲᖑᓪᓗᑎᑦ.  ᐳᓚᕋᖅᑐᓕᕆᓂᕐᓗ ᑮᓇᐅᔭᓕᐅᕈᑎᒋᔭᐅᖃᑦᑕᓲᖑᕗᖅ, ᐊᒻᒪᓗ ᐊᒥᓱᓂᑦ ᖃᓂᒋᔭᖏᓐᓃᑦᑐᓂᑦ ᓄᓇᑐᖃᕆᔭᐅᕙᓚᐅᖅᓯᒪᔪᓄᑦ ᑕᑯᔭᖅᑐᑎᑦᑎᖃᑦᑕᖅᑐᑎᑦ.  ᓄᓇᕗᒥ ᒥᕐᖑᐃᓯᕐᕕᖓ ᖁᕐᓗᖅ/ᖁᕐᓗᖅᑑᖅ 15 km ᐅᖓᓯᓐᓂᖃᖅᑐᖅ ᓄᓇᓕᐅᔪᒥᒃ ᕼᐊᒻᓚᒥ, ᖁᕐᓗᖅᑐᒥ ᕼᐊᒻᓚᐅᔪᖅ ᐊᑐᕐᓂᑰᓪᓗᓂ ᓄᓇᓕᖓᓄᑦ ᐊᑎᖃᖅᑎᑕᐅᓕᖅᑐᓂ.  ᓄᓇᕗᒥ ᒥᕐᖑᐃᓯᕐᕕᖓᓗ ᑎᑎᖅᓯᓯᒪᕗᖅ ᖁᕐᓗᖅᑐᖅ ᓄᓇᑐᖃᕆᔭᐅᕙᑦᑐᒥᓂᐅᓂᕋᖅᑕᐅᓪᓗᓂ ᓴᐳᔾᔭᐅᓯᒪᓕᖅᑐᓂ, ᐊᒻᒪᓗ ᑰᒃ ᓂᕈᐊᕋᒃᓴᕈᖅᑎᑕᐅᓚᐅᖅᓯᒪᒋᓪᓗᓂ ᑲᓇᑕᒥ ᑰᑐᖃᕆᔭᐅᕙᑦᑐᒥᓃᑦ ᓴᐳᔾᔭᐅᓂᖏᓐᓄᑦ ᐱᓕᕆᐊᖓᒍᑦ. (http://www.chrs.ca/Rivers/Coppermine/coppermine_e.php) ᖁᕐᓗᖅᑐᒥ ᐱᖅᑯᓯᓕᕆᔨᒃᑯᑦ ᑐᑭᓯᒋᐊᕐᕕᖓ ᑕᑯᔭᒐᖃᕐᕕᖓᓗ ᐊᒥᓱᓄᑦ ᐳᓚᕋᖅᑐᓕᕆᓂᕐᒧᑦ ᐱᔨᑦᑎᕋᕐᕕᐅᒋᕗᖅ ᖃᓄᐃᓕᐅᕈᓘᔭᕐᕕᐅᓲᖑᓪᓗᓂᓗᓂ, ᓲᕐᓗ ᓄᓇᙳᐊᖃᐅᖅᑐᓂ, ᐱᓱᕝᕖᑦ ᐊᖅᑯᑎᖏᓐᓂᒃ ᑕᑯᒃᓴᐅᑎᑦᑎᓲᑦ ᐊᒻᒪᓗ ᐊᐅᓪᓚᐅᔾᔨᔩᑦ ᖃᐅᔨᒋᐊᕐᕕᒃᓴᐅᓂᖏᑕ ᑐᑭᓯᒋᐊᕈᑎᖏᓐᓂᒃ ᐱᓯᒪᑦᑎᓪᓗᑎᑦ.  ᖄᖓᒍᒃᑲᓐᓂᖅ ᑮᓇᐅᔭᓕᐅᕈᑎᖃᕋᓱᐊᓲᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᕐᕕᒃᓴᐅᔪᑦ, ᓴᓇᔪᓕᕆᓂᕐᒧᑦ, ᐊᒻᒪᓗ ᓄᓇᓕᓐ ᓂᐱᔨᑦᑎᕋᕈᑏᑦ, ᐊᒥᓱᑦ ᓄᓇᓕᒻᒥᐅᑦ ᖁᕐᓗᖅᑐᒥ ᐱᖅᑯᓯᑐᖃᖅᑎᒍᑦ ᐊᑐᖅᑐᑎᑦ ᐊᖑᓇᓱᓲᑦ ᐃᖃᓗᒐᓱᐊᖃᑦᑕᓲᓪᓗ.

ᐊᒥᓱᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᖁᕐᓗᖅᑐᖅ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ.  ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᐊᓂ, ᑯᐊᐸᒃᑯᓐᓂ, ᐊᒻᒪᓗ ᖃᖓᑕᓲᒃᑯᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ.  ᐊᐅᒃᑕᔫᒃᑯᑦ ᓂᐅᕕᕈᓐᓇᐅᑎᒥᒃ ᐊᑭᓕᒃᓴᓂᒍᓐᓇᐅᑎᒥᓪᓗ ᐊᑐᕐᕕᒃᓴᐅᕗᑦ ᓂᐅᕕᕐᕕᓂ ᑕᒪᐃᓐᓂᑲᓴᒃ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᖁᕐᓗᖅᑐᑉ ᓄᓇᖓ ᖃᓂᑦᑐᑯᓂᖓᓄᑦ ᓇᐹᖅᑐᐃᑦ ᑭᓪᓕᖓᓄᑦ, ᐃᓚᖏᑦ ᓇᐹᖅᑐᓃᓲᑦ ᓂᕐᔪᑎᖏᑦ ᑕᑯᔭᐅᔪᓐᓇᓲᑦ ᑕᒫᓂ, ᐱᖃᓯᐅᑎᓪᓗᒋᑦ ᐊᒃᙵᐃᑦ, ᖃᕝᕖᑦ ᐊᒻᒪᓗ ᑐᒃᑐᕙᐃᑦ, ᐊᒻᒪᓗᑦᑕᐅᖅ ᐅᑭᐅᖅᑕᖅᑐᑉ ᓄᓇᖓᑕ ᐆᒪᔪᐃᑦ ᑕᑯᔭᐅᓲᑦ ᑕᒫᓃᒃᑲᓗᐊᕆᓪᓗᑎᑦ ᓲᕐᓗᒃ ᐅᒥᖕᒪᐃᑦ, ᑐᒃᑐᐃᑦ, ᑎᕆᒐᓂᐊᑦ, ᐊᒪᕈᐃᑦ ᐊᒻᒪᓗ ᐅᑲᓖᑦ.  ᐅᑭᐅᖅᑕᖅᑐᒥ ᓯᒃᓯᑦ ᑕᑯᔭᐅᓲᖑᒋᓪᓗᑎᑦ.  ᐊᔾᔨᒌᙱᑦᑐᑦ ᐃᓯᒐᔮᖏᒍᑦ ᑯᑭᕐᔪᐊᓖᑦ, ᓲᕐᓗᒃ ᑭᒡᒐᕕᐊᕐᔪᐃᑦ, ᑭᒡᒐᕖᑦ ᐊᒻᒪᓗ ᓇᖅᑐᕋᓖᑦ, ᑕᒫᓃᓲᖑᒻᒥᔪᑦ.  ᐃᓄᐃᑦ ᐃᖃᓗᒐᓱᐊᓲᑦ ᐃᖃᓗᒃᐱᓂᑦ ᐊᒻᒪᓗ ᑲᕕᓯᓕᖕᓂᒃ.  ᓇᑦᑏᑦ ᐃᓪᓚᐅᓕᑦᑑᕐᓃᑦᑐᒡᒍᑕᐅᓲᖑᒻᒥᔪᑦ.

ᐅᖃᓕᒫᑲᓐᓂᕐᓃᑦ : 
  • ᕚᒃ, ᔪᐊᔾᔨ.  ᐅᑭᐅᖅᑕᖅᑐᒥ ᓴᓇᙳᐊᖅᑎ: ᑎᑎᕋᖅᓯᒪᔭᖏᑦ ᐊᒻᒪᓗ ᐊᒥᐊᕆᓯᒪᔭᖏᑦ ᔪᐊᔾᔨ ᕚᒃ, ᐅᒥᐊᖅᑐᖃᑎᒋᓪᓗᒍ ᕗᕌᓐᑭᓕᓐ,1819-1822. ᐃᐊᑦ, ᓯ. ᓯᑑᕗᑦ ᕼᐃᐅᔅᑕᓐ, ᐅᖃᐅᓯᓕᒃ ᐃ.ᓯ. ᒪᒃᓕᐅᕆᓐ.  ᒪᓐᑐᕆᐊᓪ & ᑭᖕᔅᑕᓐ: ᒥᒡᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 1994.
