You are here

ᖃᐅᓱᐃᑦᑐᖅ

ᖃᐅᓱᐃᑦᑐᖅ

ᐊᕕᒃᑐᖅᓯᒪᓂᖓ: 
ᕿᑭᖅᑖᓗᒻᒥ ᐃᓕᓐᓂᐊᕐᕖᑦ ᐊᐅᓚᑦᑎᔨᖏᑦ (QSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᕼᐊᒻᓚᖓ ᖃᐅᓱᐃᑦᑐᖅ, ᓂᒋᐊᓃᑦᑐᖅ ᒪᕐᕈᓕᕿᑉ ᕿᑭᖅᑕᖓᓂ, ᐊᒥᓱᒻᒪᕆᖕᓂᒃ ᐃᑦᑕᕐᓂᓴᖅᑕᓕᒃ ᑐᓃᑦ ᑕᒫᓃᑦᑐᒥᓂᐅᑎᓪᓗᒋᑦ ᐃᓄᐃᑦ ᓯᕗᕚᖏᓪᓗ.  ᐃᓄᒃᑎᑐᑦ ᐊᑎᓕᒃ, ᖃᐅᓱᐃᑦᑐᖅ “ᑖᖅᓯᒍᓐᓇᖏᓐᓂᖓᓄᑦ”.  ᐅᐊᓐᓇᖓᓃᑦᑐᖅ ᐅᑭᐅᖅᑕᖅᑐᑉ ᑕᕆᐅᖓᓂ ᐊᖅᑯᑎᖃᕐᕕᖓᓂ, ᖃᐅᓱᐃᑦᑐᖅ ᖃᓪᓗᓈᓄᑦ ᖃᐅᔨᓴᖅᑕᐅᖃᑦᑕᕆᐊᖅᑐᖃᑦᑕᖅᑐᑐᖃᐅᕗᖅ ᐊᖅᑯᑎᒥᒃ ᕿᓂᖅᑐᓄᑦ ᐊᒻᒪᓗ ᔮᓐ ᕗᕌᓐᑭᓕᓐ ᑕᒫᓃᓐᓂᑰᓪᓗᓂ.  ᐊᑎᖓ ᑕᕆᐅᖓᑕ ᑕᐃᑲᙶᕐᓂᑰᕗᖅ ᕗᕆᑎᔅ ᐅᒥᐊᕐᔪᐊᖅ ᐊᑎᓕᒃ ᕋᓴᓗᑦ” ᑕᒪᐅᙵᓚᐅᖅᓯᒪᓪᓗᓂ ᓯᒃᑯᖅᑲᐅᖅᑲᔪᒥᓂᐅᓪᓗᓂ 1850−ᖏᓐᓂ ᕿᓂᖅᑐᑎᑦ ᔮᓐ ᕗᕌᓐᑭᓕᓐᒥ.  ᐅᐊᑦᑎᐊᕈᕐᓂᓴᐅᑎᓪᓗᒍ ᓇᔪᖅᑕᐅᖃᑦᑕᕐᓂᑯᒥᓂᖓᓂᒃ ᕿᒪᒃᑲᑯᖃᐅᕋᓗᐊᖅᑎᓪᓗᒍ, ᐃᓄᐃᑦ ᑕᒫᓃᖏᓐᓇᓕᓚᐅᖅᓯᒪᙱᑦᑐᑦ 1953−ᖑᓕᖅᑎᓪᓗᒍ ᑭᓯᐊᓂ.  