You are here

ᐃᒡᓗᓕᒑᕐᔪᒃ

ᐃᒡᓗᓕᒑᕐᔪᒃ

ᐊᕕᒃᑐᖅᓯᒪᓂᖓ: 
Kivalliq School Operations (KSO)

Community

ᑭᒃᑰᓂᕗᑦ
ᖃᓄᐃᑉᐸᓚᐅᕐᓂᖏᑦ: 

ᐃᒡᓗᓕᒑᕐᔪᒃ ᐱᑐᖃᐅᓛᖑᖃᑕᐅᕗᖅ ᓄᓇᕗᒥ ᓄᓇᓕᖏᓐᓂ: 100−ᓂᑦ ᐊᕐᕌᒍᓂᑦ ᓇᓪᓕᐅᓂᖅᓯᐅᓚᐅᖅᓯᒪᕗᖅ 2011-2012.  “ᑦᓴᔅᑐᕐ,” ᑕᐃᒪᓐᓇ ᖃᐅᔨᒪᔭᐅᓪᓗᓂ ᑕᐃᔭᐅᓲᖑᓪᓗᓂ, ᐃᓄᐃᑦ ᑲᑎᕝᕕᒌᓐᓇᖃᑦᑕᖅᓯᒪᔭᖓ.  ᐊᖅᑯᓵᖅᑕᐅᖃᑦᑕᖅᑐᓂ, ᐃᓄᐃᑦ ᑕᕝᕘᓇ ᓄᓇᖅᐸᓯᒃᑰᖃᑦᑕᖅᑐᑦ ᖃᒪᓂ’ᑐᐊᕐᒨᖅᑐᑎᑦ ᐊᒻᒪᓗ ᐅᖓᑖᓄᑦ, ᐊᒻᒪᓗ ᓯᔾᔭᖓᒎᖃᑦᑕᖅᓯᒪᔪᒥᓂᐅᓪᓗᑎᑦ.  ᐃᓄᒃᑎᑐᑦ ᐊᑎᖓ ᓄᓇᓕᖓᑕ, ᐃᒡᓗᓕᒑᕐᔪᒃ, ᑐᑭᓕᒃ “ᖃᑦᑏᓐᓇᑯᓗᖕᓂᒃ ᐃᒡᓗᖃᐅᖅᑐᖅ.”  1700-ᖏᓐᓂ, ᖃᐅᔨᓴᕆᐊᖅᓯᒪᔪᑦ “ᓇᓂᓯᔪᒥᓂᐅᕗᑦ” ᐃᒡᓗᓕᒑᕐᔪᒻᒥ ᕿᓂᖅᑐᑎᑦ ᐅᑭᐅᖅᑕᖅᑐᑉ ᐊᖅᑯᑎᖓᓂᒃ ᐃᒪᒃᑯᑦ.  ᖃᓪᓗᓈᑎᑐᑦ ᐊᑎᖓ ᐋᖅᑭᒃᑕᐅᓚᐅᖅᓯᒪᕗᖅ 1749−ᖑᑎᓪᓗᒍ, ᓄᓇᓕᐅᔪᖅ ᐊᑦᑎᖅᑕᐅᓚᐅᖅᓯᒪᓪᓗᓂ ᑎᓴᒪᖓ ᐆᕈᓪ ᑦᓴᔅᑐᕖᐅᓪᑦ, ᑯᐃᑉ ᓄᓇᖓᓂ ᐊᓪᓚᑦᑎᕐᔪᐊᕆᔭᐅᓚᐅᖅᓯᒪᔪᖅ.  1800−ᖏᓐᓂ ᐃᒡᓗᓕᒑᕐᔪᒃ ᐊᕐᕕᓂᐊᕐᕕᐅᖃᑦᑕᓚᐅᖅᓯᒪᕗᖅ, ᐊᒥᓱᑦ ᐃᓄᐃᑦ ᑕᒫᓂᕐᒥᐅᑦ ᐃᖅᑲᓇᐃᔮᖅᑖᖅᑐᒡᒍᑕᐅᓪᓗᑎᑦ ᐊᔾᔨᒌᙱᑦᑐᓂᑦ ᐊᕐᕕᓂᐊᖅᑐᑎᑦ ᑕᒪᐅᙵᖅᓯᒪᔪᓄᑦ.  ᐊᒥᓱᑦ ᐊᕐᕕᕐᓂᐊᕆᐊᖅᑐᖃᑦᑕᓚᐅᖅᑐᑦ ᑕᒪᐅᖓ ᐅᑮᓪᓗᑎᑦ ᐃᒡᓗᓕᒑᕐᔪᒻᒥ ᐊᕐᕕᕐᓂᐊᖅᓴᕋᐃᓐᓂᖅᓴᐅᓛᕐᒧᑦ ᐊᕐᕌᒎᓕᕈᓂ, ᑕᓯᐅᔭᕐᔪᐊᑉ ᑕᕆᐅᖓ ᐊᐅᓚᐅᙱᑎᓪᓗᒍ.