  • ᕕᐊᓇᑦ, ᔮᓐ & ᓲᓴᓐ ᕉᓕ, ᐋᖅᑮᒋᐊᕆᔩᑦ.  ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2004.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᐅᖃᐅᓰᑦ ᐋᖅᑭᓱᖅᓯᒪᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᐃᓅᓯᖏᑦ ᐅᑭᐅᖅᑕᖅᑐᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2010.
  • ᐃᓴᓐᒪᓐ, ᕕᐊᑎ ᑯᕙᔭᓯ.  ᐃᕙᓗᖏᑦ ᐊᓐᓇᐅᒪᔾᔪᑏᑦ: ᐃᓄᐃᑦ ᐊᓐᓄᕌᖏᑦ ᖃᓄᐃᑦᑑᖃᑦᑕᓚᐅᖅᓯᒪᓂᖏᑦ.  ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ 1997.
  • ᔨᐊᓇᔅ, ᑕᐃᒪᓐ: ᐅᑭᐅᖅᑕᖅᑐᒨᖅᑐᖅ: ᖃᐅᑕᒫᖅᓯᐅᑎᖏᑦ ᑕᐃᒪᓐ ᔨᐊᓇᔅ, 1913-1916. ᕼᐅᓪ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ, 1991.
  • ᒪᒃᑖᓄᓪᑦ, ᔮᓐ.  ᐅᑭᐅᖅᑕᖅᑐᑉ ᓯᓚᖓᐃᓄᐃᑦ ᐅᓪᓗᕆᐊᓂᓕᕆᓂᖏᑦ, ᐅᓪᓗᕆᐊᑦ ᐅᓂᒃᑳᖏᑦ ᐅᓂᒃᑳᖅᑐᐊᑐᖃᖏᓪᓗ ᐅᑉᐱᕆᔭᑦ.  ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑏᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪ ᑕᑯᔭᒐᖃᕐᕕᒃ, 1998.
  • ᒪᒌ, ᕌᕗᑦ.  ᑭᖑᓪᓕᖅᐹᖅ ᑕᐅᑐᙳᐊᖅᑕᐅᓯᒪᓂᑯ: ᐃᓄᐃᑦ ᐊᑐᖃᑦᑕᕐᓂᑯᒥᓂᖏᑦ ᐅᑭᐅᖅᑕᖅᑐᒥ.  ᑐᕌᓐᑐ: ᑮ ᐳᐊᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨᔅ−ᕼᕿᕗᑦ ᔪᒪᐃᓐ.  ᐃᓄᐃᑦ: ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᑕᑯᓇᓪᓗᒋᑦ.  ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 1995.
  • ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ.  ᐃᓄᐃᑦ ᐃᓕᖅᑯᓯᖓ: ᐃᓄᐃᑦ ᐃᓕᖅᑯᓯᖓᓄᑦ ᑐᑭᒧᐊᕈᑎᖏᑦ, ᐋᖅᑭᒋᐊᖅᑕᐅᓯᒪᔪᑦ ᐋᑐᕚ: ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ, 2006. (ᐊᒻᒪᓗ ᐊᑐᐃᓐᓇᐅᒻᒥᔪᑦ ᖃᕋᓴᐅᔭᒃᑯᑦ ᓄᓇᕗᑦ ᒐᕙᒪᖏᑕ ᐃᖅᑲᓇᐃᔭᖅᑎᑖᕆᔭᐅᕋᑖᖅᑐᑦ ᑐᑭᓯᒋᐊᖅᑎᑕᐅᓂᖏᓐᓄᑦ ᐃᑭᐊᖅᑭᕕᖓᓂ)(http://www.orientation.hr.gov.nu.ca/i18n/english/pdf/The%20Inuit%20Way.pdf)