ᐅᓪᓗᒥᓕᓴᑦ ᖃᐅᓱᐃᑦᑐᖅ ᐱᒋᐊᓚᐅᖅᓯᒪᔪᖅ 1947−ᖑᑎᓪᓗᒍ ᓯᓚᓐᓂᐊᕐᕕᒃ ᓴᓇᔭᐅᒐᒥ JAWS−ᒃᑯᓐᓄᑦ (ᑲᑐᔾᔭᐅᓪᓗᓂ ᐅᑭᐅᖅᑕᖅᑐᒥ ᓯᓚᓐᓂᐊᕐᕕᒃ) ᐱᓕᕆᐊᖓ ᑲᓇᑕᒥ ᒥᐊᓕᒐᕐᓂᓗ ᒐᕙᒪᓄᑦ ᑲᑐᔾᔭᐅᓪᓗᓂ ᑲᒪᒋᔭᐅᔪᒥᓂᐅᓚᐅᖅᓯᒪᔪᖅ.  ᖃᖓᑕᓲᒃᑯᕕᒃ ᐅᓇᑕᖅᑎᓄᑦ ᓴᓇᔭᐅᓕᓚᐅᖅᓯᒪᓪᓗᓂ 1949−ᒥ.  1953-ᒥ, ᖃᐅᓱᐃᑦᑐᖅ ᐃᓚᒋᔭᐅᓚᐅᖅᓯᒪᔪᖅ ᒪᕐᕉᖕᓂᒃ ᐃᓂᒋᔭᐅᔫᖕᓂᒃ (ᐊᐃᑉᐸᖓ ᐊᐅᓱᑦᑑᓪᓗᓂ) ᐃᓄᐃᑦ ᓄᑦᑎᖅᑕᒥᓂᐅᓪᓗᑎᑦ ᐃᑲᔪᕋᔭᕐᒪᑕ ᑲᓇᑕᑉ ᐅᑭᐅᖅᑕᖅᑐᖓ ᓇᔪᖅᑕᐅᔭᕆᐊᖃᕋᒥ.  ᐳᑭᖅᑕᓕᒃᑯᑦ ᐃᓄᖕᓂᒃ ᑕᒪᐅᙵᐅᔾᔨᖃᑕᐅᓚᐅᖅᓯᒪᔪᑦ.  ᓄᓇᓕᖓ ᖁᑦᑎᒃᑐᒨᖅᑕᐅᓯᒪᓪᓗᓂ ᐱᔮᕆᔭᐅᓪᓗᓂ, ᑲᓇᑕᒥ ᒐᕙᒪᒃᑯᑦ ᓂᕈᐊᓚᐅᖅᓯᒪᔭᖓ ᐅᑭᐅᖅᑕᖅᑐᒥ ᐱᓕᕆᐊᕆᔭᐅᓗᓂ 1950-ᖏᓐᓂ, ᑎᑎᕋᖅᓯᒪᔪᖅ ᖃᓄᑎᒋ ᑲᓇᑕ ᐃᒪᖓ ᑭᓪᓕᖃᖅᑎᑕᐅᓂᐊᕐᒪᖔᖅ ᐊᒻᒪᓗ ᖃᐅᔨᓴᖅᑐᒻᒪᕆᐅᓪᓗᑎᑦ ᑐᑭᓯᕚᓪᓕᖅᑕᐅᖁᓪᓗᒍ ᓄᓇᙳᐊᓕᖅᑕᐅᓯᒪᙱᑦᑐᖅ (ᑕᐃᔅᓱᒪᓂ) ᑲᓇᑕᑉ ᐃᓚᖓ.  ᑲᓇᑕᒥ ᒐᕙᒪᒃᑯᖏᑦ ᓴᓇᓕᓚᐅᖅᓯᒪᔪᑦ ᐃᓕᓐᓂᐊᕐᕕᒻᒥ ᐊᒻᒪᓗ ᐃᒡᓗᒃᓴᓂᑦ ᑕᒫᓂᕐᒥᐅᑕᓄᑦ 1960−ᖏᓐᓂ, ᑕᐃᒪᐃᓚᐅᖅᓯᒪᒻᒥᒻᒪᑕ ᐊᒥᓱᓕᓂᑦ ᐅᑭᐅᖅᑕᖅᑐᒥ ᓄᓇᓕᐅᔪᓂᑦ.  ᓄᓇᓕᐅᔪᖅ ᓄᑦᑎᖅᑕᐅᓚᐅᖅᓯᒪᔪᖅ ᐅᓇᑕᖅᑎᒃᑯᕕᒻᒦᒍᓐᓃᖅᑎᑕᐅᓪᓗᑎᑦ ᐃᓄᐃᑦ 1975−ᖑᑎᓪᓗᒍ.