1911-ᖏᓐᓂ ᕼᐊᑦᓴᓐᔅ ᕙᐃ ᑲᒻᐸᓂᒃᑯᑦ (HBC) ᓂᐅᕕᕐᕕᑖᓚᐅᖅᓯᒪᔪᑦ ᑕᐅᖅᓰᕕᖓᓂ ᐊᒻᒪᓗ ᐱᖁᑎᖃᕐᕕᐅᓪᓗᓂ ᐊᓯᖏᑦ ᓂᐅᕕᕐᕕᓖᑦ ᐊᕕᑦᑐᖅᓯᒪᔪᓂ ᐊᐃᒃᓯᕈᓐᓇᖃᑦᑕᖅᑐᑎᑦ.  ᖄᖓᒍᒃᑲᓐᓂᖅ ᕼᐊᑦᓴᓐᔅ ᕙᐃ ᑲᒻᐸᓂᒃᑯᑦ, ᐳᑭᖅᑕᓕᒃᑯᑦ ᑕᒪᐅᙵᓚᐅᖅᓯᒪᔪᑦ ᐊᕕᑦᑐᖅᓯᒪᔪᖓᓄᑦ ᐱᔨᑦᑎᖅᑐᑎᑦ, ᐊᒻᒪᓗ ᐃᒃᓯᖃᕐᔪᐊᑉ ᑐᒃᓯᐊᕐᕕᑖᖅᑐᓂ, ᐃᓕᓐᓂᐊᕐᕕᒋᔭᐅᕙᓚᐅᖅᓯᒪᔪᖅ (ᒫᓐᓇ ᒪᑐᓯᒪᓕᖅᑐᖅ), ᐊᒻᒪᓗ ᐋᓐᓂᐊᕕᖃᓕᖅᑐᓂ ᐊᐅᓚᑕᐅᓪᓗᓂ ᓇᔭᙳᐊᓄᑦ.  ᐋᓐᓂᐊᕐᕕᒃ ᑎᒥᒃᑯᑦ ᐊᔪᕈᑎᖕᓄᑦ ᓇᔪᒐᕆᔭᐅᓕᖅᑐᖅ, ᓇᔭ ᐃᓴᕕᐊᓪ ᓇᔪᒐᖓ, ᓱᕈᓯᕐᓄᑦ ᐊᔪᕈᑎᓕᓐᓄᑦ ᓇᔪᖅᑕᐅᕙᑦᑐᓂ, ᐊᒻᒪᓗ ᐃᓚᖏᑦ ᐃᓐᓇᑐᖃᐅᓪᓗᑎᑦ.  ᐃᒡᓗᓕᒑᕐᔪᒃ ᐱᖁᑎᒃᑯᕕᒋᔭᐅᖃᑦᑕᓚᐅᕆᕗᖅ ᓱᓕ 1950−ᖏᓐᓄᑦ ᑎᑭᑦᑐᒍ.  ᒫᓐᓇ ᐃᓚᒋᔭᐅᓕᖅᑐᖅ ᓄᓇᕗᒥ ᒥᑭᓛᖑᓪᓗᓂ ᓄᓇᓕᒃ, ᐃᒡᓗᓕᒑᕐᔪᒃ ᕼᐊᒻᓚᕈᓚᐅᖅᓯᒪᔪᖅ 1980−ᖏᓐᓂ.  ᕼᐊᒻᓚᒃᑯᑦ ᐊᑐᐃᓐᓇᐅᒪᑎᑦᑎᓲᑦ ᐊᒥᓱᕈᓘᔭᕐᓂᑦ ᐊᑐᖅᑕᐅᖃᑦᑕᖅᓯᒪᔪᑐᖃᐃᑦ ᑐᑭᓯᒋᐊᕈᑎᖏᓐᓂᑦ, ᐊᔾᔨᙳᐊᖑᓪᓗᑎᑦ ᑎᑎᕋᖅᓯᒪᔪᖃᐅᖅᑐᑎᓪᓗ, ᐃᑭᐊᖅᑭᕕᖓᓃᑦᑐᑦ (http://www.chesterfieldinlet.net/chester_then.htm).

