You are here

ᓄᖅᑲᖓᓕᖅᑐᖓ ᐃᖅᑲᓇᐃᔭᕆᐊᖃᕐᓯᒪᔭᕐᓂᒃ ᓈᕆᓯᒪᓕᕋᒪ ᐃᓕᓴᐃᔨᐅᓂᕐᒧᑦ ᐊᒻᒪᓗ ᓇᓗᓇᐃᒃᑯᑕᖃᓚᐅᕐᓯᒪᓪᓗᖓ ᐋᓐᑎᐅᕆᐅᒥ. ᓱᒻᒪᑦ ᑭᖑᕝᕕᖅᑎᐅᒍᓐᓇᖏᓪᓚᖓ ᐃᓕᓴᐃᔨᐅᓗᖓ ᓄᓇᕗᒥ ᐊᒻᒪᓗ ᐊᑭᓕᖅᑕᐅᖃᑦᑕᕐᓗᖓ ᑭᖑᕝᕕᖅᑎᐅᕙᑦᑐᑦ−ᐃᓕᓴᐃᔩᑦ ᐊᑭᓕᕐᓱᖅᑕᐅᔾᔪᑎᒋᕙᑦᑕᖏᑕ ᐊᔾᔨᖏᓐᓂᒃ, ᐊᒻᒪᓗ ᓱᒻᒪᑦ ᓇᓗᓇᐃᒃᑯᑕᖅᑖᑲᓐᓂᕆᐊᖃᖅᑯᖓ ᑕᐃᒪᐃᖃᑦᑕᕈᒪᓂᐊᕈᒪ?

ᐃᓕᓴᐃᔨᓄᑦ ᓇᓗᓇᐃᒃᑯᑕᐃᑦ ᑲᓇᑕᐅᑉ ᑭᓪᓕᖃᕐᕕᖏᓐᓂ ᓄᓇᓕᕐᔪᐊᖑᓂᕐᓴᓂᑦ  / ᓄᓇᓕᕋᓛᖑᓂᕐᓴᓂᓪᓗ ᑲᒪᒋᔭᒐᐅᒻᒪᑦ, ᑕᒪᓐᓇ ᐱᔾᔪᑎᒋᓪᓗᒍ ᑲᒪᒋᔭᐅᖃᑦᑕᕐᓂᖏᑦ ᐊᔾᔨᒌᙱᒻᒪᑕ ᑲᓇᑕᐅᑉ ᑭᓪᓕᖃᕐᕕᖏᓐᓂ ᓄᓇᓕᕐᔪᐊᖑᓂᕐᓴᓂᑦ / ᓄᓇᓕᕋᓛᖑᓂᕐᓴᓂᓪᓗ ᐊᑐᓂᑦ. ᐃᖅᑲᓇᐃᔭᖃᑦᑕᕋᓗᐊᖅᑎᓪᓗᑎᑦ ᑭᖑᕝᕕᖅᑎᐅᓂᕐᒥᒃ ᐃᓕᓴᐃᔨᒧᑦ ᓄᓇᕗᒥ ᖁᕝᕙᓯᓐᓂᕐᓴᒥᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᔭᕇᕈᑎᑖᕐᓯᒪᙱᓪᓗᑎᑦ, ᑭᓯᐊᓂᓕ ᐊᑭᓕᕐᓱᖅᑕᐅᖃᑦᑕᕈᒪᓂᐊᕈᕕᑦ ᓇᓗᓇᐃᒃᑯᑕᓕᑦᑎᑐᑦ ᑭᖑᕝᕕᖅᑎᐅᖃᑦᑕᓂᕐᒥᒃ ᐃᓕᓴᐃᔨᒧᑦ ᐱᓇᓱᐊᕈᑕᐅᕙᑦᑐᒥᒃ ᐊᑐᕆᐊᖃᕋᔭᖅᑐᑎᑦ. ᐊᑏ ᐅᖃᕐᕕᖃᕐᓂᐊᖅᑯᑎᑦ ᐃᓕᓴᕕᒻᒥ ᐊᖏᔪᖅᑳᕐᒥᒃ, ᖃᐅᔨᑎᒃᑲᔭᕐᖔᑎᑦ ᐃᖅᑲᓇᐃᔭᖅᑐᓕᕆᔨᓂᑦ ᐊᕕᑦᑐᕐᓯᒪᕕᒻᒥ ᐃᓕᓴᕕᓕᕆᔨᓄᑦ/ CSFN (ᐊᕕᑦᑐᕐᓯᒪᕕᒻᒥ ᐃᓕᓴᕕᓕᕆᔨᓄᑦ ᐅᕝᕙᓘᓐᓃᑦ ᑲᑐᔾᔨᖃᑎᒌᖏᓐᓄᑦ ᐅᐃᕖᑦ ᐃᓕᓴᕕᖓᓐᓄᑦ ᓄᓇᕗᒥ), ᑐᓂᓯᔭᐅᒐᔭᕋᕕᑦ ᑖᒃᑯᓇᙵᑦ ᐸᐃᑉᐹᓂᑦ ᓇᓗᓇᐃᒃᑯᑕᖅᑖᕈᑎᒋᔪᓐᓇᖅᑕᖏᓐᓂᒃ ᐃᕝᕕᑦ.