 

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ.  ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ.  http://www.gov.nu.ca/iu

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᕋᓴᓗᑦ, ᐊᒥᓱᓄᑦ ᐃᓄᖕᓄᑦ ᑕᐃᒪᓐᓇ ᑕᐃᔭᐅᓲᖑᒻᒥᔪᖅ, ᐅᐱᕐᖔᖑᓕᕋᐃᒻᒪᑦ ᐊᐅᔭᒃᑯᓪᓗ ᐃᓄᖕᓄᑦ ᐱᓕᕆᐊᖃᕐᕕᐅᓕᖃᑦᑕᓲᖅ, ᖃᐅᔨᓴᕆᐊᖅᑐᓄᑦ ᑐᑦᑕᕐᕕᒋᔭᐅᓕᖅᑐᓂ; ᐃᓄᐃᑦ ᑕᒪᐅᙵᖅᑐᑦ ᐊᔾᔨᒌᙱᑐᒃᑯᑦ ᐅᑭᐅᖅᑕᖅᑐᒨᖅᑐᑎᑦ, ᐃᓄᐃᑦ ᖁᑦᑎᒃᑐᓕᐊᖅᑐᑦ ᖃᐅᔨᓴᕐᕕᖓᓄᑦ ᓂᐅᕐᕈᕕᐅᕙᑦᑐᓅᖅᑐᓪᓗ, ᑲᓇᑕᒥ ᐅᓇᑕᖅᑏᑦ ᐆᑦᑐᕋᕆᐊᖅᑐᑎᑦ.  ᐊᕐᕌᒍᓕᒫᕐᒥ ᑐᑦᑕᕐᕕᒋᔭᐅᕗᖅ ᐊᖅᑯᓵᕐᕕᐅᓲᖅ ᐊᐅᓱᐃᑦᑐᒨᖅᐸᓪᓕᐊᔪᓄᑦ.  ᐊᒥᓱᑦ ᓄᓇᓕᒻᒥᐅᑦ ᐱᖅᑯᓯᑐᖃᖏᑎᒍᑦ ᐃᓄᑦᑎᑐᑦ ᐊᖑᓇᓱᓲᖑᒐᓗᐊᖅᑎᓪᓗᒋᑦ ᐊᒻᒪᓗ ᐃᖃᓗᒐᓱᐊᖅᑐᓂᑦ ᓄᐊᑦᑎᓪᓗᑎᓪᓗ ᓂᕆᓂᐊᖅᑕᒥᓂᑦ, ᓄᓇᓕᐅᔪᖅ ᖃᐅᔨᓴᕐᕕᐅᓗᐊᓲᖅ, ᐅᓇᑕᖅᑎᓄᑦ ᐆᑦᑐᕋᕐᕕᐅᓪᓗᓂ ᐊᒻᒪᓗ ᖃᐅᔨᓴᖅᑎᒻᒪᕆᒃᑯᓐᓄᑦ ᖃᐅᔨᓴᕐᕕᐅᕙᑦᑐᓂ.  ᕋᓴᓗᒻᒥᐅᑦ ᐃᓅᖃᑎᖃᕈᓐᓇᖃᑦᑕᕐᓂᑰᔪᑦ ᐃᓚᖃᐅᕈᓘᔭᖅᑐᑎᓪᓗ ᐊᓯᖏᓐᓂᑦ ᖁᑦᑎᒃᑐᓃᑦᑐᓂᑦ ᐊᒻᒪᓗ ᑯᐸᑭᒥᐅᓂᑦ ᐃᓄᐃᑦ ᓄᓇᓕᖏᓐᓂ.  ᐃᔾᔪᓇᐃᑦᑐᖅ ᐹᓇᐹᓯ ᐋᓐᓕᑲᓐ ᑐᒃᓯᐊᕐᕕᖓ ᒥᑦᑎᒪᑕᓕᖕᒦᙶᖓᔪᖅ ᑐᒃᓯᐊᕐᕕᖓᓂ.  ᑐᒃᓯᐊᕐᕕᒻᒥ ᐱᓕᕆᕖᑦ ᒥᑦᑎᒪᑕᓕᖕᒦᙶᖅᑐᑦ ᓂᐅᕐᕈᓚᐅᓲᖑᕗᑦ, ᑭᓯᐊᓂᓕ ᓄᓇᓕᒻᒥᐅᑦ ᑐᒃᓯᐊᖅᑎᑦᑎᓲᖑᓪᓗᑎᑦ.  ᐃᒃᓯᕋᕐᔪᐊᖃᙱᑦᑐᖅ ᑐᒃᓯᐊᕐᕕᒻᒥ ᕋᓴᓗᒻᒥ.