ᓄᓇᕗᑦ ᒐᕙᒪᖏᑕ (GN) ᐃᖅᑲᓇᐃᔭᖅᑏᑦ ᑐᑭᓯᒋᐊᕐᕕᖓ ᖃᕋᓴᐅᔭᒃᑯᑦ ᐱᐅᔪᒻᒪᕆᖕᓂᒃ ᓱᓇᒃᑯᑖᖃᐅᖅᑐᖅ ᐊᑐᖅᑕᐅᖃᑦᑕᖅᓯᒪᓂᖓᑕ ᓄᓇᕗᑉ ᐊᒻᒪᓗᑦᑕᐅᖅ ᓇᓗᓇᐃᔭᖅᓯᒪᔪᖃᐅᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ ᐊᑐᖃᑦᑕᕐᓂᑯᒥᓂᖏᓐᓂᑦ ᐊᒻᒪᓗ ᐅᖃᖅᓯᒪᓪᓗᑎᑦ ᖃᓄᖅ ᐃᓄᐃᑦ ᐃᓕᖅᑯᓯᖏᑕ ᑐᙵᕕᖏᑦ ᐊᑐᓕᖅᑎᑕᐅᖃᑦᑕᓕᕐᒪᖔᑕ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐱᔨᑦᑎᕋᕈᖏᓐᓄᓪᓗ.  ᖃᐅᔨᓴᖅᑕᐅᖁᕙᕗᑦ ᑖᓐᓇ ᖃᕋᓴᐅᔭᒃᑰᖓᔪᖅ ᐊᑐᐃᓐᓇᐅᒪᓕᕐᒥᒍᓂ ᐋᖅᑭᓱᖅᑕᐅᔭᕇᕈᓂ, ᒫᓐᓇᓂ ᑕᑯᓂᐊᕈᓐᓇᖅᑕᐃᑦ ᓄᓇᕗᑦ ᒐᕙᒪᖏᑕ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖓ. http://www.gov.nu.ca/iu

ᐃᓕᖅᑯᓯᖅ, ᐅᖃᐅᓯᖅ ᐊᒻᒪᓗ ᓄᓇᓕᖕᒥᑦ ᐃᓅᓯᖅ: 

ᐃᒡᓗᓕᒑᕐᔪᖕᒥᐅᑦ ᐱᖅᑯᓯᑐᖃᖅᑎᒍᑦ ᓱᓕ ᐃᓅᓯᖃᕐᒪᑕ ᐊᖑᓇᓱᖃᑦᑕᖅᑐᑦ ᐃᖃᓪᓕᐊᐸᑦᑐᓪᓗ ᖃᐅᑕᒫᑦ ᐃᓅᓯᕆᔭᐅᓪᓗᓂ.  ᓴᖅᑭᔮᖅᑐᓂ ᐃᓕᖅᑯᓯᖓ ᓴᙱᔫᓂᖓᓂᒃ, ᓄᓇᓕᒻᒥᐅᑦ ᐊᕐᓇᖏᑦ ᒥᖅᓱᓲᑦ ᖁᓕᑦᑕᐅᔭᓂᑦ, ᐊᒡᒐᒻᒥᓄᑦ ᒥᖅᓱᓲᖑᓪᓗᑎᑦ ᐳᐊᓗᖕᓂᑦ ᐊᒻᒪᓗ ᑲᒥᖕᓂᑦ ᐅᑭᐅᖅᓯᐅᑎᕆᓂᐊᖅᑕᖏᓐᓂᒃ ᐅᖅᑰᔪᓂᑦ ᐃᓚᒥᓄᑦ ᓴᓇᓪᓗᑎᑦ.  ᐃᓄᒃᑎᑑᖅᑐᒡᒍᑕᐅᕗᑦ ᓄᓇᓕᒻᒥ.  ᐃᒪᓐᓇᐅᔪᑦ, 85%−ᖏᑕ ᐃᓄᖏᑦ ᐃᓄᒃᑎᑐᑦ ᐅᖃᐅᓯᓪᓗᐊᑕᖃᕐᓂᕋᖅᐳᑦ, 97%−ᖏᑦ ᐃᓄᐃᑦ ᖃᓪᓗᓇᐅᔭᓲᖑᓪᓗᑎᑦ.  ᐅᖃᖅᓯᒪᒐᓗᐊᖅᑐᑎᑦ ᖃᓪᓗᓈᑎᑐᑦ ᐅᖃᕈᓐᓇᕐᓂᖏᓐᓂᑦ, ᑭᓯᐊᓂᓕ 90%−ᖑᔪᑦ ᐃᓄᒃᑎᑐᑦ ᐅᖃᓪᓚᓲᖑᓂᕋᖅᑐᑦ ᐊᖏᕐᕋᒥᓂ.  ᖃᑦᑏᓐᓇᑯᓗᐃᑦ ᐃᓄᐃᑦ ᓄᓇᓕᒻᒥᐅᑦ ᐅᐃᕖᑎᑑᓲᖑᓂᕋᕐᒥᔪᑦ.