ᐃᓕᓴᐃᔨᐅᓂᕐᒧᑦ ᓇᓗᓇᐃᒃᑯᑕᖅ ᐊᑑᑎᖃᕐᓂᓴᐅᒻᒪᑦ ᐊᑭᓕᕐᓱᖅᑕᐅᓂᕆᓲᖏᑕ ᓴᓂᐊᓂ, ᐊᔅᓱᕈᐊᖃᕈᑕᐅᔭᕆᐊᖃᓲᖑᒻᒪᑦ ᐃᖅᑲᓇᐃᔭᖅᑎᐅᓗᓂ ᖃᐅᔨᓴᕐᓂᕐᒥᒃ ᖁᕝᕙᓯᓐᓂᖏᓐᓂᒃ ᐃᓕᓐᓂᐊᕐᓂᐅᑉ, ᐃᓕᓴᐃᖃᑦᑕᓂᕐᒧᑦ ᐊᔪᙱᓐᓂᖏᓐᓂᒃ, ᐃᓕᓴᐃᔨᐅᑉ ᐃᓕᓴᐃᔨᐅᒍᓐᓇᓪᓚᕆᓐᓂᖓᓂᒃ ᐊᓯᖏᓐᓂ ᑲᓇᑕᐅᑉ ᑭᓪᓕᖃᕐᕕᖏᓐᓂ ᓄᓇᓕᕐᔪᐊᖑᓂᕐᓴᓂᑦ / ᓄᓇᓕᕋᓛᖑᓂᕐᓴᓂᓪᓗ ᐃᓕᓴᐃᔨᐅᓂᕐᒧᑦ ᓇᓗᓇᐃᒃᑯᑕᕐᓂᕐᒧᑦ ᑲᑐᔾᔨᖃᑎᒌᓂᑦ ᐊᒻᒪᓗ ᐱᕋᔭᔅᓯᒪᓂᑰᙱᓪᓗᑎᒃ ᐅᕝᕙᓘᓐᓃᑦ ᐃᓂᖅᑎᖅᑕᐅᓂᑰᙱᓪᓗᑎᒃ ᐃᓕᓴᐃᔨᐅᓗᑎᒃ ᐊᓯᖏᓐᓂᒃ ᐊᐅᓚᑦᑎᕕᐅᔪᓂᑦ, ᐅᕝᕙᓘᓐᓃᑦ ᐃᓕᓴᐃᔨᓪᓚᕆᐅᓂᕐᒧᑦ ᓇᓗᓇᐃᒃᑯᑕᖏᑦ ᓄᖅᑲᖅᑎᑕᐅᓂᑰᙱᓪᓗᑎᒃ. 

ᑭᖑᕝᕕᖅᑎᐅᕙᑦᑐᑦ ᐃᓕᓴᐃᔩᑦ ᒪᓕᖃᑦᑕᕆᐊᖃᕐᖓᑕ ᐊᔾᔨᖏᓐᓂᒃ ᐱᓇᓱᐊᕈᑎᒋᓲᖏᓐᓂᒃ ᐃᓕᓴᐃᔨᐅᓂᕐᒧᑦ ᓇᓗᓇᐃᒃᑯᑕᖅᑖᕋᓱᓐᓂᕐᒧᑦ ᐃᓕᓴᐃᔩᑦ ᑳᓐᑐᓛᒋᓲᖏᑎᑐᑦ. ᑕᕝᕙ ᓇᓕᖅᑲᖓ ᑎᒥᖃᑎᒌᖏᓐᓂ ᐃᓕᓴᐃᔨᓄᑦ−ᑭᖑᕝᕕᖅᑎᐅᖃᑦᑕᓂᕐᒧᑦ ᐊᑐᐊᒐᖓᑕ NTA's sub-teacher guide ᑐᑭᓯᑦᑎᐊᒃᑲᓐᓂᕈᒪᒍᕕᑦ.