ᐊᖅᑯᓵᕐᕕᐅᓲᖑᓪᓗᓂ ᖃᖓᑕᓲᒃᑯᑦ, ᕋᓴᓗᑦ ᐅᖃᐅᓯᖏᑦ ᐊᔾᔨᒌᙱᓂᖅᓴᐅᔪᑦ ᐊᒥᓱᓂᑦ ᕿᑭᖅᑕᓂ ᓄᓇᓕᐅᔪᓂᑦ ᑕᐃᒪᐃᙱᓂᖅᓴᐅᑎᓪᓗᒋᑦ.  ᐃᓄᒃᑎᑐᑦ ᐅᖃᐅᓯᓪᓗᐊᑕᕆᔭᐅᔪᖅ 56^−ᖏᓐᓄᑦ ᐃᓄᖏᓐᓄᑦ, ᖃᓪᓗᓈᑎᑐᑦ ᐅᖃᐅᓯᖃᓪᓗᐊᖅᑐᑦ 40%−ᖏᑦ, ᐊᒻᒪᓗ ᐅᐃᕖᑎᑐᑦ 2%−ᖏᑦ.  ᑭᓯᐊᓂᓕ, ᖃᓪᓗᓇᐅᔭᕐᓂᖅᓴᐅᔪᑦ ᐃᖅᑲᓇᐃᔭᕐᕕᒻᒥ ᐊᖏᕐᕋᒥᓂᓪᓗ, ᐅᖃᐅᓯᖅ ᐊᑐᖅᑕᐅᕙᒃᑐᓂ 78%−ᖏᓐᓄᑦ ᐃᓄᖏᓐᓄᑦ ᐊᖏᕐᕋᒥ ᐊᑐᖅᑕᐅᓲᖑᓪᓗᓂ, ᐊᒻᒪᓗ 14%−ᖑᔪᑦ ᖃᓪᓗᓈᑎᑐᑦ ᐅᖃᐅᓯᖃᒃᑲᓂᖅᑐᑎᑦ ᐊᑐᓲᑦ ᐊᖏᕐᕋᒥᓂᑦ.  ᐃᓄᒃᑎᑐᑦ ᐊᑐᖅᑕᐅᓲᖅ 78%−ᖏᓐᓄᑦ ᐊᖏᕐᕋᒥ ᐅᖃᐅᓯᕆᔭᐅᖅᑳᕐᓂᑰᓯᒪᓪᓗᓂ, ᐊᒻᒪᓗ 5%-ᖑᔪᑦ ᖃᓪᓗᓇᐅᔭᓲᑦ ᐅᐃᕖᑎᑐᓪᓗ.

ᖃᐅᓱᐃᑦᑐᑉ ᐃᓄᖏᑦ ᐊᖏᔫᑕᐅᓂᖅᓴᒡᒍᑕᐅᕗᑦ ᓄᓇᕗᑦ ᓄᓇᓕᖏᓐᓂ ᒪᒃᑯᓂᖅᓴᐅᑎᓪᓗᒋᑦ, ᒪᒃᑯᓂᖅᓴᐅᓪᓗᑎᑦ ᑭᓯᐊᓂ ᑲᓇᑕᒥᐅᑕᕐᓂᑦ.  2011-ᒥ ᑭᓪᓕᓯᓂᐊᖅᑕᐅᓯᒪᔪᑦ ᓈᓴᐃᓚᐅᖅᐳᑦ 20 ᐃᓕᓐᓂᐊᓕᓵᖅᑐᓂᑦ ᓱᕈᓯᓛᖃᐅᕐᒪᑕ ᐊᒻᒪᓗ 60−ᓂᑦ ᐃᓕᓐᓂᐊᕆᐊᓲᓂᑦ ᓱᕈᓯᖅᑕᖃᖅᑐᓂ, 37%−ᖏᑦ ᐃᓄᖏᑦ ᐅᑭᐅᓖᑦ 18−ᓂᑦ ᑐᖔᓂᓗ.  ᐅᑭᐅᕆᔭᐅᓗᐊᖅᑐᖅ 26.5 ᐊᒻᒪᓗ 5% ᐃᓄᖏᑦ ᐅᑭᐅᓖᑦ 65−ᓂᑦ ᐅᖓᑖᓄᓪᓗ.