 

ᐃᒃᓯᕋᕐᔪᐊᑉ ᑐᒃᓯᐊᕐᕕᖓ ᓴᙱᔫᓯᒪᕗᖅ ᐃᒡᓗᓕᒑᕐᔪᒻᒥ ᐊᑖᑕ ᑐᖅᑯᑎᐅᓪ ᐊᒻᒪᓗ ᐊᑖᑕ ᓕᕙᓛᓐᒃ ᐋᖅᑮᓚᐅᖅᓯᒪᒻᒪᑎᓂᒃ ᑐᒃᓯᐊᕐᕕᒻᒥ ᐃᒃᓯᕋᕐᔪᐊᒃᑯᓐᓄᑦ 1912-ᒥ.  ᑐᑦᑕᕐᕕᐅᓗᐊᓕᓚᐅᖅᓯᒪᔪᖅ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖓᓂ ᖃᓄᐃᓕᐅᕈᓘᔭᕐᕕᐅᓪᓗᓂ ᑕᓯᐅᔭᕐᔪᐊᕐᒥ, ᑕᒪᐃᓐᓂᓕᒫᖅ ᓄᓇᓕᐅᔪᑦ ᐃᒃᓯᕋᕐᔪᐊᖑᓕᖅᑐᑎᑦ.  ᓄᑐᕆ ᑖᒻ ᑎ ᓚ ᑎᓕᕗᕌᓐᑎ ᑐᒃᓯᐊᕐᕕᑑᕗᖅ ᐃᒡᓗᓕᒑᕐᔪᒻᒥ.(http://www.arcticomi.ca/2chesterfield.html).

 

ᐃᒡᓗᓕᒑᕐᔪᖕᒥᐅᑦ ᐃᓄᖏᑦ ᒪᒃᑯᓛᖑᖃᑕᐅᕗᑦ ᓄᓇᕗᒥ.  2011-ᒥ ᑭᓪᓕᓯᓂᐊᖅᑕᐅᓪᓗᑎᑦ 35 ᐃᓕᓐᓂᐊᓕᓵᖅᑐᑦ ᓱᕈᓯᓛᖑᓚᐅᖅᐳᑦ ᐊᒻᒪᓗ 95 ᒥᑭᔫᑕᐅᓂᖅᓴᐃᑦ ᐃᓕᓐᓂᐊᕆᐊᓲᑦ ᓱᕈᓰᑦ, 42%−ᕆᓕᖅᑐᓂᒋᑦ ᐊᒥᓲᓂᖏᑦ ᐃᓄᐃᑦ ᐅᑭᐅᓖᑦ 18−ᓂᑦ ᑐᖔᓂ.  ᐊᒥᓲᓂᖅᓴᒐᓛᖑᕗᑦ ᐳᓴᓐᑎᑎᒍᑦ ᐃᓐᓇᐃᑦ ᐊᒥᓲᓂᖏᑦ (6%) ᐅᑭᐅᓖᑦ 65-ᓂᑦ ᐅᖓᑖᓄᓪᓗ ᐃᒡᓗᓕᒑᕐᔪᒻᒥ ᐊᒥᓱᓂᑦ ᓄᓇᕗᑉ ᓄᓇᓕᖏᑦ ᑕᐃᒪᐃᙱᑎᓪᓗᒋᑦ.  ᑎᒥᒃᑯᑦ ᐊᔪᕈᑎᓖᑦ ᓇᔪᒐᖓ ᑕᐃᑲᓃᓐᓂᖓᓄᖅᑲᐃ ᐱᔾᔪᑎᖃᖅᑐᖅ.  ᐅᑭᐅᓕᒃᑕᖃᙱᓚᖅ 80−ᓂᑦ ᐅᖓᑖᓄᓪᓗ ᐃᒡᓗᓕᒑᕐᔪᖕᒥ.

ᑮᓇᐅᔾᔭᒃᓴᕈᑕᐅᔪᑦ: 

ᐃᒡᓗᓕᒑᕐᔪᑉ ᑮᓇᐅᔭᓕᐅᕈᓐᓇᕐᓂᖓ ᓄᓇᓕᓐᓃᙶᓗᐊᖅᑐᖅ ᐊᒻᒪᓗ ᓂᐅᕕᕐᕕᒻᒥ ᐱᔨᑦᑎᕋᕈᑎᓂᓪᓗ ᑕᐃᑲᙶᓗᐊᙳᐊᖅᑐᖅ ᓄᓇᓕᒻᒥᐅᓄᑦ.  ᐊᒥᓱᑦ ᐃᓄᐃᑦ ᐊᖑᓇᓱᓲᖑᒻᒪᑕ ᓱᓕ.  ᓂᐅᕕᕐᕕᒃᓴᐅᒐᓗᐊᖅ ᐃᖃᓗᓕᕆᕕᖓᓂ, ᐊᒻᒪᓗ ᐃᖃᓗᒃᐱᒃ ᐃᖃᓗᓕᕆᕕᖓᓂᒃ ᐃᖃᓗᓕᕆᓲᑦ.  ᑮᓇᐅᔭᓕᐅᕋᓱᐊᖅᑐᑎᑦ ᐃᖃᓗᒐᓱᐊᓲᑦ ᔫᓂᒥ ᐱᒋᐊᖅᑐᒍ ᐊᒻᒪᓗ ᓯᑏᕝᕙᕈᕋᓱᐊᕐᓂᖓᓂᒃ.  ᐊᐅᒪᑕᐅᕗᖅ ᓄᓇᓕᓐᓂ ᐊᕿᒡᒋᖅ ᐆᒪᔪᕐᓂᐊᖅᑎᒃᑯᑦ ᑲᑐᔾᔨᖃᑎᒌᖏᓐᓄᑦ.  ᐃᒡᓗᓕᒑᕐᔪᒃ ᒐᕙᒪᒃᑯᓐᓄᑦ ᐊᓪᓚᕝᕕᖃᕐᕕᐅᙱᑦᑐᖅ ᐊᒥᓱᓂᑦ ᓄᓇᕗᑦ ᓄᓇᓕᖏᓐᓂ ᑕᐃᒪᐃᓐᓂᖅᓴᐅᓲᖑᓪᓗᑎᑦ.  ᑭᓯᐊᓂᓕ, ᕼᐊᒻᓚᒃᑯᑦ ᑮᓇᐅᔭᓕᕆᔨᖃᑦᑎᐊᖅᑐᑦ ᐃᖅᑲᓇᐃᔮᓖᑦ ᐸᕐᓇᐅᑎᓕᐅᖅᑐᑎᑦ ᐃᑲᔪᖅᑐᐃᓇᓱᐊᖅᑐᑎᑦ ᓄᓇᓕᓐᓂ ᐊᖑᓇᓱᓐᓂᕐᒧᑦ ᐃᖃᓗᒐᓱᐊᕐᓂᒧᓪᓗ ᑮᓇᐅᔭᓕᐅᕈᑎᖃᕋᓱᐊᖃᑦᑕᕐᓂᐊᖅᑐᑎᑦ, ᕿᓂᓲᖑᓪᓗᑎᓪᓗ ᑮᓇᐅᔭᓕᐅᕐᕕᒃᓴᐅᒐᔭᖅᑐᓂᑦ, ᐳᓚᕋᖅᑐᓕᕆᓂᕐᒥᒃ ᐊᑐᕐᔫᒥᑎᑦᑎᓇᓱᐊᓲᑦ, ᐊᒻᒪᓗ ᐸᐸᑦᑎᓲᑦ ᐃᒡᓗᓕᒑᕐᔫᑉ ᐊᑐᖃᑦᑕᕐᓂᑯᑐᖄᓗᖏᓐᓂᑦ ᐊᒻᒪᓗ ᐱᖅᑯᓯᑐᖃᖅᑎᒍᑦ ᖃᐅᔨᒪᔭᐅᔪᓂᑦ.  ᐅᖃᖅᓯᒪᓂᖏᑦ ᓇᓂᔭᐅᔪᓐᓇᖅᑐᑦ ᐅᖃᓕᒫᖅᑕᐅᓗᑎᑦ ᕼᐊᒻᓚᒃᑯᑦ ᐃᑭᐊᖅᑭᕕᖓᓂ.