ᑮᓇᐅᔾᔭᒃᓴᕈᑕᐅᔪᑦ: 

ᖃᐅᓱᐃᑦᑐᖅ ᑮᓇᐅᔭᓕᐅᕋᓱᐊᓗᐊᓲᖅ ᑐᑦᑕᕐᕕᐅᓗᐊᕐᓂᖓᓄᑦ ᖃᖓᑕᓲᒃᑯᑦ ᐊᖅᑯᓵᕐᕕᐅᓲᖑᒻᒪᑦ ᖁᑦᑎᒃᑐᓕᐊᖅᐸᓪᓕᐊᔪᓄᑦ.  ᖃᖓᑕᓲᒃᑯᕕᒻᒥ ᖃᑕᐅᓲᕐᓄᑦ ᐊᖏᓂᖅᓴᓄᑦ ᑎᑭᕝᕕᐅᓲᖅ ᐊᒻᒪᓗ ᒥᑭᓂᖅᓴᐃᑦ ᖃᖓᑕᓲᑦ ᑕᒪᐅᓈᓲᖑᒻᒥᔪᑦ ᐊᐅᓱᐃᑦᑐᒨᖅᐸᓪᓕᐊᓪᓗᑎᑦ ᐊᒻᒪᓗ “ᒥᕝᕕᓚᑦᑖᖃᙱᑦᑐᑦ” ᖃᓄᐃᓕᐅᕈᑕᐅᓂᐊᖅᑐᓄᑦ ᐃᑲᔪᖅᑐᐃᔪᑦ ᖃᐅᔨᓴᕐᓂᕐᒥᒃ ᐊᒻᒪᓗ ᖃᐅᔨᓴᖅᑎᒻᒪᕇᑦ ᐱᓕᕆᐊᖃᕆᐊᖅᑐᖅᑐᑎᑦ.  ᓄᓇᓕᓐᓅᖅᓯᒪᓲᖑᒻᒥᔪᑦ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ ᖃᐅᔨᓴᖅᑎᒻᒪᕇᑦ ᐱᓕᕆᐊᖃᖅᑎᖏᑦ ᖃᐅᔨᓴᕆᐊᖅᑐᑎᑦ ᐊᒻᒪᓗ ᐅᓇᑕᖅᑏᑦ ᐅᑭᐅᖅᑐᖅᑐᒥ ᐱᓕᒻᒪᒃᓴᕐᕕᖓᓅᖅᓯᒪᓪᓗᑎᑦ.  ᓱᓇᒃᑯᑖᓪᓗ ᑕᕝᕘᓈᖅᑎᑕᐅᓲᖑᕗᑦ ᐅᒥᐊᕐᔪᐊᒃᑯᑦ ᐊᒻᒪᓗ ᐊᕐᕌᒍᑕᒫᑦ ᐅᑭᐅᖅᑕᖅᑐᒥ “ᖃᐅᔨᓴᖅᑏᑦ” ᑕᒪᐅᓈᓲᖑᔪᑦ ᐅᑭᐅᖅᑕᖅᑐᓪᓚᕆᒻᒨᖅᐸᓪᓕᐊᓪᓗᑎᑦ.  ᑐᔪᕐᕕᕖᑦ ᓇᔪᒐᕆᔭᐅᓲᑦ ᐃᖅᑲᓇᐃᔭᖅᑏᑦ ᑕᒪᐅᙵᖅᓯᒪᓪᓗᑎᑦ, ᓂᐅᕐᕈᐊᓄᑦ, ᖃᐅᔨᓴᖅᑎᓄᑦ, ᐸᖅᓴᐃᔨᓄᑦ, ᐊᒻᒪᓗ ᐊᐅᓱᐃᑦᑐᕐᒨᖅᐸᓪᓕᐊᔪᓄᑦ ᓯᓚᑲᒻᒪᕈᖅᑲᐅᖅᑲᔪᓄᑦ.  ᐊᒥᓱᑦ ᓄᓇᓕᒻᒥᐅᑦ ᓂᐅᕕᐊᒃᓴᖃᓲᖑᒻᒥᔪᑦ ᐊᒻᒪᓗ ᐱᔨᑦᑎᕋᖅᑎᐅᓪᓗᑎᑦ ᓇᓐᓂᐊᖅᑎᓄᑦ, ᐊᑐᐊᒐᕋᓛᖅᑎᒎᖅᑕᒻᒪᕆᐅᔪᖅ ᑕᒪᓐᓇ ᓇᓐᓂᐊᕆᐊᓲᓄᑦ, ᑮᓇᐅᔭᓕᐅᖅᑎᑦᑎᔪᒻᒪᕆᐅᓲᖑᓪᓗᓂ ᓄᓇᓕᐅᔪᒧᑦ.  ᖃᑦᑏᓐᓇᒡᒍᑕᐅᒐᓗᐊᑦ ᓴᓇᙳᐊᓲᑦ, ᐊᒻᒪᓗ ᐱᖅᑯᓯᑐᖃᖅᑎᒍᑦ ᐊᖑᓇᓱᓲᖑᓪᓗᑎᑦ.

ᐊᒥᓱᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᖃᐅᓱᑐᐃᑦᑐᖅ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ.  ᑯᐊᐸᒃᑯᑦ “ᑮᓇᐅᔭᓕᕆᒐᓛᒍᓐᓇᖅᑑᒐᓗᐊᑦ”, ᖃᑦᑏᓐᓇᑯᓘᒐᓗᐊᓂᑦ ᑮᓇᐅᔭᖃᕐᕕᒃᓴᐅᒍᓐᓇᖅᑐᓂ, ᓯᒃᑮᕐᕕᒃᓴᐅᓗᓂ, ᐊᓯᖏᓪᓗ.  ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ.  ᐊᐅᒃᑕᔫᒃᑯᑦ ᐊᑭᓕᐅᑎᓂᑦ ᐊᒻᒪᓗ ᐊᑭᓕᒃᓴᓂᐅᑎᓂᑦ ᐊᑐᕐᕕᒃᓴᐅᓲᖅ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᓂᕐᔪᑏᑦ ᐊᑐᐃᓐᓇᐅᒪᓂᖏᑦ ᐊᓯᔾᔨᓲᑦ ᖃᐅᓱᐃᑦᑐᒥ ᐊᕐᕌᒍ ᐊᓂᒍᖅᐸᓪᓕᐊᓂᖓ ᒪᓕᑦᑐᒍ.  ᓇᓄᐃᑦ, ᐊᒪᕈᐃᑦ, ᑎᕆᒐᓂᐊᑦ, ᑐᒃᑐᐃᑦ, ᓇᑦᑏᑦ ᐅᔾᔪᐃᑦ ᐊᒻᒪᓗ ᑑᒑᓖᑦ ᑕᒫᓃᓲᖑᒐᓗᐊᕐᒥᔪᑦ ᐊᕐᕌᒎᓕᒫᐸᓗᒻᒥ.  ᓇᓐᓂᐊᑎᑦᑎᓪᓗᑎᑦ ᑎᑭᓯᒪᔪᓂᑦ ᐊᐅᓪᓚᐅᔾᔨᓲᑦ ᑮᓇᐅᔭᓕᐅᕈᑎᒋᔭᒻᒪᕆᐅᓲᖑᓪᓗᓂᓗ ᓄᓇᓕᐅᔪᒧᑦ, ᐊᒻᒪᓗ ᐊᐅᓚᑕᐅᓲᖑᓪᓗᓂ ᐆᒪᔪᓕᕆᓂᕐᒧᑦ ᐊᑐᐊᒐᖏᓐᓄᑦ.  ᐊᐅᔭᒃᑯᑦ 30−ᐸᓗᐃᑦ ᐆᒪᔪᐃᑦ ᐅᑭᐅᖅᑕᖅᑐᒥᐅᑦ ᑎᖕᒥᐊᑦ ᐅᑎᖅᐸᑦᑐᑦ, ᓲᕐᓗᒃ ᒥᑏᑦ, ᓂᕐᓖᑦ, ᓇᐅᔭᑦ, ᑭᒡᒐᕕᐊᕐᔪᐃᑦ, ᓯᔾᔭᕆᐊᓪᓗ.  ᑕᓪᓗᕈᑎᐅᑉ ᐃᒪᖓᓗ ᐊᔾᔨᒌᙱᑦᑐᓂᑦ ᐆᒪᔪᕐᓂᑦ ᑕᑯᔭᖅᑐᕕᒃᓴᐅᓲᖑᒻᒥᔪᑦ ᓴᕐᕕᓄᑦ, ᓯᑯᕈᕈᓐᓇᖏᑦᑐᑦ.  