 

ᐊᒥᓱᑦ ᓄᓇᕗᑉ ᓄᓇᓕᖏᓐᓂ ᑕᐃᒪᐃᒻᒥᒻᒪᑕ, ᑮᓇᐅᔭᒃᑯᕕᖃᙱᑦᑐᖅ ᐃᒡᓗᓕᒑᕐᔪᒃ, ᑮᓇᐅᔭᓪᓚᑦᑖᓪᓗ ᐊᒥᒐᖅᓯᓲᖑᓪᓗᑎᑦ.  ᓄᐊᑐᓐ ᓂᐅᕕᕐᕕᒃ, ᐊᒻᒪᓗ ᐱᑦᓯᐅᓛᖅ ᑯᐊᐸᒃᑯᑦ “ᑮᓇᐅᔭᓕᕆᔪᓐᓇᕐᒥᔫᒐᓗᐊᑦ”, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖃᕐᕕᒋᒍᓐᓇᖅᑐᒋᑦ ᓂᐅᕕᕐᕕᒃᑯᑦ, ᓯᒃᑮᕐᕕᒃᓴᐅᓪᓗᑎᑦ, ᐊᓯᖏᓪᓗ.  ᑮᓇᐅᔭᓂᑦ ᐲᖅᓯᕖᑦ ᐊᑐᐃᓐᓇᐅᒪᕗᑦ ᓄᐊᑐᓐ ᓂᐅᕕᕐᕕᒻᒥ, ᖃᑦᑏᓐᓇᐅᒐᓗᐊᓂᑦ ᑮᓇᐅᔭᖅᑕᖃᓲᖑᓪᓗᓂ.  ᑕᒪᐅᙵᕆᐅᕋᑖᖅᑐᑦ ᖃᕋᓴᐅᔭᒃᑯᑦ ᑮᓇᐅᔭᓕᕆᔪᓐᓇᖁᔭᐅᕗᑦ ᐊᒻᒪᓗ ᖃᕋᓴᐅᔭᒃᑯᑦ ᐊᑭᓕᖅᓱᐃᔪᓐᓇᕐᓗᑎᑦ, ᐱᓗᐊᖅᑐᒥᒃ ᓯᓚᕈᔫᑎᓪᓗᒍ ᐊᒻᒪᓗ ᑎᑭᕝᕕᒃᓴᐅᒍᓐᓃᓲᖑᒻᒪᑦ ᑎᑎᖅᑲᓂᐊᕐᕕᑯᓐᓄᑦ.

ᐆᒪᔪᐃᑦ: 