ᐊᒥᓱᑦᑕᐅᑦ ᓄᓇᓕᑉ ᖃᓂᒋᔭᖓᓂ ᐃᖃᓗᒐᓱᕝᕕᐅᒍᓐᓇᓲᑦ ᐃᖃᓗᒃᐱᓂᑦ.  ᖃᓂᒋᔭᖓᓂ, ᑲᓇᑕᒥ ᒐᕙᒪᒃᑯᑦ ᐋᖅᑮᓯᒪᒻᒥᔪᑦ ᓇᓄᐃᑦ ᑲᓇᑕᒥ ᐸᐸᑕᐅᕝᕕᖓ (http://www.ec.gc.ca/ap-pa/default.asp?lang=En&n=E7EA9B73-1). ᐅᓪᓗᒥᐅᔪᖅ ᐋᖅᑮᕙᓪᓕᐊᒐᓱᐊᖅᑐᑦ ᑲᓇᑕᒥ ᒥᕐᖑᐃᓯᕐᕕᒻᒥ ᐱᖃᓯᐅᔾᔭᐅᖁᓪᓗᒋ ᐆᒪᔪᐃᑦ ᐸᐸᑕᐅᓂᐊᕐᒪᑕ ᐊᒻᒪᓗ ᐊᓯᖏᑦ ᓄᓇᐃᑦ ᐃᒪᐃᓪᓗ ᖃᓄᐃᑦᑑᓂᖏᑦ ᐸᐸᑕᐅᓂᐊᕐᒪᑕ.

ᐅᖃᓕᒫᑲᓐᓂᕐᓃᑦ : 
  • ᕕᐊᓇᑦ, ᔮᓐ & ᓲᓴᓐ ᕉᓕ, ᐋᖅᑮᒋᐊᕆᔩᑦ.  ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2004.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᐅᖃᐅᓰᑦ ᐋᖅᑭᓱᖅᓯᒪᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᐃᓅᓯᖏᑦ ᐅᑭᐅᖅᑕᖅᑐᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2010.
  • ᒍᕌᓐᑦ, ᓰᓚ ᑎ.  ᑲᓇᑕᑉ ᓇᒻᒥᓂᖅᓱᕐᓂᖓᓄᑦ ᐅᕝᕙᓘᓐᓃ ᓴᐳᔾᔭᐅᓂᖓᓄᑦ? ᒐᕙᒪᒃᑯᑦ ᐊᑐᐊᒐᖓ ᑲᓇᑕᑉ ᐅᑭᐅᖅᑕᖅᑐᖓᓂ 1936-1950. ᕚᓐᑰᕗᕐ: ᕗᕆᑎᔅ ᑲᓚᒻᐱᐊᑉ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᐅᓯᒪᓂᑯᑦ, 1988.
  • ᐃᓴᓐᒪᓐ, ᕕᐊᑎ ᑯᕙᔭᓯ.  ᐃᕙᓗᖏᑦ ᐊᓐᓇᐅᒪᔾᔪᑏᑦ: ᐃᓄᐃᑦ ᐊᓐᓄᕌᖏᑦ ᖃᓄᐃᑦᑑᖃᑦᑕᓚᐅᖅᓯᒪᓂᖏᑦ.  ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ 1997.
  • ᒪᒃᑖᓄᓪᑦ, ᔮᓐ.  ᐅᑭᐅᖅᑕᖅᑐᑉ ᓯᓚᖓᐃᓄᐃᑦ ᐅᓪᓗᕆᐊᓂᓕᕆᓂᖏᑦ, ᐅᓪᓗᕆᐊᑦ ᐅᓂᒃᑳᖏᑦ ᐅᓂᒃᑳᖅᑐᐊᑐᖃᖏᓪᓗ ᐅᑉᐱᕆᔭᑦ.  ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑏᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪ ᑕᑯᔭᒐᖃᕐᕕᒃ, 1998.
  • ᒪᕇᓄ, ᑭᐅᕈᓪ, ᐊᒻᒪᓗ ᒪᐃᑯᓪ ᕚᔅᑐᕐ.  ᐅᑭᐅᖅᑕᖅᑐᒥ ᓄᓇᖓ: ᑲᓇᑕᑉ ᐅᑭᐅᖅᑕᖅᑐᖓᓂ ᖃᐅᔨᓴᖅᑎᒻᒪᕇᑦ.  ᑐᕌᓐᑐ: NC ᑎᑎᕋᖅᑎᖏᑦ, 1986.
  • ᒪᒌ, ᕌᕗᑦ.  ᑭᖑᓪᓕᖅᐹᖅ ᑕᐅᑐᙳᐊᖅᑕᐅᓯᒪᓂᑯ: ᐃᓄᐃᑦ ᐊᑐᖃᑦᑕᕐᓂᑯᒥᓂᖏᑦ ᐅᑭᐅᖅᑕᖅᑐᒥ.  ᑐᕌᓐᑐ: ᑮ ᐳᐊᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨᔅ−ᕼᕿᕗᑦ ᔪᒪᐃᓐ.  ᐃᓄᐃᑦ: ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᑕᑯᓇᓪᓗᒋᑦ.  ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 1995.
  • ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ.  ᐃᓄᐃᑦ ᐃᓕᖅᑯᓯᖓ: ᐃᓄᐃᑦ ᐃᓕᖅᑯᓯᖓᓄᑦ ᑐᑭᒧᐊᕈᑎᖏᑦ, ᐋᖅᑭᒋᐊᖅᑕᐅᓯᒪᔪᑦ ᐋᑐᕚ: ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ, 2006. (ᐊᒻᒪᓗ ᐊᑐᐃᓐᓇᐅᒻᒥᔪᑦ ᖃᕋᓴᐅᔭᒃᑯᑦ ᓄᓇᕗᑦ ᒐᕙᒪᖏᑕ ᐃᖅᑲᓇᐃᔭᖅᑎᑖᕆᔭᐅᕋᑖᖅᑐᑦ ᑐᑭᓯᒋᐊᖅᑎᑕᐅᓂᖏᓐᓄᑦ ᐃᑭᐊᖅᑭᕕᖓᓂ)(http://www.orientation.hr.gov.nu.ca/i18n/english/pdf/The%20Inuit%20Way.pdf)
  • ᑎᐊᔅᑐᕐ, ᕗᕌᓐᒃ ᔭᐃᒥᓯ ᐊᒻᒪᓗ ᑯᓪᑦᓯᔅᑭ, ᐲᑕ.  ᑕᒻᒪᕐᓃᑦ.: ᐃᓄᐃᑦ ᓄᑦᑎᖅᑕᒥᓃᑦ ᐅᑭᐅᖅᑕᖅᑐᑉ ᑲᓇᓐᓇᖓᓂ 1939-63. ᕗᕆᑎᔅ ᑲᓚᒻᐱᐊᑉ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᐅᓯᒪᓂᑯᑦ, 1994.