ᒪᓕᑦᑐᒋᑦ ᑕᓪᓕᓂᖏᑦ ᐊᕐᕌᒍᒧᑦ, ᑐᒃᑐᐃᑦ ᑕᑯᔭᐅᔪᓐᓇᓲᑦ ᐅᖓᓯᓐᓂᓕᒻᒥᒃ ᐃᑲᕐᕋᒥᒃ ᑎᑭᓐᓇᓱᐊᕐᓗᒋᑦ ᓄᓇᓕᑉ ᓯᓚᑖᓄᑦ.  ᐃᓄᐃᑦ ᐃᖃᓗᒐᓱᐊᓲᑦ ᐃᖃᓗᒃᐱᓂᑦ ᐃᕕᓵᕈᓂᓪᓗ ᑕᓯᕐᓂᑦ.  ᐅᐱᕐᖔᒃᑯᑦ, ᓇᑦᑎᖃᓲᑦ, ᐅᒡᔪᑦ ᐊᒻᒪᓗ ᖃᐃᕈᓕᓂᑦ ᓯᓈᓂ ᐃᑲᕐᕋᑉ ᐊᕝᕙᐸᓗᖓ ᐊᑯᓂᐅᓂᖓ ᐅᐸᒐᓱᐊᕐᓗᒍ.  ᐊᒃᑑᕝᕙᒥ ᓄᕖᕝᕙᒥᓗ ᐊᒥᓱᑦ ᓇᓄᐃᑦ ᑕᒪᐃᓈᓲᑦ ᐊᒻᒪᓗ ᐃᓛᓐᓂᒃᑯᑦ ᓄᓇᓕᓐᓅᖅᑐᒻᒪᕆᐅᕙᑦᑐᑎᑦ ᑕᒫᓃᖁᔭᐅᙱᒃᑲᓗᐊᖅᑐᑎᑦ!  ᕼᐊᒻᓚᖓᑕ ᐃᑭᐊᖅᑭᕕᖓ ᐱᐅᔪᒻᒪᕆᖕᓂᒃ ᓄᓇᓕᓐᓂ ᓄᓇᓂ ᐱᕈᖅᑐᓂᑦ ᑐᑭᓯᒋᐊᕈᑎᓕᒃ ᐊᒻᒪᓗ ᐆᒪᔪᖏᓐᓂᑦ (http://www.chesterfieldinlet.net/wildlife.htm)

ᐅᖃᓕᒫᑲᓐᓂᕐᓃᑦ : 
  • ᕕᐊᓇᑦ, ᔮᓐ & ᓲᓴᓐ ᕉᓕ, ᐋᖅᑮᒋᐊᕆᔩᑦ.  ᐅᖃᓗᕋᐃᑦ: ᐅᓂᒃᑲᐅᓯᑐᖃᖏᑦ ᓄᓇᕗᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2004.
  • ᑳᑉᓚᓐ, ᐃ.  ᑕᑦᓕ: ᑲᑉᓚᓘᒃ: ᐊᖓᔪᖅᑳᖅ ᑕᐅᖅᓰᔨ, ᕼᐊᑦᓴᓐ ᕙᐃ ᑲᒻᐸᓂᒃᑯᑦ, 1923-39.  ᕕᓂᐱᒡ: ᕙᑦᓴᓐ & ᑕᐃᔪᕐ, 1989.
  • ᑎᕙ, ᒥᐊᕆᐊᒻ, ᐋᖅᑭᒋᐊᖅᓯᒪᔪᑦ. ᓄᓇᕘᒥ ᒥᒃᓵᓄᑦ ᐅᖃᓕᒫᒐᕋᓛᖅ: ᑲᓇᑕᑉ ᐅᑭᐅᖅᑕᖅᑐᒥ ᐊᐅᓪᓚᕐᓂᖅ.  ᐃᖃᓗᐃᑦ: ᐊᔮᔭ ᓂᐅᕕᐊᒃᓴᓕᕆᔨᒃᑯᑦ ᑐᓴᐅᒪᖃᑎᒌᑦᑐᓕᕆᔨᒃᑯᓪᓗ, 2004.
  • ᑐᕋᐃ, ᓗᐃ−ᔮᒃ: ᐃᓄᐃᑦ ᐅᖃᐅᓯᖏᑦ: ᐅᖃᐅᓰᑦ ᐋᖅᑭᓱᖅᓯᒪᓂᖏᑦ, ᖃᓄᐃᑦᑑᓂᖏᑦ ᐊᒻᒪᓗ ᐃᓅᓯᖏᑦ ᐅᑭᐅᖅᑕᖅᑐᒥ.  ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2010.
  • ᐄᐳᕐ, ᑐᕈᐊᑎ ᕼᐊᕐᓕ: ᐊᕐᕕᓂᐊᖅᑏᑦ ᐅᑭᐅᖅᑕᖅᑐᒦᑦᑎᓪᓗᒋᑦᒪᓐᑐᕆᐊᓪ & ᑭᖕᔅᑕᓐ: ᒪᓐᑐᕆᐊᓪ: ᒥᒋᐅᓪ−ᑯᐃᓐ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 1989.
  • ᕚᓴᑦ, ᕆᓇᐃ:  ᐃᓅᓯᖃᖁᓪᓗᑕ ᐊᒃᓱᕈᕐᓇᙱᑦᑐᒥᑦ: ᐃᓄᐃᑦ ᕿᑎᕐᒥᐅᑦ, 1550-1940 ᕕᓂᐱᒡ, ᒫᓂᑑᕙ: ᒫᓂᑑᕙ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ, 2001.
  • ᐃᓴᓐᒪᓐ, ᕕᐊᑎ ᑯᕙᔭᓯ.  ᐃᕙᓗᖏᑦ ᐊᓐᓇᐅᒪᔾᔪᑏᑦ: ᐃᓄᐃᑦ ᐊᓐᓄᕌᖏᑦ ᖃᓄᐃᑦᑑᖃᑦᑕᓚᐅᖅᓯᒪᓂᖏᑦ.  ᕚᓐᑰᕗᕐ: ᕗᕆᑎᔅ ᑲᓚᒻᐱᐊᒥ ᓯᓚᑦᑐᓴᕐᕕᕐᔪᐊᖓᓂ ᑎᑎᕋᖅᑕᒥᓃᑦ 1997.
  • ᒪᒃᑖᓄᓪᑦ, ᔮᓐ.  ᐅᑭᐅᖅᑕᖅᑐᑉ ᓯᓚᖓᐃᓄᐃᑦ ᐅᓪᓗᕆᐊᓂᓕᕆᓂᖏᑦ, ᐅᓪᓗᕆᐊᑦ ᐅᓂᒃᑳᖏᑦ ᐅᓂᒃᑳᖅᑐᐊᑐᖃᖏᓪᓗ ᐅᑉᐱᕆᔭᑦ.  ᐃᖃᓗᐃᑦ, ᓄᓇᕗᑦ & ᑐᕌᓐᑐ: ᓄᓇᕘᒥ ᖃᐅᔨᓴᖅᑏᑦ ᐊᒻᒪᓗ ᕈᐊᔭᓪ ᐋᓐᑎᐅᕆᔪ ᑕᑯᔭᒐᖃᕐᕕᒃ, 1998.
  • ᒪᒌ, ᕌᕗᑦ.  ᑭᖑᓪᓕᖅᐹᖅ ᑕᐅᑐᙳᐊᖅᑕᐅᓯᒪᓂᑯ: ᐃᓄᐃᑦ ᐊᑐᖃᑦᑕᕐᓂᑯᒥᓂᖏᑦ ᐅᑭᐅᖅᑕᖅᑐᒥ.  ᑐᕌᓐᑐ: ᑮ ᐳᐊᑐᕐ ᐅᖃᓕᒫᒐᓕᐅᖅᑏᑦ, ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 2004.
  • ᒧᐊᕆᓴᓐ, ᑕᐃᕕᑎ ᐊᒻᒪᓗ ᔪᐊᔾᔨᔅ−ᕼᕿᕗᑦ ᔪᒪᐃᓐ.  ᐃᓄᐃᑦ: ᐅᑭᐅᖅᑕᖅᑐᒥ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᑕᑯᓇᓪᓗᒋᑦ.  ᕼᐅᓪ, ᑯᐸᑭ: ᑲᓇᑕᒥ ᑕᑯᔭᒐᖃᕐᕕᕐᔪᐊᖅ ᓄᓇᕐᔪᐊᕐᒥ ᐃᓄᖏᓐᓂᑦ, 1995.
  • ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ.  ᐃᓄᐃᑦ ᐃᓕᖅᑯᓯᖓ: ᐃᓄᐃᑦ ᐃᓕᖅᑯᓯᖓᓄᑦ ᑐᑭᒧᐊᕈᑎᖏᑦ, ᐋᖅᑭᒋᐊᖅᑕᐅᓯᒪᔪᑦ ᐋᑐᕚ: ᐸᐅᖅᑑᑏᑦ ᐃᓄᐃᑦ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ, 2006. (http://www.uqar.ca/files/boreas/inuitway_e.pdf)
  •